FAATOMUAGA i Le Tusi a Mosaea
Aisea e suesue ai lenei tusi?
I la latou suesuega o le tusi a Mosaea, o le a faitau ai le au aooga i molimau mamana i le misiona a Iesu Keriso. O le a latou aoao ai foi e uiga i tagata na laveaiina e le Alii mai le nofopologa o le agasala, pe mai saisaitiaga faaletino. E le gata i lea, o le a aoao ai foi e le au aooga le ala na aumaia ai faamanuiaga e tele i isi ona o taumafaiga amiotonu a tagata e pei o le Tupu o Peniamina, Apinati, ma Alema. I se isi itu, o le a iloa ai foi e le au aooga, ona o filifiliga sese a tagata pei o Senifa ma lona atalii le tupu o Noa, na aumaia ai taunuuga le lelei i o latou lava luga ma o latou tagata.
O ai na tusia lenei tusi?
Na tuufaatasia e Mamona ma faapuupuu ia faamaumauga a isi tusitala e fau ai le tusi a Mosaea. Ua faaigoaina le tusi ia Mosaea, o se atalii o le Tupu o Peniamina. O Mosaea o se perofeta, tagatavaai, ma se talifaaaliga, ma o le tupu sa pulea Saraemila pe tusa o le 124 T.L.M. e oo atu i le 91 T.L.M. Na faaigoa o ia i le igoa o lona tamamatua o Mosaea, lea foi na avea ma tupu i Saraemila (tagai Ominae 1:12–13, 19).
Na faaaogaina e Mamona ia faamaumauga eseese e tuufaatasi ai le tusi a Mosaea. Na ia faapuupuuina ma sii mai le faamaumauga na tausia e Mosaea i luga o papatusi tetele a Nifae, lea na auiliili ai le talafaasolopito o sa Nifae i le nuu o Saraemila (tagai Mosaea 1–7; 25–29). Na ia aumaia foi faamatalaga mai faamaumauga a Senifa, lea o loo faamatala ai le talafaasolopito o tagata o Senifa mai le taimi na latou tuua ai Saraemila seia oo ina latou toe foi (tagai Mosaea 7–22). E le gata i lea, sa sii mai foi e Mamona ma faapupuu ia vaega o tusiga a Alema, o le na faasaosaoina upu a Apinati ma tausia ai se talafaamaumau a ona lava tagata (tagai Mosaea 17:4; 18; 23–24).
Mo ai na tusia ai lenei tusi ma pe aisea foi?
E lei faapatinoina e Mamona le tusi a Mosaea i se aofia faapitoa pe ta’ua ai foi pe aisea na ia tusia ai lea tusi. Peitai, o le tusi a Mosaea e matuai tele lona sao i faamoemoega autu o le Tusi a Mamona —ia molimau atu o Iesu o le Keriso ma ia faalauiloa feagaiga a le Alii (tagai i le itulau faaulutala o le Tusi a Mamona). O le tusi a Mosaea e aofia ai saunoaga maoae e lua e uiga i le misiona a Iesu Keriso: o upu a le Tupu o Peniamina i le Mosaea 2–5 ma upu a Apinati i le Mosaea 12–16. E le gata i lea, o le tusi a Mosaea o loo faapupula faafia mai ai le taua o le osia ma le tausiga o feagaiga ma le Alii (tagai Mosaea 5:5–9; 18:5–10; 21:31–32; 24:13–15; 25:16–18; 26:20).
O anafea ma o fea foi na tusia ai?
O uluai faamaumauga na faaaoga e fai ma punavai o le tusi a Mosaea na foliga mai na tusia i le va o le 200 T.L.M. ma le 91 T.L.M. Na faapuupuu e Mamona na faamaumauga i se taimi o le va o le T.A. 345 ma le T.A. 385. E lei tusia e Mamona pe o fea na i ai o ia a o ia tusiaina lenei tusi.
