Alema 38

Faatomuaga

Na galulue faatasi Sepulona ma lona tama, o Alema, o se faifeautalai i totonu o sa Sorama (tagai Alema 31:7). Ina ua maea lenei misiona, na faaalia e Alema lona fiafia i le faaaliga e Sepulona o lona tumau mausali ma le faamaoni ao mafatia ai i sauaga. Na molimau foi Alema ia Sepulona e uiga i le mana o le laveai a le Faaola ma tuuina atu se fautuaga e faatatau i taumafaiga faifaipea a Sepulona i le aoao atu o le talalelei.

Fautuaga mo le Aoaoga

Alema 38:1–3

Na faaalia e Alema le fiafia i le faamaoni o Sepulona

Afai sa e fai i tamaiti e fai le gaoioiga faatatau e fai i le fale i le faaiuga o le lesona ua tea, toe faamanatu atu ia i latou e uiga i fesili e lua lea na e valaauliaina i latou e fesili atu i o latou matua po o se tasi o tagata matua faamoemoeina:

Na faapefea ona fesoasoani le usiusitai i poloaiga a le Atua ia te oe?
O le a sau fautuaga mo au ina ia fesoasoani ai ia te au ia atili ai ona ou atamai ao ou talavou?

Fai i tamaiti e lipoti mai i a latou aafiaga faatasi ai ma se gaoioiga. A uma ona faasoa mai tamaiti, fesili atu:

Na faapefea ona uunaia e lenei aafiaga lou naunau ina ia tausia poloaiga a le Alii?

Faamalamalama atu o le Alema 38 o loo faamaumau ai le fautuaga a Alema i lona atalii o Sepulona. Valaaulia se tamaitiiti aoga e faitau leotele le Alema 38:1–3. Fai i le vasega e mulimuli i le faitauga, tagai mo fasifuaitau o loo faamatalaina ai lagona o Alema e uiga ia Sepulona ma le pogai. Valaaulia tamaiti e lipoti mea sa latou mauaina.

O le a se mea tatou te aoaoina mai le Alema 38:2–3 e uiga i aafiaga o tamaiti amiotonu i luga o o latou matua? (E mafai ona eseese tali a tamaiti. Ia mautinoa o loo latou faailoa mai le upu moni faapeaa o tumau mausali ai ma faamaoni ia talavou i le tausiga o poloaiga, o le a mafai ona latou aumaia le olioli sili i o latou matua.)
O anafea na lagona ai e ou matua le fiafia ona o se filifiliga lelei sa e faia pe ona o au taumafaiga ina ia ola i le talalelei?
O faapefea ona aafia e au taumafaiga e tausia poloaiga la outou mafutaga ma ou matua?

Atonu e te manao e faasoa atu se faataitaiga o le auala na uunaia ai lou aiga e ala i filifiliga amiotonu a fanau i totonu o le aiga.

Alema 38:4–9

Ua molimau Alema e uiga i le mana o le laveai a le Faaola

Faamatala atu sa toe faamanatu atu e Alema ia Sepulona sa la tofo uma lava i le mana o le laveai a le Faaola Ia saunia le siata lenei i se pepa e tufa atu, pe faapipii i luga o le laupapa ma fai atu i tamaiti aoga e kopi i totonu o a latou api o le vasega po o api talaaga mo le suesueina o tusitusiga paia.

	Sepulona (Alema 38:4–5)	Alema (Alema 38:6–8)
O le a le mea na laveaiina mai ai o ia?
Aisea na ia maua ai le faamanuiga o le laveaiga?
O le a se mea tatou te aoaoina mai lenei aafiaga?

Faatumu faatasi o se vasega le siata, pe tofi ni tamaiti e fai paga e faatumuina. Tuu atu i tamaiti e vaai i fasifuaitau o mau o loo lisiina atu i le siata ao latou taliina ia fesili. Uunaia i latou e faaaofia ai mea ua uma ona latou iloa e uiga i le laveaiina e le Alii o Sepulona (tagai i le Alema 38:2–3) ma Alema (tagai i le Mosaea 27; Alema 36). A uma ona faatumu e tamaiti le siata, fai atu fesili nei ina ia fesoasoani ia i latou i le talanoaina o mataupu faavae sa latou aoaoina:

O le a se mea tatou te aoaoina mai i le aafiaga a Sepulona? (Atonu e mafai ona faailoa mai e tamaiti ni mataupu faavae eseese. Ia faamautinoa o lo latou faailoa mai le upu moni lenei: Afai tatou te tauaveina mea uma ma le onosai ma faalagolago i le Atua, o le a Ia laveaiina i tatou mai faigata, faafitauli, ma puapuaga ma siitiaina i tatou i luga i le aso gataaga.)
O le a se mea tatou te aoaoina mai le aafiaga a Alema? (E ui e ono eseese mai tali a tamaiti, ae ia faamautinoa atu latou te faaalia mai le tulaga lea faapea o le mauaina o le faamagaloga o a tatou agasala ma maua le filemu i o tatou agaga, e tatau ona tatou faaaoga ai le faatuatua ia Iesu Keriso ma sailia Lona alofa mutimutivale.)

