Lesona 59
Mosaea 12:18–14:12
Faatomuaga
Ina ua fesiliga e le Tupu o Noa ma ana faitaulaga ia Apinati, sa a’oa’i i latou e le perofeta i lo le aoaoina pe tausia poloaiga. Sa faatonuina e le Tupu o Noa ana faitaulaga e faasiotia ia Apinati, peitai na puipuia Apinati e le Atua ma tuu atu ia te ia le mana e faaauau ai lana savali. I le ta’ua ai o Isaia, na molimau atu ai Apinati ia Iesu Keriso ma Lana Togiola.
Fautuaga mo le Aoaoga
Mosaea 12:18–13:26
Ua aoai e Apinati le Tupu o Noa ma ana faitaulaga i lo latou mumusu e tausia ma aoao atu ia poloaiga
Ina ia amata lenei lesona, tusi ia faamatalaga nei i luga o le laupapa:
UA OU ILOA le uiga o le ola i le talalelei a Iesu Keriso.
UA OU OLA i le talalelei a Iesu Keriso.
Fai i tamaiti e mafaufau filemu po o le a le lelei o le faamatalaina o i latou e le faamatalaga, faaaoga le fua o le 1 i le 10 (o le 10 o lona uiga e matuai lelei le faamtalaina o i latou e le faamatalaga).
-
Aisea e taua ai le mafai ona faamatalaina lelei oe e nei faamatalaga?
Faamatala a o talanoaina e tamaiti ia upu a Apinati, o le a tele mea latou te aoaoina e uiga i le taua o le iloa ma ola ai i le talalelei. Faamanatu atu ia i latou i lesona ua mavae, sa latou talanoaina ai le tala i le Tupu o Noa ma ana faitaulaga o lafoina Apinati i le falepuipui ona o ana valoaga e faasaga ia i latou (tagai Mosaea 12:1–17). Aotele le Mosaea 12:18–24 e ala i le faamalamalamaina na toe aumaia Apinati i luma o le Tupu o Noa ma ana faitaulaga. Na fesiligia o ia e faitaulaga, ma taumafai e faafememea’i o ia ina ia ona ia fai atua se upu e mafai ona latou osofaia ai o ia. Ona fesili lea o se tasi na te faamalamalama atua se mau.
Valaaulia tamaiti e faitau lemu le Mosaea 12:25–30, ma vaavaai mo mafuaaga na aoai ai e Apinati ia Noa ma ana faitaulaga. A maea lipoti a tamaiti i mea na latou maua, ona fesili lea:
-
Fai mai Apinati ua faapi’opi’o e Noa ma ana faitaulaga ia ala o le Alii (tagai Mosaea 12:26). I se isi faaupuga, ua latou faapi’opi’o ona fai mea paia ma ua liliu ese mai le ala sao e ola ai. O a auala na tausalaina ai Noa ma le au faitaulaga i le faaleagaina o ala o le Alii?
Ina ia fesoasoani i tamaiti e tali le fesili lea, atonu e te manao e ta’u i ai na fai mai faitaulaga o le faaolataga e maua i le tulafono a Mose (tagai Mosaea 12:32). Peitai, latou te lei tausia Poloaiga e Sefulu, o se vaega o lena tulafono, latou te lei aoaoina foi tagata e tausi poloaiga (tagai Mosaea 11:1–15; 12:27–29, 37; 13:25–26).
Faasino i faamatalaga o i luga o le laupapa.
-
I se fua o le 1 i le 10, o le a le lelei e te manatu ua faamatalaina ai e faamatalaga taitasi ia Noa ma ana faitaulaga?
Valaaulia se tamaitiiti e faitau leotele le Mosaea 12:31–33. Fai i le vasega e faailoa mai le mataupu faavae na aoao atu e Apinati ia Noa ma ana faitaulaga. (Na ia aoao atu e faapea afai tatou te tausia poloaiga a le Atua, o le a faaolaina i tatou.)
Faasoa atu faataitaiga nei na tuuina mai e Elder F. Melvin Hammond o le Fitugafulu. Fautuaina tamaiti e faalogologo mo le taua o le iloa ma tausia o poloaiga.
