Alema 15–16

Faatomuaga

Ina ua uma ona laveai e le Alii ia Alema ma Amoleka mai le falepuipui, sa la o e talai i tagata o le laueleele o Saitoma. O iina sa la maua ai tagata na talitonu o e na tutulieseina mai Amonaea, e aofia ai Seseroma, o le na mafatia faaletino ma faaleagaga ona o ana agasala. Ina ua faailoa mai e Seseroma lona faatuatua ia Iesu Keriso, na faamaloloina o ia e Alema ma papatisoina o ia. Na faatuina e Alema le Ekalesia i Saitoma, ona ia toe fai mai ai lea faatasi ma Amoleka i Saraemila. I le faataunuuina o le valoaga a Alema, ua faaumatia e sa Lamana le nuu o Amonaea i le aso e tasi. E le gata i lea, na ave faatagataotaua e sa Lamana nisi o sa Nifae mai laueleele tuaoi. O le filifiliga e mulimuli i taitaiga faaperofeta a Alema, na toe maua ai e autau a sa Nifae ia tagata na avea faapagota ma tutuliese ai ia sa Lamana mai le laueleele. I le vaitaimi o le filemu, na faamalosia ai e Alema, Amoleka, ma le toatele o isi le Ekalesia i le laueleele atoa o sa Nifae.

Fautuaga mo le Aoaoga

Alema 15

Na faatuina e Alema le Ekalesia i Saitoma, ona toe fai mai ai lea faatasi ma Amoleka i Saraemila.

Ina ia fesoasoani i tamaiti e manatua le tagata autu ma mea na tutupu o loo ta’ua i le Alema 11–14, tusi ia upu nei i luga o le laupapa:

Seseroma

Oneti

Afi

Alema

Amoleka

Amonaea

Tuu atu i tamaiti se minute se tasi e taumafai ai e faaaoga uma ia igoa ma upu o loo i le laupapa e aotele ai ia mea na tutupu lea na ta’ua i le Alema 11–14. (Atonu e mafai ona e fautuaina i latou e toe tagai i aotelega o mataupu mo se fesoasoani.) A uma ona tali mai ni nai tamaiti, tape uma upu vagana ai Seseroma.

Faamatala ina ua uma ona o ese mai Alema ma Amoleka mai Amonaea, ma o atu i Saitoma, na la maua ai i latou na talitonu [i upu a Alema] lea na tutuli ese i fafo mai le laueleele o Amonaea, e aofia ai ma Seseroma. Fai i tamaiti e faitau le leoa le Alema 15:3–5, vaavaai mo upu ma fasifuaitau lea o loo faamatala ai le tulaga o Seseroma. Ao lipoti mai e tamaiti mea sa latou maua, tusi a latou tali i luga o le laupapa i lalo ifo o le igoa o Seseroma.

Aisea e te manatu ai o le lagona tausala o Seseroma na mafua ai ona ia tiga faaleagaga ma faaletino? O le a se mea e manaomia ona fai e tagata o loo i lenei tulaga ina ia suia ai o latou tulaga?
O ai se tagata na saili i ai Seseroma mo se fesoasoani? (Tagai i le Alema 15:4.) Aisea e te manatu ai na ia moli manao mai ia Alema ma Amoleka? (O tali e ono aofia ai lona faalagolagoina o i laua ma sa ia iloa o i laua o ni alii o le Atua ma e i ai le pule o le perisitua.)

Valaaulia ni nai tamaiti aoga e feauauai i le faitauina leotele mai o le Alema 15:6–10. Fai i le vasega e vaavaai mo upu ia na ta’ua e Alema o le a fesoasoani ia Seseroma e faaaoga le faatuatua ia Iesu Keriso ma Lana Togiola.

Aisea e te manatu ai sa manaomia e Seseroma le faaaogaina o le faatuatua ia Iesu Keriso ma Lana Togiola ao lei faamaloloina o ia?

Fai i tamaiti e faitau le leoa le Alema 15:11–12 e iloa ai le mea na tupu ia Seseroma. Afai ua lava se taimi latou te faitau ai, tapeese uma ia upu ma fasifuaitau o loo i luga o le laupapa i lalo o le igoa o Seseroma.

O le a se faamaoniga o e vaaia na salamo Seseroma ma mauaina le alofa mutimutivale o le Alii? (Sa faamaloloina o ia e ala i le faatuatua ia Iesu Keriso, papatisoina o ia, ma amata ona ia talai atu le talalelei.)

