Lesona 138

Mamona 3–4

Faatomuaga

Ina ua uma ona latou toe maua mai o latou fanua mai ia sa Lamana, na toe saunia sa Nifae mo le taua. Na faatoga atu Mamona ia sa Nifae ia salamo. Nai lo o lena, na latou mitamita i lo latou malosi ma tauto e tauimasui mo o latou uso na fasiotia. Ona sa faasaina e le Alii Lona nuu ona saili atu i le tauimasui, o lea na musu ai Mamona e taitai le autau a sa Nifae ma na faatoilaloina i latou. A o fai pea le amioleaga a sa Nifae, na liligi ifo e le Atua Ana faamasinoga i luga ia i latou, ma na amata ona tafiesea i latou e sa Lamana mai le fogaeleele.

Fautuaga mo le Aoaoga

Mamona 3:1–8

Na faasaoina e le Alii sa Nifae i le taua ina ia tuu atu ai ia i latou le avanoa e salamo ai, ae na latou faamaaaina o latou loto

A o lei amataina le vasega, tusi le fesili lenei i le laupapa: Pe na e lagonaina i se taimi o taumafai le Alii e te manatu mai ia te Ia ma faamalosia oe e sui se mea i lou olaga?

Amata i le fai atu i tamaiti aoga e faasoa mai a latou tali i le fesili o i le laupapa. (Ia mautinoa latou te le manatu faapea e tatau ona faasoa soo se mea e sili ona patino pe le faalauaiteleina.) E mafai ona e mafaufau foi e faasoa atu se aafiaga.

Faamatala atu na finagalo le Alii ia gauai mai sa Nifae ina ia latou suia o latou ala amioleaga. Ae ui i lea, na faamaaa loto o sa Nifae ma na le iloa ai na faamanuiaina i latou e le Alii ia latou taua ma sa Lamana. Ina ua uma ona osi e sa Nifae se feagaiga ma sa Lamana ma le au faomea a Katianetona (tagai Mamona 2:28), na puipuia i latou e le Alii, ma faatagaina i latou e ola mo le 10 tausaga e aunoa ma se vevesi. I na tausaga, na fesoasoani Mamona ia sa Nifae e saunia mo ni osofaiga e oo mai (tagai Mamona 3:1).

Valaaulia se tamaitiiti aoga e faitau leotele le Mamona 3:2–3. Fai atu i le vasega e mulimuli i le faitauga, ma vaavaai mo mea na finagalo le Alii ia faia e sa Nifae i le taimi o le filemu na Ia tuuina atu ia i latou.

• O le a le savali na poloaiina Mamona e le Alii e tuuina atu ia sa Nifae? Pe na malamalama sa Nifae i lenei savali? Pe na faapefea ona tali atu sa Nifae i le savali?

• E tusa ai ma le Mamona 3:3, aisea na faasaoina ai e le Alii sa Nifae ia latou taua talu ai e ui lava i lo latou amioleaga?

• O a mea moni e mafai ona e faailoaina mai i mea na faia e le Alii ia sa Nifae ua faamaumauina i le Mamona 3:2–3? (Atonu e tuuina mai e tamaiti ni tali eseese. Aotele a latou tali e ala i le tusia o le mea moni lenei i le laupapa: E lava avanoa e tuuina mai e le Alii ia i tatou e salamo ai mai a tatou agasala. E mafai ona e fautuaina tamaiti aoga e tusi lenei mea moni ia latou tusitusiga paia.)

Aotele le Mamona 3:4–8 e ala i le faamatalaina faapea na toe puipuia faalua e le Alii ia sa Nifae i le taua, e ui lava ia latou amioleaga ma lo latou le naunau e liliu atu ia te Ia.

• O le a se mea ua e aoaoina i uiga o le Alii mai Lona puipuiga o sa Nifae? (O tali e ono aofia ai faapea o le Alii e alofa mutimutivale ma onosai.)

Tau atu faapea e tuuina mai e le Alii ia i tatou uma “se avanoa e salamo ai” (Mamona 3:3). Ona fai atu lea i tamaiti aoga e mafaufau loloto filemu i fesili nei:

• Pe na e naunau ea e salamo ma faia suiga e finagalo le Atua e te faia? Pe o i ai ni suiga e mafai ona e faia nei ina ia avea ai oe ma le tagata e finagalo le Atua ia avea ai oe?

