Lesona 159
Moronae 10:1–7, 27–29
Faatomuaga
Na uunaia e Moronae sa Lamana ma isi tagata uma o le a faitau i lana molimau e fesili atu i le Atua e faamaonia le moni o ana upu. Na ia aoao atu faapea o le a faaali atu e le Atua le moni o le Tusi a Mamona ma le moni o Iesu Keriso e ala atu i le mana o le Agaga Paia. Na folafola mai foi e Moronae o le a ia faafeiloaia i tatou i le nofoa faamasino o le Atua, lea o le a faamaonia mai ai ai e le Alii lava Ia le moni o upu a Moronae. (Manatua: Atonu e te manao e faatotoe se taimi i le faaiuga o le lesona mo tamaiti e faasoa mai ai a latou molimau o le Tusi a Mamona. Ina ia mautinoa e lava le taimi , ia filifili ma le agaga tatalo vaega o lenei lesona o le a sili le aoga i au tamaiti aoga.)
Fautuaga mo le Aoaoga
Moronae 10:1–7
Ua apoapoaiina i tatou e Moronae ia maua se molimau o le Tusi a Mamona ma Iesu Keriso
A o lei amataina le lesona, tusi i le laupapa se ata o se faitotoa faaofuofu faatasi ma se ma’a’au’au (atonu e te manao e faaaoga le ata na faaaoga i le lesona 4). Amata le lesona i le faasino atu o le ata.
-
O le a le faamoemoega o le ma’a’au’au i se faitotoa faaofuofu?
-
O le a le sootaga a se ma’a’au’au ma le Tusi a Mamona? (Afai e manaomia e tamaiti aoga le fesoasoani i le taliina o lenei fesili, atonu e te manao e fautua atu latou te faitau le saunoaga a le Perofeta o Iosefa Samita i le parakalafa lona ono o le faatomuaga o le Tusi a Mamona.)
Valaaulia tamaiti aoga e faitau le leoa le parakalafa mulimuli o le faatomuaga o le Tusi a Mamona. A o lei faitauina, fai atu ia i latou e vaai mo upumoni e tolu e mafai e se tagata ona oo ina iloa e ala i le mauaina o se molimau o le Tusi a Mamona.
-
E pei lava o le faitotoa faaofuofu e taofia faatasi e le ma’a’au’au, o a isi vaega o a tatou molimau e faamalosia e ala i le mauaina o se molimau o le Tusi a Mamona?
-
Aisea e taua ai mo tagata taitoatasi ona maua sana ia lava molimau i le Tusi a Mamona?
Aotele Moronae 10:1–2 e ala i le faamatalaina atu faapea e tusa o le 1,400 tausaga a o lei maua e le Perofeta o Iosefa Samita papatusi auro, na faaiuina ai e Moronae le talafaamaumau a lona tama e ala i le tusiaina o lana apoapoaiga mulimuli ia i latou o le a mauaina le Tusi a Mamona i aso e gata ai. (E mafai foi ona fesoasoani le faamatala atu o le upu apoapoai o lona uiga o le matuai faamalosia pe uunaia se isi. O lenei upu e valu taimi o loo maua ai i Moronae 10.)
Faamatala atu faapea na apoapoai atu Moronae i tagata uma e mauaina le Tusi a Mamona ina ia saili se molimau o lona moni ma lona paia. Valaaulia tamaiti aoga e faitau Moronae 10:3–4 le leoa, ma vaai mo fuaitau ua faamatala mai ai mea e manaomia mo le mauaina o se molimau o le Tusi a Mamona e ala mai le Agaga Paia. Atonu e te manao e fautua atu latou te faailoga fuaitau a o latou mauaina. A o lipoti mai e tamaiti aoga fuaitau ua latou faailoaina, tusi fuaitau i le laupapa. O a latou tali e tatau ona aofia ai mea nei:
“Faitauina nei mea”
“Manatua le alofa mutimutivale tele o le Alii”
“Manatunatu i ai i o outou loto”
“Ole atu ma le loto faamaoni, ma le manatu moni i ai, ma le faatuatua ia Keriso”
Ina ia fesoasoani i tamaiti aoga ia malamalama atili i le mea e tatau ona fai e se tasi e maua ai se molimau mai le Agaga Paia faapea o le Tusi a Mamona e moni, faaaoga manatu faafaiaoga e talanoaina ai mea manaomia taitasi na aoao mai e Moronae.
