Lesona mo Suesuega e Faia i le Aiga
2 Nifae 4–10 (Iunite 6)
Sauniuniga o Anomea mo le Faiaoga o Suesuega e Faia i le Aiga
Aotelega o Lesona o Suesuega e Faia i le Aiga i Aso Taitasi
O le aotelega lenei o aoaoga faavae ma mataupu faavae sa aoaoina e tamaiti aoga a o latou suesueina le 2 Nifae 4–10 (iunite 6) e le o faamoemoe e aoaoina o se vaega o lau lesona. O le lesona e te aoao atu ua na ona taulai atu i ni nai aoaoga faavae ma mataupu faavae nei. Mulimuli i uunaiga a le Agaga Paia a o e iloiloina manaoga o au tamaiti aoga.
Aso 1 (2 Nifae 4–5)
A o suesue e tamaiti aoga le 2 Nifae 4, na latou taulai atu i le mataupu faavae e faapea e lagolago e le Atua i latou e tuu atu lo latou faalagolago ia te Ia (tagai i le 2 Nifae 4:12–35) ma na tusi i a latou api talaaga mo le suesueina o tusitusiga paia se ala se tasi o le a latou fia faateleina ai lo latou faalagolago i le Atua. I le 2 Nifae 5 sa latou vaaia ai ni faataitaiga o le mulimuli i upumoni: E oo mai le saogalemu mai le usiusitai i faaaliga a le Atua (tagai i le 2 Nifae 5:1–8). A oo ina avea le talalelei a Iesu Keriso ma o tatou ala o le olaga, o le a faateleina lo tatou fiafia (tagai i le 2 Nifae 5:9–18, 26–27). E suesueina e tamaiti aoga o latou olaga ma fuafua ai se mea o le a latou faia e ola atoatoa atili ai “e tusa ma le ala o le fiafia.”
Aso 2 (2 Nifae 6–8)
I lenei lesona sa aoao ai tamaiti aoga e alofa mutimutivale le Alii ia i latou e toe foi atu ia te Ia (tagai i le 2 Nifae 6). Sa latou mafaufau loloto i le auala e alofa mutimutivale ai le Alii ia i latou. Sa latou aoao foi e finagalo le Faaola e togiola Lona nuu o le feagaiga ma ua ia [te Ia] le mana uma e faia ai (tagai i le 2 Nifae 7–8).
Aso 3 (2 Nifae 9)
Ina ua amata e tamaiti aoga la latou suesuega o le 2 Nifae 9, sa latou aoao ai i le mea semanu e tupu pe ana leai se Togiola. Sa latou aoao foi ia upumoni nei: O le Togiola a Iesu Keriso ua laveai ai tagata uma mai le oti faaletino ma faaleagaga lea na oo mai ona o le Pa’u (tagai i le 2 Nifae 9:1–22). E ala mai i le Togiola a Iesu Keriso, e mafai ai ona tatou faatoilaloina ia taunuuga o a tatou agasala pe afai tatou te faatuatua ia Iesu Keriso, salamo, ma papatisoina, ma tumau e oo i le iuga (tagai i le 2 Nifae 9:14–27). Sa tusia e tamaiti aoga se parakalafa e faailoa ai o latou lagona e uiga i le taulaga a le Faaola mo i latou.
Aso 4 (2 Nifae 9–10)
Ina ua suesue e tamaiti aoga le toega o le 2 Nifae 9 ma suesue le 2 Nifae 10, sa latou mafaufau loloto ai pe o a a latou filifiliga atonu o vavaeeseina ai i latou mai le Alii ma pe o a foi filifiliga o fesoasoani ia i latou e latalata atili ai ia te Ia. Sa latou aoao e faapea a o tatou o mai i le Alii ma ola e tusa ma Lona finagalo, o le a tatou mauaina faamanuiaga atoatoa o le Togiola.
Faatomuaga
Faatasi ai ma le tele o upumoni taua ua suesueina e tamaiti aoga i lenei vaiaso, ia faamamafa atu le taua o le Togiola a Iesu Keriso. Tatalo mo le taitaiga e faatatau i le auala e mafai ai ona e fesoasoani sili ia i latou ia malamalama ma faalagolago i le Togiola. A o e aoao atu, ia uunaia tamaiti aoga e mafaufau loloto i mea latou te manaomia e fai e maua ai faamanuiaga o le Togiola a le Faaola.
