Lesona 5

Vaaiga aoao i le Tusi a Mamona

Faatomuaga

O lenei lesona o le a sauniaina se vaaiga aoao i le Tusi a Mamona. O le a suesue tamaiti aoga i le molimau a Iosefa Samita e uiga i le oo mai o le Tusi a Mamona. O le a latou aoaoina foi pe na faapefea ona tuufaatasia ma otootoina i lalo o le taitaiga faalelagi. Sa vaai le au tusitala o le Tusi a Mamona i aso e gata ai, ma sa latou faaaofia ai tala ma aoaoga na latou iloa o le a sili ona aoga mo i tatou.

Sauniaina o ni vaaiga aoao

Na saunoa mai Peresitene Boyd K. Packer o le Korama a Aposetolo e Toasefululua faapea: “E matua taua lava le tuuina atu o se vaaiga aoao puupuu ae matuai lelei le faatulagaina o le kosi atoa i le amataga lava. …

“… [O Tamaiti Aoga] e sili atu ona mauaa pe a latou iloa le auala na tuufaatasia uma ai vaega uma, ma o le malamalama o le aoaoina o le a sili atu lona susulu. O le muai vaaiga o le a fausiaina se faavaa ma o le a sili atu lona taua nai lo o le taimi ma le galuega o loo tuuina i ai” (“The Great Plan of Happiness” [CES symposium on the Doctrine and Covenants/Church History, 10 Aok., 1993], 2, si.lds.org).

Fautuaga mo le Aoaoga

O Le Molimau a le Perofeta o Iosefa Samita

A o le i amataina le vasega, tuu se Tusi a Mamona i totonu o se pusa ma afifi e pei o se meaalofa. Tuu le meaalofa i luga o se laulau i luma o le vasega, ma ta’u atu i le vasega e taua tele le meaalofa.

• O a nisi o meaalofa e sili ona taua ua e mauaina?

• O le a se mea e faatauaina ai se meaalofa?

• O le a sou lagona pe a e tuuina atu i se tasi se meaalofa e taua ia te oe ma na taliaina ma le olioli?

Valaaulia se tamaitiiti aoga e tatala le meaalofa ma faaali atu i isi tamaiti aoga le mea o loo i ai.

• O ai na tuuina mai ia i tatou lenei meaalofa?

• Aisea e te lagona ai e taua lenei meaalofa?

Faaali le ata o Moronae o loo Faaali Atu ia Iosefa Samita i totonu o Lona Potumoe (62492; Tusi Ata o le Talalelei [2009], nu. 91).

• O le a le mea o loo faaalia i lenei ata?

• Na faapefea ona saofaga atu lenei mea na tupu i le Toefuataiga o le talalelei?

Faamalamalama atu i tamaiti aoga o le a latou faitauina nei upu patino a le Perofeta o Iosefa Samita e uiga i le oo mai o le Tusi a Mamona. Ta’u atu ia i latou o le molimau a le Perofeta o Iosefa Samita o loo i ai i le amataga o le Tusi a Mamona e sii mai le Iosefa Samita—Talafaasolopito i le Penina Tau Tele. A o faamaeaina e tamaiti aoga le gaoioiga lenei, fai atu ia i latou e faitau mai le Penina Tau Tele.

Tofi ni tamaiti aoga e galulue fai paga. Valaaulia se tamaitiiti aoga se toatasi o paga taitasi e faitau le leoa le Iosefa Samita—Talafaasolopito 1:30, 32–35, 42 . Fai atu i le isi tamaitiiti aoga i paga taitasi e faitau le leoa le Iosefa Samita—Talafaasolopito 1:51–54, 59–60. Faamalamalama atu a maea le latou faitauga, e tatau i paga taitasi ona aoao e le tasi le isi e uiga i mea sa faitauina.

A ua lava se taimi e faitau ma talatalanoa ai tamaiti aoga, fesili atu:

• O le a sou manatu pe na fesoasoani le faatali o Iosefa Samita mo le fa tausaga faatoa mafai ona ia aveina papatusi auro i le fale? (I lena taimi sa aoaoina Iosefa e Moronae, ma sa tuputupu ae faatagatamatua o ia i ni ala se tele. Tagai i leIosefa Samita—Talafaasolopito 1:54.)

• I le tala a Iosefa Samita, o a ni faamaoniga o loo e vaaia na faasaoina e le Alii le Tusi a Mamona ina ia oo mai i aso e gata ai?