Valaaulia se tamaitiiti aoga e faitau leotele le Alema 38:9. Fai i le vasega e mulimuli i le faitauga, vaavaai mo le mea na manao Alema ia iloa e lona atalii e uiga i le Faaola.

Aisea e taua ai lo tatou iloaina ua na o Iesu Keriso lava le “ala po o ni auala e mafai ona faaolaina ai i [tatou]”?
O a ni auala na e lagonaina ai le laveaiina e ala i le mana o le Faaola? (Atonu e te manao e tuu atu i tamaiti se taimi e mafaufau ai i lenei fesili ao lei fai atu mo ni a latou tali.) O le a se mea e te faia e saili ai lena laveaiga?

Tuu atu i tamaiti sina taimi e mafaufau ai i le auala latou te ono sailia ai le fesoasoani a le Alii faatasi ai ma se luitau patino.

Alema 38:10–15

Na fautuaina e Alema Sepulona e faaauau pea ona talai atu le talalelei ma atiina ae ni uiga lelei amiotonu

Faamalamalama atu na uunaia e Alema Sepulona ina ia atiina ae ni uiga lea o le a fesoasoani ia te ia ao faaauau pea ona ia talai atu le talalelei ma auauna atu i isi. O le fautuaga a Alema ia Sepulona e mafai ona faatatau i soo se tagata o loo manao e auauna atu, aoao atu, po o le faatosinaina o isi mo le lelei. Fai i tamaiti e faitau le leoa le Alema 38:10–15, vaavaai mo le fautuaga o le a sili ona aoga mo i latou. Atonu e te manao e fautuaina tamaiti e faailoga mea sa latou mauaina.

Tuu atu i tamaiti se kopi o le taiala suesue o loo i le faaiuga o lenei lesona. Faamalamalama atu faapea pe a latou faaaogaina le taiala, o le a latou iloa ai le auala o loo saunia ai i tatou e a tatou taumafaiga ina ia atiina ae ni uiga amiotonu e aoao atu ai ma auauna atu i isi. Valaaulia i latou e filifili se vaega se tasi o le fautuaga a Alema i le koluma tauagavale o le taiala ma ia faatumu le gaoioiga faaleaoaoga e faatatau i ai i le koluma taumatau. (Afai e le mafai ona e faia ni kopi o le taiala suesue, fetuunai le gaoioiga e ala i le taitaia o se talanoaga faalevasega ma faaaoga le faamatalaga o i le taiala suesue e avea o se punaoa.)

A ua lava loa le taimi a tamaiti aoga e faamaea ai se tasi o gaoioiga faaleaoaoga i le taiala suesue, mafaufau e fai atu i nisi o i latou e faasoa mai se mea sa latou aoaoina mai lenei gaoioiga ma le auala o lo latou fuafuaina e faaaoga ai. Afai na e tuuina atu i tamaiti ni kopi o le taiala suesue, uunaia i latou e ave i le fale ma suesue atili ai e uiga i le fautuaga a Alema ia Sepulona.

Taiala Suesue mo le Alema 38:10–12

Suesue ia vaega eseese o le fautuaga a Alema o loo lisiina atu i lalo, ma filifili se vaega se tasi e te manao e faaleleia. Faamaea le gaoioiga faaleaoaoga e faatatau i ai ina ia fesoasoani ia te oe e faaaoga lenei fautuaga i lou olaga.

