Suesueina o Tusitusiga Paia–Vaaiga aoao i le Tusi a Mamona (Iunite 1)

Sauniuniga o Anomea mo le Faiaoga o Suesuega e Faia i le Aiga

Aotelega o Lesona o Suesuega i le Fale i Aso Taitasi

O le aotelega lea o mea na tutupu, aoaoga faavae, ma mataupu faavae sa aoaoina e tamaiti aoga ao latou faamaeaina ia lesona e fa mo tamaiti aoga e suesue i le fale mo le iunite 1. O le iloaina o mea sa suesueina e tamaiti aoga o le a fesoasoani e saunia ai oe mo lau vasega. O le aotelega e le o se vaega o lenei lesona ma e le faapea e faasoa atu i tamaiti aoga. Ona o le lesona e te aoaoina atu mo le Iunite 1 e taulai atu i ni nai vaega itiiti o nei aoaoga faavae ma mataupu faavae, atonu o le a e maua se lagona lofituina i nisi taimi e toe iloilo pe talanoaina isi e tusa ai ma uunaiga a le Agaga ma manaoga o au tamaiti aoga.

Aso 1 (Suesueina o Tusitusiga Paia)

E aoaoina e tamaiti aoga ni tomai e fesoasoani ia i latou ia malamalama i le talaaga ma le siosiomaga o mau, pe faapefea ona suesue ma iloa upumoni o le talalelei, ma pe faapefea ona faaaoga ia aoaoga ma mataupu faavae o le talalelei i o latou olaga.

Aso 2 (O Le Ata o le Faaolataga)

O lenei lesona o se vaaiga aoao puupuu i le ata o le faaolataga. O loo aoaoina e le Tusi a Mamona faapea o le fuafuaga a le Tama Faalelagi ua mamanuina ina ia aumaia i Lana fanau le olataga ma le fiafia e faavavau. O Iesu Keriso o le tagata autu i le ata o le faaolataga, ma o Lana Togiola lea e mafai ai ona aoga le ata mo fanau uma a le Atua. Pe a tatou filifili e mulimuli i le fuafuaga a le Atua, ua tatou saunia ia maua le ola e faavavau.

Aso 3 (Itulau Autu, Faatomuaga, ma Mau a Molimau)

O faamatalaga tomua o le Tusi a Mamona e fesoasoani e faavaeina lona faamoemoega ma faamalamalama lona moni aiai ma lona mafuaaga paia. O le itulau autu o loo aoao mai ai o le Tusi a Mamona o se molimau o Iesu o le Keriso. A o tatou faitauina, mafaufau loloto, ma tatalo e uiga i le Tusi a Mamona, o le Agaga Paia o le a molimau mai e moni, o Iesu o le Keriso, o Iosefa Samita o se perofeta a le Atua, ma o Le Ekalesia a Iesu Keriso o le Au Paia o Aso e Gata Ai o le malo lea o le Alii i luga o le fogaeleele.

Aso 4 (Vaaiga aoao i le Tusi a Mamona)

O le molimau a le Perofeta o Iosefa Samita na fesoasoani i tamaiti aoga e faamalolosia ai a latou molimau o le Tusi a Mamona sa oo mai e ala mai i le mana o le Atua. Sa faasaoina e le Alii le Tusi a Mamona e oo mai i aso e gata ai. Sa vaai le au tusitala a le Tusi a Mamona i o tatou aso ma tusia mea o le a sili ona fesoasoani ia i tatou. Sa uunaia ia tamaiti aoga e mafaufau i ni a latou fesili o i ai ma saili mo ni tali a o latou suesue i le Tusi a Mamona.

Faatomuaga

O le lesona o lenei vaiaso e faamamafa ai le matafaioi a tamaiti aoga taitoatasi mo lona aoaoina o le talalelei. E faamamafa ai foi le matafaioi tutotonu o le Tusi a Mamona i le fesoasoaniga i tamaiti aoga e fausia se molimau ia Iesu Keriso ma Lana Ekalesia. A o e aoao atu, fesoasoani i tamaiti aoga ina ia malamalama i le taua o le suesue ma le filiga i lenei tusi paia o tusitusiga paia ma faamanuiaga o le a faatumulia ai o latou olaga pe a latou faia.

