1 Nifae 20–2 Nifae 3 (Iunite 5)

Sauniuniga o Anomea mo le Faiaoga o Suesuega e Faia i le Aiga

Aotelega o Lesona o Suesuega e Faia i le Aiga i Aso Taitasi

O le aotelega lenei o aoaoga faavae ma mataupu faavae e aoao e tamaiti aoga a o latou suesue le 1 Nifae 20 e oo i le 2 Nifae 3 (iunite 5) e le o faamoemoe ina ia aoao atu o se vaega o lau lesona. O le lesona e te aoao atu mo le iunite 5 ua na ona taulai atu i ni nai vaega o aoaoga faavae ma mataupu faavae nei. Mulimuli i uunaiga a le Agaga Paia a o e iloiloina manaoga a au tamaiti aoga.

Aso 1 (1 Nifae 20–22)

E pei ona sii mai e Nifae nisi o valoaga a Isaia i ona uso, ua aoaoina e tamaiti aoga e valaaulia e le Alii i latou sa le usiusitai ina ia salamo ma toe foi atu ia te Ia. Ua faaali mai ai ia i tatou e lenei mea e alofa le Alii ia i tatou ma o le a Ia le faagaloina lava i tatou. Ua aoaoina foi e tamaiti aoga e ui o le a faataapeapeina Isaraelu ona o le le usiusitai, ae ua folafola mai e le Alii e toefuatai mai le talalelei ma faapotopoto mai Isaraelu i aso e gata ai.

Aso 2 (2 Nifae 1)

Sa suesue e tamaiti aoga ia aoaoga mulimuli a Liae i lona aiga a o lei maliu o ia. Na faamamafa mai e Liae e faapea e faamanuiaina e le Alii i tatou pe a tatou tausia Ana poloaiga, ma Na te taofia faamanuiaga pe a tatou le tausia Ana poloaiga. Ina ua silafia e Liae o le a maliu o ia, na apoapoai atu o ia i lona aiga ina ia mulimuli ia Nifae. Sa vaaia e tamaiti aoga e faapea a tatou mulimuli ia i latou ua valaauina e le Atua e taitai i tatou, o le a faamanuiaina i tatou i faamanuiaga faaleagaga ma le saogalemu.

Aso 3 (2 Nifae 2)

Sa faamalamalama atu e Liae i lona atalii o Iakopo ni upumoni taua se lua: (1) e faapea o le Pa’ū o Atamu ma Eva o se vaega taua o le fuafuaga o le fiafia a le Tama Faalelagi ma le (2) e ala i le Togiola, ua togiola ai i tatou e Iesu Keriso mai aafiaga o le Pa’ū ma ofo mai ai le togiolaina o a tatou agasala. Sa faamalamalama mai e Liae e faapea, o se taunuuga o le Pa’ū ma le Togiola, ua tatou saoloto ai e filifili le saolotoga ma le ola e faavavau po o le faatagataotauaina ma le oti (tagai i le 2 Nifae 2:27).

Aso 4 (2 Nifae 3)

I le saunoa atu ai i lona atalii o Iosefa, sa fesootai atu ai e Liae le valoaga a Iosefa o Aikupito o loo maua i papatusi apamemea. Na muai tau mai e lenei valoaga e faapea na faatu ae e le Alii le Perofeta o Iosefa Samita ia fesoasoani e aumai le Toefuataiga o le talalelei. Sa talosagaina tamaiti aoga e tusi i a latou api talaaga mo le suesueina o tusitusiga paia pe na faapefea ona avea le sāo a le Perofeta o Iosefa Samita o se mea aoga tele ia i latou.

Faatomuaga

O lenei lesona ua faamoemoe e fesoasoani i tamaiti aoga ina ia malamalama i faamoemoega e faavavau o le Atua. Na silafia e Liae e mafai e ana fanau ona faia ni filifiliga ia o le a taitai atu ai i latou i le olioli, saolotoga, ma le ola e faavavau pe afai lena latou te malamalama ma talitonu i aoaoga faavae autu—e pei o le Pa’ū, le Togiola a Iesu Keriso, faitalia, ma le usiusitai (tagai i le 2 Nifae 2:25, 27). Uunaia tamaiti aoga ia filifili le ola e faavavau ina ia mafai ona “siomia [i latou] e faavavau i aao o [le] alofa [o le Atua]” (2 Nifae 1:15), e pei ona oo ia Liae.