Manatua: A o e saunia ma le agaga tatalo lau lesona, mafaufau i manaoga o au tamaiti—aemaise lava manaoga o i latou atonu o loo tauivi [ma faigata]. A o e tatalo mo tamaiti aoga taitoatasi ma mo le taitaiga i le auala e sili ona aoao atu ai aoaoga faavae ma mataupu faavae ia i latou ia o loo maua i tusitusiga paia, o le a musuia oe e le Agaga Paia ia iloa pe faapefea ona faafetaia’ia manaoga o tamaiti.
Fautuaga mo le Aoaoga
2 Nifae 4—5
Ua faailoa e Nifae Lona faalagolago i le Alii; ua vavaeese e le Alii sa Nifae mai ia sa Lamana; ua ola sa Nifae e tusa ma le ala o le fiafia
Tusi le faamatalaga o loo i le siata lenei i luga o le laupapa, pe faasaunia e fai ma tufaaga.
|
|
Vaelua le vasega. Tuu atu i le tasi afa o tamaiti aoga e sauni e aoao mai le anomea i lalo o le 2 Nifae 4 ma le isi afa e sauni e aoao mai le anomea i lalo o le 2 Nifae 5.
Faapaga tamaiti aoga taitasi ua atofa i ai le 2 Nifae 4 ma se tamaitiiti aoga ua atofa i ai le 2 Nifae 5. Valaaulia tamaiti aoga e fefaasoaa’i ma a latou paga le anomea ua latou sauniaina mo a latou galuega atofaina.
2 Nifae 6–8
Ua valoia e Iakopo le faataapeapeina ma le faapotopotoina o Isaraelu ma sii mai valoaga a Isaia e uiga i le faamaoni o le Faaola i le nuu o le feagaiga
Faamanatu atu i tamaiti aoga e faapea o le 2 Nifae 6–9 o le aso muamua lea o se lauga na tuu atu e Iakopo i lona nuu. O le aso lona lua o ana aoaoga ua faaauau lea i le 2 Nifae 10. I le 2 Nifae 6, na vavalo atu ai Iakopo o le a teena e tagata Iutaia le Alii ma faataapeapeina. Tuu atu i tamaiti aoga e faitau le 2 Nifae 7:1–2, ma valaaulia i latou e toe faamatala lona uiga i a latou lava upu.
2 Nifae–9
Ua aoao mai Iakopo i le auala e laveai ai e le Togiola a le Faaola i tatou mai aafiaga o le Pa’u ma taunuuga o agasala
Faasoa atu le faamatalaga lenei e Peresitene Ezra Taft Benson:
“E pei lava o se tagata e le fia manao i se meaai seiloga ua fiaai, o lea na te le manao ai foi i le faaolataga a Keriso seiloga ua ia iloa pe aisea na te manaomiaina ai Keriso.
“E leai se tasi e lava ma lelei lona iloaina o le mafuaaga na te manaomiaina ai Keriso seiloga ua ia malamalama ma taliaina le aoaoga faavae o le Pa’ū ma ona aafiaga i luga o tagata uma. Ma e leai se isi lava tusi i le lalolagi na te faamalamalamaina lelei lenei aoaoga faavae taua e latalata atu i le Tusi a Mamona” (“O Le Tusi a Mamona ma le Mataupu Faavae ma Feagaiga,” Liahona, Iul. 1987, 85).
Tuu atu i tamaiti aoga e mafaufau faapea sa fesili se uo, “Pe aisea tatou te manaomia ai le Faaola?” Valaaulia le vasega e sauni e tali lenei fesili e tusa ai ma mea ua latou aoaoina i le 2 Nifae 9. Tuu atu ia i latou e iloilo le 2 Nifae 9:7–10, 19–22 mo se tali. Fai atu i tamaiti aoga e faasoa mai a latou tali i le fesili.
Ina ia fesoasoani i tamaiti aoga ia malamalama atili i le auala e mafai ai ona laveai e Iesu Keriso i tatou mai taunuuga o le Pa’u, faitau le faatusatusaga a Peresitene Iosefa Filitia Samita i le anomea o le lesona mo le 2 Nifae 9:10–27, i le Iunite 6: Aso 3, i le tusi lesona a le tamaitiiti aoga . E mafai ona e mafaufau e valaaulia se tamaitiiti aoga e tusi i luga o le laupapa po o luga o se fasi pepa le mea na faamatala e Peresitene Samita. Afai e te filifili e tuu atu i se tamaitiiti aoga e tusi i luga o le laupapa po o se fasi pepa, atonu e te manao e valaaulia le tamaitiiti aoga e faamalamalama mai foi le mea ua tusia.
Valaaulia tamaiti aoga e mafaufau e uiga i o latou lava lagona o le maileiina i se lua loloto ma ua vavaeese ai mai le Atua ona o filifiliga na latou faia. Faamalamalama atu e faapea pe ana le seanoa le Togiola a Iesu Keriso, semanu e leai ni avanoa mo le salamo, semanu o le a leai se faamoemoe, ma leai se tasi e mafai ona sola ese mai nei taunuuga o le agasala.
