Mosaea 2

Faatomuaga

Ina ua taufaaiuiu le soifua o le Tupu o Peniamina, sa manao o ia e toe tuuina atu lana toe saunoaga i lona nuu. O lana lauga, o loo tusia i le Mosaea 2–5, o le mataupu lea o lenei lesona ma lesona e 53–55. I le amataga o le lauga, na ia faamatalaina ai lana auaunaga i le nuu, ma faamamafaina ai lo tatou auauna atu i le Atua pe a tatou auauna atu i isi. Sa ia molimauina ai foi le tulaga fiafia o i latou o ē tausia poloaiga a le Atua.

Fautuaga mo le Aoaoga

Manatua: E mafai ona fesoasoani le aotelega lenei, pe afai e te filifili e tuuina atu se vaaiga aoao o le lauga a le Tupu o Peniamina i le amataga o le lesona lenei.

I le taufaaiuiuga o lona soifua, na saunoa atu ai le Tupu o Peniamina i tagata o lona malo i talaane o le malumalu i Saraemila. Na ia tuuina atu se faamatalaga o lana auaunaga i le nuu, ma lona lotofuatiaifo lelei i luma o le Atua, ma sa ia tuuina atu lona atalii o Mosaea e fai ma tupu fou o le nuu. I lenei lauga faaiu, lea o loo maua i le Mosaea 2–5, na faasoa atu ai e le Tupu o Peniamina ni savali e uiga i le tele o mataupu, e aofia ai le taua o le auauna atu i isi, o lo tatou nofo aitalafu e faavavau i lo tatou Tama Faalelagi, o le misiona a Iesu Keriso i la le tino ma le Togiola, o le manaomia ona tuu ese o le tagata o le lalolagi, talitonu i le Atua mo le faaolataga, foai atu o oloa e fesoasoani ai i e matitiva, tausisia o le faamagaloga o agasala, ma le avea ma atalii ma afafine o le Keriso e ala i le faatuatua ma le faia pea o galuega lelei. O se faamanatu faapitoa, Mosaea 3 o loo i ai se savali na maua e le Tupu o Peniamina mai se agelu.

Mosaea 2: 1-9 2:1–9

Sa faapotopoto aiga ma sauniuni e talia upu a le Tupu o Peniamina

Tusi fesili nei i le pito i luga o le laupapa: O ai? O fea? O le a?Aisea?

Fai i tamaiti e saili lemu i le Mosaea 2:1–6 ma vaavaai mo faamatalaga e tali ai fesili o i luga o le laupapa. A uma ona faitau, valaaulia nisi e tusi i luga o le laupapa ni faamatalaga uma latou te maua, i lalo o fesili taitasi. (Atonu e tatau ona e faamalamalama atu sa saunia tagata e talia upu a le Tupu o Peniamina e ala i le ofoina atu o taulaga e tusa ma tulafono a Mose. O le faia o nei taulaga, sa faaali atu ai e tagata o latou lotofaafetai i le Atua ma tuuto atu i latou lava ia te Ia.)

Fai i tamaiti e faitau lemu i le Mosaea 2:9, vaavaai mo upu ma fasifuaitau o loo ta’u mai ai sa manao le Tupu o Peniamina i tagata e faia e pei ona latou faalogo ai i ana upu.

Mai i upu ma fasifuaitau na outou mauaina, mata o le a se lagona o le Tupu o Peniamina i lana savali?
E tusa ai ma le vaega mulimuli o le Mosaea 2:9, o le a le mea sa talitonu i ai le Tupu o Peniamina o le a tupu pe afai e tatala e tagata o latou taliga ma loto i lana savali?
O le a le uiga o le tatala o o tatou taliga ma loto ia i latou ua valaauina e aoao mai?

Faamalosiau i tamaiti e tausia i o latou mafaufau le valaaulia a le Tupu o Peniamina a o latou suesue i lana savali ma ao latou faalogologo atu i upu a perofeta o aso e gata ai.

Mosaea 2:10–28

Na aoao mai le Tupu o Peniamina e uiga i le taua o le auauna atu i le Atua ma le auauna atu o le tasi i le isi, ma e uiga i lo tatou nofoaitalafu e faavavau i le Atua.

Faaali atu i le vasega le ata o le Tupu o Peniamina a o Lauga Atu i Lona Nuu (62298; Tusi Ata o le Talalelei [2009], nu. 74). Faamanatu i tamaiti na valaau atu le Tupu o Peniamina i lona nuu e faapotopoto ina ia ta’u atu i ai o lona atalii o Mosaea o le a suitulaga ia te ia e fai ma tupu, ma tuu atu ia i latou se “igoa, e mafai ona faailoga ese ai i latou i luga o tagata uma na aumai i fafo e le Alii le Atua mai le laueleele o Ierusalema (tagai Mosaea 1:9–12).

