Lesona 94

Alema 37

Faatomuaga

Ua faaauau pea ona fautua atu Alema i lona atalii o Helamana ma tuu atu ia te ia le tausiga o talafaamaumau paia. Na ia toe faamanatu atu ia Helamana o tusitusiga paia ua leva ona avea ma ala o le aumaia o le faitau afe o sa Lamana i le Alii, ma sa ia valoia e tele faamoemoega a le Alii mo talafaamaumau mo le lumanai. Na poloaiina e Alema lona atalii e uiga i le mea e aoao atu ai tagata. E faatusatusa i afioga a Keriso i le Liahona, na ia faamamafa atu ia Helamana le taua o le tagai i ai mo se taitaiga.

Faaaliga: O lenei lesona o le a tuuina atu se avanoa mo ni tamaiti se toatolu e aoao atu ai le vasega. Ina ia fesoasoani la i le sauniaina o nei tamaiti e aoao atu, tuu atu i tamaiti taitasi se kopi o le vaega o le a ia aoaoina atu i le tasi pe lua foi aso ao lei oo i ai. Pe e mafai foi ona e filifili e aoao atu e oe lava ia nei vaega.

Fautuaga mo le Aoaoga

Alema 37

Ua tuuina atu e Alema ia Helamana le tausiga o talafaamaumau, fautuaina o ia e tausi ia poloaiga, ma faamanatu atu ia te ia o le Liahona e galue i le faatuatua.

Tusi le siata lenei i luga o le laupapa:

Small and Simple

Fai i tamaiti e lisi i luga o le laupapa nisi o mea laiti ma faatauvaa lea na tele se faatosinaga mo le lelei i o latou olaga. Atonu e te manao e fai ia i latou e faamatala mai a latou tali.

Faamatala atu i le Alema 37 o loo i ai le fautuaga a Alema e fesoasoani i lona atalii o Helamana e saunia ai i le avea ma tausi talafaamaumau paia o le a sosoo ai. Na aoao o ia e Alema e uiga i le matafaioi o mea laiti ma faatauvaa i le galuega a le Alii. Valaaulia se tamaitiiti aoga e faitau leotele le Alema 37:6–7.

O le a se mea o tatou aoaoina mai nei fuaiupu e uiga i le taua o “mea laiti ma faatauvaa”? (Atonu o le a eseese ia upu e faaaoga e tamaiti, peitai e tatau ona latou faailoa mai le upu moni faapea e galue le Alii i auala laiti ma faatauvaa e faataunuu ai Ona faamoemoega tetele ma faavavau.)

Fai i tamaiti e faitau le leoa le Alema 37:1–5, vaavaai mo se faataitaiga o se mea laitiiti ma faatauvaa lea e mafai ona tele se faatosinaga i olaga o tagata (o talafaamaumau paia, po o tusitusiga paia). A uma ona lipoti mai e tamaiti mea sa latou mauaina, tusi le upu Tusitusiga paia i luga o le laupapa i lalo o Mea laiti ma faatauvaa.

Tuu atu i tamaiti e suesue i le Alema 37:8–10 mo ni auala na uunaia ai e tusitusiga paia ia tagata o le Tusi a Mamona. A o lipoti mai e tamaiti mea sa latou mauaina, atonu e te manao e tusi a latou tali i lalo o le FAATOSINAGA TETELE.

• O a ni auala ua avea ai tusitusiga paia ma se faatosinaga o lou olaga?

Aotele le Alema 37:11–32 e ala i le faamatalaina na aoao atu e Alema Helamana o le a faaalia e le Alii Lona mana i le toefuataiina mai o le Tusi a Mamona. Na ia aoaoina Helamana e mulimuli i poloaiga a le Alii ma tausi ma le faaeteete ia talafaamaumau. Na ia faatonuina foi Helamana e faaaoga talafaamaumau e aoao atu ai tagata ma ia aua nei faailoa atu ia faamatalaga uma o le amioleaga o sa Iareto ma le faaumatiaga na oo i ai.