“O ni tausaga ua mavae, sa tu ai ma le lototoa se faifeautalai ua maea mai le misiona, i se sauniga faamanatuga ma folafola leotele atu na ia iloaina mai ana suesuega o tusitusiga paia e moni le talalelei, ma na te ofoina atu lona ola mo le Alii ma Lana Ekalesia. E lua vaiaso mulimuli ane, na ia tu ai i luma o le epikopo o lana uarota a tamaiti aoga, ua maasiasi ma fefe, a o ia tautau atu faapea i se minute na ia vaivai ai, na ia lafoai ai lona mama. E foliga mai o lana tuuto na folafola atu i le Faaola, ua galo i le taavilivili o ona tuinanauga. E ui o ia o se tagata aoao i le upu a le Atua, ae na te lei faafesootaia ana suesuega ma le faaaogaina patino o le olaga lotomaualalo faa-Keriso i aso faisoo.
“Sa galue se teineitiiti lalelei i mea uma na manaomia e ausia ai le Aloaiaina o le Tulaga Faatamaitai Talavou. Na tusia ma le faautauta ana sini patino ma tuu ma le faaeteete i lana tusi o manatuaga. Na ia tusia faamaopoina lelei faapea nao alii talavou agavaa lava na te tafao faamasani i ai, ma sue lena alii faapitoa e aveina o ia i le malumalu. Ina ua sefuluvalu ona tausaga, sa galo ana sini; na avavaga o ia ma se tamaitiiti e le o se tagata o le Ekalesia. E tele loimata na maligi o i latou sa sili ona alolofa ia te ia—o ona matua, faiaoga, ma uo. Na pau atu o ia i se āva matautia i le va o mea na manaomia o le tulafono ma le tulaga moni o le avea ma soo moni” (“Eliminating the Void between Information and Application,” CES satellite training broadcast, Aug. 2003, 17, si.lds.org).
-
Aisea e le lava ai le na ona iloa o poloaiga e agavaa ai mo le faaolataga?
Faaali le ata o Apinati i luma o le Tupu o Noa (62042; Tusi Ata o le Talalelei [2009], no. 75). Fai i tamaiti e faamatala le mea o loo tupu i le ata. (Ua poloaiina e le tupu ia Apinati ina ia fasiotia. O loo puipuia e le Alii ia Apinati.) Ina ia fesoasoani ia malamalama tamaiti i lenei tala, fuafua e faatutu ni tamaiti se toatolu e faatino le faitauga ma fai ia taga. E fai ma faamatala le isi tamaitiiti. Faitau e le lona lua ia upu a le Tupu o Noa. Ae faitau e le lona tolu ia upu a Apinati. Muamua, fai i le faamatala ma le tamaitiiti o loo fai ma Noa e faitau a la’ua vaega i le Mosaea 13:1–2. Ona vaai lea o le tamaitiiti o loo avea ma Apinati e tali atu i le Mosaea 13:3–4. Ona faitau lea e le faamatala o le Mosaea 13:5–6. Ona faauma lea e le tamaitiiti o loo avea ma Apinati i le Mosaea 13:7–11.
Faagauai atu tamaiti i le Mosaea 13:11.
-
O le a sou manatu i le uiga o le tusia o poloaiga i o tatou loto? (Fesoasoani ia malamalama tamaiti o le tusia o poloaiga i o tatou loto, e tatau ona tatou iloa ma ola ai i le talalelei.)
Faamatala a o le saili ia Noa e fasiotia ia Apinati, na amata ona lau atu e Apinati se mau atonu na masani ai le tupu ma ana faitaulaga ma sa avea ma faamaoniga o lo latou amioleaga. Fai i le vasega e faitau lemu le Mosaea 12:34–36 e iloa ai pe foliga e masani i le mau na faitau atu e Apinati ia Noa ma ana faitaulaga. Fesoasoani ia latou iloa na amata lau atu e Apinati ia Poloaiga e Sefulu.