1. “Faitauina nei mea”
Na valaaulia e Moronae i tatou ia “faitauina nei mea,” po o le faitau le Tusi a Mamona. Valaaulia tamaiti aoga e faitau leotele le tala lenei na faamatalaina e Elder Tad R. Callister o le Korama a Fitugafulu e uiga i le ala na faamanuiaina ai se tasi o tamaitai talavou mai le faitauina o le Tusi a Mamona:
“Se tamaitai e 14-tausaga le matua … fai mai o ia sa la talanoa ma se tasi o ana uo i le aoga e uiga i mea tau lotu. Sa fai atu lana uo ia te ia, ‘O le a le lotu e te auai ai?’
“Sa tali atu o ia, ‘O Le Ekalesia a Iesu Keriso o le Au Paia o Aso e Gata Ai, po o le Mamona.’
“Sa tali ane lana uo, ‘ou te iloa le ekalesia lena, ma ou te iloa e le moni.’
“‘E faapefea ona e iloa?’ na tali atu ai.
“‘Aua,’ o le tala lea a lana uo, ‘sa ou sailiili i ai.’
“‘Na e faitauina le Tusi a Mamona?’
“‘Leai,’ o le tali mai lea. ‘Ou te lei faitaua.’
“Ona tali atu lea o lenei tamaitai talavou lelei, ‘O lona uiga la e te lei sailiili i lau ekalesia, aua ua ou faitauina itulau uma o le Tusi a Mamona ma ua ou iloa ai e moni’” (“O Le Tusi a Mamona —o se Tusi Mai le Atua,” Ensign po o le Liahona, Nov. 2011, 74).
-
Aisea e avea ai le faitauina o le Tusi a Mamona ma ki i le mauaina o se molimau o lona moni?
-
Na faapefea ona faamalosia lau molimau o le Tusi a Mamona ma upumoni o loo ia aoaoina e ala i le faitauina i lenei tausaga?
2. “Manatua le alofa mutimutivale tele o le Alii”
Na aoao mai Moronae o i latou e faitau i le Tusi a Mamona ma mananao ia iloa lona moni e tatau ona “manatua le alofa mutimutivale tele o le Alii” (Moronae 10:3). Faamatala atu faapea o le iloaina ma manatua taimi o le alofa mutimutivale tele o le Alii e mafai ona faamaluluina ai o tatou loto ma saunia i tatou e lagona le uunaiga o le Agaga Paia. O le tasi uiga o le upu alofa mutimutivale tele o le agaalofa. Valaaulia tamaiti aoga e manatunatu mo sina minute i se taimi na latou maua ai se aafiaga o le alofa mutimutivale po o le agalelei ia i latou pe na iloaina foi i le olaga o se tasi latou te iloa.
Valaaulia tamaiti aoga e faasoa mai faataitaiga o le alofa mutimutivale o le Alii i le Tusi a Mamona na taua ia i latou.
-
E mafai faapefea i lou manatu ona fesoasoani le alofa mutimutivale o le Alii i se tasi ia talia le Agaga Paia ma maua se molimau o le Tusi a Mamona?
-
O a faamaoniga o le alofa mutimutivale o le Alii ua e molimauina i lou olaga?
-
O a ni lagona ua e maua a o manatua le alofa mutimutivale o le Alii i lou olaga?