Mafaufau loloto

O le tasi auala e fesoasoani ai i tamaiti aoga e faaloloto lo latou malamalama i mea ua latou aoaoina o le tuuina atu lea ia i latou o le taimi i le vasega e mafaufau loloto ai. E mafai ona e valaaulia tamaiti aoga e mafaufau lemu pe na faapefea e se mataupu faavae ona uunaia o latou olaga po o le pe faapefea ona latou faaaogaina. A o aoao tamaiti aoga e mafaufau loloto i tusitusiga paia i le vasega ma o latou lava taimi, e tele lava ina faaali atu e le Agaga Paia ia i latou le mea moni.

Molimau atu i le agalelei ma le onosai o le Atua i le tuuina mai o avanoa ia i tatou e salamo ai. Valaaulia tamaiti aoga e vaavaai mo avanoa ma valaaulia ia faia ni suiga i o latou olaga, ma fautuaina i latou ia faia vave suiga.

Mamona 3:9–22

Ua faateleina le amioleaga o sa Nifae, ma ua musu Mamona e taitai a latou autau

Faamatala atu na le tali atu sa Nifae i le valaaulia a le Alii ia salamo ae na sili atu le faamaaaina o o latou loto. Valaaulia se tamaitiiti aoga e faitau leotele Mamona 3:9–10. Fai atu i le vasega e mulimuli i le faitauga, ma vaavaai mo uiga faaalia o sa Nifae e tusa ai ma o latou manumalo e tele i sa Lamana. (Atonu e te manao e tau atu i tamaiti faapea o le upu tauia i le fuaiupu 9 o lona uiga o le saili e tauimasui.)

• Na faapefea ona tali atu sa Nifae ina ua mavae o latou manumalo ia sa Lamana?

• Aisea na sese ai mo sa Nifae ona mitamita i lo latou lava malosi? O le a le mea ua faaalia mai e lenei mitamita e uiga i la latou sootaga ma le Atua?

Valaaulia se tamaitiiti aoga e faitau leotele Mamona 3:11–13. Fai atu i le vasega e vaavaai mo le tali atu a Mamona ina ua tauto sa Nifae e saili le tauimasui.

• O le a le mea na fai e Mamona ina ua faaalia e sa Nifae se manao mo le tauimasui ia sa Lamana?

• Pe na i ai se taimi na e manao ai e saili e tauimasui i se tasi? Aisea e te manatu ai o le saili e tauimasui o se tali masani mo le toatele o tagata?

• Na taitaia e Mamona autau a sa Nifae mo le silia ma le 30 tausaga, e ui lava i lo latou amioleaga. O le a se mea ua aoao mai i le musu o Mamona e taitai le autau e uiga i le matautia o le saili e tauimasui?

Valaaulia se tamaitiiti aoga e faitau le Mamona 3:14–16, ma fautuaina le vasega e vaavaai mo le mea na aoao ai Mamona e le Alii e uiga i le saili e tauimasui.

• O le a le lagona o le Alii e uiga i le saili e tauimasui? (Atonu e eseese tali a tamaiti aoga. Aotele a latou tali e ala i le tusia o le mea moni lenei i le laupapa: Ua faasaina i tatou e le Alii ona saili e tauimasui.)

Ina ia fesoasoani i tamaiti aoga ia sili atu le malamalama i le fautuaga a le Alii i fuaiupu 14–16, fai atu i tamaiti aoga e toe faitau le vaega muamua o le Mamona 3:15 (“O le tauimasui e a au ia, ma o le a ou toe totogi atu”) ia latou lava upu.

• Aisea e taua ai le aua le saili e tauimasui? E mafai faapefea ona tatou manumalo i le manao e saili e tauimasui?

Ina ia fesoasoani i tamaiti aoga e aoao pe faapefea ona manumalo mai lagona o le tauimasui, valaaulia se tamaitiiti e faitau leotele le fautuaga lenei mai ia Peresitene James E. Faust o le Au Peresitene Sili. Afai e mafai, saunia se kopi o le upusii mo tamaiti aoga taitasi.