Tusi ni papatusi lapopoa se lua e leai se mea o tusi ai, i luga o le laupapa. Valaaulia tamaiti e tusi se tasi o Poloaiga e Sefulu i se tasi o nei papatusi. Fai i le tamaitiiti e pasi le sioka i se isi e tusi ai se isi o Poloaiga e Sefulu. Fai pea lena faasologa seia tusia uma e tamaiti mea latou te manatua. Valaaulia i latou e siaki a latou tali i le Mosaea 12:34–36 ma le 13:12–24. Atonu e te manao e fautuaina i latou e faailoga Poloaiga e Sefulu i fuaiupu nei ma i le Esoto 20:3–17 (o se mau tauloto).
Faasoa atu le saunoaga lea a Peresitene Gordon B. Hinckley:
“[O] Poloaiga e Sefulu [na] tusia e le tamatamai aao o Ieova i papa ma’a mo le faaolataga ma le saogalemu, mo le malutiaga ma le fiafia o le fanauga a Isaraelu, ma tupulaga uma o le a o’o mai pe a mavae atu i latou” (“O TatouTiutetauave Paia,” Liahona, Ianuari. 1992, 58).
Fautuaina tamaiti e toe iloilo lemu ia Poloaiga e Sefulu ma mafaufau i a latou lava taumafaiga e tausia.
Mosaea 13:27–14:12
Ua aoao atu e Apinati le faaolataga e ala i le Togiola a Iesu Keriso
Tusi mea nei i luga o le laupapa (atonu e te manao e tusi a o lei amataina le vasega). Fai i tamaiti e mafaufau po o a mea e mafai ona tuu i avanoa.
“A uma ona tatou usitai i mea uma ma galuega lelei, e le mafai ona faasaoina i tatou mai le oti po o aafiaga o a tatou lava agasala e aunoa …”
Faitau leotele le saunoaga lea a Elder Dallin H. Oaks:
“A uma ona tatou usitai i mea uma ma galuega lelei, e le mafai ona faasaoina i tatou mai le oti po o aafiaga o a tatou lava agasala e aunoa ma le alofa tunoa na tuuina mai e le togiola a Iesu Keriso. Ua faamanino mai e le Tusi a Mamona. O loo aoao mai e faapea, ‘e le oo mai le faaolataga i le na o le tulafono’ (Mosaea 13:28). I se isi faaupuga, e le oo mai le faaolataga i le na o le tausia o poloaiga. … E oo lava ia i latou o e taumafai e usitai ma auauna atu i le Atua ma o latou loto atoa, malosi atoa, mafaufau atoa, ma le malosi atoa, o ni ‘auauna le aoga’ (Mosaea 2:21). E le mafai e le tagata ona maua lona lava faaolataga” (“Another Testament of Jesus Christ,” Ensign, Mar. 1994, 67).
Faauma le faamatalaga o i luga o le laupapa i le tusia ai ma le alofa tunoa e tuuina mai e le togiola a Iesu Keriso. Ona fai lea i ni nai tamaiti e feauaua’i e faitau leotele mai le Mosaea 13:28, 32–35. Fai i le vasega e vaavaai mo upu ma fasifuaitau e faiā i le saunoaga a Elder Oaks. Valaaulia ni tamaiti e faasoa mai mea na latou maua. (O tali talafeagai e aofia ai “le togiola,” “o le faaolataga a le Atua,” “o le afio mai o le Mesia,” ma le folafolaga faapea “o le Atua lava ia [o le a] afio mai i lalo i le fanauga a tagata.”)
Faamalamalama saunoaga a Apinati e uiga i “le tulafono” o i le Mosaea 13:28 ma le 32 o mau faasino ia i le tulafono a Mose, ia o loo aofia ai se seti mautu o poloaiga e aofia ai osigataulaga, taumafataga, ma isi faatinoga. Na tuuina atu le tulafono e fesoasoani ai i tagata Isaraelu ia manatua le Atua ma faatalitali atu i le Togiola a Iesu Keriso. I le gasologa o taimi, e toatele Isaraelu na le malamalama i le matafaioi a Iesu Keriso o lo latou Faaola, ma sa manatu ai e mafai lava ona faasaoina i latou i le na o le usiiusitai i le tulafono a Mose.
