Moronae 8

Faatomuaga

I lona faaauauina o le faaopoopo atu i le talafaamaumau paia, na faaaofia ai e Moronae se savali, po o se tusi, na ia mauaina mai lona tama, o Mamona. I le savali, na faamaumauina e Mamona se faaaliga na ia maua e uiga i le mafuaaga e le manaomia ai e fanau laiti le papatisoga. Na aoao mai foi Mamona i le ala tatou te saunia ai e mau faatasi ma le Atua. Na ia faaiuina lana savali i le faamatalaina mai o le popolega e uiga i le amioleaga o sa Nifae ma lo latou faatafunaiga ua lata mai.

Fautuaga mo le Aoaoga

Moronae 8:1–24

Ua aoao mai Mamona o fanau laiti ua ola ia Keriso

Ata

Teineitiiti o Loo Papatisoina

A o lei amataina le vasega, faaali atu le ata Teineitiiti o Loo Papatisoina (Tusi Ata o le Talalelei [2009], nu. 104) po o se isi ata o se tamaitiiti e valu-tausaga i lona sauniga o le papatisoga. Tusi le fesili lenei i le laupapa:

Aisea e le papatisoina ai tamaiti seiloga ua tai valu o latou tausaga?

A o taunuu mai tamaiti aoga, valaaulia i latou e vaai i le ata ma manatunatu loloto i le fesili i le laupapa.

A amata le vasega, tau atu i tamaiti aoga faapea i se tusi i lona atalii o Moronae, na aoao atu ai Mamona e uiga i le faaolaina o fanau laiti. Valaaulia se tamaitiiti e faitau Moronae 8:4–6 leotele, ma fai atu i le vasega e vaai po o le a le mea na popole ai Mamona. (Atonu e te manao e faamatala atu faapea i fuaiupu 6, o le upu sese o lona uiga o le matuia, faamaasiasiina, po o le matautia.)

A uma ona lipoti mai tamaiti aoga i mea na latou maua, valaaulia i latou e faitau le leoa le Moronae 8:7 ma faailoa mai le mea na fai e Mamona ina ua ia iloaina lenei faafitauli.

O le a se mea ua tatou aoaoina mai le faataitaiga a Mamona?

Valaaulia se tamaitiiti aoga e faitau Moronae 8:8–9 leotele, ma fai atu i le vasega e vaai mo le tali i le tatalo a Mamona. A o lipoti mai tamaiti aoga i mea ua latou maua, atonu e te manao e faamatala atu faapea o le fuaitau “le fetuu o Atamu” e faatatau i le tuueseeseina o Atamu mai le afioaga o le Atua o se taunuuga o le Pau. O nisi tagata e talitonu sese faapea o tamaiti uma e fananau mai i se tulaga agasala ona o le Pau. Ona o lenei manatu sese, ua latou manatu o fanau laiti ua le agavaa e i ai i le afioaga o le Atua pe a feoti i latou e aunoa ma le papatisoga. A o e faamatalaina atu lenei mea, atonu e te manao e tuu atu i tamaiti aoga e tauloto mai le mataupu faavae o le faatuatua lona lua. Atonu e te manao e fautua atu latou te fesootaia Moronae 8:8–9 ma le Mataupu Faavae o le Faatuatua 1:2.

Tusi lenei fuaitau le maea i le laupapa: O le salamo ma le papatisoga e manaomia mo tagata uma o e …

Fai atu i tamaiti aoga e faitau Moronae 8:10 le leoa, ma vaai mo upu ma fuaitau e faauma ai le fuaitau i le laupapa. A uma ona lipoti mai e tamaiti aoga a latou tali, faauma le fuaitau faapenei: O le salamo ma le papatisoga e manaomia mo i latou uma o e e mafai ona tali atu ma mafai ona faia le agasala . Atonu e te manao e fautuaina tamaiti aoga e faailoga fuaitau i le Moronae 8:10 o loo aoaoina mai lenei upumoni.

E mafai ona fesoasoani le faamanino atu o le agasala o le “lē usiusitai i poloaiga a le Atua ma le loto i ai” (Taiala i Tusitusiga Paia, “Agasala,” scriptures.lds.org). Faitau le saunoaga lenei a Elder Dallin H. Oaks o le Korama a Aposetolo e Toasefululua:

Ata

Elder Dallin H. Oaks

“Tatou te malamalama mai la tatou aoaoga faavae faapea a o lei oo i le tausaga e tali atu ai, o se tamaitiiti e ‘le mafai ona faia se agasala’ (Moro. 8:8). I lena taimi, e mafai e tamaiti ona faia mea sese, e oo lava i sese matuia ma afaina e tatau ona faasa’oina, ae o a latou faatinoga e le faitaulia oni agasala” (“Sins and Mistakes,” Ensign, Oke. 1996, 65).

