Alema 8

Faatomuaga

Ina ua uma ona taliaina e le toatele o tagata le savali a Alema i Saraemila, Kitiona, ma Meleka, na teena e le nuu o Amonaea ia Alema ma tuliesea o ia mai lo latou aai. A o mafatia Alema ona o le amioleaga o nei tagata, na toe afio ifo ia te ia le agelu lava lea na faaali ane ia te ia ma atalii o Mosaea. Na faaamuia le agelu ia Alema mo lona faamaoni ma poloaiina o ia e toe foi atu i le aai o Amonaea. Na usitaia ma le faamaoni e Alema le poloaiga a le Alii, ma sa tofia e le Alii ia Amoleka e fesoasoani ia te ia i lana talaiga. Na o atu Alema ma Amoleka e aoao atu le nuu o Amonaea, faatumulia e le Agaga Paia ma le mana e faia ai le galuega a le Alii.

Fautuaga mo le Aoaoga

Alema 8:1–6

O le toatele o tagata i Meleka na taliaina le savali a Alema ma papatisoina.

Fai i tamaiti e sii i luga o latou lima pe afai na i ai se tagata o le latou aiga po o se uo na ave se misiona mo le Ekalesia. Fai i ni tamaiti se toalua pe toatolu foi e faasoa mai se aafiaga na faamatalaina ia i latou e se tagata o lo latou aiga po o se uo e faailoa mai ai le lagona o faifeautalai pe a taliaina le latou savali. (Atonu e te manao foi e mafaufau e valaaulia ni tamaiti aoga e faamatala mai ni taimi na talia ai e se tagata a latou taumafaiga e faasoa atu le talalelei. Atonu e te manao foi e faasoa atu sou lava aafiaga.)

Fai i tamaiti e faitau le leoa le Alema 8:1–5. Fai i ai e faailoa mai ia nuu e tolu ia na talai i ai e Alema le talalelei. Tusi igoa o nuu nei e tolu i luga o le laupapa. (Saraemila, Kitiona, ma Meleka.)

O a ni taunuuga o le talaiga a Alema i nei nuu e tolu? (Atonu e te manao e fautua i tamaiti e tagai i aotelega o mataupu o le Alema 6–8 e fesoasoani ai ia i latou i le taliina o lenei fesili.)

Faailoa atu e ui lava na taliaina e tagata o nei nuu le savali a Alema, ae e lei faapea ai la sa lei aunoa lana galuega faafaifeautalai ma ni faafitauli.

Alema 8:7–32

Ina ua uma ona teenaina ia Alema i Amonaea, na poloaiina o ia e le Alii ina ia toe foi

Fai i tamaiti pe na vaai tagata o o latou aiga po o uo ia na galulue faafaifeautalai o teena e ni tagata le savali o le talalelei. Mafaufau e valaaulia ni nai tamaiti e faamatala mai le auala na tali atu ai tagata o o latou aiga po o uo i ia ituaiga aafiaga.

Valaaulia ni nai tamaiti aoga e feauauai i le faitauina leotele mai o le Alema 8:7–14. Uunaia le vasega e mafaufau e uiga i le tulaga na ono i ai lagona o Alema a o ia taumafai e aoao atu le talalelei i le nuu o Amonaea. A o faitau e tamaiti aoga nei fuaiupu, fai atu ia i latou e fai ma taofi e tali ia fesili e pei o fesili nei:

O le a le mea o tau mai e nei fuaiupu ia i tatou e uiga i le tulaga faaletagata o Alema? (Tagai Alema 8:8–10.)
Faamata e faapefea ona e tali i le tausiga na mauaina e Alema? (Tagai Alema 8:11–13.)
O faapefea ona tutusa pe eseese foi le tali mai a Alema i le tulaga e semanu e te ono oo i ai i se tulaga lava lea e tasi. (Tagai Alema 8:14. Atonu e te manao e fautua atu o le filifiliga a Alema e faaauau pea le galuega a le Alii i totonu o le aai o Arona na faaalia mai ai lona faatuatua i le Alii ma lona le fiu.)

Faailoa atu e ui o tatalo a Alema mo le nuu o Amonaea na faamaoni (tagai Alema 8:10), ae e lei tali vave mai ana talosaga. (Na salamo mulimuli ane nisi tagata o le nuu o Amonaea. Tagai i le Alema 14:1.)

Faitau le saunoaga lenei a Elder Russell M. Nelson o le Korama a Aposetolo a Toasefululua:

Ata

Elder Russell M. Nelson

“Ua ou iloaina, e i ai nisi taimi, e foliga mai ai e le tali maia nisi o a tatou tatlo faatauanau. Tatou te maofa, ‘Aisea?’ Ou te iloaina lena lagona! Ua ou iloaina ia popolega ma loimata o taimi faapena. Ae, ua ou iloaina foi o a tatou tatalo e leai se taimi ua le amanaiaina ai. E le faapea ua le talisapaiaina lo tatou faatuatua. Ua ou iloaina e sili atu le lautele o le silafaga a se Tama Faalelagi atamai nai lo tatou. E ui ua tatou iloa o tatou faafitauli ma tiga faaletino, ae ua Ia silafia lo tatou alualu i luma e le iu ma lo tatou malosiaga” (“Iesu Keriso—o le Fomai o Fomai,” Ensign po o le Liahona, Nov. 2005, 86).

