Alema 39–44 (Iunite 20)

Sauniuniga o Anomea mo le Faiaoga o Suesuega e Faia i le Aiga

Aotelega o Lesona o Suesuega e Faia i le Aiga i Aso Taitasi

E le o i ai se faamoemoega o le aotelega lenei o aoaoga faavae ma mataupu faavae lea na aoao e tamaiti aoga a o latou suesue i le Alema 39–44 (iunite 20) ina ia aoao atu o se vaega o lau lesona. O le lesona e te aoao atua ua na o ni nai vaega o aoaoga faavae ma mataupu faavae nei e taulai atu i ai. Mulimuli i uunaiga a le Agaga Paia a o e mafaufau i manaoga o tamaiti aoga.

Aso 1 (Alema 39)

Ao suesue i upu a Alema i lona atalii faalogogata o Korianetona, na iloa ai e tamaiti o le agasala o le feusuai o se mea inosia i le silafaga a le Alii. Na aoao atu foi e Alema i lona atalii o le salamo e aofia ai le faailoa atu ma le lafoaia o a tatou agasala ma ia liliu atu i le Alii ma o tatou loto, mafaufau, ma le malosi atoa. Faitau e tamaiti le molimau a Alema na afio mai Iesu Keriso e aveese agasala a le lalolagi.

Aso 2 (Alema 40–41)

Na popole Korianetone e uiga i le toetu ma le Faamasinoga Mulimuli. O le tali a Alema i nei popolega, ua iloa ai e tamaiti ni mataupu faavae eseese e faatatau i le toetu, e aofia ai le upumoni faapea o le a toefuatai i tatou a le o le fiafia po o le malaia e tusa ma a tatou galuega ma tuinanauga i le olaga faitino. Na faamamafaina atu foi e Alema faapea “e lei avea lava le amioleaga ma fiafia” (Alema 41:10).

Aso 3 (Alema 42)

Na fesoasoani Alema ia Korianetona ia iloa o le le usiusitai e mafua ai le vavaeeseina o tagata taitoatasi mai le silafaga a le Atua. I le liliuga, ua aoao ai e tamaiti le ala ua faataga ai e le fuafuaga o le togiola ia tagata taitoatasi ina ia manumalo mai lo latou tulaga pau. Ua faamautinoa mai e aoaoga a Alema o Iesu Keriso na mafatia ina ia faamalie ai manaoga o le faamasinotonu ma mafai ai ona faalautele atu le alofa mutimutivale ia i latou o e salamo.

Aso 4 (Alema 43–44)

Na aoao tamaiti aoga e uiga i se taua i le va o sa Lamana ma sa Nifae. O se lesona e tasi na latou aoaoina mai le Alema 43–44 afai tatou te saili ma mulimuli i le fautuaga faaperofeta, o le a sili atu ona mafai ona tatou puipuia i tatou lava e tetee atu ai i le fili. E le gata i lea, ua iloa e tamaiti aoga pe a tatou tatalo i le Alii e faatatau i a tatou fuafuaga ma moomooga amiotonu, o le a Ia fesoasoani mai ia i tatou i le faataunuuina o ia mea.

Faatomuaga

E pei ona faamaumauina i le Alema 39–42, na fesoasoani Alema i lona atalii o Korianetona ia malamalama i le matautia o le agasala o le feusuai, aoaoga faavae e faatatau i le toetu ma le Faamasinoga Mulimuli, ma taunuuga faavavau o tulafono o le faamasinotonu ma le alofa mutimutivale. O le a maua e tamaiti mai lenei lesona ni avanoa e aoao atu ai ma faamatala atu nei aoaoga faavae i le tasi ma le isi.

Fautuaga mo le Aoaoga

Ao lei faia le vasega, saunia ni pepa e tufatufa atu o aofia ai ni faatonuga o lenei lesona. Ia e faamasani i faatonuga ina ia mafai ona e fesoasoani i tamaiti aoga ia faamanuiaina a latou taumafaiga e aoao atu le tasi ma le isi.