Fautuaga a Alema	Gaoioiga Faaleaoaoga
“Ia e filiga ma faautauta i mea uma” (Alema 38:10).	O le filiga o le taumafai faifaipea, faaeteete, ma le faamaoni. O le faautauta o le “faaaogaina o le tofamanino i mea uma po o le faaaoga o le loto pulea” (Kent D. Watson, “Being Temperate in All Things,” Ensign po o le Liahona, Nov. 2009, 38). Tusi i totonu o lau api talaaga mo le suesueina o tusitusiga paia ia uiga nei e lua e manaomia e se tagata pe a aoao atu le talalelei ma auauna atu i isi. Tusi foi e uiga i soo se vaega o lou olaga lea e mafai ona e matua filiga pe agalelei ai ma e uiga i le auala o le faaleleia o na vaega o le a fesoasoani ai ia te oe ina ia aoao atu ai ma auauna atu i isi ma le lelei atili.
“Vaai ia aua ne’i faafefeteina oe i luga i le faamaualuga; … aua ne’i e mitamitavale” (Alema 38:11).	O se tasi vaega o le faamaualuga o le faatuatuaina tele lea o oe lava ia nai lo le Atua. E iloagofie lava foi le faamaualuga pe a mafaufau se tagata ua sili atu ia po o lona taua nai lo isi. Tusi i totonu o lau api talaaga mo le suesueina o tusitusiga paia se mea e ono tupu pe a faamaualuga se tagata o le Ekalesia i lona valaauga. Na aoao mai Elder Robert D. Hales o le Korama a Aposetolo e Toasefululua, “O soo moni e tautatala ma le mautinoa e le leoa, ae le o le faasausili limalala’u” (“Lototele Faakerisiano: O Le Tulaga Manaomia o se Soo,” Ensign po o le Liahona, Nov. 2008, 73). Mafaufau i se tagata e te iloa e aoao atu le talalelei “ma le mautinoa le leoa.” Tusi i totonu o lau api talaaga mo le suesueina o tusitusiga paia e uiga i lenei tagata ma le aafiaga o lana aoaoga ia te oe. Tusi se auala se tasi pe lua foi o le a e sailia e aloese mai ai i le faamaualuga.
“Faaaoga le lotoa, ae le o le faafiamalosi” (Alma 38:12).	Faitau i upu a le Aposetolo a Paulo o loo i le Filipi 1:14 (i le Feagaiga Fou) e iloa ai le auala o loo faaalia mai ai e auauna a le Atua le lototoa. Na aoao mai Peresitene James E. Faust o le Au Peresitene Sili le auala e mafai ona tatou aloese ai mai le faafiamalosi: “Ou te le talitonu e tatau ona tatou … leotetele, faamalosi, pe le manatu mamafa i le tatou taulimaina [o le galuega faafaifeautalai]” (in James P. Bell, In the Strength of the Lord: The Life and Teachings of James E. Faust [1999], 373). Tusi i totonu o lau api talaaga mo le suesueina o tusitusiga paia le auala e mafai ai e se tagata ona lototoa e aunoa ma le fiamalosi. Faamaumau se auala faapitoa o le a e faaaoga ai le fautuaga ina ia lototoa ae le o le fiamalosi. Tusi foi e uiga i le auala e mafai ai ona fesoasoani lenei fautuaga ia te oe ina ia faamanuiaina i le aoao atu ma auauna atu i isi.
“Ia pulea ou tuinanau uma” (Alema 38:12).	O le pulea o lona uiga o le taofiofi, taialaina, po o le faatonutonu. O le tuinanau o se uiga malosi. Mafaufau i fesili nei, ma tusi au tali i totonu o lau api talaaga mo le suesueina o tusitusiga paia: Aisea e te manatu ai e taua mo i tatou le puleaina o o tatou tuinanau? O le a sou manatu, e mafai faapefea ona fesoasoani le puleaina o ou tuinanau ina ia faatumulia ai i le alofa? O le a sau mea e fai e mulimuli ai i le fautuaga a Alema ina ia pulea ou tuinanau uma?
“Aloese mai le faapaie” (Alema 38:12).	Toe faamanatu ia fasifuaitau o mau o loo lisiina i le faasologa o autu ma mea na tutupu o le fusitolu i lalo o le “Faapaia, Paie, Faatalanoa.” Tagai mo se fautuaga e faatatau i le uiga o le faapaie ma le faafeagai o le faapaie. Filifili ia mau e lua o loo lisiina i lalo o le faamatalaga ma suesue i ai. Tusi i totonu o lau api talaaga mo le suesueina o tusitusiga paia e uiga i mea sa e aoaoina mai mau ia sa e filifilia. Tusi e uiga i le auala o le a fesoasoani ai le fautuaga o le aloese mai le faapaie ina ia e aoao atu ai ma auauna atu i isi ma le lelei atili. Ma le mea mulimuli, tusi se auala faapitoa o le a e aloese mai ai i le faapaie.