O le a se mea na aoao mai e Elder Nelson e mafai ona fesoasoani ia i tatou ia maua le faatuatua e tusa lava pe e le o tali vave mai a tatou tatalo amiotonu pe i le auala tatou te faamoemoe i ai pe mafaufauina?

Valaaulia se tamaitiiti aoga e faitau leotele mai le Alema 8:14–17. Fai i le vasega e mulimuli i le faitauga, tagai mo savali faamafanafana i upu a agelu ma mo faatonuga atonu na faigata ia Alema le usitai i ai.

Na faapefea ona avea upu a agelu i le Alema 8:15 ma faamafanafanaga ia Alema? O faapefea ona avea upu a agelu ma faamafanafanaga ia te oe?
Aisea atonu na faigata ai ia Alema le usiusitai i lenei tulaga?

Fai i tamaiti e faitau le Alema 8:18, tagai mo le upu o faamatalaina ai le auala na tali atu ai Alema i le faatonuga a le Alii ina ia toe foi i le aai o Amonaea. (Atonu e te manao e fautuaina tamaiti e faailoga le upu vave.)

O le a se mea e mafai ona tatou aoaoina e uiga ia Alema mai le faamatalaga sa vave ona ia toe foi i Amonaea?

Faasoa atu le saunoaga lenei a Peresitene Henry B. Eyring o le Au Peresitene Sili. Fai i tamaiti e faalogo i le auala e mafai ona tatou manuia ai mai le usitai vave i le Alii:

Ata

Peresitene Henry B. Eyring

“E tusa lava pe o le a le tele o lo tatou faatuatua i le taimi nei e usitai ai i le Atua, e manaomia pea ona tatou faamalolosia atili ma faafouina pea e le aunoa. E mafai ona tatou faia lena mea e ala i le filifili nei e tali vave atu e usitai ma naunau atili e tumau. O le aoao ina ia vave amata ma ia tutumau ai, o ki ia i sauniuniga faaleagaga. …

“… Ua tuuina mai e se Tama Faalelagi alofa ma Lona Alo Pele ia i tatou uma le fesoasoani e mafai ona La’ua tuuina mai tatou te manumalo ai i tofotofoga o le olaga ua i o tatou luma. Ma e tatau ona tatou filifili e usitai ona faia ai lea. O aluga o taimi, faapea ma a tatou filifiliga i aso taitasi, [tatou] te atiina ae ai le faatuatua tatou te manumalo ai i tofotofoga o le usiusitai. E tatau ona tatou filifili i le taimi lenei e vave faataunuu soo se mea e finagalo ai le Atua ia i tatou.Ma e tatau ona tatou filifili e tutumau i tofotofoga laiti o le usiusitai, lea e atiina ae ai le faatuatua tatou te manumalo ai i tofotofoga sili atu, ia o le a faapea lava ona oo mai” (“Sauniuniga Faaleagaga: Ia Vave Amata ma Ia Tumau Ai,” Liahona, Nov. 2005, 38, 40).

E tusa ai ma le saunoaga a Peresitene Eyring, o le a se mea e tupu i lo tatou faatuatua pe a tatou filifili e usitai vave i le Alii?
O ana fea na e lagona ai le faamalosia o lou faatuatua i le Alii ona o lou usiusitai vave ma le le maluelue?

Mo tulaga taitasi nei, fesili i tamaiti pe o faapefea ona faamanuiaina i latou i le vave ona usiusitai:

A o aluese atu se tamaitai talavou mo le aoga, sa fai atu lona tina ia te ia e ofu se ofu aluga sili ona taugafau pe talafeagai.
I se faatalanoaga ma lona epikopo, sa luiina ai se ositaulaga fou ina ia mauaina se Taui o le Tiute i le Atua.
Na lagona e ni faifeautalai se toalua le lofituina i le taimi o le polokalamaina o la fuafuaga o aso uma e asia se aiga ua le o toe toaaga mai lea e le auai le tina i le Ekalesia.

Faamatala atu na faamanuiaina e le Alii ia Alema mo lona usiusitai vave. Valaaulia ni tamaiti aoga se toatolu i luma o le vasega e faatino se faatinoga o le feiloaiga a Alema ma Amoleka i le Alema 8:19–26. Fai i se tamaitiiti se toatasi e faitau ia upu a Alema, ao o se isi tamaitiiti ia upu a Amoleka, ma tuu atu i se tamaitiiti lona tolu e faamatalaina le tala. Uunaia ia tamaiti e faitau a latou vaega ma ni lagona latou te manatu na oo ia Alema ma Amoleka.