Alema 39–41

Ua aoao atu Alema o le salamo e aumaia le fiafia

Amata le vasega i le valaaulia o tamaiti e tauloto faatasi le Alema 39:9, o se fuaitau o se mau tauloto sa uunaia i latou e tauloto o se vaega o la latou suesuega i lenei vaiaso. Fai atu pe i ai se tagata e mafai ona toe faamatala mai i le vasega le mafuaaga na fautuaina ai e Alema lona atalii o Korianetona e salamo ma lafoai ana agasala o i lenei mau.

Toe faamanatu atu i tamaiti o le Alema 40–41, o loo talanoaina ai e Alema ia popolega o Korianetona e uiga i le toetu o e ua maliliu ma le Faamasinoga Mulimuli. Ina ia fesoasoani i tamaiti e faamatala mai mea sa latou aoaoina ma faasoa mai o latou lagona ma molimau e uiga i upumoni na mauaina i leAlema 39–41, tusi ia fesili ma mau faasino nei i le laupapa ao lei amataina le vasega:

Aisea e taua ai le tausia o le tulafono o le legavia? (Tagai i le Alema 39:1–9.)
O le a le toetu? O le a le eseesega i le va o tino faaletino ma tino toetutu? O le a se mea e tupu pe a mavae lo tatou toetutu? (Tagai i le Alema 40:21–26.)
O le a faapefea ona faamasinoina au i le Faamasinoga Mulimuli? (Tagai i le Alema 41:1–7.)
E foliga mai o nisi o e solia ia poloaiga e fiafia. E moni lena mea? (Tagai i le Alema 41:10–15.)

Valaaulia ni tamaiti e mafaufau faapea o i latou o ni faifeautalai ma sa setiina se latou taimi e feiloai ai ma se tagata o loo sailia ni tali o nei fesili. Faailoa atu ia i latou o le a tuu atu se taimi ia i latou e sauniuni ai, ma o le a latou maua se avanoa e tali ai nisi o nei fesili e faaaoga ai mea sa latou aoaoina mai le Alema 39–41.

Pe afai e faatagaina e le aofai o lau vasega, vaevae le vasega e fai paga e faatusa i soa faifeautalai. Atofa atu i soa taitasi se tasi o fesili mai le laupapa. (Afai e toalaiti lau vasega, e mafai ona e atofa atu ni fesili i tamaiti taitasi.) Ia tofu soa taitasi ma se kopi o faatonuga nei, ma fai atu ia i latou e faaaoga ia mau faasino o loo i le faaiuga o a latou fesili ia na atofa atu e tali ai ia fesili a latou tagata sailiili. Tuu atu se taimi i tamaiti aoga e iloilo ai ia mau ma saunia ai se lesona puupuu mo le latou tagata sailiili. Fautuaina ia soa e filifili po o fea o vaega o faatonuga o le a nafa ma i latou taitoatasi e aoao atu.

Ao sauniuni tamaiti, atonu e te manao e fealuai i autafa o tamaiti ina ia mafai ona e faalogologo ma tuu atu se fesoasoani pe a manaomia. Afai e manaomia, fesoasoani i tamaiti aoga ina ia iloa aoaoga faavae mai leAlema 39–41 lea o le a fesoasoani i le taliina o fesili na atofa atu ia i latou. Faaaoga ia aoaoga faavae nei e avea o se taiala:

O agasala o feusuaiga o se mea inosia lea i fofoga o le Alii (tagai i le Alema 39:1–9).

O le toetu o le tuufaatasia lea o le agaga ma le tino, ma o le toefuatai o mea uma i lo latou tulaga sao ma atoatoa (tagai i le Alma 40:21–26).

O le a toefuatai mai i tatou a le o le fiafia po o le faanoanoa e tusa ma a tatou galuega ma manaoga i le olaga faaletino. (tagai i le Alema 41:1–7).

E lei avea lava le amioleaga ma fiafia (tagai i leAlema 41:10–15).