Vaelua le vasega. Valaaulia le afa o tamaiti aoga e faitau le leoa le Moronae 8:11–18 ma le isi afa e faitau le leoa le Moronae 8:11, 19–24. (Atonu e te manao e tusi nei mau i le laupapa.) A o lei faitau i latou, fai atu i tamaiti aoga i vaega e lua e faailoa mai mea na aoao atu e Mamona e uiga i le papatisoina o fanau laiti. A uma se taimi talafeagai mo tamaiti aoga e faitau ai, valaaulia nisi o i latou mai vaega taitasi e lipoti mai mea na latou maua. Atonu e te manao e faaaoga nisi o fesili nei e fesoasoani i tamaiti aoga e mafaufau atili ai e uiga i aoaoga a Mamona:

O le a sou manatu i le uiga faapea o fanau laiti e “ola ia Keriso”? (Moronae 8:12, 22). (E faaolaina i latou i le Togiola a Iesu Keriso. E le mafai ona agasala i latou, ona e le tuuina atu ia Satani le mana e faaosoosoina ai fanau laiti. Tagai foi Moronae 8:10; MF&F 29:46–47.)
O le a le mea tatou te manaomia e fai ina ia tatou ola ai ia Keriso? (Tagai 2 Nifae 25:23–26; Moronae 8:10.)
O a ni mea e mafai ona tatou aoao mai nei fuaiupu e uiga i le ala e faaolaina ai fanau laiti? (Atonu e faaaoga e tamaiti aoga ni upu eseese, ae e tatau ona latou faailoa mai le upumoni lenei: E faaolaina fanau laiti i le Togiola a Iesu Keriso. Atonu e tau mai foi e tamaiti aoga faapea e ola fanau laiti ia Keriso, ma e le faailoga tagata le Atua, ma le isi foi e le fesuisuiai le Atua.)

Tusi faataitaiga nei i le laupapa pe saunia ni pepa e tufa atu. Valaaulia tamaiti aoga taitasi e filifili se pepa se tasi. Ona fai atu lea i tamaiti aoga e filifili se fuaiupu e tasi pe lua mai Moronae 8:8–23 ma faamatala mai le ala ua talanoa mai ai upumoni i na fuaiupu e uiga i le popolega ua faaleoina mai le faataitaiga na latou filifilia.

Faataitaiga 1: I le avea ai ma se faifeautalai, ua e feiloai i se tane ma se ava ua matuai faanoanoa lava ona o le la tama teine e lua-masina ua oti. Ua tau atu e le taitai o le latou lotu ia i laua o fanau laiti e fananau mai ma le agasala ona o le solitulafono a Atamu. Ua ia fai mai ona o le la tama teine e lei papatisoina ae lei oti, e le mafai ona faaolaina o ia.

Faataitaiga 2: E i ai sau uo ua feiloai i faifeautalai ma ua auai i le lotu faatasi ma oe. Ua filifili o ia ua manao e fia auai i le Ekalesia, ae ua le mautonu i le papatisoina. “Na papatiso au a o ou pepe,” lana faamatalaga. “E le lava lena papatisoga?”

A o faasoa mai e tamaiti aoga o latou manatu e uiga i le faataitaiga lona lua, atonu e te manao e faamanatu atu ia i latou o le salamo ma le papatisoga e mo “i latou o e ua tali atu ma mafai ona faia le agasala” (Moronae 8:10). Na fetalai mai le Alii o tamaiti e amata ona mafai ona tali atu i Ona luma i le valu tausaga. O faaaliga i lenei upumoni e maua i le Faaliliuga a Iosefa Samita, Kenese 17:11 (i le faaopoopoga i le lomiga a le Au Paia o Aso e Gata Ai o le King James Version of the Bible) ma Mataupu Faavae ma Feagaiga 68:25–27.

Moronae 8:25–30

Ua aoao mai e Mamona mea e tatau ona fai e i latou ua mafai ona tali atu e mafai ai ona mau faatasi ma le Atua

Faamatala atu ina ua uma ona aoao atu e Mamona Moronae e uiga i le mafuaaga e le manaomia ai e fanau laiti le papatisoga, ona ia aoao atu lea o le mafuaaga e manaomia ai le papatisoga mo i latou ua mafai ona tali atu. Valaaulia se tamaitiiti aoga e faitau Moronae 8:25–26 leotele. Fai atu i le vasega e mulimuli i le faitauga, ma vaai mo faamanuiaga e oo mai i tagata o e e faatinoina le faatuatua, salamo, ma ua papatisoina.

