Eteru 13–Moronae 7:19 (Iunite 31)

Sauniuniga o Anomea mo le Faiaoga o Suesuega e Faia i le Aiga

Aotelega o Lesona o Suesuega e Faia i le Aiga i Aso Taitasi

O le aotelega lenei o aoaoga ma mataupu faavae na aoaoina e tamaiti aoga a o latou suesueina Eteru 13–Moronae 7:19 (iunite 31) e le faamoemoe e aoaoina o se vaega o lau lesona. O le lesona e te aoaoina e faamamafa tau lava o se vaega o nei aoaoga ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.

Aso 1 (Eteru 13–15)

Na teena e sa Iareto le perofeta o Eteru ma tumau i le amioleaga ma taua seia oo ina latou faaumatia e i latou i latou lava. Mai lenei tala, na aoaoina e tamaiti aoga faapea afai tatou te teena lapataiga a le Alii ia salamo, e aluese Lona Agaga ma maua ai le malosiaga o Satani i o latou loto. Na mafai foi ona iloa e tamaiti aoga o le ita ma le taui ma sui e taitai atu i le faia o filifiliga e faatiga ai i tatou lava ma isi. I lana tala i le faatafunaiga o sa Iareto, na tuuina atu e Moronae i ana tagata faitau le faamoemoe e ala i le folafolaina atu faapea o le Ierusalema Fou, po o Siona, o le a fausia i aso e gata ai.

Aso 2 (Moronae 1–5)

A o fealuai solo Moronae mo le puipuia o lona ola, na ia faamaumauina nisi faamatalaga i le perisitua ma sauniga o le talalelei. Na ia tusia faapea o le faaeeina o le meaalofa o le Agaga Paia ma le faauuina i tofi o le perisitua e faia i le faaee o lima e i latou o i ai le pule. O le manatu mamafa o Moronae i le faamanatuga na saunia ai mo tamaiti aoga le avanoa e manatunatu loloto ai pe faapefea e faatusa o le faamanatuga ona fesoasoani ia i latou e manatua le Togiola a Iesu Keriso. Na faamanatuina foi ia i latou faapea a o latou tausia ma le faamaoni feagaiga e faatatau i le faamanatuga, e mafai ona latou maua pea le Agaga o le Alii e faatasi ma i latou.

Aso 3 (Moronae 6)

Na faamamafa atu e Moronae le taua o le papatisoga, faaaumea i le Ekalesia, ma le taitaiina o sauniga o le Ekalesia e ala atu i le Agaga Paia. Na aoaoina e tamaiti aoga faapea e ala atu i le papatisoga tatou te osi feagaiga ai e tauave i o tatou luga le suafa o Iesu Keriso ma auauna ia te Ia e oo i le iuga. Na latou aoao foi e uiga i le tiutetauave ua ia i latou o le fafagaina faaleagaga o isi tagata o le Ekalesia e ala i le potopoto soo e anapopogi ma tatalo ma ia fetagofi atu i le faamanatuga i le manatuaina o Iesu Keriso. Ma lea foi, na aoao tamaiti aoga faapea o le tele lava ona tatou salamo ma saili le faamagaloga ma le manatu faamaoni i ai, o le a faamagaloina i tatou.

Aso 4 (Moronae 7:1–19)

Na faamaumauina e Moronae se aoaoga na tuuina atu e lona tama, o le na aoao atu faapea, ina ia faamanuiaina mo a tatou galuega lelei, e tatau ona tatou faia na galuega ma le manatu moni i ai. I lenei aoaoga na aoao mai foi e Mamona le ala e mafai ai ona tatou faia faamasinoga amiotonu. Na iloa e tamaiti aoga soo se mea e sau mai le Atua e valaaulia i tatou e fai le lelei ma alofa ma auauna i le Atua, ma soo se mea e faatauanauina i tatou e fai le leaga ma tetee atu i le Atua e sau mai le tiapolo. Na faatoga atu Mamona i e faalogologo ia te ia e sailiili ma le filiga i le Malamalama o Keriso, lena o le a tuuina atu ia i latou le mana e iloa ai le eseesega o le lelei ma le leaga.