A uma le faatinoga, fesili atu:

Na faapefea ona faamanuiaina e le Alii ia Alema mo lona usiusitai?
Na faapefea ona avea le mea na tupu ia Alema ma Amoleka o se faailoga o le faafofogaina ma ma taliina mai e le Alii o tatalo a Alema? (Tagai i le Alema 8:10.)
O a mataupu faavae e mafai ona tatou aoaoina mai aafiaga o Alema? (E mafai ona fautua mai e tamaiti ni mataupu faavae eseese. O se tasi o tali talafeagai e faapeape a tatou tali vave atu i le afioga a le Alii, o le a Ia fesoasoani ia i tatou e usitaia Ana poloaiga.)

Valaaulia tamaiti e faitau le leoa le Alema 8:27–32, suesue mo nisi faamaoniga afai tatou te faamaoni ma filiga, o le a fesoasoani le Alii ia i tatou e usitaia Ana poloaiga.

O a luitau na fetaiai ai ma Alema ma Amoleka ao la o atu e aoao atu ia tagata? (Tagai i le Alema 8:28–29. Na faateleina le amioleaga o tagata, ma sa poloaiina e le Alii ia Alema ma Amoleka e alaga atu ia i latou le salamo.)
Na faapefea ona fesoasoani le Alii ia Alema ma Amoleka? (Tagai i le Alema 8:30–31. Sa faatumulia i laua i le Agaga Paia ma sa maua le mana paia e puipuia i laua. Atonu e te manao e fautuaina tamaiti aoga e faailoga ia faamatalaga o nei faamanuiaga i totonu o a latou tusitusiga paia.)
O anafea na e lagona ai sa fesoasoani atu le Alii ia te oe ina ua e faamaoni ma filiga?

Fai i tamaiti e tusi le faamatalaga lenei mai ia Peresitene Howard W. Hunter i totonu o api o le vasega po o api talaaga mo le suesueina o tusitusiga paia:

“Ioe, ia sili atu le fiafia o le Alii i se tautinoga e le suia e usiusitai i lana fautuaga, nai lo se isi lava mea” (“Tautinoga I Le Atua,” Liahona, Ian. 1983, 114).

Ona tuu atu lea ia i latou o ni nai minute e tusi ai se tali o le fesili lenei:

O le a se mea o le a faia i le asō e faaali atu ai i le Tama Faalelagi o le a vave ona e usitaia Lana fautuaga ma auauna atu ma le faamaoni ma le filiga ia te Ia?

Molimau atu i faamanuiaga tatou te mauaina pe a tatou mulimuli ma le faamaoni i le fautuaga a le Alii. Atonu e te manao foi e tuuina atu i tamaiti aoga se avanoa e faasoa atu ai a latou molimau e uiga i lenei upu moni.

Tala ma Faamatalaga o Talaaga

Alema 8:10. “Tatalo malosi”

O le fasifuaitau “tatalo malosi” o loo faailoa mai ai se fagatua mamana ma faatumulia i le faatuatua ma le Atua. Na fautuaina mai e Elder Joseph B. Wirthlin o le Korama a Aposetolo e Toasefululua ni auala e mafai ona tatou iloiloina ma sailia ai le faaleleiga o le malosi o a tatou tatalo:

“E mafai ona ou fai atu ia te outou i le asō e manatunatu i le taua o a outou tatalo? O le a le latalata o o outou lagona i lo outou Tama Faalelagi? Pe o outou lagonaina le taliina mai o a outou tatalo? Pe o outou lagonaina o taimi tou te faaaluina i tatalo e faamauoaina ma siitia ai lou agaga? O i ai se avanoa mo le faaleleia?

“E tele mafuaaga e leai ai se mana i a tatou tatalo. O nisi taimi ua avea ma faiga masani. E oo lava ina leai se uiga i a tatou tatalo pe afai tatou te faia pea lava pea upu lava e tasi i auala lava e tasi ma avea ai upu e pei o se tauloto nai lo o se talanoaga [e fesootai ai lagona]. O le mea lea na faamatalaina e le Faaola o le ‘tautu i upu’( Mataio 6:7). O ia tatalo faapea, na Ia fetalai ai, o le a le faafofogaina. …

“Pe i ai ea ni taimi e te lagonaina ai e tutusa lava au tatalo? Pe ua e tatalo ea e aunoa ma le mafaufau i ai, e solo mai lava upu e pei o faasolo mai e se masini? Pe i ai ni taimi e te augata ai a o e tatalo?

“O tatalo e le o alu tele i ai sou mafaufau o le a le manaomia ai foi se taulaiga mai lo tatou Tama Faalelagi. Afai ua e oo i se tulaga ua fai ai au tatalo ona o se masani, tuu loa lau mea lena e fai ae mafaufau. Manatunatu mo se taimi i mea e te matuai faafetai ai lava” (“Improving Our Prayers,” [Lauga i Faigalotu a le Iunivesite o Brigham Young , Ian. 21, 2003], 2, speeches.byu.edu).