Fai i tamaiti e suesue le leoa le Alema 37:13–16, vaavaai mo mataupu faavae na aoao atu e Alema ia Helamana ao ia tuuina atu ia te ia le tausiga o talafaamaumau. (E mafai ona faasoa mai e tamaiti ni mataupu faavae eseese, peitai ia faamautinoa atu o loo atagia mai ia latou le tulaga lea afai tatou te usiusitai i poloaiga a le Alii, o le a Ia fesoasoani mai ia i tatou e faataunuu o tatou tiute. Atonu e te manao e fesili atu pe faapefea ona fesootai lenei mataupu faavae ma le manatu lea, o mea laiti ma faatauvaa e mafai ona maua ai se faatosinaga tele.)

O le vaega o totoe o lenei lesona ua mamanuina ina ia aoao atu e ni tamaiti aoga se toatolu. Afai e toatele le vasega, fai i tamaiti o loo faiaoga e o i ni nofoaga eseese se tolu i totonu o le potu. Vaevae le vasega i ni vaega se tolu. Fai i vaega taitasi e ave a latou tusitusiga paia, api o le vasega po o api talaaga mo le suesueina o tusitusiga paia, ma peni po o penitala ma potopoto faatasi ma se tasi o tamaitiiti aoga o loo faiaoga. A uma le lesona a le tamaitiiti o loo faiaoga, o le a fesuiai ia vaega. Afai e toalaiti le vasega, e mafai ona feauauai ia tamaiti faiaoga i le aoaoina o le vasega atoa. I soo se tulaga lava, e tatau i tamaiti faiaoga ona faaaoga pe a ma le fitu minute e tuuina atu ai a latou lesona ma taialaina se talanoaga.

Tamaitiiti Faiaoga 1—Alema 37:33–34

Fai atu i tamaiti o lau vasega e mafaufau i se taitai o le Ekalesia i le lotoifale po o se Au Pulega Aoao o le sa aoaoina i latou i se mea ua faia ai se suiga i o latou olaga. Fai i ni nai tamaiti e faasoa mai le mea na aoaoina e lenei taitai ma le auala na uunaia ai i latou. Atonu e te manao e faasoa mai se faataitaiga mai lou olaga.

Valaaulia ni tamaiti se toalua e feauauai i le faitau leotele mai o le Alema 37:33–34. Fai i le vasega atoa e mulimuli i le faitauga, vaavaai mo le mea na fautua ai e Alema ia Helamana ina ia aoao atu i tagata. E mafai ona e fautuaina i latou e faailoga ia fasifuaitau “aoao atu ia te i latou” ma le “talai atu ia te i latou” a o latou faitau. I luga o le laupapa po o luga o se fasi pepa, tusi ai O aoaoga a taitai o le Ekalesia. A uma ona faitau e tamaiti ia fuaiupu, fai atu ia i latou e lipoti mai mea na latou mauaina. Tusi a latou tali i lalo ifo o le O aoaoga a taitai o le Ekalesia. Fai atu fesili nei:

• O a ni auala e matuai aoga ai lava nei aoaoga ia i tatou i lenei vaitaimi? Aisea?

Fai i au tamaiti aoga e tagai i le fasifuaitau mulimuli o le Alma 37:34 e iloa ai po o le a se faamanuiaga o le a oo mai pe a mulimuli i aoaoga a taitai o le Ekalesia. Tusi le mataupu faavae lenei i luga o le laupapa: O le mulimuli i aoaoga a taitai o le Ekalesia, o le a mafai ai ona tatou maua le malologa mo o tatou agaga. Fesili atu ia i latou po o le a so latou manatu i le uiga o le “maua le malologa mo o latou agaga”. (O tali e ono aofia ai le saoloto mai taunuuga o le agasala, mauaina o le filemu mai le Agaga, ma le faamanuiaina i le malosi e onosaia ma faatoilaloina ia luitau.)

Faasoa atu lau molimau e uiga i le auala e moni ai lenei mataupu faavae i lou olaga. Afai e maua sou taimi faaopoopo, valaaulia nisi e faasoa mai a latou molimau e uiga i lenei mataupu faavae.