• I le tala a Iosefa Samita, o a ni faamaoniga o loo e vaaia na oo mai le Tusi a Mamona e ala mai i le mana o le Atua?

O Se Faamalamalamaga Puupuu e uiga i le Tusi a Mamona

Ina ia fesoasoani i tamaiti aoga ia malamalama pe na faapefea ona tuufaatasia le Tusi a Mamona, fai atu i ai e sue i le “O Se Faamalamalamaga Puupuu e uiga i le Tusi a Mamona” o loo i itulau o le faatomuaga o le Tusi a Mamona. Valaaulia ni tamaiti se toafa e auauai i le faitauga leotele o aitema 1–4. Ao latou faitauina, ia fai atu i le vasega atoa e faalogologo mo ni auala e taua ai ia seti papatusi taitasi i le Tusi a Mamona. O loo aofia i le faaopoopoga o lenei tusi lesona se ata tusi e faaautuina “O Papatusi ma la Latou Faia i le Tusi a Mamona ua Lomia.” O lenei ata e mafai ona fesoasoani i tamaiti aoga ia vaai faalemafaufau ai i papatusi o loo talanoaina i le “O Se Faamalamalamaga Puupuu e uiga i le Tusi a Mamona.” (Afai e te lagona o le a aoga i le avea ai ma se vaega o lenei talanoaga, faailoa mai le palakalafa mulimuli o le faamalamalamaga puupuu, e amata atu i le fuaiupu “E faatatau i lenei lomiga.” Faamalamalama atu o lomiga uma lava o le Tusi a Mamona na aofia ai ni faasaoga iti e aofia ai le sipelaina o upu ma mea sese tau lomiga.)

Faaali atu le ata o Mamona o Otootoina ia Papatusi (62520; Tusi Ata o le Talalelei, no. 73). Faamalamalama atu e toatele ni tagata na faasaoina faamaumauga lea ua avea nei ma le Tusi a Mamona. Tusi i luga o le laupapa ia mau nei. Fai atu i tamaiti aoga e suesue le leoa ia mau, ma saili nisi o mataupu faavae na fesoasoani i tusitala o le Tusi a Mamona e iloa po o a mea e tatau ona aofia i totonu o a latou faamaumauga. Valaaulia tamaiti aoga e faasoa atu ni mea sa latou mauaina. (Atonu e te manao e tusi a latou tali i luga o le laupapa.)

• 1 Nifae 1:20

• 1 Nifae 6:4–6

• 2 Nifae 4:15

• 2 Nifae 25:23, 26

• 2 Nifae 29:11–13

• Upu a Mamona 1:4–8

• 3 Nifae 16:4

• Moronae 1:4

• E faapefea ona fesoasoani ia te oe le iloa o nei mataupu faavae taiala ao e suesue i le Tusi a Mamona?

Faasoa atu lau molimau faapea sa vaai le au tusitala a le Tusi a Mamona i o tatou aso ma tusia mea o le a sili ona fesoasoani ia i tatou. Valaaulia se tamaitiiti aoga e faitau leotele le Mamona 8:35–38.

• O a faafitauli sa vaaia e Moronae i tagata o o tatou aso?

• Aisea e taua ai le iloa faapea na silafia e Moronae ma isi tusitala o le Tusi a Mamona ia faafitauli o le a feagai ma i tatou?

Valaaulia se tamaitiiti aoga e faitau le faamatalaga lenei mai ia Peresitene Ezra Taft Benson e faatatau i le auala e suesue ai i le Tusi a Mamona:

“Afai na latou vaai i o tatou aso, ma latou filifili mea e sili ona taua mo i tatou, e le o se pogai sili ea lena ona taua e tatau ai ona tatou suesue ma aoao i le Tusi a Mamona? E tatau ona tatou fesili ifo soo ia i tatou lava, “O le a le pogai na musuia ai e le Alii ia Mamona po o Moronae po o Alema ia tuu lena mea i le tusi? O le a se lesona e mafai ona ou aoaoina mai lena mea e fesoasoani ia te au ou te ola i nei aso?’” (“O Le Tusi a Mamona—O Le Maa’au’au o lo Tatou Faatuatuaga,” Liahona, Ian. 1987, 6).