Faatonuga

Ia saunia e fai le mea lenei ao e aoao atu:

Tuu atu ni faamatalaga e uiga i mau (e pei o le faamalamalama atu po o ai o tautala, po o ai o tautala i ai, ma pe aisea).
Faitau ni vaega o fuaitau o mau ua saunia e fesoasoani ia te oe i le taliina o le fesili sa atofa atu ia te oe.
Tusi i lalo se aoaoga faavae po o se mataupu faavae sa aoaoina i mau ia sa e suesue i ai e faatatau i le fesili na atofa atu ia te oe.
Faamatala le auala na fesoasoani ai le aoaoga faavae po o le mataupu faavae na e tusia i le taliina o le fesili sa atofa atu ia te oe. Atonu e te manao e fautua atu ia i latou o loo e aoaoina ina ia tusi lenei aoaoga faavae po o le mataupu faavae i totonu o a latou tusitusiga paia.
Faasoa atu le mafuaaga e taua ai ia te oe lenei aoaoga faavae po o le mataupu faavae, ma molimau atu i upumoni na e aoao atu.

A uma ona saunia tamaiti e tali mai a latou fesili ia na atofaina atu, faatulaga i latou i ni vaega toalaiti ina ia mafai ona latou aoao atu e le tasi le isi. (Afai e toalaiti lau vasega, tuu atu i tamaiti taitasi po o se soa e aoao atu le vasega atoa.) A uma ona aoao atu e tamaiti le tasi ma le isi, fai atu i le vasega ia fesili nei:

Pe a e mafaufau i agasala a Korianetona, aisea e te manatu ai o le malamalama i nei aoaoga faavae o le a fesoasoani tele ia te ia?
Aisea e taua ai le mafai ona faamatala atu o nei upumoni ia i latou o le a e mafuta i ai i lou olaga?
Aisea e taua ai lou malamalama ma ola ai i nei upumoni?

Alema 42

Ua aoao atu e Alema Korianetona e uiga i le faamasinotonu ma le alofa mutimutivale

Tusi se ata faigofie o se seti o fua i le laupapa. Fai atu i se tamaitiiti e aoao ni mataupu o le faamasinotonu ma le alofa mutimutivale i le vasega e faaaoga ai le ata tusi ma mea sa ia aoaoina mai aoaoga a Alema ia Korianetona i le Alema 42. Fai i tamaiti e auauai i le Alema 42 i a latou tusitusiga paia ma vaavaai mo fuaitau ma faamatalaga e uiga i le faamasinotonu ma le alofa mutimutivale na latou faailogaina pe na vaseina.

Ata

fua

Ina ia fesoasoani i tamaiti ia malamalama i tulaga lea o loo avanoa ai ia le alofa mutimutivale, fai atu ia fesili nei:

O le a se mea e tatau ona fai e Iesu Keriso ina ia tatou maua ai le alofa mutimutivale?
O le a se mea e tatau ona tatou faia ina ia maua ai le alofa mutimutivale?

Fai atu i ni nai tamaiti e faasoa mai le mafuaaga latou te faafetaia ai le Togiola a Iesu Keriso.

Alema 43–44

O le usitaia o le fautuaga a perofeta e puipuia ai i tatou mai le fili.

Afai o i ai se taimi, mafaufau e fai i tamaiti e iloilo mea sa latou aoaoina mai le Alema 43–44 e ala i le faasoaina mai o mea sa latou tusiaina i totonu o a latou api talaaga mo le suesueina o tusitusiga paia e uiga i le tauina o a latou taua faaleagaga (aso 4, galue fai e 3 ma le 4). Molimau atu ia Iesu Keriso ma Lona mana e faalauaitele le alofa mutimutivale ao tatou salamo ma ia puipuia i tatou a o tatou o mai ia te Ia.

Le Isi Iunite (Alema 45–63)

Aisea na manuia ai sa Nifae i le tetee atu i o latou fili? Na faapefea ona latou tau ma le malosi o le Alii? E mafai ona maua ia tali i le suesue i faataitaiga a Kapeteni Moronae ma Helamana ma lana autau malolosi.