Tusi le mataupu faavae lenei i luga o le laupapa: O lo tatou faatuatua ia Iesu Keriso o le a mafai ai ona faamaloloina ma faamalosia i tatou.

Faailoa atu o Alema, i le avea ai ma taitai perisitua, e lei faagauai atu se vaaiga ia te ia lava ia. O lona faamoemoega i lenei talanoaga ma Seseroma o le fesoasoani atu lea ia Seseroma ina ia faaaoga le faatuatua ia Iesu Keriso ma maua le alofa mutimutivale e ala atu i le Togiola. Ina ia faailoa atu se auala se tasi o loo fesoasoani mai ai o tatou taitai perisitua ia i tatou ina ia maua faamanuiaga o le Togiola, faitau le aafiaga lenei na faasoa mai e Elder Jay E. Jensen o le Fitugafulu:

“A o ou galue o se epikopo, sa ou molimauina ia faamanuiaga o le Togiola i olaga o tagata o le Ekalesia o e sa faia ni solitulafono matuia. …

“Sa tafafao faamasani se talavou nonofua matua o la matou uarota ma se tamaitai talavou. Sa le pulea lelei o la’ua lagona faamemelo. Na sau le alii ia te au mo se fautuaga ma se fesoasoani. E faalagolago i mea sa ta’u mai ma le uunaiga a le Agaga ia te au, faatasi ma isi mea, sa le faatagaina o ia e tagofia le faamanatuga mo se vaitaimi. Sa ma talanoa e le aunoa ina ia mautinoa ua salamo, ma ina ua mavae se taimi talafeagai, sa ou toe faatagaina o ia e ai ma inu i le faamanatuga.

“A o ou nofo i luga o le tulaga i lena sauniga faamanatuga, na taulai atu o’u mata ia te ia ina ua ia ‘ai ma inu ma le agavaa i le faamanatuga. Sa ou molimauina lima o le alofa mutimutivale, alofa, ma le mamalu o siosiomia o ia a o faamafanafanaina lona agaga i le faamalologa a le Togiola ma sii ese lana avega, ma ua maua ai le faamagaloga na folafolaina, filemu, ma le fiafia” (“I Lima o le Mamalu,” Ensign po o le Liahona, Nov. 2008, 49).

Molimau atu o epikopo ma isi taitai o le perisitua e mafai ona fesoasoani ia i tatou ina ia maua le alofa mutimutivale ma le malosi tatou te manaomia e ala i le Togiola a Iesu Keriso.

Ina ia fesoasoani i tamaiti ia iloa o loo auauna atu taitai o le Ekalesia i vaega o tagata ma tagata taitoatasi, fai atu i ai e suesue le Alema 15:13–18. Tofi i latou e galulue i paga. Fai atu i le tasi o tamaitiiti i paga taitasi e suesue le Alema 15:13–15, 17, vaavaai i auala na faamanuiaina ai ia tagata o Saitoma e ala i le galuega talai a Alema. Fai atu i le tasi o tamaitiiti i paga taitasi e suesue le Alema 15:16, 18, vaavaai i auala na faamanuiaina ai ia Amoleka e ala i le galuega talai a Alema. A ua lava le taimi, valaaulia i latou e faamatala i le tasi ma le isi le mea sa latou maua.

Valaaulia ia paga e mafaufau i ni auala e tolu e oo i le lima na fesoasoani ai ia taitai o le Ekalesia i lenei vaitaimi i vaega ma tagata taitoatasi. Uunaia ia tamaiti e mafaufau i o latou lava tiutetauave i le avea ai ma ni taitai i o latou korama o le perisitua ma vasega o Tamatai Talavou. Fai atu i paga taitasi e faasoa mai se tasi o o latou manatu i le vasega.

Alema 16:1–12

Na faaumatia e sa Lamana ia Amonaea ae sa le mafai ona faatoilaloina ia sa Nifae o e na mulimuli i fautuaga a Alema.

Fai i tamaiti e mafaufau i se taimi sa latou lagona ai le tei po o le faafuasei ona lagona le fefe. Atonu e te manao e fai i se tasi po o le toalua foi o tamaiti e faasoa mai ni o latou aafiaga. Valaaulia ia tamaiti e faitau le leoa le Alema 16:1–3, vaavaai mo le auala na tetei ai ia sa Nifae i Amonaea ma le mafuaaga na foliga ai nisi o i latou e pei e fefefe. Fai i tamaiti e lipoti mai mea sa latou maua. (Afai e manaomia, fesoasoani atu ia i latou ina ia latou iloa na faafuasei lava ona osofaia e sa Lamana ia le laueleele o Amonaea ma faaumatia ona tagata ao lei mafai ona faapotopoto e sa Nifae se autau e tau ma i latou.)

