3 Nifae 11:18–16:20 (iunite 25)

Sauniuniga o Anomea mo le Faiaoga o Suesuega e Faia i le Aiga

Aotelega o Lesona o Suesuega e Faia i le Aiga i Aso Taitasi

O le otootoga lenei o aoaoga faavae ma mataupu faavae na aoaoina mai e tamaiti aoga, a o latou suesueina le 3 Nifae 11:18–16:20 (iunite 25) e le o faamoemoeina e aoao atu o se vaega o lau lesona. O le lesona e te aoao atu e taula’i atu i nai vaega itiiti o nei aoaoga faavae ma mataupu faavae. Mulimuli i uunaiga a le Agaga Paia, a o e mafaufau i manaoga o au tamaiti aoga.

Aso 1 (3 Nifae 11:18–12:48)

Na aoaoina e tamaiti aoga faapea, o le papatisoga e ao ona faatinoina e se tagata e umiaina le pule tatau, ma e ao ona faia i le ala ua faatulagaina mai e le Alii. Na latou suesueina foi le mataupu a Keriso ma aoaoina faapea, o le Agaga Paia e molimau mai i le Tama Faalelagi ma Iesu Keriso. I la latou suesuega o Upu Faaamuia ma le faamalamalamaga a le Faaola o le tulafono maualuga atu, na latou aoaoina ai faapea, afai tatou te ola e tusa ma aoaoga a Iesu Keriso, o le a faamanuiaina ma saunia i tatou e ulu atu i le malo o le lagi. Na latou aoaoina foi faapea, a o tatou o mai ia Keriso ma tausia Ana poloaiga, o le a mafai ona sili atu ona avea i tatou faapei o Ia ma lo tatou Tama oi le Lagi, o e ua atoatoa.

Aso 2 (3 Nifae 13)

Mai aoaoga a le Faaola e uiga i mafuaaga mo le tuuina atu o meaalofa, tatalo, ma le anapogi, na aoao ai tamaiti aoga faapea, afai tatou te faia galuega amiotonu e faafiafia ai le Tama Faalelagi, o le a Ia tauia faaaliali i tatou. A o latou suesueina aoaoga a le Faaola e uiga i le lē mafai ona auauna i ni matai se toalua, ua latou aoaoina ai mataupu faavae nei: Ina ia mafai ona avea le Atua ma o tatou matai, e ao ona tatou alolofa ma auauna ia te Ia nai lo mea o le lalolagi. Afai tatou te sailia muamua le malo o le Atua, o le a Ia fesoasoani ia i tatou e tuuina mai mea o loo tatou manaomia.

Aso 3 (3 Nifae 14)

O aoaoga a le Faaola e uiga i le faamasinoina amiotonu ua fesoasoani ai i tamaiti aoga e malamalama faapea, o le a faamasinoina i tatou e tusa ma le ala tatou te faamasinoina ai isi. Na latou aoaoina foi faapea, e faamanuiaina i tatou e le Tama Faalelagi, pe a tatou tatalo atu mo Lana fesoasoani. Na tusia e tamaiti ia ata e faaalia ai aoaoga a le Faaola ma aoaoina faapea, e ao ona tatou faia le finagalo o le Tama Faalelagi, ina ia mafai ai ona ulu atu i le malo o le lagi.

Aso 4 (3 Nifae 15–16)

Na aoaoina e tamaiti faapea, o Iesu Keriso o le punaoa lea o tulafono ma poloaiga uma o le talalelei. Afai tatou te vaavaai atu ia te Ia e ala i le tausia o Ana poloaiga ma tumau e oo i le iuga, o le a Ia tuuina mai ia i tatou le ola e faavavau. A o suesueina e tamaiti ia fetalaiga a le Faaola e uiga i “isi mamoe” (3 Nifae 15:21), na latou aoaoina faapea, e popole le Atua mo Ana fanau uma, ma faaali o Ia lava ia te i latou. Na latou aoao foi faapea, e tuuina mai ia i tatou e le Atua le malamalama ma le upumoni e tusa ma lo tatou faatuatua ma le usiusitai.