O a faamanuiaga na e vaaia i nei fuaiupu? (A o lipoti mai e tamaiti aoga mea na latou maua, atonu e te manao e lisi a latou tali i le laupapa. O tali e ono aofia ai faapea o le faatuatua, salamo, ma le papatisoga e taitai atu i le faamagaloina o agasala, agamalu ma le maualalo o le loto, le asiasiga a le Agaga Paia, faamoemoe, alofa atoatoa, ma, i le iuga, o le faamanuiaga o le mau faatasi ma le Atua.)

A o lisiina e tamaiti aoga faamanuiaga ua latou vaaia i Moronae 8:25–26, atonu e te manao e fai atu nei fesili tulitatao:

Aisea e te manatu ai o le mauaina o le faamagaloga o a tatou agasala e taitai atu i le agamalu ma le maualalo o le loto?
E faapefea e le agamalu ma le maualalo o le loto ona mafai ona valaaulia le Agaga Paia i o tatou olaga?
Aisea e fesoasoani ai le Agaga Paia ia i tatou ia saunia e ola faatasi ma le Atua?
Aisea e te manatu ai tatou te manaomia le filiga ma le agaga tatalo ina ia faatumauina ai le alofa atoatoa i o tatou olaga?

Tusi le fuaitau le maea lenei i le laupapa: E ala atu i le usiusitai faamaoni i poloaiga, e mafai ona tatou maua le Agaga Paia, lea e saunia i tatou e …

Valaaulia tamaiti aoga e faailoa mai se fuaitau mai Moronae 8:25–26 e faamaeaina lenei mataupu faavae: E ala atu i le usiusitai faamaoni i poloaiga, e mafai ona tatou maua le Agaga Paia, lea e saunia i tatou e mau faatasi ma le Atua.

Valaaulia se tamaitiiti aoga e faitau leotele le Moronae 8:27 , ma fai atu i le vasega e vaai mo le taunuuga o le faamaualuga o sa Nifae. Ona fesili atu lea i tamaiti aoga e iloilo le leoa Moronae 8:26 ma le Moronae 8:27, faatusatusa taunuuga o le agamalu ma le maualalo o le loto i taunuuga o le faamaualuga.

Valaaulia se isi tamaitiiti aoga e faitau leotele le Moronae 8:28. Tau atu faapea ina ua uma ona faaleo atu e Mamona le popolega e uiga i sa Nifae, na ia faapea atu, “tatalo mo i latou, lou atalii e, ina ia oo mai le salamo ia te i latou.” Faamanatu atu i tamaiti aoga le mana e mafai ona oo mai i olaga o tagata pe a tatalo isi mo i latou.

Ina ia faaiuina le lesona, valaaulia tamaiti aoga e faasoa mai o latou lagona e uiga i le mana o le Togiola e faaolaina ai fanau laiti ma faaolaina ai i tatou uma a o tatou taumafai e faamaoni ia tatou feagaiga.

Tala ma Faamatalaga o Talaaga

Moronae 8:8. “ Ua aveesea mai ia te i latou, ia te au, le fetuu o Atamu”

O nisi tagata ua talitonu faapea ona o le Pau o Atamu ma Eva, o pepe fou e fananau mai i le lalolagi ua pisipisia i le agasala. Na faamatalaina e Peresitene Iosefa Filitia Samita faapea o lenei aoaoga e sese:

“O i latou uma e talitonu faapea o le tagata, ioe, e oo lava i pepe faatoa fananau mai, ua pisipisia i le ‘uluai agasala’ (i se isi faaupuga o le solitulafono a Atamu,) ua faafitia le alofa mutimutivale o le toto togiola o Iesu Keriso. O le Tusi Paia (e faapena foi a tatou tusitusiga paia faaonaponei) ua aoao mai o Iesu Keriso i soo se itu, o le Faaola o le fanauga a tagata mai le pau. Na ia totogiina le aitalafu mai le avea o le fanauga a tagata ma suli e ala atu i le solitulafono a Atamu. O le mokesi i luga o o tatou agaga na totogiina i le atoatoa. E lei totoe sina sala itiiti e ono manaomia ai sina galuega e fai, pe mo se tasi, soo se mea ola, e faasaolotoina o ia mai le ‘uluai agasala.’ O le aoaoga faavae faapea e o mai pepe i lenei lalolagi i lalo o le fetuu a le ‘uluai agasala’ o se aoaoga faavae inosia i le silafaga a le Atua, ma ua faafitia le maoae ma le alofa mutimutivale o le togiola. (Tagai Moronae Mataupu 8.)”(Talafaasolopito a le Ekalesia o Faaliga i I ona Po Nei: O se Kosi mo Suesuega mo le Kolama Perisitua Mekisateko, 4 vols. [1949], 4:99).