Faatomuaga

O le lesona i le aso e faamamafaina ai mafuaaga ma le manaomia mo i tatou taitoatasi ina ia auai i sauniga o le Ekalesia. Ua fautuaina foi tamaiti aoga i lo latou naunau ia iloa le eseesega i le va o le lelei ma le leaga ma ia sailiili ma le filiga i le Malamalama o Keriso ina ia fai ai faamasinoga lelei.

Fautuaga mo le Aoaoga

Eteru 14–15

Ua faamaumauina e Moronae le iuga o le nuu o sa Iareto

Tusi 2,000,000 i le laupapa. Fai atu i tamaiti aoga e vaai faalemafaufau pe toafia tagata e lua miliona faatusatusa i le numera o tagata o loo nonofo i lo latou aai. Valaaulia se tamaitiiti aoga e faitau leotele le Eteru 15:1–2 a o iloilo e le vasega le mea na tupu i le lua miliona tagata sa Iareto.

Fesili atu pe mafai e soo se tamaitiiti aoga ona aotele mai mea na tutupu na taitai atu i le faaumatiaga o sa Iareto e pei ona faamaumauina i le Eteru 14–15. Afai e faigata i tamaiti aoga ona tali mai, valaaulia i latou e iloilo mau fuaitau nei: Eteru 14:5–10, 24; 15:1–6, 19, 22.

Fesili: O a nisi lesona e mafai ona tatou aoaoina mai le faaumatiaga o sa Iareto?

O nei upumoni e lua na faapitoa lava i lesona a tamaiti aoga i le gasologa o le vaiaso: (1) Afai tatou te teena lapataiga a le Alii ia salamo, o le a aluese Lona Agaga ma o le a maua e Satani le mana i o tatou loto. (2) O le ita ma le taui ma sui e taitai atu ai tagata i le faia o filifiliga e faatiga ai i latou lava ma isi.

Fesili: O a nisi tulaga e mafai ai ona aoga nei lesona i le olaga o se alii po o se tamaitai talavou o le aso?

Moronae 1–3

Ua molimau mai Moronae o le a ia le faafitia Keriso

Valaaulia se tamaitiiti aoga e faitau leotele le Moronae 1:1–4.Ona fai atu lea o fesili nei i le vasega:

Aisea o le a fasiotia ai e sa Lamana Moronae?
O le a le mea ua faaalia mai e lenei mea e uiga i le faatuatua ma le lototoa o Moronae? E faapefea ona tatou atinaeina se molimau malosi faapea ia Iesu Keriso?

Moronae 4–6

Ua faamaumau e Moronae tatalo o le faamanatuga, agavaa mo le papatisoga, ma mafuaaga mo sauniga o le Ekalesia

Tusi fuaitau nei i le laupapa: Aisea e tatau ai ona ou alu i le lotu i le Aso Sa. Valaaulia tamaiti aoga e sue Moronae 4–6 ma saunia se tali e tasi-i le lua-minute i lenei fuaitau e ala i le faia o nai faamatalaga ia latou tusi talaaga mo le suesueina o tusitusiga paia. Fautuaina i latou e faaaofia i a latou tali ia le itiiti ifo ma le lua o nei elemene (atonu e te manao e tusi nei mea i le laupapa pe saunia i ni pepa e tufa atu):

Se mau mai Moronae 4–6 o loo faamatala ai le mafuaaga mo le potopoto faatasi i le lotu.
O se aoaoga po o se mataupu faavae e faamatala ai pe aisea e tatau ai ona tatou auai i sauniga o le Ekalesia.
Se aafiaga patino e faaalia ai pe aisea e tatau ai ona tatou auai i sauniga o le Ekalesia.
Se molimau patino i le taua o le auai i sauniga o le Ekalesia.

A lava loa le taimi mo tamaiti aoga e saunia ai o latou manatu, ona valaaulia lea o nisi o i latou e faasoa mai o latou manatu i le vasega.