Tau atu i tamaiti aoga sa feagai tagata o loo tusia i totonu o le Tusi a Mamona ma faafitauli e pei lava o i tatou. E ui lava o le Tusi a Mamona o se tusitusiga anamua, o ona aoaoga faavae, talafaasolopito, ma tala e taua tele i aso nei.

Fai atu i se tamaitiiti aoga e faitau leotele le faamatalaga lea a Peresitene Ezra Taft Benson. (Atonu e te manao e tuuina atu ni kopi o le faamatalaga lea i tamaiti aoga taitasi.) Fai atu i le vasega e faalogologo mo ni faamanuiaga sa folafolaina atu e Peresitene Benson ia i latou o e ua amataina se suesuega faamaoni o le Tusi a Mamona.

“Ua le na o le faapea ua aoao mai e le Tusi a Mamona ia i tatou upu moni, e ui ina moni lena mea. E le na o le faapea ua molimau mai e le Tusi a Mamona ia i tatou Keriso, e ui ina tonu lena mea. Ae e i ai se mea e sili atu. O loo i ai se mana i lena tusi o le a amata ona tafe mai i o outou olaga i le taimi tou te amata ai ona faitau ma suesue ma le loto i ai i lena tusi. O le a outou maua ai le mana tele tou te tetee atu ai i faaosoosoga. O le a outou maua ai le mana e aloese ai mai mea tau faasese. O le a outou maua ai le mana e tumau ai i le ala sao ma le vaapiapi. O tusitusiga paia ua faaigoaina “o upu o le ola” (tagai i le MF&F 84:85), ma e leai se isi mea e sili atu ona moni nai lo le Tusi a Mamona. A amata loa ona e matelaina ma galala i le fia maua o ia upu, o le a faateleina ona e maua le ola.” (“O Le Tusi a Mamona—O Le Maa’au’au o lo Tatou Faatuatuaga,” 8).

• O anafea na e mauaina ai ni faamanuiaga mai le suesueina o le Tusi a Mamona?

Faasoa atu lau molimau faapea o le Tusi a Mamona e tuuina mai ia i tatou se mana sili e tetee atu ai faaosoosoga, alofia le taufaasese, ma tumau i le ala sao ma le vaapiapi. Tau atu i tamaiti aoga e uiga i se taimi na e mauaina ai nei faamanuiaga o se taunuuga o le suesueina o le Tusi a Mamona.

A o le i amataina le vasega

Afai e mafai, faaaoga se taimi e saunia ai le potuaoga a o le i amataina le vasega. Faaali atu ni mau faasino, fesili, ma isi gaoioiga i luga o le laupapa a o lei amata le vasega. O le a fesoasoani lea ia te oe i le faasaoina o taimi taua mo faatonuga ma faaitiitia ai ni mea faalavefau e ono faalavelave i le faagasologa o le aoao atu ma le aoaoina mai.

A o le i amataina le vasega, tusi le lisi lenei o fesili ma mau i luga o le laupapa:

• E i ai ea se Atua? (Tagai i le Alema 30:37. E mafai ona ou iloa le Atua? (Tagai i le Alema 22:18.) Pe alofagia au e le Atua? (Tagai i le 3 Nifae 13:26–32.)

• E faapefea ona ou tetee atu i faaosoosoga ma agasala? (Tagai i le Helamana 5:12.)

• O le a le faamoemoega o le olaga? (Tagai i le Alema 34:32–34.)

• Pe i ai se olaga pe a mavae le oti? (Tagai i le Alema 40:11–12, 21–23.)

• E faapefea ona ou mauaina le filemu ma le olioli ma le fiafia? (Tagai i le Mosaea 2:41; 4:2–3; Alema 41:10.)

• Pe faapefea ona atili fiafia ma maopoopo lo’u aiga? (Tagai i le Mosaea 4:14–15.)

• Pe faapefea ona ou faamasino i le va o le sao ma le sese? (Tagai i le Moronae 7:16–17.)

• Aisea e faatagaina ai e le Atua mea leaga ma puapuaga e tutupu? (Tagai i le 2 Nifae 2:1–2, 11–16, 22–27; Alema 14:9–11; 60:13.)

Faamalamalama atu e faaopoopo atu i faamanuiaga ua uma ona taua, o le Tusi a Mamona e i ai tali o fesili pito sili ona taua i le olaga. Valaaulia tamaiti aoga ia taitasi ma filifili se fesili se tasi pe lua foi ma saili ni fuaitau faaopoopo o tusitusiga paia mo ni tali. Tuu atu ia i latou ni nai minute e saili ai ia tali. Atonu e te fia savalivali solo i totonu o le potu, ma tuuina atu se fesoasoani pe a manaomia.