Tamaitiiti Faiaoga 2—Alema 37:35–37

Faamatala atu i au tamaiti aoga o se mea masani mo i latou e totoina ni laau le nonoaina o se tamai laau i se ogalaau ona aveese lea o le lagolago i le taimi e ola ai le laau. Fesili atu ia i latou pe aisea latou te manatu ai e faia lenei tulaga. Ona faitau lea o le tala lenei e uiga i se laau na totoina e Peresitene Gordon B. Hinckley i lona fanua:

Peresitene Gordon B. Hinckley

Na totoina e Peresitene Gordon B. Hinckley se tamai laau e latalata i lona fale i se taimi e lei umi talu ona ia faaipoipo. Na te lei amanaia tele i le gasologa o tausaga. I se tasi aso sa ou iloa ai e le o tino lelei ma le tu sao le laau ma o loo lo’u agai i sisifo. Sa ia taumafai e uunai e faatu sa’o, peitai ua lapo’a le tino o le laau. Sa ia taumafai e faaaoga se maea ma se uili e faasao ai, peitai e lei migoi le laau. Na iu lava ina ia, aumaia se ili ma ili ese ai lala tetele sa i le itu i sisifo, ma sa mailoga ai se maila mataga. Na ia saunoa mai mulimuli ane e uiga i le laau:

“Ua sili atu nei i le afa senituri talu ona ou totoina lena laau. … O le tasi aso na ou toe vaai ai i le laau. Ua tele lava. Ua sili atu le lelei o ona foliga. Ua aoga tele foi i le fale. Ae sa faigata lava lona laitiiti ma saua tele le mea na ou faia e faasao ai.

“I le taimi muamua na toto ai, sa na o se manoa puupuu lava sa manaomia e nonoa faasao ai mai le matagi. Sa mafai ma sa tatau ona ou maua mai lena manoa e aunoa ma se galuega tele. Peitai sa ou le faia, ma o lea na falala sese ai le laau i le matagi na taia ai” (“Aoao ia le Tama e Tusa ma Lona Ala,” Liahona, Ian. 1994, 68).

Tuu atu i tamaiti e faitau le fautuaga a Alema ia Helamana i le Alema 37:35. Fai atu ia i latou e mafaufau i le auala e fesootai ai lenei mau ma le mea na tupu ia Peresitene Hinckley ma le laau.

Alema 37:35 o se fasifuaitau o le mau tauloto. Atonu e te manao e fesoasoani i tamaiti i le latou taulotoina o lenei fasifuaitau e ala i le fai atu ia i latou e faamaea le galuega fai i le faaiuga o le lesona o le aso lenei.

Fai i tamaiti e aotele le Alema 37:35 i a latou lava upu. (E tatau ona faaalia mai i a latou tali le tulaga lenei e tatau ona tatou aoao i lo tatou talavou e tausi ia poloaiga a le Atua.) Valaaulia foi i latou e tusi ni a latou tali i fesili nei: (Atonu e te manao e tusi ia fesili i luga o le laupapa pe faitau lemu ina ia mafai ona tusi e tamaiti.)

• O le a se eseesega e te manatu o le a faia i le olaga o se tagata i le aoao lea e tausi ia poloaiga a le Atua ao laitiiti?

• E mafai ona e mafaufau i ni tagata na faamanuiaina o latou olaga atoa ona sa latou aoao e usiusitai i poloaiga i lo latou talavou? Tusi e uiga i le auala na faamanuiaina ai i latou.

Valaaulia ni nai tamaiti e lipoti mai mea na latou tusia. Ona valaaulia lea o se tamaitiiti e faitau leotele mai le Alema 37:36–37. Fai i le vasega atoa e mulimuli i le faitauga, vaavaai mo se fautuaga faapitoa lea e mafai ona fesoasoani ia i latou i le tausiaina o poloaiga ao latou talavou.

• E faapefea ona fesoasoani le mulimuli i lenei fautuaga i aso uma e te tausia ai poloaiga?

• O a ni auala o e taumafai e faamuamua ai le Alii i ou mafaufauga, upu, galuega, ma le alofa? (Uunaia ia tamaiti e mafaufau i le auala latou te ono faaleleia ai.)

Faasoa atu ou lagona e uiga i le auala na fesoasoani ai le filifili ma le Alii i lou tausiga o poloaiga. Uunaia au tamaiti aoga e filifili ma le Alii i mea uma latou te faia.