Fautuaga mo le Aoaoga

2 Nifae 1–2

A o lei maliu o ia, na apoapoai atu Liae i lana fanau ina ia tausi poloaiga a le Atua ma aoao atu ia i latou aoaoga faavae autu o le ata o le faaolataga

Amata i le tuu atu i tamaiti aoga e faitau le fuaiupu mulimuli o le 2 Nifae 3:25 (“Ia e manatua upu a lou tama a oti”). Fai atu ia i latou pe ono mafai faapefea ona suia lo latou gauai atu i le fautuaga a se tagata o le aiga pe afai latou te iloa o le a maliu lena tagata.

E mafai ona fesoasoani le gaoioiga lenei i tamaiti aoga ia malamalama atili i upumoni ia na faamamafa atu e Liae i ana toe upu i lona aiga. O le a faatagaina ai foi i latou e fefaasoaai le tasi ma le isi i le auala e mafai ai e nei upumoni ona fesoasoani ia i latou e mulimuli i le fuafuaga a le Tama Faalelagi mo lo latou faaolataga.

Atofa atu ia fuaitau o tusitusiga paia taitasi nei i tamaiti aoga taitoatasi po o ni paga: 2 Nifae 1:16–20; 2 Nifae 2:6–10; 2 Nifae 2:19–20, 22–25; ma le 2 Nifae 2:11–13, 27–29. (Afai e itiiti ifo ma le toafa tamaiti, e mafai ona e fetuunaia lenei gaoioiga e ala i le atofa atu i tamaiti aoga le sili atu ma le tasi le fuaitau o tusitusiga paia pe ala foi i le filifilia o ni fuaitau laiti ifo e talanoaina.)
A o suesueina e tamaiti aoga nei fuaitau, tuu atu ia i latou e tali ia fesili nei i a latou api talaaga mo le suesueina o tusitusiga paia. (E mafai ona e mafaufau e tusi ia fesili i luga o le laupapa.)
1. O a upumoni autu na aoao atu e Liae?
2. Aisea e taua ai nei upumoni mo lo tatou manuia e faavavau?
A maea ona tuu atu i tamaiti aoga le taimi e faamaea ai a latou galuega atofaina, valaaulia tamaiti aoga taitasi po o ni paga e lipoti mai ni mea sa latou mauaina. Uunaia le toatele o tamaiti aoga e mafai ai e faasoa mai mea na latou mauaina ma pe aisea e taua ai ia i latou.

A maea le gaoioiga, tusi le upumoni lenei i luga o le laupapa: O le Pa’ū o Atamu ma Eva o se vaega taua o le fuafuaga o le fiafia a le Tama Faalelagi.

Faasoa atu le faamatalaga lenei a Peresitene Iosefa Filitia Samita:

“Na faia e Atamu tau lava o le mea na tatau ona ia faia. Na ia ‘ai lena fua mo se mafuaaga lelei, ma o lena mea o le tatalaina lea o le faitotoa e aumai ai oe ma au ma tagata uma lava i lenei lalolagi. …

“… Ana le seanoa Atamu, ou te le i ai iinei; e te le i ai iinei; ae o le a tatou faatalitali pea i le lagi o ni agaga” (i le Conference Report, Oke. 1967, 121–22).

Fai atu i tamaiti aoga fesili nei:

O a nisi o taunuuga o le Pa’ū lea na faamatalaina e Liae i le 2 Nifae 2:21–24?
E faapefea ona tatou mafaia e ala i nei taunuuga ona alualu i luma e tusa ai ma le fuafuaga a le Tama Faalelagi mo lo tatou faaolataga?

Faaopoopo atu le upumoni lenei i luga o le laupapa: E ala mai i le Togiola, ua togiolaina ai e Iesu Keriso i tatou mai le Pa’ū ma ofo mai ai le togiolaina o a tatou agasala.