Faitau leotele le Mosaea 2:10–15 i le vasega. Fai i ai e faailoa mai fasifuaitau o loo faaalia ai le popolega o le Tupu o Peniamina e uiga i le auauna atu i tagata, ae le o lona lava tulaga po o sona fialauiloa. Valaaulia i latou e sii mai o latou lima i soo se taimi latou te faalogo ai i se tasi o nei fasifuaitau. A sii mai o latou lima, ona taofi lea o le faitauga ae fesili i ai e faamatala mai po o le a le mea sa latou iloa ma faaalia e uiga i le Tupu o Peniamina.

E avea o se vaega o lenei talanoaga, faasoa atu i ai le saunoaga lea mai ia Peresitene Howard W. Hunter:

“Aua nei popole tele i tulaga …. E taua le faafetai atu mo se mea ua faia. Peitai, tatou te tulimatai atu le amiotonu, ae le o le viiga; o le auauna atu, ae le o le tulaga.” (“I Tamaitai o le Ekalesia,” Liahona, Ian. 1993, 96).

Valaaulia le vasega e faitau lemu le Mosaea 2:16–17 ma faailoa mai mea na manao le Tupu o Peniamina i lona nuu e aoao. Fesoasoani ia latou iloa a tatou auauna atu i isi tagata, ua tatou auauna lava lea i le Atua. Tusi le faamatalaga lea i luga o le laupapa. Faasino i ai o le Mosaea 2:17 o se mau tauloto. Atonu e te manao e fautuaina tamaiti e make le mau lea i se ala e iloagofie ai ina ia faigofie ona latou sueina.

Valaaulia tamaiti e mafaufau i taimi na latou auauna atu ai i isi tagata.

Ina ua e tuuina atu lea auaunaga i isi, na faapefea la ona e auauna atu ai foi i le Atua?
O anafea na faamanuiaina ai lou olaga e isi tagata e ala i le auaunaga? Ina ua latou auauna atu ia te oe, na faapefea la ona latou auauna atu ai foi i le Atua?

Valaaulia ni tamaiti e feauaua’i i le faitauina leotele mai le Mosaea 2:18–24, 34.

Aisea e faasino ai e le Tupu o Peniamina ia te ia lava ma lona nuu o ni “auauna le aoga”? (Atonu e manaomia ona e faamalamalama e maua e tagata ni faasiliga pe a sili atu mea latou te maua nai lo mea latou te tuuina atu. O i tatou o ni auauna le aoga i lo tatou Tama Faalelagi, aua o le tau o faamanuiaga Na te tuuina mai ia i tatou o le a matua sili atu e le aunoa nai le tau o le auaunaga Na te mauaina mai ia i tatou.)
O a faamanuiaga ua e maua e te lagona ai lou nofoaitalafu i le Atua?
Aisea e taua ai lo tatou iloa tatou te “nofoaitalafu e faavavau” i le Atua? (O tali e mafai ona aofia ai, a tatou iloa o loo tatou nonofoaitalafu i le Atua, ona faateleina lea o lo tatou lotofaafetai, ua tatou mananao e tausi poloaiga, ma tatou te mananao atili ai e auauna atu i isi.)

Faamatala i le Mosaea 2:34, o le upu tuuina atu o lona uiga o le avatu po o le auina atu. Valaaulia tamaiti e mafaufau pe faapefea ona latou “tuuina atu i le [Tama Faalelagi] mea uma [latou] te maua.” Molimau atu a tatou tausia poloaiga a le Atua ma saili e tuuina atu ma le loto faamaoni ni auaunaga, Na te faamanuiaina i tatou.

Mosaea 2:29–41

Na apoapoai atu le Tupu o Peniamina i lona nuu ina ia usiusitai i le Atua

Tusi le FAAETEETE i luga o le laupapa. Fai i tamaiti e faamatala mai taimi na latou vaai ai i se faailoga na faaaoga ai le upu lea pe na ta’u mai ai le manatu lea. Faamaoti i ai, o na lapataiga e mafai ona puipuia i tatou pe laveaiina ai o tatou ola.

Valaaulia le vasega e faitau lemu le Mosaea 2:32–33, 36–38 ma vaavaai mo mea na ta’u atu e le Tupu o Peniamina i lona nuu e faaeteete mai ai. Atonu e tatau ona e faamatalaina i le Mosaea 2:33, o le upu mala e faasino i le faanoanoa ma le le fiafia.

O a lapataiga na tuuina atu e le Tupu o Peniamina i lona nuu?
E mafai faapefea ona tatou iloa pe ua amata ona tatou mulimuli i le agaga sese? Aisea e taua ai le vave iloa o lena mea?
E tusa ai ma le Mosaea 2:38, o a taunuuga e oo mai ia i latou e oti i a latou agasala?