Tamaitiiti Faiaoga 3—Alema 37:38–45

O Le Liahona

Faaali le ata O Le Liahona (62041; Tusi Ata o le Talalelei [2009], nu. 68). Toe faamanatu i au tamaiti aoga e uiga i le tapasa lea na faaaoga e le Alii e fesoasoani i le faigamalaga a le aiga a Liae i le nuu folafolaina. I le Alema 37:38, tatou te aoao ai i le tapasa lea na ta’ua o le Liahona. Faamatala atu na talanoa Alema e uiga i le Liahona ina ia mafai ona aoao ia Helamana se mataupu faavae taua e uiga i le auala na taitaiina ai e le Alii Lana fanau.

Faamalamalama atu i au tamaiti aoga o le a e tuuina atu ia i latou ni fesili ona feauauai lea o i latou i le faitauina leotele mai o ni nai mau ao saili e tagata uma ia ni tali. Tuu atu ia i latou e tali mai fesili taitasi pe a uma ona faitau mai le fasifuaitau o le mau e fesootai i ai.

• Na faapefea ona galue le Liahona? (Tagai i le Alema 37:38–40.)

• Aisea na le galue ai le Liahona i nisi taimi? (Tagai i le Alema 37:41–42.)

• E faapefea ona tatou faatusatusaina le Liahona i afioga a Keriso? (Tagai i le Alema 37:43–45.)

Atonu e manaomia lou faamalamalamaina faapea i nei fuaiupu, o upu faaataataga ma le faatusa e faasino i “se tagata, mea na tupu, po o se sauniga e faatusa i se isi tagata, mea na tupu, po o se sauniga e sili atu le taua e pei o lea o le a sosoo atu. … O ituaiga sao o le a i ai ni tulaga e iloagofie ai le tutusa, faaali mai se faamaoniga o le galuega paia, ma ia i ai se vaaiga mamao i mea o le a tutupu i le lumanai” (Joseph Fielding McConkie, Gospel Symbolism [1985], 274). O le filifiliga e mulimuli pe le mulimuli i le taitaiga a le Liahona e tutusa lea ma la tatou filifiliga e uiga i le auala tatou te tali atu ai i le taitaiga lea tatou te maua e ala mai afioga a Keriso.

• O fea tatou te maua ai afioga a Keriso? (O tali e ono aofia ai ia tusitusiga paia, upu a perofeta o aso e gata ai, faamanuiaga faapeteriaka, ma uunaiga a le Agaga.)

Fai i au tamaiti aoga e aotele mai upu a Alema i le Alema 37:38–45, aemaise lava ia fuaiupu e 44–45. O lenei talanoaga e tatau ona aofia ai le upu moni lenei: Afai tatou te mulimuli i afioga a Iesu Keriso, o le a latou taitaiina i tatou ina ia maua le ola e faavavau.

Faasoa atu pe na faapefea ona aafia oe faaleagaga e afioga a Keriso ma pe na faapefea ona latou fesoasoani i lou alualu i luma e agai atu i le ola e faavavau. E mafai ona e fautuaina tamaiti aoga e mafaufau i le mauaina o se faamanuiaga faapeteriaka pe, afai ua uma ona maua, ia faitau soo i ai ma le agaga tatalo.

Faaaliga i le faiaoga: A uma ona aoao atu e tamaiti a latou vaega o le lesona, faafetai atu ia i latou, afai e lava se taimi, valaaulia ni nai tamaiti e molimau mai e uiga i se tasi o mataupu faavae sa latou aoaoina i le asō. Atonu e te manao foi e faasoa atu lau molimau e uiga i nei mataupu faavae. Faaiu i le valaauliaina o le vasega e mulimuli i a latou tusi a o e faitauina leotele atu le Alema 37:46–47.

Mau Tauloto—Alema 37:35

Faaaliga: O le gaoioiga lenei e ave i le fale o le a saunia ai tamaiti aoga mo le amataga o le isi lesona (Alema 38). Fuafua mo se taimi i le vasega e faamalamalama ai le galuega fai i tamaiti ma faailoa atu ai ia i latou lau fuafuaga ina ia tulitataoina a latou aafiaga i le isi taimi tou te feiloai ai.