Ina ia fesoasoani i tamaiti aoga ia maua se malamalama loloto o lenei upumoni, tuu atu i se tamaitiiti aoga e faitau leotele mai le faamatalaga lenei a Elder Joseph B. Wirthlin o le Korama a Aposetolo e Toasefululua:

“O le Togiola a Iesu Keriso, o se faatinoga o le alofa le pona, ua faatoilaloina ai aafiaga o le Pa’ū ma maua ai le ala mo tagata uma e toe foi atu ai i le afioaga o le Atua. I le avea ai ma se vaega o le Togiola, na faatoilalo ai e le Faaola le oti faaletino ma maua ai e tagata uma o le fanau a le Atua le tino ola pea e ala i le Toetu. Na ia faatoilaloina foi le oti faaleagaga ma mafai ai ona maua le ola e faavavau, le soifuaga lea o loo soifua ai le Atua ma o le meaalofa aupito sili lea o meaalofa uma a le Atua” (“Kerisiano i Talitonuga ma Mea e Fai,” Liahona, Ian. 1997, 84).

Fesili atu i tamaiti: O a nisi o faamanuiaga o le Togiola?

Ina ia fesoasoani i tamaiti aoga ia malamalama i le taua o le faitalia i le fuafuaga a le Tama Faalelagi, faitau le faamatalaga lenei a Elder Neal A. Maxwell o le Korama a Aposetolo e Toasefululua:

“A aunoa ma le i ai o filifiliga, aunoa ma lo tatou saolotoga e filifili ai ma aunoa ma le faafeagai, e leai lava se olaga moni. … O le mea moni lava e le mafai ona tatou tuputupu ae faaleagaga pe fiafia moni ai iina sei vagana ma seiloga tatou te faaaogaina ma le atamai a tatou filifiliga lelei” (One More Strain of Praise [1999], 80).

Tusi le mataupu faavae lenei i luga o le laupapa: Ua tatou saoloto e filifili le saolotoga ma le ola e faavavau po o le faatagataotauaina ma le oti.

Tuu atu i tamaiti aoga e sue i le galuega atofaina 4 i lalo o le aso 3 i a latou api talaaga o le suesueina o tusitusiga paia. Valaaulia nisi o i latou e faamalamalama mai ni mea ua latou aoaoina e uiga i le faitalia mai le 2 Nifae 2:26–29.

Faitau leotele le saunoaga lenei a le Perofeta o Iosefa Samita:

“Ina ia maua le faaolataga e le gata e tatau ona tatou faia ni mea, ae o mea uma ua poloaiina e le Atua” (Aoaoga a Peresitene o le Ekalesia: Iosefa Samita [2007], 161).

Ina ia fesoasoani i tamaiti aoga ia malamalama i le taua o le usiuistai, e mafai ona e tuuina atu ia fesili nei:

Aisea e te manatu ai na faamamafa atu e Liae le usiusitai i lana fautuaga faaiu i lona aiga a o lei maliu o ia?
O a ni aafiaga na e mauaina sa fesoasoani ia te oe e iloa ai e faamanuiaina i tatou e le Alii pe a tatou tausia Ana poloaiga, ma Na te taofia faamanuiaga pe a tatou le tausia Ana poloaiga? (Faaopoopo atu lenei upumoni i le lisi o i luga o le laupapa.)

Ina ia faaiu ai lenei lesona, faitau le saunoga lenei a Peresitene Boyd K. Packer, Peresitene o le Korama a Aposetolo e Toasefululua:

“O le usiusitai o se vailaau mamana faaleagaga. Ua latalata atu lava i le avea ai ma se vaifofo mo mea uma” (“Pulu Pasama o Kiliata,” Liahona, Ian. 1988, 17).

Faasoa atu lau molimau e uiga i le Alofa o le Atua mo au tamaiti aoga ma Lona finagalo ina ia fesoasoani ia i latou e faatoilalo ia aafiaga o le Pa’ū ma maua le ola e faavavau.

Iunite e Sosoo ai (2 Nifae 4–10)

Ina ua mavae le maliu o Liae, sa toe saili foi Lamana ma Lemuelu e aveese le ola o Nifae. O le a le lapataiga na tuu atu e le Alii na faasaoina ai le ola o Nifae? Ma le isi, o le a le mea semanu e tupu i o tatou tino ma agaga pe ana leai le Togiola? O le a maua e tamaiti aoga ia tali i lenei fesili i le 2 Nifae 9:7–9.