3. “Manatunatu [i le alofa mutimutivale o le Alii] i o outou loto”
Na aoao mai Moronae e tatau ona tatou manatunatu i le alofa mutimutivale o le Alii i o tatou loto. Faamatala atu o le manatunatu i auala na alofa mutimutivale ai le Alii i isi ma i tatou lava e saunia ai i tatou e talia le uunaiga a le Agaga Paia. Ina ia fesoasoani i tamaiti aoga ia malamalama pe faapefea ona tupu lenei mea, valaaulia tamaiti aoga e faitau le faamatalaga lenei a Elder Marvin J. Ashton o le Korama a Aposetolo e Toasefululua:
“Ua fai mai lomifefiloi, o le mafaufau o lona uiga o le manatunatu mamafa, manatunatu loloto, ma le mauai ma le loto i ai. …
“O le mafaufau, e tuu atu ai e i tatou i le agaga le avanoa e faagaeetia ai ma taitai. O le mafaufau, o se sootaga malosi lea i le va o le loto ma le mafaufau. A o tatou faitauina tusitusiga paia, e ootia o tatou loto ma mafaufau. Afai tatou te faaaoga le meaalofa e mafaufau ai, e mafai ona tatou faaaoga upumoni ia e faavavau ma iloa ai le ala e mafai ona tatou faaaogaina ai ia tatou mea e fai i aso taitasi. …
“O le mafaufau, o se gaoioiga alualu i luma faalemafaufau. O se meaalofa sili ia i latou ua latou aoao e faaaoga. Tatou te maua le poto, ma le malamalama, ma le mea aoga pe afai tatou te faaaoga le meaalofa o le mafaufau” (“E Tele Meaalofa,” Liahona, Ian. 1988, 19).
-
A o e suesueina le Tusi a Mamona, o anafea na fesoasoani ai le manatunatu loloto ia te oe e lagona le uunaiga a le Agaga Paia?
-
O le a se mea e mafai ona tatou faia ina ia faaauau ai pea le manatunatu loloto a o tatou suesueina tusitusiga paia ?
4. “Ole atu ma le loto faamaoni, ma le manatu moni i ai, ma le faatuatua ia [Iesu] Keriso”
Na aoao mai Moronae afai tatou te mananao ia maua se molimau o le moni o le Tusi a Mamona, e tatau ona tatou ole atu i le Atua “faamaoni ma le manatu tonu i ai, o lona uiga ia latou faamoemoe ia [Iesu] Keriso.” Faamatala atu o le tatalo faamaoni ma le manatu tonu i ai o lona uiga ia tatou “faamoemoe e galulue e tusa ai ma le tali na [tatou] maua mai le Atua” (Talai Lau Talalelei: O se Taiala mo le Galuega Faafaifeautalai [2004], 111). Mafaufau e faasoa atu le tala lenei, lea na tatalo ai se alii ma le manatu moni i ai ia maua se molimau o le moni o le Tusi a Mamona:
“E masani lava ona ou tatalo ia iloa le mea sao, ae sa sili atu le pei o se mafaufauga masani nai lo se fesili faamaoni. Ona oo lea i se tasi po, na ou filifili e tatalo ma le ‘manatu moni i ai.’
“Na ou tau atu i le Tama Faalelagi na ou manao ia iloa o Ia ma ia avea ma se vaega o Lana Ekalesia moni. Na ou folafola atu: ‘Afai e te tau mai ia te au pe o Iosefa Samita o se perofeta moni ma pe moni le Tusi a Mamona, o le a ou faia soo se mea E te finagalo ou te faia. Afai o le Ekalesia a Iesu Keriso o le Au Paia o Aso e Gata Ai o le Ekalesia moni, o le a ou mulimuli ai ma e le toe fiu lava.’
“Ou te lei maua se faaaliga tulaga ese, ae sa ou lagonaina le filemu ma sa ou moe loa. O ni nai itula mulimuli ane, sa ou ala ae ai ma se manatu manino lelei: “O Iosefa Samita o se perofeta moni, ma e moni le Tusi a Mamona.” Sa o mai faatasi lea manatu ma se filemu e le mafaamatalaina. Sa ou toe moe, ae na ou toe ala ae mulimuli ane ma lena lava manatu ma le faalogoga lava e tasi.
“Mai lena taimi, ou te lei toe masalosalo lava o Iosefa Samita o se perofeta moni. Ou te iloa o le galuega moni lenei a le Faaola ma o le a tali mai le Tama Faalelagi ia tatou olega faamaoni” (Rodolfo Armando Pérez Bonilla, “O Le Auala Na Ou Iloa Ai” Liahona, Oke, 2011, 64).
Valaaulia tamaiti aoga e suesue Moronae 10:4 ma faailoa mai le mea o le a fai e le Atua mo i latou e mulimuli i le faagasologa ua otooto mai e Moronae.