Faasino atu o le Alema 37:35 o se fasifuaitau o se mau tauloto. Atonu e te manao e uunaia ia tamaiti aoga e faailogaina i se auala faapitoa ina ia faigofie ai ona latou sueina. Valaaulia i latou e taulotoina lenei fasifuaitau i le fale i le po nanei ma taulotoina i se matua po o se isi tagata matua faamoemoeina. (Pe e mafai foi ona latou faitauina le mau faatasi ma se tagata matua.) Uunaia i latou e fai ia fesili nei i se tagata matua. (Atonu e te manao i tamaiti e tusi ia fesili nei i luga o se fasi pepa e ave i le fale.)

Na faapefea ona fesoasoani le usiusitai i poloaiga a le Atua ia te oe?

O le a sau fautuaga mo au ina ia fesoasoani ai ia te au ia atili ai ona ou atamai ao ou talavou?

Tau atu i tamaiti o le a e talosagaina i latou e faamatala mai ni a latou aafiaga i le taimi o le isi vasega.

Tala ma Faamatalaga o Talaaga

Alema 37:6–7 O mea laiti ma faatauvaa

Ina ia faailoa atu le mataupu faavae o mea laiti ma faatauvaa e mafai ona faia ai se eseesega tele, na faamatalaina e Peresitene Gordon B. Hinckley le tala lenei:

“I tausaga e tele ua mavae, sa ou galue ai i se nofoaga mo nofoaafi i ofisa tutotonu i Denver. Sa ou vaai le vaega e faamaopoopo ai ma faasoasoa le faaeeina o uta. O aso na sa femalagaai ai tagata uma i nofoaafi la’u pasese. I se tasi taeao na telefoni mai ai sa’u paaga faigaluega i Newark i New Jersey. Fai mai a ia, ‘Ua taunuu mai le nofoaafi numera fia ma fia ae leai se taavale uta. E leiloa pe o fea o leiloloa ai uta a pasese e 300, ma o loo feita i latou.’

“O le taimi lava lena na ou galue ai e sue po o fea ua alu i ai le taavale uta. Na ou mauaina sa lelei lava ona uta ma faapipii i le nofoaafi e alu i Oakland i Kalefonia. Na ui mai i le Aai o Sate Leki ma avatu ai i Denver, ma Pueblo, ma ui atu i se isi ala ma agai atu i St. Louis. O iina e faaee ai i se isi ala nofoaafi ma avatu ai i Newark, New Jersey. Ae o se alii le magafagafa e vaaia ki o le ala nofoaafi i St. Louis, na ia aveesea se fasi uamea e tolu inisi, i le mea e sui ai ki, ona ia toso maia lea o le ‘au e tatala ai le taavale. Sa matou maua le tala o le taavale uta mo Newark i New Jersey, ua oo i New Orleans i Louisiana—e 1,500 maila mai le mea na tatau ona taunuu i ai. Na o le sui lava i le tolu inisi o le ki na sui i St. Louis e se tagata faigaluega le faautauta, na amata ai ona sese le ala na alu ai le taavale uta, ma na matua mamao ese lava ma le mea na tatau ona taunuu moni i ai. E faapena foi o tatou olaga. Nai lo le mulimulitai i se ala mautinoa, ua tosoina i tatou e ni manatu sese i se isi itu. Atonu o le agai ese mai lo tatou taunuuga na muai faamoemoeina e matua itiiti lava, peitai afai e faaauau ai pea, o lena faiga alualu lemu o le a oo ina avea ma ava tele ma tatou taumamao ese ai mai le mea ua tatou faamoemoe e o i ai.

“Ua e vaai ea i se tasi o na faitotoa e 16-futu le maualuga? Pe a tatala e lautele lona matala. E ui ina gaioi lemu pito i tafatafa o faamau, ae maoae le gaoioiga i le mea e gata ai. O mea iti ia o loo liliuina le olaga e maua ai eseesega tetele i o tatou olaga, a’u uo talavou pele” (“O Le Fautuaga ma le Tatalo a se Perofeta mo le Autalavou,” Liahona, Ape. 2001, 34–35).

