Potutusi
1 Nifae

FAATOMUAGA I Le Tusi Muamua a Nifae

Aisea e suesueina ai lenei tusi?

A o suesueina e tamaiti aoga le 1 Nifae, o le a latou iloaina ai faapea, o le “alofa mutimutivale agamalu o le Alii i luga o i latou uma o e ua ia filifilia, ona o lo latou faatuatua, e faamalolosi tele ai i latou” (1 Nifae 1:20). O le a latou aoaoina foi faapea e finagalo le Atua e faamanuia Ana fanau. O Liae ma ona tagata sa latou mauaina le alofa mutimutivale ma faamanuiaga a le Atua a o latou mulimuli i Ana poloaiga. Sa sailia e Liae ma Nifae le taitaiga mai le Atua ma mauaina e ala i miti, faaaliga vaaia, le Liahona, ma le taitaiga a le Agaga Paia. Sa mauaina ma faamaumauina e Nifae se faaaliga lautele o le talafaasolopito o le lalolagi lea na faaali atu ai ia te ia le silisiliese o le Atua; le papatisoga, galuega, ma le faasatauroga o Iesu Keriso; le faafanoga o Sa Nifae; ma aso e gata ai. Sa fesoasoani le Atua ia Nifae ma ona uso ina ia maua mai papatusi apamemea, ina ia mafai ai e i latou ona maua tusitusiga paia. Sa ia faasaoina foi Liae ma ona tagata mai le oge i le vao ma le faafanoga i luga o le vasa, i le aveina atu saogalemu o i latou i le laueleele folafolaina. A o suesueina e tagata aoga mea na tutupu ia Nifae ma Liae i totonu o lenei tusi, e mafai ona latou aoaoina auala e saili ma maua ai faamanuiaga o le lagi.

O ai na tusia lenei tusi?

O le atalii o Liae, o Nifae, na tusia lenei tusi o se tali atu i le poloaiga a le Alii faapea ia tausiaina se talafaamaumau a lona nuu. Atonu sa fanau mai Nifae i totonu, pe latalata ane foi i Ierusalema. Sa ia soifua ai iina i le taimi o le galuega a le perofeta o Ieremia ma le nofoaiga a le tupu o Setekaia. Sa sailia e Nifae lana lava molimau e uiga i upu a lona tama e faatatau i le faatafunaga o Ierusalema ma le manaomia ona o ese mai ai lona aiga. A o ia faaauau ona saili ma mulimuli i le fautuaga a le Alii, sa avea Nifae ma se mea faigaluega i aao o le Atua. Sa ia toe foi atu faalua i Ierusalema, ma le agaga usiusitai, faatasi ma ona uso — muamua ina ia maua mai papatusi apamemea ma mulimuli ane ina ia tauanau le aiga o Isamaeli e faatasi atu ma le aiga o Liae i le vao. Faatasi ma le fesoasoani a le Alii, sa fausia e Nifae le vaa lea na aveina atu ai lona aiga ma isi i luga o le vasa i le laueleele folafolaina. Ina ua maliu Liae, na filifilia e le Alii Nifae ina ia avea ma taitai o lona nuu.

O ai na tusi i ai lenei tusi, ma aisea foi?

Na tusia e Nifae faatasi ma ituaiga tagata e tolu i le mafaufau: o suli o lona tama, o tagata o le feagaiga a le Alii i aso e gata ai, ma tagata uma o i le lalolagi (tagai i le 2 Nifae 33:3, 13). Na ia tusia ina ia faatauanau ai tagata uma e o mai ia Iesu Keriso ma ia faaolaina (tagai i le 1 Nifae 6:4).

O anafea, ma o fea na tusia ai?

Na tusia e Nifae le tala na faapea ona avea ma 1 Nifae i le toeitiiti 570 TLM.—30 tausaga talu ona mavae le tuua ai e ia ma lona aiga o Ierusalema (tagai i le 2 Nifae 5:30). Na ia tusia ina o i ai o ia i le laueleele o Nifae.

O a nisi o elemene tulaga ese o lenei tusi?