Faatomuaga

I lenei lesona, o le a mafaufau ai tamaiti aoga i le auala e faaaafia ai e le finauga lo latou gafatia e lagonaina le Agaga. O le a mafai foi ona latou manatunatu e uiga ia i latou, o e ua avea ma faataitaiga lelei ia i latou ma mafaufau i le auala e mafai ai ona lelei atu ona latou auauna o ni faataitaiga i isi.

Fautuaga mo le Aoaoga

3 Nifae 11:18–41

Ua faatulaga mai e Iesu Keriso le ala e fai ai le papatisoga, ta’usalaina le finauga, ma tautino mai Lana mataupu

Tusi le upu finauga i luga o le laupapa, ma fai atu i tamaiti aoga e faamatala lenei upu (finauga, feteenaiga, po o feeseeseaiga).

Valaaulia tamaiti e lisi faapuupuu i luga o le laupapa nisi o tulaga po o gaoioiga, ia latou te manatu e ono o’o mai ai le finauga. (Atonu e te manao e tofi se tamaitiiti e fai ma failautusi, a o tuuina mai tali a le vasega.) A o faia lenei gaoioiga, aloese mai le mea na faaigoaina e Elder Dallin H. Oaks o le Korama a Aposetolo e Toasefululua o le “auala faatiapolo” ia atonu e uunaia le “finauga ma le feeseeseaiga” (The Lord’s Way [1991], 139).

Toe faamanatu i tamaiti faapea, i le 3 Nifae 11 na latou faitau ai faapea na faaali atu Iesu Keriso i tagata sa Nifaē, o e na faapotopoto i le malumalu. Valaaulia se tamaitiiti aoga e faitau leotele le 3 Nifae 11:28 ma fai atu i le vasega e faailoa mai le autu na fefinauai ai nisi o tagata sa Nifaē. (Ina ia fesoasonai i tamaiti aoga ia malamalama lelei i lenei fuaiupu, atonu e manaomia lou faamalamalama atu faapea o le upu feeseeseaiga o lona uiga o finauga po o feteenaiga.)

Fesili atu: Aisea e te manatu ai e taua le aloese mai feeseeseaiga po o finauga, pe a talanoaina le talalelei ma isi?

Tusi le faamatalaga lenei i luga o le laupapa: O le agaga o finauga e le mai le Atua, ae … Valaaulia se tamaitiiti e faitau leotele le 3 Nifae 11:29–30 ma fai atu i tamaiti aoga e faailoa mai le mea e sau ai le agaga o le finauga. O le upumoni ua latou mauaina, atonu e mafai ona faamatalaina faapenei: O le agaga o finauga e le mai le Atua ae mai le tiapolo. Atonu e te manao e fautuaina tamaiti aoga e faailoga lenei upumoni i totonu o a latou tusitusiga paia.

Fesili atu: E mafai faapefea e le manatuaina o aoaoga a le Faaola o loo i le 3 Nifae 11:29–30 ona fesoasoani ia te oe, pe a e i ai i se tulaga atonu o loo i ai le fefinauai? (Atonu e te faamanino atu tulaga patino ua tusia i luga o le laupapa, po o le fai i tamaiti aoga e mafaufau i se tulaga na manao ai se tasi e finau e uiga i mataupu o le talalelei.)

Ina ia fesoasoani i tamaiti aoga ia malamalama i se taunuuga taua se tasi o le finauga, faitau pe faapipii i luga le faamatalaga lenei mai ia Peresitene James E. Faust o le Au Peresitene Sili: “Pe a i ai le finauga, o le a aluese le Agaga o le Alii, e tusa lava pe o ai e sese,” (“O Mea Ou Te Manao Ia Iloa E Lo’u Atalii, Ao Le i Tuua Mo Lana Misiona,”Liahona, Iulai 1996, 42).