-
O le a le mea ua folafola mai e Moronae ia i latou e saili se molimau o le Tusi a Mamona i le ala ua ia fautuaina mai?
-
O a auala e mafai ai e le Agaga Paia ona molimau mai ia i tatou i le moni o le Tusi a Mamona? (Ia mautinoa ua malamalama tamaiti aoga o le tele o faaaliga e le oo mai i se tulaga ofoofogia. A o mafai e nisi tagata ona maua aafiaga faaleagaga maoae, o le toatele o le a oo i se aafiaga e filemu ma maaleale, e pei o se lagona po o se faamautinoaga ma filemu. Atonu e te manao e faamatala atu faapea a o tatou suesue i tusitusiga paia, e mafai e le Agaga ona molimau mai i le moni o mea ua tatou faitauina. Ona, afai tatou te ole atu faapitoa lava ia iloa le moni o le Tusi a Mamona, o le a faamaonia mai e le Agaga molimau ua uma ona tatou maua.)
Valaaulia se tamaitiiti aoga e faitau leotele le Moronae 10:5–7. Fai atu i le vasega e faailoa mai isi mea na folafola mai e Moronae e mafai ona tatou iloa e ala mai le Agaga Paia. Tau atu o le Moronae 10:4–5 o se mau tauloto. Atonu e te manao e fautuaina tamaiti aoga e faailoga lenei fuaitau i se auala faapitoa ina ia mafai ai ona latou maua gofie.
-
O le a se mea e mafai ona tatou aoao mai Moronae 10:3–7? (E mafai e tamaiti aoga ona faaaoga nisi upu, ae e tatau ona latou faailoa mai le mataupu faavae lenei: Afai tatou te ole atu i le Atua i le faatuatua ma le manatu moni i ai, e mafai ona tatou maua se molimau o le Tusi a Mamona ma Iesu Keriso e ala mai i le Agaga Paia.)
Valaaulia tamaiti aoga e tusi i api e tusi ai faamatalaga po o api talaaga mo le suesueina o tusitusiga paia mea o le a latou faia ina ia maua ai ma faamalosia ai a latou molimau o le Tusi a Mamona. Fautuaina i latou e faaaoga le mataupu faavae na aoaoina e Moronae 10:4.
Moronae 10:27–29
Ua molimau mai Moronae o le a ia feiloai ma i tatou i le nofoa faamasino o le Atua
Valaaulia se tamaitiiti aoga e faitau leotele le Moronae 10:27–29. Fai atu i le vasega e mafaufau pe faapefea ona mafai ona latou tali atu i le fesili o loo maua i Moronae 10:27. Molimau atu o i latou ua mauaina le Tusi a Mamona o le a tali atu i le Atua i le auala na latou faaaoga ai le tusi.
Faatagaina se taimi ia lava i le faaiuga o lenei lesona e valaaulia ai tamaiti aoga e faasoa mai a latou molimau o le Tusi a Mamona. Mafaufau e fai atu la oe lava molimau o le Tusi a Mamona. Ia faamautinoa i tamaiti aoga afai latou te faaauau ona suesue i le Tusi a Mamona i o latou olaga atoa, o le a faateleina lo latou faatuatua ia Iesu Keriso ma Lana talalelei.
Mau Tauloto—Moronae 10:4–5
O tamaiti aoga o e taulotoina Moronae 10:4–5 o le a sili atu ona saunia e faasoa atu le savali o le Tusi a Mamona i isi. Tusi le savali i le laupapa, ma fai atu i tamaiti aoga e faitau faatasi leotele. Tape upu e ono, ona tuu atu lea i le vasega e toe faitau, ma faatumu upu ua misi a o latou faitau. Faaauau lenei faagasologa seia oo ina tape uma le fuaitau.