-
Na molimau atu Apinati e faapea e leai se tasi e mafai ona faasaoina vagana e ala i le Togiola a Iesu Keriso (tagai Mosaea 13:28, 32). Aisea e taua ai lo tatou malamalama i lenei upumoni?
Faamatala na tautala atu Apinati ia Noa ma faitaulaga, ma sa ia ta’ua ni valoaga a Isaia e uiga ia Iesu Keriso. Valaaulia tamaiti e faitau lemu le Mosaea 14:3–12. Fai i ai e vaavaai mo upu ma fasifuaitau o loo faamatalaina ai le mea na faia e le Faaola e aumaia ai le faaolataga.
A uma ona suesue e tamaiti ia nei fuaiupu mo ni nai minute, ona fai lea i ai e faasoa mai mea na latou maua. Atonu e te fuafua e tusi a latou tali i luga o le laupapa. Ina ia fesoasoani i tamaiti e mafaufau i le mafatiaga ma le faanoanoa na tauave e le Faaola mo i latou ma fesoasoani ia latou mafaufau e uiga i Ona puapuaga mo a latou agasala, faitau atu i ai faamatalaga nei. Valaaulia i latou e faauma ia nei faamatalaga i o latou mafaufau:
Na tauave e Iesu Keriso o’u faanoanoaga, e pei o le …
Na manu’a Iesu Keriso ma tuimomomoina mo a’u solitulafono, e pei o le …
Fesili i tamaiti po o le a le uiga o le faamatalaga lea ia i latou: “O ona faalavalava ua malolo ai i tatou” (Mosaea 14:5). Atonu e manaomia ona e faamatala i ai o le upu faalavalava e faasino tonu lava i manu’a na tuua ai i le tino o le Faaola ina ua tatui, pe sasa (tagai Ioane 19:1). I se tulaga aoao lava, o le upu e faasino i Ona mafatiaga uma.
A uma ona faasoa mai e tamaiti o latou lagona e uiga i le faamatalaga, molimau atu e ala i mafatiaga o le Faaola ma a tatou lava taumafaiga e tausi ia poloaiga, e mafai ai ona tatou maua le filemu ma le faamagaloga i lenei olaga ma le faaolataga i le olaga a sau (tagai MF&F 59:23; Mataupu Faavae o le Faatuatua 1:3). Valaaulia tamaiti e faaali lo latou alolofa ma le talisapaia o le Faaola e ala i le tausia o poloaiga.
Tala ma Faamatalaga o Talaaga
Mosaea 13:34. “E afio ifo le Atua lava”
O le upu Atua e masani lava ona faasino i lo tatou Tama Faalelagi, ae i le Mosaea 13:34 e faasino ia Iesu Keriso. Na iloa e la Au Paia o le Feagaiga Tuai ia Iesu Keriso o Ieova ma o le Atua o Aperaamo, Isaako, ma Iakopo. Na aoao mai e Elder James E. Talmage o le Korama a Aposetolo e Toasefululua e faapea, e fesoasoani ia tusitusiga paia tatou te malamalama ai i le paia o Iesu Keriso ma Lana matafaioi o se Atua:
“Tatou te tapā le pule faatusipaia mo le faaupuga faapea o Iesu Keriso o le Atua le Foafoa, o le Atua o lē na faaalia o Ia lava ia Atamu, Enoka, ma muai peteriaka ma perofeta e oo mai ia Noa; o le Atua o Aperaamo, Isaako ma Iakopo; o le Atua o Isaraelu o se nuu soofaatasi, ma o le Atua o Efaraima ma Iuta ina ua mavae le faamalepeina o le malo o Eperu; o le Atua na faaalia o Ia lava i perofeta mai ia Mose e oo atu ia Malaki; o le Atua o faamaumauga o le Feagaiga Tuai; ma o le Atua o sa Nifae. Ua tatou faamautinoa o Iesu Keriso o Ieova lava lea, le Tasi e Faavavau” (Jesus the Christ, 3rd ed. [1916], 32).