Fai i se tamaitiiti aoga e faitau leotele le Alema 16:4–6, ma fai i le vasega e faailoa mai po o fea na saili i ai sa Nifae amiotonu mo se taitaiga. Fai i se isi tamaitiiti aoga e faitau leotele le Alema 16:7–8 ao saili e le vasega atoa le taunuuga o le fesoasoani sa latou mauaina.

Na faapefea ona fesoasoani le taitaiga faaperofeta a Alema i tagata sa Nifae?
O a mataupu faavae e mafai ona tatou aoao mai lenei tala? (E mafai e tamaiti ona faailoa mai ni mataupu faavae eseese. Ia mautinoa latou te malamalama a o tatou saili ma mulimuli i le taitaiga mai perofeta a le Alii, o le a faamalosia ma puipuia i tatou e le Alii. Tusi le mataupu faavae lenei i luga o le laupapa.)
O faapefea ona faamanuia le autalavou a o latou mulimuli i le taitaiga faaperofeta? (Ina ia fesoasoani i tamaiti aoga i le taliina o lenei fesili, mafaufau e fai atu ia i latou e sue i ni vaega se lua pe tolu foi o i le tamaitusi Mo le Malosi o le Autalavou. Valaaulia i latou e tali le fesili lenei e faatatau i vaega taitasi e te filifiliina.)

Fai i tamaiti e mafaufau i ni aafiaga na fesoasoani ai le taitaiga faaperofeta ia i latou e faia ni filifiliga sao i taimi po o tulaga faigata. Valaaulia ni nai tamaiti aoga e faasoa mai a latou aafiaga i le vasega.(Ia mautinoa latou te malamalama e le faamalosia i latou e faasoa mai ni aafiaga e le faalauaiteleina pe patino.) Atonu e te fia faasoaina atu foi sou lava aafiaga. Ina ia lagolagoina ai le upumoni lea e faapea e faataunuuina lava e le aunoa ia upu a perofeta, atonu e te manao e faailoa atu o le Alema 16:9–11 o loo faaalia ai le faataunuuina o le valoaga a Alema e uiga i le nuu o Amonaea (tagai i le Alema 9:12).

Alema 16:13–21

O Alema, Amoleka, ma isi na faatuina le Ekalesia i totonu o sa Nifae

A uma ona suesue e tamaiti le Alema 16, uunaia i latou e tagai mo ni faataitaiga o mataupu faavae e lua lea sa e tusia i luga o le laupapa. Aotele le Alema 16:13–15 e ala i le faamatala atu na faaauau e Alema ma Amoleka le talai atu o le afioga a le Atua i le laueleele atoa, faatasi ai ma le fesoasoani a isi “o e na filifilia mo le galuega” (Alema 16:15). Fai i tamaiti e faitau le leoa le Alema 16:16–21, tagai mo taunuuga o nei taumafaiga. A lava se taimi, fai i tamaiti e ta’u mai mea sa latou maua. Fai i ai pe na faapefea ona faailoa mai e nei faataitaiga se tasi po o mataupu faavae uma e lua lea o loo tusia i luga o le laupapa.

Faaiu le lesona i le uunaia o tamaiti e kopi se tasi o nei mataupu faavae i totonu o api o le vasega po o api talaaga mo le suesueina o tusitusiga paia. Valaaulia i latou e tusi se aotelega o mea sa latou aoaoina i le aso e uiga i lena mataupu faavae. Fai foi i ai e tusi e uiga i le auala na latou fuafua ai e faaaoga mea sa latou aoaoina.

Iloiloga o le Mau Tauloto

O lenei lesona e faailoga ai le ogatotonu o lenei kosi. Ina ia fesoasoani i tamaiti e faamautu lo latou malamalama i fasifuaitau o mau tauloto, fuafua e tuuina atu ia i latou se suega e fua i ai pe faapei lo latou iloa o fasifuatau o mau tauloto sa e aoaoina i le vasega. Atonu o le a e saunia se suega tautala pe tusitusia faigofie, e pei o le tuuina atu o se faaiteite mai le faailogatusi o le seminare ma tuu atu i tamaiti e tusi le faasinoga sa’o, pe atonu foi e te manao e faia se iloiloga o nisi o fasifuaitau sa taulotoina e tamaiti aoga. Atonu e te manao e tau i tamaiti le suega a o lei faia ina ia mafai ona latou sauniuni i ai.