Alema 37:35. “Aoao le poto i lou talavou e tausi i poloaiga a le Atua”

Na faamatalaina e Elder L. Tom Perry o le Korama a Aposetolo e Toasefululua le tala ia Creed Haymond, o se tagata na aoaoina i lona talavou ina ia tausi poloaiga a le Atua:

“O Creed Haymond [sa avea] o se Mamona talavou sa apalai ma taliaina i le Iunivesite o Penisilevania. O se alii afeleti sa lauiloa i lona saoasaoa, ona o se uiga e gaioi ai o ia ma auai, sa filifili ai o ia e kapeteni i le au tamomoe.

“O le tauvaga faaletausaga a se Faalapotopotoga a Tagata Afeleti Tau Amata o Amerika, sa faia i le Malae Taalo o Harvard i le faaiuga o Me o le 1919. Na o mai i Cambridge ni tagata afeleti sili o kolisi—e 1,700 le tuufaatasiga. I ni faataitaiga, na pasia ai e le ‘au a Penisilevania ni alii e toa 17. O le au a Cornell, le aoga lea e sili ona fefefe i ai i latou i lena tausaga, sa na o le toa 10 na pasia. Sa i ai le ‘au a Penisilevania i se tulaga e faapaleina ai e avea ma siamupini. O sikoa na maua i tulaga muamua e lima—e lima mo le muamua, fa mo le lona lua, tolu mo le lona tolu, lua mo le lona fa, ma le tasi mo le lona lima. E masani lava, o le ‘au e pasi le tele o ona alii, e sili so latou avanoa e malo ai i le tauvaga.

“Sa lelei le agaga o le taitai ‘au a Penisilevania i le po na sosoo ma le tauvaga. Sa faataamilo o ia e asiasi i tagata o lana ‘au a o lei momoe. Na sau o ia i le potu o Creed ma fai mai, ‘Creed, a tatou faia le mea sili tatou te mafaia taeao, o le a tatou sosola ma le manumalo.’

“Sa faatalitali le taitai ‘au. ‘Creed, ua ou tuu atu tama o le ‘au e inu sina uaina laitiiti i le po nei. Ou te manao e te inuina sina uaina, ioe, na o sina mea itiiti lava.’

Ou te le faia lena mea, Taitai.’

“‘Ae vaai oe Creed, ou te le faaonaina oe. Ua ou iloa le mea e talitonu ai outou “Mamona”. Ou te avatua ia te outou lenei mea e pei o sina vailaau, e uai atu ai uma outou i le tauvaga.’

“‘Ou te le maua ai se lelei, Taitai; e le mafai ona ou inuina.’

“Na tali mai le taitai au, ‘Ia e manatua Creed, o oe o le kapeteni o le au ma o oe o le tatou tagata taalo sili ona lelei e maua ai ni ai. E sefulufa afe tamaiti aoga o loo tilotilo patino mai ia te oe ina ia manumalo i lenei tauvaga. A e faatoilaloina i tatou o le a tatou faiaina. E ao ona ou iloa mea e lelei mo oe.’

“Sa iloa e Creed na lagona e taitai o isi au o sina uaina itiiti sa aoga pe a koleni e alii ia maso ma uaua seia tau papa. Sa ia iloa foi o le mea na fai atu ai le taitai o le au na te faia, sa tetee i mea uma sa aoaoina ai o ia mai lona laitiiti. Sa ia tilotilo sao atu i mata o le taitai ma fai atu, ‘Ou te le inuina.’

“Na tali mai le taitai, ‘O oe o se tagata malie, Creed. E te le inua se lauti i le laulau koleni. E i ai ni ou lava manatu. Ia, o le a ou tuua oe e fai le mea e te loto i ai.’

“Ona tuua lea e le taitai au, o le kapeteni o lana au, i se tulaga faapopoleina tele. Faapea e leaga nei lana taalo taeao. O le a se mea e mafai ona ia tau atu i lona taitai au? E leai se mea e itiiti ifo i le mea sili na te fai. Leai se isi mea nai lo lana taumafaiga sili e mafai ai. O lona ulumalo atonu o le a faiaina ai le au a Penisilevania i le tauvaga. Sa faia e tagata o lana au le mea sa faatonuina ai i latou. Sa latou talitonu i lo latou taitai. Se a se aia sa ia te ia e le usiusitai ai? Sa na o le tasi lava le pogai. Sa aoaoina o ia i lona olaga atoa ia usiusitai i le Upu o le Poto.