Atonu e te mana’o e fautua atu i tamaiti aoga e tusi lenei faamatalaga i totonu o a latou api po o api talaaga o le suesueina o tusitusiga paia.

Fesili atu: Pe na i ai ea se taimi na e lagonaina ai le Agaga o le Alii ua aluese ona o le finauga? Na faapefea ou lagona?

Faamanino atu fetalaiga a le Faaola e faatatau i le finauga o loo i le 3 Nifae 11:30: “O lau mataupu lenei, ia aveesea mea faapena.” Ona fai atu lea o fesili nei:

E mafai faapefea ona tatou aveesea finauga ma feeseeseaiga?
E mafai faapefea ona tatou le malilie i isi, ma aloese mai le finauga?
O a auala na e lagonaina ai le tulaga faamanuiaina mo au taumafaiga e aloese, pe faatoilalo le finauga?

Atonu e te manao e faasoa atu se aafiaga na e mauaina, na e lagonaina ai le faamanuiaina mo au taumafaiga e aloese pe faatoilaloina le finauga. Valaaulia tamaiti aoga e vaai i le lisi o loo i le laupapa, ma filifili se tulaga lea atonu e masani ona latou lagonaina ai le agaga fefinauai. Tuu atu ia i latou se taimi e tusi ai i lalo se sini o le a latou sailia, e aloese pe faatoilaloina ai le finauga i lena tulaga.

3 Nifae 12–16

Ua aoao atu e Iesu Keriso ia mataupu faavae e fesoasoani ai i Lana fanau e agaigai atu i le tulaga atoatoa

Valaaulia tamaiti e tutu i luga ma tauloto mai le 3 Nifae 12:48. Atonu e manaomia le fai atu ia i latou e faataitai mo ni nai taimi ina ia mafai ona latou taulotoina lelei lenei mau tauloto. Fai atu i tamaiti e faaaoga a latou tusitusiga paia e faamanino ai nisi o uiga o le atoatoa ua taua i le 3 Nifae 12:1–12 lea latou te faamoemoe e atiina ae i se tulaga sili atu.

Tuu sina masima laitiiti i luga o se sipuni, ma fai atu i tamaiti e mate po o le a lea mea. Ona valaaulia lea o se tamaitiiti e sau i luma ma faailoa mai lea mea e ala i le tofo i ai. Pe a uma ona faailoa mai e le tamaitiiti le mea faapea o le masima, fai atu i le vasega e lisi aoga o le masima. A o latou tali mai, ia mautinoa ua manino faapea, i le faaopoopo ai i le faaoonaina o meaai, ua faaaogaina le masima o se mea e faaaoga e puipuia ai aano o manu mai le faaleagaina.

Fai atu i tamaiti e faitau le 3 Nifae 12:13 ina ia iloa ai po o ai na faatusa i ai e le Faaola le masima. A o tali mai tamaiti, faamalamalama atu faapea, na Ia faasino e le gata o le motu o tagata sa i ai i le malumalu i lena aso, ae faapea foi i latou uma ua papatisoina i totonu o Lana feagaiga.

Fesili atu: O a auala e mafai ai e i tatou, i le avea ai ma tagata e mulimuli ia Iesu Keriso, ona faapei o le masima? (E ao ona tatou fesoasoani e faasaoina pe laveaiina tagata ma faaleleia atili le lalolagi e ala i le uunaia o isi mo le lelei.)

Faamalamalama atu faapea i le 3 Nifae 12:13 o le upu mai e le gata ina faasino i le tofo o le masima, ae faapea foi lona aoga o se mea e faasaoina ai.

Fai atu i se tamaitiiti e faitau le faamatalaga lenei a Elder Carlos E. Asay o le Fitugafulu e faatatau i le auala e mafai ona aveesea ai le mai o le masima.