O le 1 Nifae ua i ai tala eseese o asiasiga faalelagi e ala i miti, faaaliga vaaia, ma faaaliga tuusao. O nei asiasiga ua faaalia ai e faatonuina, taitaia, ma puipuia e le Atua i latou o e saili atu ia te Ia:

  • A o tatalo Liae, na oo mai se afi faaniutu, ma sa ia vaaia ma faalogoina mea e tele sa galulu ma tetemu ai o ia (tagai i le 1 Nifae 1:6–7).

  • Ua maua e Liae se faaaliga vaaia lea na ia vaai ai i le Atua ma faitau mai se tusi lea ua valoia ai le faaumatiaga o Ierusalema, ma le ave faatagataotauaina o ona tagata (tagai i le 1 Nifae 1:8–14).

  • Ua poloaiina e le Alii Liae e o atu ma lona aiga i le vao (tagai i le 1 Nifae 2:1–2).

  • Ua faatonuina e le Alii Liae e toe auina atu ona atalii i Ierusalema mo papatusi apamemea (tagai i le 1 Nifae 3:2–4).

  • Ua faasalavei se agelu ina o sasaina Nifae ma Sama e Lamana ma Lemuelu (tagai i le 1 Nephi 3:29).

  • Ua poloaiina e le Alii ina ia toe foi atu Nifae ma ona uso i Ierusalema mo Isamaeli ma lona aiga (tagai i le 1 Nifae 7:1–2).

  • Ua maua e Liae ma Nifae faaaliga vaaia lea e aofia ai le laau o le ola; o le soifua mai, galuega, ma le Togiola a Iesu Keriso; o le talafaasolopito o le laueleele o le folafolaga; o le Toefuataiga o le talalelei; ma le feteenaiga i le va o au a le tiapolo ma le ekalesia a le Tamai Mamoe a le Atua (tagai i le 1 Nifae 8; 11–14).

O le 1 Nifae ua i ai le tala moni o se nuu, o e na malaga atu i le laueleele o le folafolaga. Ua faaigoaina mulimuli ane e le Tusi a Mamona isi vaega e lua o tagata, o e na faimalaga atu i le laueleele folafolaina: o Sa Moleka (tagai i le Ominae 1:14–17) ma Sa Iareto (tagai i le Eteru 6:4–12).

O le tusi a 1 Nifae ua faailoa mai ai foi mea taua e lua: o le pelu a Lapana ma se tapasa, po o le faasinoala, ua ta’ua o le Liahona (tagai i le 1 Nifae 18:12; Alema 37:38). E ala i le Liahona, na taitaia ai e le Alii le aiga o Liae i le vao ma luga o le vasa. O le pelu a Lapana na tuufaasolo mai augatupulaga seia oo i le faaiuga o le nuu o Sa Nifae. O le Liahona ma le pelu a Lapana na tanumia faatasi ma papatusi auro, ma sa faaalia ia Iosefa Samita ma Molimau e Toatolu (tagai i le MF&F 17:1–2).

Otootoga

1 Nifae 1–7 Ua taitaiina e Liae lona aiga i le vao. Ua usitaia e ona atalii le poloaiga a le Alii ina ia foi atu i Ierusalema ma aumaia papatusi apamemea, ma toe foi atu faalua e faatauanau Isamaeli ma lona aiga e faatasi ma i latou i le vao.

1 Nifae 8–15 O Liae ma Nifae ua taitasi ma mauaina se faaaliga o le laau o le ola. Ua toe faamatalaina e Nifae lana faaaliga o le galuega a le Faaola, ma le talafaasolopito o mea o le a tutupu seia oo atu i le Toefuataiga o le talalelei i aso e gata ai.

1 Nifae 16–18 Ua taitaia Liae ma lona aiga e le Alii i la latou malaga i le vao ma luga o le vasa agai atu i le laueleele folafolaina.

1 Nifae 19–22 Ua valoia Iesu Keriso ma le faataapeapeina ma le toe faapotopotoina o Isaraelu, e Nifae.