Tuu atu i se tamaitiiti aoga e faitau le 2 Nifae 9:21–23, ma fai atu i ni nai tamaiti aoga e faamalamalama mai i a latou lava upu. E ui atonu e eseese lo latou faamatalaina, ae ia mautinoa o loo manino le upumoni lenei: E auala mai i le Togiola a Iesu Keriso, ua mafai ai ona tatou faatoilaloina ia taunuuga o a tatou agasala.
Faamalamalama atu o se tasi o avanoa sili o loo maua i le fono ai faatasi o se vaega o le mafai lea ona fefaasoaai lagona ma molimau. Valaaulia tamaiti aoga e fefaasoaai o latou lagona ma molimau e uiga ia Iesu Keriso ma Lana Togiola. Afai e fai si faigata ona latou faasoa mai, e mafai ona e tuu atu ia i latou e faitau mea na latou tusia i a latou api talaaga mo le suesueina o tusitusiga paia mo le aso 3, galuega atofaina 4. Atonu e te manao e faaopoopo atu i ai lau molimau i a latou molimau.
Tuu atu i le vasega e mafaufau faapea na taia se tagata i se faamai matautia. Ona talanoaina lea o fesili nei:
-
Aisea e taua ai ona malamalama le tagata i le manaoga e saili atu mo se fesoasoani?
-
Aisea e taua ai ona malamalama foi le tagata i le mea e ao ona fai ina ia maua ai le fesoasoani?
-
O le a le taunuuga pe afai e malamalama le tagata i le manaoga mo le fesoasoani ae le malamalama i le mea e fai e maua ai?
Fai atu i tamaiti aoga pe latou te iloaina le mea e tatau ona latou faia e maua ai faamanuiaga o le Togiola. Faamanatu atu ia i latou sa latou suesueina le 2 Nifae 9:23, 42–52 ma faailoa nisi o amioga ma uiga ia e fesoasoani ai ia i tatou e o mai ia Keriso ma valaaulia ai le mana o Lana taulaga togiola i o tatou olaga. Tuu atu ia i latou e iloilo ia mau na latou faailogaina ma le lisi sa latou faia i a latou api talaaga mo le suesueina o tusitusiga paia e uiga i mea na e taitai atu ai i tatou i le Faaola (aso 4, galuega atofaina 1). Valaaulia tamaiti aoga e faasoa mai pe faapefea e se tasi po o le sili atu o nei amioga ma uiga ona faalatalata atili ai i latou i le Faaola. Faasoa atu lau molimau e faapea o le mulimuli i mataupu faavae o loo aoaoina i nei fuaiupu o le a fesoasoani lea ia i tatou e maua ia faamanuiaga atoatoa o le Togiola.
2 Nifae 10
Ua uunaia e Iakopo lona nuu ia olioli ma o mai i le Alii
Faitau faatasi ma tamaiti aoga le 2 Nifae 10:23–24. Faamanatu atu i tamaiti aoga e faapea i le aso 3, galuega atofaina 6, sa valaaulia ai i latou e fuafua se mea o le a latou faia e faalelei ai i latou lava ma le finagalo o le Atua. Uunaia i latou e mulimulitai i lenei valaaulia.
Fai atu i tamaiti aoga e faasoa mai ni malamalamaaga faaopoopo na latou maua mai mataupu sa latou aoaoina i lenei vaiaso. Pe a talafeagai ai ma le taimi, faaiu atu le lesona o lenei vaiaso e ala i le usuina po o le faitauina faatasi o upu o le viiga “Ou te Tu ma Ofo” (Viiga, nu. 107) po o se isi viiga e faatatau i le Togiola a Iesu Keriso. Faasoa atu lau molimau e uiga i le taua o le o mai i le Faaola ma le moni o faamanuiaga o le Togiola.
Iunite e Sosoo ai (2 Nifae 11–25)
A o suesue e tamaiti aoga le 2 Nifae 11–25 i le vaiaso o agafua nei, o le a latou iloaina nisi o upu a Isaia ma le ala na ia vaai ai i o tatou aso ma lapatai ai i tatou e tusa ma mea na ia vaaia. O nisi o nei lapataiga e faatatau i a tatou ala o faasalalauga, o tatou laei, ma sitali o le olaga, ma o tatou uiga. Uunaia tamaiti aoga e faitau ma ao faatasi mai mea e mafai ona latou maua mai le 2 Nifae 11–25, e tusa lava pe latou te le malamalama i upu uma.