“O le a le aluese le mai o le masima i le taatia umi. E aluese le mai ona ua filogia ma se isi mea, ma faaleagaina. E talitutusa lava … o le a alu ese le lelei ma le tulaga manaomia mai se tagata pe a ia faaleagaina lona mafaufau i manatu eleelea, faaleagaina lona gutu i le tautala i mea e lē moni, ma faaaoga sese lona malosi e faatino ai galuega faatiapolo,” (“Masima o le Lalolagi: Taua i Tagata ma Faaola o Tagata,” Liahona, Me 1980, 42).

Fesili atu: Aisea e ao ai ona tatou tauivi ina ia mama, ina ia mafai ai ona uunaia isi mo le lelei?

Faaali atu i tamaiti se moliuila. Ia ki le moliuila, ma valaaulia tamaiti e faitau le 3 Nifae 12:14–16 ma vaavaai mo le auala na faaaoga ai e le Faaola le malamalama e aoao atili ai le matafaioi a Lona nuu o le feagaiga i le lalolagi. Ae latou te le’i faitau, atonu e fesoasoani le faamalamalama faapea o sepusa e tuu ai saito o se ato.

Fesili atu: Faamata e mafai faapefea e tagata o le Ekalesia o e tausia a latou feagaiga ona avea o se malamalama i isi?

Ufiufi le malamalama i se ato po o se solo, ma fai atu fesili nei:

O a nisi o auala atonu e faaosoosoina ai tatou e ufiufi lo tatou malamalama?
E tusa ai ma le 3 Nifae 12:16, aisea ua finagalo ai le Faaola ia i tatou e faatuina se faataitaiga amiotonu mo isi? A o tatou faatuina se faataitaiga amiotonu, o le a mafai ona tatou fesoasoani i isi e faamamaluina le Tama Faalelagi. Atonu e te manao e fautua atu i tamaiti e tusi lenei mataupu faavae i le laina i autafa o a latou mau.)
O ai e ana le faataitaiga amiotonu lea na fesoasoani ia te oe e faalatalata atili atu ai i le Tama Faalelagi, pe na faamalosia ai lou manao e ola atoatoa i le talalelei?

Fautuaina tamaiti ia faapei o le masima ma le malamalama i le lalolagi, e ala i le filifili e avea ma faataitaiga amiotonu.

Faamalamalama atu faapea, na faaauau ona aoao e le Faaola tagata sa Nifaē faapea o le taui moni mo le usitaiaina ma le amiotonu o poloaiga, o le a o’o mai a o latou tapuai e aunoa ma le pepelo, ma e aunoa ma le tuuina o o latou loto i oa faalelalolagi po o taui. Tusi le mau lenei i luga o le laupapa: 3 Nifae 13:22; 13:31–33; 14:7–8; 15:9; 16:13. Valaaulia tamaiti e sailiili nei fuaitau ma faailoa mai nisi o taui na folafola mai ia i tatou e le Tama Faalelagi, pe a taula’i atu o tatou loto i le ola ai i ni olaga amiotonu. Pe a uma ona tuuina atu se taimi ia lava, valaaulia i latou e lipoti mai mea na latou mauaina.

Faasoa atu lau molimau i tamaiti faapea, o le a fesoasoani ma faamanuiaina i latou e le Tama Faalelagi ma Iesu Keriso i a latou taumafaiga e aloese mai le finauga ma avea o se faataitaiga amiotonu i le lalolagi.

Iunite e Sosoo ai (3 Nifae 17–22)

Ta’u atu i tamaiti faapea, a o latou suesueina le 3 Nifae 17–22, o le a latou faitau ai faapea na tutulu Iesu Keriso ina ua ia faatasi ma tamaiti sa Nifaē. Uunai i latou e vaavaai mo tali i fesili nei: O le a le mea na Ia faia mo i latou? O a isi vavega na faatinoina e Iesu, a o auauna atu i tagata sa Nifaē?