O a ni elemene iloga o lenei tusi?
O le Mosaea o le uluai tusi lea i le Tusi a Mamona, o se faapuupuuga mai papatusi tetele a Nifae. O loo aumaia ai aoaoga e faatatau i tomai o se tagatavaai (tagai Mosaea 8:13–18; 28:10–17). E le gata i lea, o le tusi a Mosaea e tulaga ese i lona faamatalaga o aafiaga ma malaga a vaega eseese o sa Nifae —o i latou i le nuu o Saraemila; o i latou na pulea e Senifa, Noa, ma Limae i le laueleele o Nifae; ma i latou sa sosola ese mai ma Alema mai le laueleele o Nifae. Ina ia aoao atili e uiga i nei vaega, atonu e te manao e tagai i le vaaiga aoao o malaga i le Mosaea 7–24, o loo maua i le faaopoopoga i le faaiuga o lenei tusi lesona.
O le tusi a Mosaea o loo faamatala mai ai le tuufaatasiga o tagata na taitaia e Limae ma Alema, faatasi ai ma sa Nifae i le nuu o Saraemila (tagai Mosaea 25:1–13). O loo aumaia ai foi faamatalaga e uiga i le taitaiiga o le Ekalesia a Iesu Keriso i le laueleele o Saraemila (tagai Mosaea 25:14–24; 26). Ma le mea mulimuli, o le tusi a Mosaea o loo folasia mai ai le nofoaiga a faamasino (tagai Mosaea 29).
Otootoga
Mosaea 1–5 Ua tofia e le Tupu o Peniamina lona atalii o Mosaea e suitulaga ia te ia ma tuu atu i ai se talaaga o lana nofoaiga. Ua aoao atu e Peniamina e uiga ia Iesu Keriso, ma valaaulia lona nuu e ulu atu i se feagaiga ma le Atua.
Mosaea 6–8 Ua amata le nofoaiga a Mosaea. Ua sailia e Amona ma le 15 o isi ia tupuaga o tagata o Senifa i le laueleele o Nifae. Ua fetaiai Amona ma le Tupu o Limae, o se atalii o le atalii o Senifa, ma iloa ai le mafuaaga na nofopologa ai tagata.
Mosaea 9–17 Ua tuuina mai ai se talafaasolopito o tagata o Senifa. Ina ua maliu Senifa, sa pule ma le amioletonu lona atalii o Noa. Ua molimau atu Apinati e uiga ia Iesu Keriso ma ua uunaia le Tupu o Noa ma ona tagata ia salamo. Ua susunuina Apinati i le afi.
Mosaea 18–20 Ua salamo Alema, o se faitaulaga a le Tupu o Noa. Ua ia aoao atu le talalelei ma sosola ese ai i le vao ma i latou sa mulimuli ia te ia. Ua osofaia sa Nifae i le laueleele o Nifae e sa Lamana, ma faanofopologa ai i latou. Ua fasiotia Noa e ona tagata, ma ua suitulaga ai lona atalii o Limae.
Mosaea 21–22 Ua salamo Limae ma ona tagata. Ua laveai e le Alii i latou mai le nofopologa, ma ua taitai atu i latou e Amona i le nuu o Saraemila.
Mosaea 23–24 Ua faavae e Alema ma ona tagata le aai o Helama. Ua faanofo pologaina i latou e sa Lamana, ma ua sauaina i latou e Amulona ma ona uso, o faitaulaga a le Tupu o Noa. Na laveaiina e le Alii ia Alema ma ona tagata ma taitai atu i latou i le nuu o Saraemila.
Mosaea 25–29 Na tuufaatasia sa Nifae i lalo o le puleaga a Mosaea, ma sa taitai e Alema le Ekalesia. Na oo ina liua Alema (e masani ona faaigoa o Alema le Itiiti) ma atalii o Mosaea. A o lei maliu o ia, sa faatulaga e Mosaea le nofoaiga a faamasino.