Moronae 8:10. Tausaga mo le tali atu

Salamo e mo i latou o e tali atu “Tamaiti Laiti e le mafai ona salamo”(Moronae 8:19). O fanau i lalo ifo o le valu tausaga le matutua e le tali atu i latou i luma o le Atua (tagai MF&F 68:25–27), o le mea lea e le manaomia e i latou le salamo. O tagata e le atoatoa le mafaufau ma e le mafai ona iloa le salamo e mafai foi ona faitauina e le tali atu. Na faamatalaina e Elder Bruce R. McConkie o le Korama a Aposetolo e Toasefululua pe faapefea ona tali atu tamaiti:

“O le tali atu e le pasae atoatoa i luga o se tamaititi i soo se taimi o lona olaga. E faasolosolo lemu mai lava ona malamalama le tamaitiiti a o tuputupu ae o ia, i nai tausaga muamua o lona ola. Avea ma le e tali atu o se faagasologa, e leo se sini ia ausia pe a tuuina mai ni tausaga,aso,ma itula ua alu. I la tatou faaaliga ua fetalai mai ai le Alii, ‘O le mea lea, e lē mafai ona agasala i latou, ona ua lē tuuina atu ia Satani le mana e faaosooso ai tamaiti laiti, sei oo ina amata ona tali mai i latou i oʼu luma.’(MF&F 29:47.) Ae peitai o le a oo mai le taimi e moni ai le oo o le tamaitiiti i tausaga tatau ma ua moni ma o le a i ai foi le agasala i olaga o nei tamaiti nei o le a tutupu malolosi ma ola lelei ae e pei ona masani ai. Ma a oo loa i le valu tausaga o tausaga ia ua tatau ai loa le papatisoga.(MF&F 68:27.)” (“O Le Faaolataga o Tamaiti Laiti,” Liahona, Fep. 1978, 9).

Moronae 8:8–24. Papatisoga o tamaiti

Na aoao mai le Perofeta o Iosefa Samita faapea o fanau laiti e le manaomia le papatisoga:

“‘ Pe [tatou] te talitonu i le papatisoina o tamaiti?’ Leai. Aua e leai se mea o tusia ai i le Tusi Paia. O le papatisoga e mo le faamagaloina o agasala. E leai ni agasala a tamaiti. Ua ola tamaiti uma ia Keriso, ma o i latou e matutua atu e ala atu i le faatuatua ma le salamo” (History of the Church, 5:499).

Na tau atu e Peresitene Boyd K. Packer o le Korama a Aposetolo e Toasefululua i faifeautalai o e na mafai ona faamafanafanaina se tina na faavauvau i le oti o lana tama tama laitiiti:

“Sa galulue ai ni faifeautalai se toalua i atumauga o le itu sasae o le Iunaite Setete. O se tasi aso, mai se tumutumu mauga, sa la vaaia ai ni tagata o potopoto i se nofoaga taalaelae e mamao lava i lālō. Sa le i toatele ni tagata na masani ona aoaoina e faifeautalai, o lea na la o atu ai loa i le nofoaga taalaelae lea.

“Sa malemo se tamaitiiti, ma e ao ona fai se sauniga o le maliu. Sa aami e matua le faifeau e “lauga” i le falelauasiga o le la tama. Sa tuumuli ia faifeautalai i tua a o faasaga atu le faifeau sa aami i le tama ma le tina faavauvau ma amata lana lauga. Afai sa faamoemoeina e matua ia maua se faamafanafanaga mai lenei faifeau, o le a le fiafia lava i la’ua.

“Sa ia matua otegiaina lava i laua mo le le papatisoina o le la tama. Sa la tolopoina ona o nisi mea, ma o lea la ua tuai. Sa ia ta’u manino atu ia i laua ua alu atu nei le la tama i seoli. O lo la faatamala. E ao ona tuua’ia i laua mo le faanoanoa e le gata o lo la atalii.

“Ina ua uma le lauga ma ufi foi le tuugamau, sa faalatalata atu ia faifeautalai i matua faavauvau. ‘O i ma’ua o auauna a le Alii,’ sa la ta’u atu ai i le tina, ‘ma ua ma o mai ma se savali mo oulua.’ A o faafofoga atu ia matua sa tagitu’i, sa faitau atu e faifeautalai e toalua ni faaaliga ma tuu atu a la molimau i le toefuataiga mai o ki mo le togiolaina uma o ē ola ma ē oti.

“E i ai sina ou tigaalofa mo lena faifeau. Sa ia faia le mea sili na te mafaia faatasi ma lena malamalama ma le iloa e pei ona ia te ia. Ae e tele atu mea sa tatau ona mafai ona ia tuuina atu. O loo i ai le atoaga o le talalelei.

“Sa oo mai ia feaifeautalai o ni ē faamafanafana, o ni faiaoga, o ni auauna a le Alii, o ni faifeau ua faamaonia o le talalelei a Iesu Keriso” (“E Taitaiina foi i Latou e le Tama Iti,” Ensign po o le Liahona, Me 2012, 7).