Fautuaga mo le Aoaoga

O Le Suesueina O Tusitusiga Paia

Atonu e te manao e amata i le tuuina atu o fesili nei i tamaiti aoga:

O le a le eseesega i le va o se tagata e faitau i le Tusi a Mamona ma maua se molimau ma se tagata e faitau ae le maua se molimau? (O nisi e na o le faitau lava o upu; o isi e faitau ma le faatuatua, ma le loto i ai, ma le tatalaina o o latou loto i le Agaga Paia.)
E faapefea ona aoao e se tasi ia upu moni faaleagaga? (Mafaufau e lisi i luga o le laupapa ia tali a tamaiti aoga. Toe foi i le lisi lea pe a maea ona faitau le faamatalaga lenei a Elder David A. Bednar.)

Tusi i luga o le laupapa le faamatalaga lenei, ae aua le tusia ai upu o loo vaseina: “Saili i le aoaoina, e ala lava lea i le suesue ma le faatuatua foi.”

Toe iloilo mea sa aoaoina e tamaiti aoga i lenei vaiaso e ala i le valaauliaina o i latou e faatumu ia avanoa. Afai latou te manaomia se fesoasoani, tuu atu ia i latou e faitau leMataupu Faavae ma Feagaiga 88:118. Fesili atu po o le a le uiga o le saili i le aoaoina e ala i le suesue ma le faatuatua. A o outou talanoaina lenei mea, ia mautinoa o loo latou malamalama o le aoaoina e ala i le suesue ma le faatuatua e manaomia ai se taumafaiga faaletagata lava ia.

Ina ia fesoasoani i tamaiti aoga ia malamalama pe aisea e manaomia ai le taumafai ma le galue e aoao ai le talalelei, tuu atu i se tamaitiiti aoao e faitau le faamalamalamaga lenei a Elder David A. Bednar o le Korama a Aposetolo e Toasefululua. Valaaulia ia tamaiti aoga e faalogologo mo ni mea e tutupu pe a tatou tuuina atu se taumafaiga i le aoaoga faaleagaga.

“O se tagata aoao na te faaaogaina le saolotoga e ala i le galue e faatino e tusa ai ma mataupu faavae sao, e tatalaina lona loto i le Agaga Paia ma valaaulia Ana aoaoga, o le mana molimau, ma molimau faamaonia. O le aoao e ala i le faatuatua e manaomia ona tuu i ai le faaleagaga, o le mafaufau, ma le faaletino ae le tau lava ina talia.” (“Saili e Aoao e Ala i le Faatuatua,” Liahona, Set. 2007, 64).

Fesili i tamaiti aoga: O le a le mea sa saunoa mai ai Elder Bednar o le a tupu i le tagata aoao e tuuina atu se taumafaiga i se aoaoga faaleagaga?

Valaaulia ia tamaiti aoga e faasoa atu ni aafiaga sa feagai ma i latou ina ua latou faia se taumafaiga faapitoa faaleagaga ma lagona ai le faateleina o le faatasi mai o le Agaga Paia e avea o se taunuuga. Atonu e te manao e faaopoopo atu lau molimau faapeao a tatou taumafaiga ina ia suesue ma le agaga tatalo le talalelei o le a valaauliaina le Agaga Paia i le faagasologa o le aoaoga.

Fesili atu i tamaiti aoga: O a ni mea patino e mafai ona e faia i lenei tausaga e “saili le aoaoina … e ala lava lea i le suesue ma le faatuatua foi”?

O Le Ata o le Faaolataga

Toe iloilo ia igoa eseese o le ata o le faaolataga e ala i le fai atu i tamaiti aoga e tusi i luga o le laupapa ia igoa sa latou faamaumauina i totonu o a latou api talaaga mo suesuega o tusitusiga paia mo galuega fai 1 o le lesona o lo latou aso 2. Afai latou te manaomia se fesoasoani, fai atu i ai e sue i le itulau e sosoo ai ia latou taiala suesue.

Atonu e te manao e fesili atu: O a ni mea e aoaoina ai oe e nei igoa e uiga i le ata o le faaolataga? (O le fuafuaga a le Tama Faalelagi sa mamanuina ina ia aumaia i Lana fanau le olataga ma le fiafia e faavavau.)

Faamalamalama atu o le a tele ni avanoa i le aluga o le tausaga e aoao ai pe faapefea e upu moni o loo tatou aoaoina mai i le Tusi a Mamona ona fetaui i le fuafuaga o le fiafia a lo tatou Tama Faalelagi. E mafai ona e fai atu i tamaiti aoga e saili ma faailoga i totonu o a latou tusitusiga paia ia mataupu faavae e fesootai i le ata o le faaolataga ao latou suesue i lenei tausaga. Mafaufau e saunia ni nai faataitaiga o ni mea latou te ono mauaina ao latou suesue. Faamalosiau atu i tamaiti aoga e faasoa a latou suesuega faatasi ma le vasega i le aluga o le tausaga.