Tala ma Faamatalaga o Talaaga
Moronae 10:3. “Manatunatu i ai i o outou loto”
I le taua ai Moronae 10:3, na faamatalaina e Elder Gene R. Cook:
“O upu mulimuli e lima o le fuaiupu ua ofoina mai se aoaiga— ‘manatunatu i ai i o outou loto.’ O le a le uputomua i le ‘i ai’—le mea e tatau ona tatou manatunatu loloto i ai? O le ‘tele naua o le alofa mutimutivale o le Alii i le fanauga a tagata, mai le foafoaga o Atamu e oo lava i lalo seia oo mai i le taimi o le a tatou maua ai nei mea.’ E tatau ona tatou manatua le agalelei tele, le vaaiga mamao maoae, le lelei tele, le loto faamagalo o lo tatou Tama Faalelagi ia i tatou” (“Moroni’s Promise,” Ensign, Ape. 1994, 12).
O lenei apoapoaiga latalata i le faaiuga o le Tusi a Mamona ia manatua ma manatunatu i le alofa mutimutivale o le Alii o se faaiuga talafeagai i le folafolaga a Nifae faapea ‘O au, o Nifae, o le a ou faaali atu ia te outou le i ai o le alofa mutimutivale agamalu o le Alii i luga o i latou uma o e ua ia filifilia” (1 Nifae 1:20).
E faaopoopo atu i le manatunatu i le natura o le alofamutimutivale o le Alii, o i latou e faitau i le Tusi a Mamona e tatau ona manatunatu i upumoni faavavau latou te mauaina i totonu o ona itulau (tagai i le faatomuaga o le Tusi a Mamona).
Moronae 10:4. O le a faaalia e le Agaga Paia le moni o le Tusi a Mamona ia i latou o e e ole atu i le Atua i le faatuatua ma le “manatu moni i ai”
Na saunoa Elder Dallin H. Oaks o le Korama a Aposetolo e Toasefululua i le apoapoaiga a Moronae faapea ia tatou ole atu i le Atua ma le “manatu moni i ai” e faatatau i le moni o le Tusi a Mamona:
“E lei folafolaina mai e Moronae se faaaliga o le Agaga Paia ia i latou o e saili ia iloa le moni o le Tusi a Mamona mo mafuaaga faalemafaufau pe faaleaoaoga, e tusa lava pe latou te ‘ole atu ma se loto faamaoni.’” O le folafolaga a Moronae e mo i latou ua tuuto i o latou loto e usitai i le faaaliga o le Agaga Paia pe a maua. O tatalo e faaautu i se isi lava mafuaaga e leai se folafolaga aua e leo faia ‘ma le manatu moni i ai’”(Pure in Heart [1988], 19–20).
Moronae 10:27–29. O lo tatou faaolataga e faalagolago i le auala tatou te taliaina ai le Tusi a Mamona
Na faamamafa mai e Peresitene Ezra Taft Benson le taua o le Tusi a Mamona ina ua ia faalauteleina lenei apoapoaiga i tagata uma o le Ekalesia:
“Uso e ma tuafafine, ou te aioi atu ia te outou ma lo’u loto atoa, ia outou manatunatu mamafa i le taua o le Tusi a Mamona ia te oe lava ia faapea ma le Ekalesia atoa.
“Ua silia ma le 10 tausaga ua mavae, na ou faia ai le faaupuga lenei e uiga i le Tusi a Mamona. …
“‘ E tatau i tagata taitoatasi uma o le Au Paia ona aoao, ia avea lenei tusi e aoao ai i lona olaga. A le o lena o lona uiga ua tuuina atu lona lava agaga i le matautia ma le tetee atu nai lo le tuuina atu i le tulaga faaleagaga, ma ia maua le atamai i lona olaga atoa. O loo i ai le eseesega i se tagata liliu mai o le e fausia lona faavae ia Keriso, e ala i le Tusi a Mamona, ma tumau ai i lena ai uamea nai lo le tagata e na te le faapea’ (Liahona, Aok. 1975, i. 24).
“Ou te toe tuu atu ia upu ia te outou i le aso. Aua tatou te tumau i lalo o le faasalaga ma lona mamafa ma lona faamansinoga, i lo tatou manatu mama i lenei meaalofa silisili ma ofoofogia ua tuuina mai e le Alii ia i tatou. [Tagai MF&F 84:54–58.] Ae ia tatou maua folafolaga ua o faatasi ma le faatauaina o lenei tusi i o tatou loto” (“O Le Tusi a Mamona—O Le Maa’au’au o la Tatou Faatuatuaga,” Liahona, Ian. 1987, 8).