Faaaliga: Afai e le lava sou taimi e faaaoga ai lenei gaoioiga o se vaega o lenei lesona, e mafai ona e faaaogaina i se isi aso. Mo nisi gaoioiga toe faamanatu, tagai i le faaaopoopoga o i le faaiuga o lenei tusi lesona.

Tala ma Faamatalaga o Talaaga

Alema 15:3–5. O tiga faaletino e mafua mai i faaletonu faaleagaga

A o i ai Seseroma i le tulaga o le salamo, o ana agasala “sa atuatuvale ai lona mafaufau sa oo ina matua tiga tele lava” (Alema 15:3). Na saunoa Peresitene Boyd K. Packer o le Korama a Aposetolo e Toasefululua e uiga i le moni o le tiga faaletino lea e mafai ona tupu ona o faaletonu faaleagaga:

“Sa ou fesili i se tasi taimi i se fomai o mea tau vailaau a le aiga po o le a le tele o lona taimi e alu i le faasaoina o mea o loo faaletonu i le tino. E tele naua ana galuega, ma ina ua uma ona iloilo lona mafaufau sa ia faapea mai ‘E le sili atu i le 20 pasene. A o le isi taimi atoa e peiseai ou te galue ai i faafitauli e aafia ai le saogalemu ma le maloloina lelei o le tino o au ma’i ae le mafua mai la i le tino.’

“‘O nei la faaletonu i le tino,’ o le faaiuga lea o le tali a le fomai, ‘ua na o ni faailoga lava o se isi ituaiga faaletonu.’

“I augatupulaga talu ai nei sa iu lava ina gauai atu faamai tetele ma mafai ona foia po o le togafitia foi. E i ai lava nisi faamai tetele o loo i ai pea lava e oo mai i le taimi nei, ae pei la e foliga mai ua mafai nei ona tatou foia ma togafitia le tele o ia faamai.

“O loo i ai se isi vaega o i tatou e le faitino, ae pei lava lona moni o tatou tino faaletino. O lea la vaega o i tatou e taua o le mafaufau, lagona, o le atamai, o o tatou uiga ma isi lava mau mea. E seasea ona faamatalaina faapea e faaleagaga.

“Ae o loo i ai se agaga i le tagata; o le le amanaiaina o lea agaga o le le amanaiaina foi lena o tulaga moni faaletino. O loo i ai foi tulaga faaletonu faaleagaga, atoa ai ma gasegase faaleagaga e ono mafatia tele ai.

“O le tino ma le agaga o le tagata ua fusia faatasi” (“O Le Pulu Pasama o Kiliata,” Liahona, Mat. 1978, 93).

Manatu Faaopoopo Faafaiaoga

Alema 15:16–18 . Tausia e Alema Amoleka

A o e aoao atu le Alema 15:16–18, fesoasoani i tamaiti aoga ia malamalama i le mafuaaga na ono manaomia ai e Amoleka le tausiga a Alema. Faailoa atu e itiiti ifo ma le ono masina le taimi ua mavae ma le va o le taimi na asia ai e le agelu ia Amoleka ma le taimi lea ua la taunuu ai ma Alema i Saraemila (tagai i le Alema 10:6; 14:23; 15:19). I le faaaoga ai o le Alema 15:16, 18 e avea ma se taiala, fai i tamaiti e toe iloilo le mea na tupu ia Amoleka i lena taimi puupuu. Fai atu i tamaiti ni fesili e pei o fesili nei:

Aisea e te manatu ai na manaomia e Amoleka le faamalosia i lea vaitaimi?
O le a se mea ua tatou aoao mai le tausiga e Alema o Amoleka? (Fesoasoani i tamaiti aoga ina ia malamalama e mafai ona tatou faamafanafana atu ma faamalolosia isi e ala i le tausia o i latou i taimi o o latou faafitauli.)

Fai i tamaiti e mafaufau i se tasi—atonu o se tagata o le aiga po o se tagata i lo latou uarota po o paranesi—o loo aafia i se faafitauli o soo se ituaiga. Fai i tamaiti aoga e tusi se fuafuaga i api o le vasega po o api talaaga mo le suesueina o tusitusiga paia e faamatala ai se mea o le a latou faia e fesoasoani ai i le faamalosia o lena tagata. Uunaia i latou e faatino a latou fuafuaga.