A uma ona faasoa mai e tamaiti aoga mea na latou aoaoina, faaopoopo atu lau molimau i upumoni na latou faailoa mai ma le taua o le faapotopoto soo i sauniga o le Ekalesia.

Moronae 7:1–19

Ua aoao mai Mamona pe faapefea ona faamasino i le va o le lelei ma le leaga

A o lei amataina le vasega, faatumu se ipu i le vai ma le isi ipu e fefiloi le vai ma le vineta paepae (po o le masima). E tatau ona foliga tutusa ipu. Tau atu i le vasega o loo ia te oe ni ipu vai se lua e foliga tutusa, a o le tasi e oona lona tofo (pe masimā). Fesili mo se tasi e ofo mai e iloilo po o fea le ipu o loo i ai le vai lelei a o fea le ipu o loo i ai le vai oona (pe masimā) (e mafai ona latou faia i le tofo i ai pe sogisogi i ai).

Fesili: E faapefea ona e iloa o se mea e leaga e aunoa ma le matua faataitaia lava?

Faamatala atu i lana talafaamaumau na faaaofia ai e Moronae se lauga mai lona tama, o Mamona, o loo tuuina mai ai se vaaiga i lenei fesili. Valaaulia se tamaitiiti aoga e faitau Moronae 7:11–13, 15–16 leotele. Fai atu i le vasega e filifili ia le itiiti ifo i le tasi le fuaitau e tulagaese ia i latou o loo faamatalaina ai le ala e mafai ona tatou iloa ai le eseesega i le va o le lelei ma le leaga. Tuu atu se avanoa i ni nai tamaiti aoga e faasoa mai ai se fuaitau ua latou filifilia.

Valaaulia se tamaitiiti aoga e faitau leotele le Moronae 7:19, ma fai atu i le vasega e vaai mo le mea na fai mai ai Mamona e tatau ona tatou faia ina ia iloa ai le lelei mai le leaga.

Fesili: O le a le mea na fautua mai Mamona e tatau ona tatou faia ina ia tatou iloa ai le eseesega i le va o le lelei ma le leaga?

E mafai e tamaiti aoga ona faailoa mai lenei mataupu faavae: A o tatou sailiili ma le filiga i le Malamalama o Keriso, e mafai ona tatou iloa le eseesega i le va o le lelei ma le leaga.

Fai atu i tamaiti aoga fesili nei:

Mai au suesuega o lenei vaiaso, o le a sou iloa o le a le Malamalama o Keriso?
O anafea na fesoasoani ai le Malamalama o Keriso ia te oe e iloa le eseesega i le va o le lelei ma le leaga?

Tuu atu i tamaiti aoga se minute se tasi pe lua e tusi ai se lisi o a latou faaaliga e sili ona fiafia i ai i le televise, pese, au fai pese, saite i le Initoneti, polokalama i le Initoneti, taaloga vitio, po o meatotino patino. Valaaulia i latou e faaaoga Moronae 7:16–19 e iloilo ai pe o aitema i a latou lisi e fesoasoani ia i latou e latalata atili ai i le Atua pe se’e’ese mamao ai mai ia te Ia.

Faamanatu i tamaiti aoga le valaaulia na latou mauaina ia latou suesuega i lenei vaiaso ia aveese mai o latou olaga na mea e le lelei ma ia “taofi mau i mea lelei uma” (Moronae 7:19). Atonu e te manao e faasoa atu se aafiaga na e maua ina ua e mulimuli i le Malamalama o Keriso ma na mafai ai ona iloa le eseesega i le va o le lelei ma le leaga.

Iunite e Sosoo ai (Moronae 7:20–10:34)

Valaaulia tamaiti aoga e mafaufau i fesili nei a o latou suesueina le isi iunite: O le a le alofa mama? E faapefea e se tagata ona maua le alofa mama? Aisea e le tatau ai ona papatisoina fanau laiti po o pepe? Na faapefea e Mamona ma Moronae ona tumau i le faatuatua e tusa lava pe na siomia i laua e le amioleaga? O a upu mulimuli a Moronae? Aisea e taua ai na upu?