• Pe faapefea ona tali e le Tusi a Mamona ia fesili na e filifilia?

Faitau le saunoaga lenei a Peresitene Boyd K. Packer o le Korama a Aposetolo e Toasefululua. A o ia faia lenei faamatalaga, na ia saunoa atu i faiaoga seminare ma inisitituti e uiga i le mana o tusitusiga paia e tali ai fesili e sili ona taua o le olaga.

“Afai e masani au tamaiti aoga i faaaliga, e leai se fesili—patino pe faaagafesootai pe faapolokiki pe faalegaluega—e le mafai ona le taliina. O iina o loo i ai le atoatoaga o le talalelei faavavau. O iina o le a tatou maua ai mataupu faavae o le upu moni lea o le a soloia soo se fenumiaiga ma soo se faafitauli ma soo se atugaluga e feagai ma le aiga o le tagata po o soo se tasi lava o loo i ai i totonu” (“Teach the Scriptures” [address to CES religious educators, 14 Oke., 1977], 3–4, si.lds.org).

Faasoa atu pe na faapefea ona faamanuiaina lou olaga e le Tusi a Mamona. Faamanatu atu i tamaiti aoga a latou sini e faitau le Tusi a Mamona i aso uma ma ia faitau atoa le Tusi a Mamona ia le itiiti ifo ma le faatasi i lenei tausaga.

Tala ma Faamatalaga o Talaaga

O se Faamatalaga Puupuu e uiga i le Tusi a Mamona. “E uiga i lenei lomiga”

E lua ni tusigatusilima o le Tusi a Mamona: o le uluai tusigatusilima muamua ma le tusigatusilima a le lomitusi. O se vaega itiiti o le lomiga faatulaga muamua i le 1830 o le Tusi a Mamona sa faavae i le uluai tusigatusilima, a o le vaega uma na totoe sa faavae i le tusigatusilima a le lomitusi, o se kopi o le uluai tusigatusilima. Ao saunia e Iosefa Samita le lomiga o le Tusi a Mamona i le 1840, sa ia faaaogaina le uluai tusigatusilima e faasa’o ai mea sese faafuasei ma mea sa tape lea na tupu i le lomiga o le 1830. Mo le lomiga o le 1981, o le uluai tusigatusilima muamua sa faaaogaina e toefuatai ai ululai faaupuga i vaega pe tusa ma le 20. Soo se mea sese i le Tusi a Mamona o mea sese a tagata, ma o suiga e faia e mo le toefuatai ai le Tusi a Mamona i lona uluai uiga ma le faamoemoega. (Tagai Book of Mormon Reference Companion, ed. Dennis L. Largey (2003), 124-25.

Na tusia e Peresitene Iosefa Filitia Samita:

“Na iloa lava o le a i ai ni mea sese tau lomiga i le uluai lomiga [o le Tusi a Mamona], ma atonu i le aveesea o se upu e tasi pe lua. O i latou sa lomia ia tusi i lalo o se faaeteetega ma tulaga lelei, sa latou mauaina ma le faanoanoa ni mea sese, i anotusi ma masini, o nisi mea sese sa tupu i le taimi na maea ai le iloiloga faaiu sa faia e faamaonia ai.

“… O se siakiina faaeteete o le lisi o suiga … na faaalia ai e leai lava se suiga e tasi po o se faaopoopo e le ogatasi ma le tusi muamua. O suiga o loo faia i faailoga ma isi vaega laiti e manaomia le faasaoga, ae e le i faia lava ni suiga po o se faaopoopoga e suia ai se manatu autu se tasi. E pei ona tatou vaaia, o suiga … ua faamanino atili ai le tusi ma faailoa mai ai sa misi. Ou te mautinoa o sese po o vaega na misia i le lomiga muamua sa tele ina pau i le na faatulagaina mataitusi po o le lomitusi. Tele o nei mea sese lea sa iai i le siakiina muamua sa maua e le Perofeta o Iosefa Samita lava ia, ma ia faia faasaoga”Tali atu i fesili o le Talalelei,faaau. Iosefa Filitia Samita leitiiti.,5 vols. [1957–66], 2:199–200; italics in original).