Itulau Autu, Faatomuaga, ma Mau a Molimau

Valaaulia ia tamaiti aoga e auai i se tala faatino e ala i le vaai faalemafaufau o loo latou tuuina atu se kopi o le Tusi a Mamona i se tagata e le auai i le Ekalesia.

Vaevae le vasega i ni vaega se lua, ma fai atu i vaega taitasi e saunia mo le faatinoina o tala faatino e ala i le talatalanoa i fesili sa tuuina atu ia latou vaega. Atonu o le a fesoasoani le tusia o fesili i luga o le laupapa a o le i amataina le vasega po o le saunia o se kopi o fesili mo tamaiti aoga taitoatasi. Faamalosiau i tamaiti aoga e vaavaai mo faailoga ma maka faamatalaga latou te lagona e taua ona faasoa atu a o aoao atu e uiga i le Tusi a mamona.

Fesili mo le Vaega 1:

O le a le Tusi a Mamona? (Tagai i le faatomuaga, palakalafa 1–3.)
O le a le faamoemoega o le Tusi a Mamona? (Tagai i le itulau autu, palakalafa 2.)
O a faamanuiaga e oo mai i le ola ai i aoaoga po o mataupu faavae o loo aoao mai e le Tusi a Mamona? (Tagai i le faatomuaga, palakalafa 6.)

Fesili mo le Vaega 2:

Na faapefea ona oo mai le Tusi a Mamona? (Tagai i le faatomuaga, palakalafa 4–5.)
E faapefea ona tatou iloa e moni le Tusi a Mamona? (Tagai i le faatomuaga, palakalafa 8.)
O a nisi mea e mafai ona tatou iloa e ala i le mana o le Agaga Paia? (Tagai i le faatomuaga, palakalafa mulimuli.)

A maea ona tuu atu se avanoa e sauni ai tamaiti aoga, filifili se tamaitiiti aoga se toatasi e suitulaga i se tagata e le auai i le Ekalesia. Fai atu i se volenitia mai vaega taitasi e tuuina atu se kopi o le Tusi a Mamona i lena tagata. Uunaia ia tamaiti aoga e faaaoga ia tali o fesili ia sa suesueina e le latou vaega e aoao atu ai le tamaitiiti aoga muamua e uiga i le Tusi a Mamona.

A maea ona latou faatinoina le tala, mafaufau e fesili i le vasega atoa po o a ni faamatalaga faaopoopo e ono mafai ona latou faasoa atu pe ana faapea o i latou ia na tuuina atu le kopi o le Tusi a Mamona. E mafai foi ona e fesili atu: O le a sau mea sa aoaoina po o manatuaina e uiga i le Tusi a Mamona i le faatinoina o lenei gaoioiga?

A o tali mai ia tamaiti aoga, ia faamautinoa o loo latou malamalama o le Tusi a Mamona o se molimau ia Iesu o le Keriso. Faamamafa atu le taua o le taulai atu pe faapefea ona molimau mai le Tusi a Mamona ia Iesu Keriso. O se faaopoopoga, faamalamalama atu o le suesueina o le Tusi a Mamona o le a fesoasoani ia i latou ia malamalama i aoaoga ma mataupu faavae o le talalelei a Iesu Keriso ma faamalolosia a latou molimau i Lana Ekalesia.

Faamanatu atu i tamaiti aoga faapea sa vaai le au tusitala a le Tusi a Mamona i o tatou aso ma tusia mea o le a sili ona fesoasoani ia i tatou (tagai i leMamona 8:35).

Fesili atu i tamaiti aoga: O le a se mea sa e aoaoina mai i lenei vaiaso o le a aafia ai le auala o e suesueina ai le Tusi a Mamona?

Valaaulia ni nai tamaiti aoga e faasoa atu pe faapefea ona latou fuafuaina le faataunuuina o la latou tiutetauave o le faitauina o le Tusi a Mamona i le faagasologa o le tausaga aoga. Faaiu i lou faasoaina atu o ou lagona ma le molimau e uiga i le Tusi a Mamona ma pe na faapefea ona aafia ai lou olaga.

Iunite e Sosoo Ai (1 Nifae 1–6, 9)

Fesili atu i tamaiti aoga pe sa i ai se taimi sa latou iloaina ai se mea sa sao ae peitai o le faatinoina sa foliga faigata pe sa le mafai ona faia. Faamalamalama atu o le vaiaso a sau o le a latou iloa ai sa feagai foi Nifae ma ia ituaiga luitau, ma o le a latou aoaoina ai le auala sa ia faalagolago ai i le Atua ina ia faataunuuina le mea sa foliga e le mafai ona faia.