“E manaomia ona tatou iloa ma faailoa lagona ita. E manaomia ai le lotomaualalo e faia ai, peitai afai tatou te o ifo i o tatou tulivae ma ole atu i le Tama Faalelagi mo se lagona o le faamagaloga, o le a fesoasoani mai o Ia ia te i tatou. E finagalo le Alii ina ia tatou ‘faamagalo atu i tagata uma’ [MF&F 64:10] mo lo tatou lava lelei aua o le ‘inoino e telegese ai le tuputupu ae faaleagaga.’ [Orson F. Whitney, Gospel Themes (1914), 144.] Sei iloga ua tatou faamamaina i tatou lava mai le inoino ma le ita ona mafai lea e le Alii ona tuu le mafanafana lelei i o tatou loto. …

“… A tulai mai mala, e le tatau ona tatou tali atu i ai e ala i le saili atu e tauimasui, ae ia tau lava ina tuu atu le faamasinoga tonu i lona ala, ona faagalo ai lea. E le faigofie ona faagalo ma faamama o tatou loto mai le faateleina o le ita. Ua uma ona ofoina mai e le Faaola ia i tatou uma se filemu taua e ala i Lana Togiola, peitai ua na o lo tatou naunau e lafoai lagona le lelei o le ita, lotovale, po o le tauimasui e mafai ai ona oo mai” (“O Le Mana Faamalolo o le Faamagaloga,” Ensign po o le Liahona, Me 2007, 69).

Valaaulia se tamaitiiti aoga e faitau leotele le Mamona 3:17, 20–22, ma fai atu i le vasega e vaavaai mo mea na manao Mamona ia tatou iloa. Atonu e te manao e valaaulia tamaiti aoga e faailoga le fautuaga a Mamona ia “salamo ma sauni e tutu i luma o le nofoa-faamasino o Keriso” (Mamona 3:22).

Mamona 4

Ua amata ona tafiese e sa Lamana ia sa Nifae mai le fogaeleele

Fai atu i tamaiti aoga e sii o latou lima pe afai latou te iloa se tasi na faia se mea sese ae lei maua pe lei feagai ma taunuuga o le sese na fai. Valaaulia tamaiti aoga e mafaufau loloto i le fesili lenei:

• Pe na e ofo ea ina ua oo mai taunuuga o filifiliga sese i se tasi ua faia ma le iloa filifiliga sese?

Valaaulia tamaiti aoga e faitau le leoa Mamona 4:1–2, ma vaavaai mo le mea na tupu i le autau a sa Nifae ao latou saili e tauimasui ia sa Lamana. Ona fai atu lea i tamaiti aoga e faitau le leoa le Mamona 4:4, ma vaavaai pe aisea na le faamanuiaina ai autau a sa Nifae. Fai atu i tamaiti aoga e lipoti mai mea ua latou maua.

Fai atu i se tamaitiiti aoga e faitau leotele le Mamona 4:5. Valaaulia le vasega e mulimuli i le faitauga, ma vaavaai mo mea moni o loo aoao mai e lenei fuaiupu e uiga i taunuuga o le fai pea o le amioleaga. A o faasoa mai e tamaiti aoga mea na latou maua, tusi i le laupapa le mea moni lenei mai leMamona 4:5: “E maua e faamasinoga a le Atua e e amioleaga.” E mafai ona e fautuaina tamaiti aoga e faailoga lenei mea moni ia latou tusitusiga paia.

Valaaulia tamaiti aoga e faitau le leoa le Mamona 4:10–12, ma vaavaai mo faamatalaga o le amioleaga o sa Nifae. Fai atu i tamaiti aoga e lipoti mai mea ua latou maua.

Valaaulia ni nai tamaiti aoga e feauauai i le faitauina leotele mai o le Mamona 4:13–14, 18, 21–22. Fai atu i le vasega e mulimuli i le faitauga, ma vaavaai pe na faapefea ona liligi atu faamasinoga a le Atua i luga o sa Nifae.

• Mo oe, o le a le vaega sili ona faanoanoa o lenei tala?

Faasino i tamaiti aoga mataupu faavae na e tusia i le laupapa. Valaaulia i latou e mafaufau loloto pe faapefea ona latou faaaoga nei mea moni i o latou olaga. Fautuaina i latou e usitai i uunaiga a le Agaga Paia latou te maua ao latou mafaufau loloto.

Molimau atu i le agalelei ma le alofa o le Alii i le tuuina mai o avanoa e salamo ai. Molimau atu foi o taunuuga o le a oo mai i taimi uma ia i latou e fai pea le agasala.