Mosaea 13:27–35. O le tulafono a Mose ma Iesu Keriso
Na aoao mai e Elder Jeffrey R. Holland o le Korama a Aposetolo e Toasefululua le ala e fesootai ai le tulafono a Mose i le talalelei a Iesu Keriso:
“E le tatau i le tagata faitau o ona po nei ona vaai atu i le tuutuuga o tulafono faa-Mose —i aso anamua po o ona po nei—ua na o se faasologa lēmalie o tapu faalelotu e mulimulita’i ai pei ni pologa (a o nisi taimi e faafitafita) e tagata ua maaa o ē e lei taliaina le Keriso ma lana talalelei. O lenei feagaiga iloga faasolopito, na tuuina mai e le aao o le Atua lava ia ma se mea e lona lua i le atoaga o le talalelei e avea o se mea e taitai atu ai tagata i le amiotonu, ae e tatau ona vaai i ai o le faupu’ega le mafaatusalia o ituaiga, atalafoia, faatusa, ma faataimuaga o Keriso. Mo lena mafuaaga sa avea ai lava (ma o loo faapena lava, i lona fatu ma le mama a’ia’i) o se taiala i le faaleagaga, o se faitotoa ia Keriso, o se ala i le tausia atoatoa o poloaiga lea e ala atu i tulafono o le tiute ma le tauagafau, e tau atu ai i tulafono e maualuluga atu o le paia e agai atu i le tino ola pea ma le ola e faavavau.
“… E taua le malamalama o le tulafono a Mose sa laualuga i lena vaitau, ma o lea na aofia ai, le tele o vaega taua o le talalelei a Iesu Keriso, lea sa i ai muamua. Sa lei fuafuaina e avea o se mea e ese mai pe tuuesea mai, ma e moni foi e le o se mea e feteenai ma le, talalelei a Iesu Keriso. O lona faamoemoega sa le mafai lava ona iai se eseesega mai le tulafono maualuga. O laua uma o le aumaia o tagata ia Keriso” (Christ and the New Covenant: The Messianic Message of the Book of Mormon [1997], 136–37, 147; tagai foi 2 Nifae 11:4; Mosaea 16:14–15).
Mosaea 14:5. O Le Fiafia e ala i le Togiola
Na molimau mai Elder M. Russell Ballard o le Korama a Aposetolo e Toasefululua i le faamalologa e mafai ona tatou maua ona o le mafatia o le Faaola i le taimi o Lana Togiola:
“E maeu le filemu, e maeu le mafanafana lea e oo mai ia i tatou mai lenei meaalofa silisili e ala mai i le alofa tunoa o Iesu Keriso, le Faaola ma le Togiola o tagata uma. …
“… E ui lava sa mama Lona soifuaga ma saoloto mai agasala, ae na Ia totogia le tau mo agasala—a oe, o au, ma tagata uma o e ua soifua mai. Sa matua maoae lava lona tiga faalemafaufau, faalelagona ma faaleagaga ia na mafua ai le puna mai o Lona toto mai pu afu uma (tagai i le Luka 22:44; MF&F19:18). Ae peitai sa puapuagatia Iesu ma le loto i ai ina ia mafai ona maua e i tatou uma le avanoa e toe faamamaina ai —e ala i lo tatou faatuatua ia te ia, salamo i a tatou agasala, ia papatisoina e ala i le pule sao o le perisitua, e ala i le mauaina o le meaalofa faamama o le Agaga Paia e ala i le faamauina, faapea ma le taliaina o isi sauniga uma e tatau ai. A aunoa ma le Togiola a le Alii, e leai ma se tasi o nei faamanuiaga e avanoa mai mo i tatou, ma e le mafai ona tatou agavaa ma saunia e mau i le afioaga o le Atua.” (“O Le Togiola ma le Taua o le Agaga e Tasi,” Ensign po o le Liahona, Me 2004, 84–85).