Atonu e te manao e faamamafa atu aoaoga o i le Mosaea 2:36 e faapea, o se tagata i lana lava amio, e mafai ona aveesea mai le Agaga o le Alii. Na ta’ua e Elder David A. Bednar o le Korama a Aposetolo e Toasefululua le taua o le iloa o le taimi tatou te ono o ese ai mai le Agaga:

“E tatau ona tatou ….taumafai e iloa pe a tatou ‘aveese [i tatou lava] mai le Agaga o le Alii, ina ia leai sona nofoaga i totonu ia [i tatou] e taitai ai [i tatou] i ala o le poto ina ia mafai ai ona [tatou] manuia ai, ma uluola, ma faasaoina.” (Mosaea 2:36). …

“… Afai o se mea tatou te mafaufau i ai, vaai i ai, faalogo i ai, pe fai foi tatou te taumamao ai mai le Agaga Paia, o lona uiga ua tatau loa ona taofia le mafaufau i ai, vaai i ai, faalogologo i ai, po o le faia o lena mea. Mo se faataitaiga, afai o le mea o loo faamoemoe e faafiafia ai, e tavavae ese mai ai i tatou mai le Agaga Paia, ua manino mai ai o na ituaiga o faafiafiaga e le mo i tatou. Talu ai e le mafai ona mafuta le Agaga ma mea faatufanua, o mea paaa, pe le tausaafia foi, o lona uiga e manino lava e le mo i tatou foi na mea. Aua tatou te tuliesea ai le Agaga o le Alii pe a tatou auai i gaoioiga ua tatou iloa e tatau ona tatou lafoaia, o lona uiga e le mo i tatou na ituaiga o mea.” (“Ina Ia i ai Pea Lona Agaga e Faatasi ma i Tatou,” Ensign po o le Liahona, Me 2006, 30).

O le a le mea na ta’ua e Elder Bednar tatou te mamao ese ai mai le Agaga Paia?
E mafai faapefea ona tatou iloa le taimi ua tatou taumamao ese ai mai le Agaga Paia?

Tusi le MANATUA ma le MAFAUFAU i luga o le laupapa i tafatafa o le FAAETEETE.

Valaaulia se tamaitiiti e faitau leotele le Mosaea 2: 40–41 Fai i le vasega e faailoa atu po o le a le mea na manao le Tupu o Peniamina i lona nuu e mafaufau i ai ma pe o le a foi le mea sa manao latou te manatua. A tali mai tamaiti, e mafai ona e faamamafa atu i ai aoaoga a le Tupu o Peniamina e ala i le tusia o mea moni nei i luga o le laupapa: A tatou tausia poloaiga, o le a faamanuiaina i tatou faaletino ma le faaleagaga.

O anafea na e molimauina ai pe iloaina le fiafia e maua mai le usiusitai i poloaiga a le Alii?

Molimau atu i le moni o mea na talanoaina i le aso e tamaiti o le vasega. Faaiu i le fautuaina o tamaiti e faatutu ni sini patino ia usitai atili i se vaega e faigata mo i latou pe saili foi e faaleleia atili se vaega o loo ta’ua i le Alualu i Luma o le Tagata Lava Ia (mo tamaitai talavou) po o le Tiute i le Atua (mo alii talavou).

Mau Tauloto—Mosaea 2:17

Valaaulia tamaiti e faitau le Mosaea 2:17, Mataio 22:36–40, ma leMataio 25:40. O fuaitau i le Mataio e fesoasoani e faailoa mai ai le aoaoga faavae, tatala mai ai le malamalama, ma faamanino ai le uiga o le Mosaea 2:17. Atonu e te manao e fautuaina tamaiti e fai se filifili o mau e ala i le tusia o le Mataio 22:36–40 i autafa o le Mosaea 2:17, Mataio 25:40 i autafa o le Mataio 22:36–40, ma le Mosaea 2:17 i autafa o le Mataio 25:40.

Fesili i ni nai tamaiti e faamatala atu taimi na latou lagonaina ai o loo latou auauna atu i le Atua ina ua latou auauna atu i isi tagata.

Valaaulia tamaiti e auauna le tasi i le isi a o lei oo i le isi vasega o le seminare. Fautuaina ia sauniuni e faasoa mai o latou aafiaga i le mea lea (ae ia mautinoa ua latou malamalama e le faapea e tatau ona latou faasoa maia ni aafiaga e patino ia i latou lava pe le faalauaiteleina).

E mafai foi ona e lu’iina tamaiti e tauloto le Mosaea 2:17 ae tou te lei toe feiloai i le isi vasega.

Molimau atu a tatou auauna atu i isi ma o tatou loto faamaoni, ua tatou auauna atu lava lea i le Alii.

Manatua: Ona o le natura ma le umi o lenei lesona, atonu ai o le a e manao e faaaoga le gaoioiga lea i se isi aso, pe a lava le taimi.

Tala ma Faamatalaga o Talaaga

Mosaea 2:33, 38–39. “Faasalaga e fa’avavau” “afi le ma tineia,” ma le “mafatia e le gata”

I se lapataiga e uiga i taunuuga o le fouvale i le Atua, na faaaoga ai e le Tupu o Peniamina fasifuaitau o le “faasalaga e faavavau” (Mosaea 2:33), “afi le matineia” (Mosaea 2:38), ma le “mafatia e le gata” (Mosaea 2:39). Ina ia maua se malamalama sili atu i nei faaupuga, tagai i upu a le Alii i le Mataupu Faavae ma Feagaiga 19:6–12.