“O se itula faigata lea i le olaga o se alii talavou. Ma lagona uma faaleagaga o lona natura na uunaiina o ia, sa ia tootuli ifo i lalo ma ole atu ma le faatauanau i le Alii, e tuuina mai ia te ia se molimau e uiga i le pogai o le faaaliga sa ia talitonu ma usitai i ai. Ona moe ai loa lea o ia, ua matua moegase lava.

“O le taeao na sosoo ai, na sau ai le taitai i lona potu ma fesili mai, ‘O a mai sau faalogona, Creed?’

“‘Lelei,’ o le tali fiafia atu lea a le kapeteni.

O leisi vaega atoa ua mamai Ou te leiloa poo le a le mea ua tupu ia i latou na fai mai ai ma le popole le taitai.

“‘Matea o le meainu malosi sa e avatu ia i latou, Taitai.’

“‘Atonu o lena,’ o le tali mai lea a le taitai.

“O le ta o le lua, sa tau fai nonofo uma ai le au maimoa e 20,000 i o latou nofoaga ma faatalitali mo le tauvaga o le a amata. A o amataina taualumaga, na manino mai sa i ai se mea na faaletonu i le au lelei a Penisilevania. O lea taaloga ma lea taaloga sa matua pau ai lava ‘ai o le au a Penisilevania nai lo se mea sa faamoemoeina ai i latou. O nisi o le au sa mamai tele e le mafai ona taaalo.

“O le tautuuga o le 100 ma le 200 iata, o tautuuga ia na tamoe ai Creed. Sa matua manaomia e le au a Penisilevania lona manumalo mo i latou. Sa i luga ona togi i le tulaga e tauva ai ma alii e sili ona saoasaoa i kolisi a Amerika. A o o mai alii i o latou tulaga o le tautuuga e 100 iata, ma faapaina le fana, sa taufai oso i luma alii uma i le ea ma papai i le palapala e tamomoe —o i latou uma lava sei vagana ai le toatasi —o Creed Haymond. O le tagata sa faaaogaina le laina lona lua i le tauvaga —le laina lea ua tamoe ai nei Creed i lea taufetuliga faapitoa—na ia kikia se pu e tasi pe lua inisi agai i tua i le tulaga lea ua filifilia e Haymond mo ia. Latou te lei faaaogaina ni poloka e tutu ai mo le amataina o taufetuliga i na aso. I le malosi tele o le oso a Creed, na solo ai le vaega vaiti o le palapala na tu ai lona vae, ma pau ai i lalo i ona tuli i tua o le laina.

“Na ia tu i luga ma taumafai e alu saoasaoa ona e sa leaga le amataga o lana tamoe. I le 60 iata, o ia lava na mulimuli i le tautuuga. Ona foliga mai lea ua ia pasi maia le tagata lona lima, sosoo ai ma le lona fa, ma le lona tolu, ma le lona lua. I le latalata i le tini, ma lona fatu na tata i le sela, na ia momoe saoasaoa atu ai e pei o se agi o se asiosio, ma pasi mai le tagata mulimuli ma manumalo ai.

“Ona o ni mea sa faaletonu i fuafuaga, sa le maea ai suegafusi o le 200 iata, faatoa maea lava ina ua lata i le faaiuga o le tauvaga. Ma lea lava tulaga o le le lelei o le amataga lea na oo i le au a Penisilevania i le aso atoa, na tuu ai Creed Haymond i le tautuuga mulimuli o le 220 iata. Ma e lima minute talu ona malo o ia, na valaau mai ai e amata le tautuuga mulimuli o le 220 iata, o le taualumaga faaiu lena o le aso. Sa faatopetope atu ia te ia se tasi o alii sa momoe i se tautuuga muamua e faapea. “Tau i le tagata e toina le tautuuga e te manaomia sina malologa ae e te lei toe tamoe. E ia te oe le aia i lena tulaga, e tusa ai ma tulafono. O lea lava e tau to lou sela, ae o lea sa ou tamoe i tautuuga sa muamua i lau tautuuga.’