Tala ma Faamatalaga o Talaaga

Mamona 3:9–10. Faia o se tautoga

Na fai mai Mamona na tauto sa Nifae “i le lagi, ma i le nofoalii o le Atua” o le a latou saili e tauimasui ia sa Lamana (tagai Mamona 3:9–10). O le faamatalaga lenei mai ia Elder Bruce R. McConkie o le Korama a Aposetolo e Toasefululua ua faamatalaina ai le taua o le faia o se tautoga i le taimi o le Tusi a Mamona, ua aumaia ai ia i tatou se malamalamaaga o le natura faatiapolo o le taumafaiga a sa Nifae ia faaaofia ai le Atua ia latou tauimasui.

“Sa sili atu ona taua i ona po anamua le mataupu lea o le tuuina atu o se tautooga, nai lo mea ua malamalama i ai le toatele o i tatou i ona po nei.

“O se faataitaiga: Sa o atu Nifae ma ona uso e aumai papatusi apamemea mai ia Lapana. Sa lamatia o latou ola. Peitai sa tauto atu Nifae faapea: ‘O soifua le Atua, o ola foi i tatou, tatou te le o atu i lo tatou tama i le vao, seia uma ona faia e i tatou le mea ua poloaiina ai i tatou e le Atua.’(1 Ni. 3:15.)

“Sa manatu Nifae o ia o se soa a le Atua. Afai na te le maua mai papatusi, o lona uiga ua iuvale le Atua. Ma talu ai ona e le iuvale le Atua, o lea sa manatu ifo ai Nifae e tatau lava ona ia mauaina o papatusi e tusa pe faaumatia ai lona ola” (“O Le Mataupu o le Perisitua,” Ensign, Iulai 1982, 55).

Manatu Faaopoopo Faafaiaoga

Mamona 3:9–15. Ua faasaina i tatou e le Alii ona saili le tauimasui.

O le Savali Faamamona “Faamagalo Atu: Na Mama Ai La’u Avega” o se tala ia Chris Williams, na maliliu le afa o lona aiga i se faalavelave na aafia ai se avetaavale talavou ona. O lenei vitio e mafai ona faaali i le lesona ao lei faitauina po o le maea foi ona faitauina le saunoaga a Peresitene James E. Faust.

Mafaufau i le tuuina atu i tamaiti o sina taimi e tusi ai i api po o le api talaaga o le suesueina o tusitusiga paia pe faapefea ona fuafua e faamatuuese soo se tiga, ita, po o lagona le lelei i isi, atonu o loo ia i latou.

Mamona 4:5. “E oo atu Faamasinoga a le Atua i e Amioleaga”

O le tala lenei e mafai ona faaaoga i le faaiuga o le lesona po o le latalata foi i ai:

Ina ia faapupula o taunuuga leaga e mulimuli mai ia i latou e agasala, faitau pe tuu atu i se tamaitiiti aoga e faitau le aafiaga lenei na faasoa mai e Peresitene Thomas S. Monson:

“I se vasega o le tulafono faapisinisi i le iunivesite sa ou a’oga ai, ou te manatua se tasi o la’u vasega e le saunia lava o ia mo ni talanoaga faalevasega. Sa ou mafaufau ifo ia te au lava, ‘O le a faapefea ona pasi lana suega faaiu?’

“Sa ou mauaina le tali ina ua sau i le vasega mo le suega faaiu, i se aso o le taumalulu, ae se’e mai i ona vae na o ni seevae tosotoso. Sa ou ofo ma matauina o ia ina ua amata le vasega. Sa tuu uma a matou tusi ma api i le fola e pei ona faatonuina ai. Sa se’i ese mai le seevae mai lona vae; ona ia faaaogaina lea o ona tamaivae ua uma ona ia toleniina ma saunia i se suavai manino totoo, ma sa ia susueina ma le poto ia itulau o se tasi o tusi na ia tuuina i le fola, ma o lea na ia autilo ai i tali o fesili o le suega.

“Sa ia mauaina se tasi o togi aupito maualuga i lena vasega o le tulafono faapisinisi. Peitai na oo mai le taimi o le faamasinoga tonu. Mulimuli ane, a o ia sauniuni e sue lana suega lavelave, o le taimi muamua lea na fai mai ai le faaao o lenei mataupu, ‘O le tausaga lenei o le a ou se’e ese mai ai i le faiga masani ae fai se suega taligutu, ae le o se suega tusitusi.’ Sa iloa e le matou matuaofaiva-toleni tamaivae, ua tu lona vae i lona fofoga [tulou] i lena taimi ma lē pasi ai lana suega” (“O Sauniuniga e Aumaia ai Faamanuiaga,” Ensign po o le Liahona, Me 2010, 64).