“Sa alu atu ma le sela Creed i le tagata e toina le tautuuga, ma aioi i ai mo se taimi faaopoopo. Na fai i ai le taitai e 10 minute na te tuu atu ia te ia. Peitai sa pisapisao le aumaimoa, i le tautuuga mulimuli ina ia amata. Talofa e, na ia valaau atu i alii e sauniuni. I tulaga e masani ai, e le taitai fefe Creed i lea tautuuga. Atonu o ia lava le tagata pito saoasaoa i le lalolagi i lena mamao, ae o lea ua uma ona tamoe o ia i tautuuga e tolu i lena aoauli—o se tasi o na tautuuga o le 100 iata, o se tautuuga faape fatu.

“Sa valaau atu le tagata e toina le tautuuga i alii e sauniuni, sa ia sii i luga lana fana ma faapa ua asu, ma amata ai le tautuuga. O le taimi lea na oso ese ai le kapeteni o Penisilevania mai lona tulaga. Sa le pine ae aliali mai Creed mai tagata sa taufetuli, ma mua i luma. Sa tamoe saoasaoa ese atu o ia mai le malae, i se masau televave, ma e valu iata na sili ai o ia i luma o le tagata na tau latalata atu, ma sa ia momotua le lipine i le tini, ma malo ai i le tautuuga lona lua—o le 220 iata.

“Sa faiaina le au a Penisilevania i le tauvaga, ae sa faaofoina e lo latou kapeteni tagata matamata i ana mua maoae e lua.

“I le faaiuga o lena aso uiga ese, a o alu atu Creed Haymond e moe, na faafuasei ona oo mai i lona mafaufau lana fesili i le po ua mavae, e uiga i le tulaga paia o le Upu o le Poto. I lena taimi, o le faasologa o na tauvaga uiga ese o taaloga na faia, na pasi ane i lona mafaufau —o tagata o lana au na inu uaina ma toilalo; o lona le inua o le uaina na aumaia ai ni manumalo sa ofo ai foi o ia lava. Na oo mai ia te ia se faamaoniga malu a le Agaga: o le Upu o le Poto e mai le Atua ia (fetuunai mai ia Joseph J. Cannon, “Speed and the Spirit,” Improvement Era, Oct. 1928, 1001–7)” (“Taufetuli Ae Le Vaivai,” Liahona, Ian. 1997, 43–44).

Alema 37:38–46. O Le Agaga Paia e faapei o le Liahona

Na faatusaina e Elder David A. Bednar o le Korama a Aposetolo e Toasefululua le Liahona i le Agaga Paia:

“A o taitasi i tatou ma fetaomi atu i luma i le ala o le ola, tatou te maua le taitaiga mai le Agaga Paia e faapei foi ona taitaiina Liae e ala i le Liahona. …

“E patino ona galue le Agaga Paia i o tatou olaga e faapei foi ona faia e le Liahona mo Liae ma lona aiga, e tusa ai ma lo tatou faatuatua ma le filiga ma le usiusitai. …

“Ma o ‘nai mea iti ma le faatauvaa’(Alema 37:6), e saunia ai e le Agaga Paia mo i tatou auala e mafai ai ona tatou maua le malamalama faateleina e uiga i ala o le Alii. …

“E mafai ona avea le Agaga o le Alii ma o tatou taiala ma o le a faamanuiaina i tatou i le faasinoala, faatonuga, ma le puipuiga faaleagaga i la tatou malaga i le olaga nei. Tatou te valaaulia le Agaga Paia i o tatou olaga e ala i tatalo anoa a le tagata lava ia ma le aiga, taumamafa i afioga a Keriso, filiga ma le usitai atoatoa, faamaoni ma le faamamaluina o feagaiga, ma le amioatua, lotomaualalo, ma le auaunaga. Ma e tatau ona tatou mausali i le aloese mai mea e le mama, o mea paaa, o mea faatufanua, agasala, pe faatiapolo ia e mafua ai ona tatou aveeseina mai i tatou lava mai le Agaga Paia.

“Tatou te valaaulia foi le mafutaga faifaipea ma le Agaga Paia a o tatou taumamafa ma le agavaa i le faamanatuga i aso Sapati taitasi” (“Ina Ia Tatou Maua Pea Lona Agaga e Faatasi ma i Tatou,” Ensign po o le Liahona, Me 2006, 30–31).