Mamona 7–8:11

Faatomuaga

Ina ua mavae le taua mulimuli i le va o sa Nifae ma sa Lamana, na tusi atu Mamona i e o le a tupuga mai i le lumanai i tagata o le Tusi a Mamona e uiga i le taua o le iloaina po o ai i latou ma po o le a le mea e tatau ona latou faia ina ia laveaiina ai. Faatasi ai ma le alofa tele i tupuaga o le lumanai a ona fili, na aoao atu ai e Mamona le taua o le mulimuli i le talalelei a Iesu Keriso ina ia “lelei ia te [outou] i le aso o le faamasinoga” (Mamona 7:10). Ina ua mavae le maliu o Mamona, na tuua toatasi lona atalii o Moronae e tusia le faatafunaga o lona nuu.

Fautuaga mo le Aoaoga

Mamona 7

I le molimau mulimuli a Mamona, na ia apoapoai atu ai i tupuaga a sa Lamana ia talitonu ia Iesu Keriso ma mulimuli i Lana talalelei

Tusi le numera 230,000 i le laupapa. Fesili i tamaiti aoga pe faapefea ona fesootai lenei numera ma le faatafunaga o sa Nifae. (O le numera o fitafita sa Nifae na maliliu i le taua mulimuli, faamaumauina i le Mamona 6. Atonu e te manao e faamamafa atu o numera i le Mamona 6:10–15 e foliga mai e faatatau lava na o i latou na tau i le taua, ae le o ta’ua ai le isi toatele na fasiotia ona o le taua.) Tuu atu i tamaiti aoga e mafaufau faapea ua latou sao mai i se taua tele lea na fasiotia ai tagata o o latou aiga ma uo ma ua faoa ai lo latou malo. Tuu atu ia i latou se taimi e mafaufau ai e uiga i se mea e mafai ona latou fai atua pe afai latou te tusia se savali i tupuaga o tagata na fasiotia e e pele ia i latou ma pulea lo latou nuu.

Valaaulia tamaiti aoga e faitau le leoa le Mamona 7:1–4, ma vaavaai mo nisi o upu mulimuli a Mamona i tupuaga a sa Lamana.

O le a le mea na manao Mamona i tupuaga a sa Lamana ia iloa?
O a uiga o le Faaola o loo e vaaia i upu a Mamona i ona fili?

Fesoasoani i tamaiti aoga ia malamalama na aoaoina e Mamona ē tupuga mai ia sa Lamana i mea latou te manaomia e fai ina ia laveaiina ai. Na i ai lona alofa mama mo tagata uma, e oo lava i ona fili.

Fai atu i tamaiti aoga e faitau le leoa le Mamona 7:5, 8, 10, ma faailoa mai mea na aoaoina e Mamona i ana tagata faitau e tatau ona fai. Fai atu i tamaiti aoga e faasoa mai mea na latou maua, ma lisi a latou tali i le laupapa. Atonu e te manao e ta’ua faapea o aoaoga a Mamona, o mataupu faavae lava e tasi na semanu e faasaoina sa Nifae mai le faaumatiaga (tagai Mamona 3:2).

Valaaulia se tamaitiiti aoga e faitau leotele le Mamona 7:6–7. Fai atu i le vasega e mulimuli i le faitauga, ma vaavaai mo mea ua ofoina mai e le Alii ia i latou uma o e talitonu ia te Ia ma talia Lana talalelei. A uma ona lipoti mai e tamaiti aoga mea na latou maua, fautuaina i latou e tusi le mea moni lenei i autafa o le Mamona 7:6–7: E ofoina atu e le Alii le faaolataga i tagata uma, ma o le a Ia laveaiina i latou o e talia mataupu faavae ma sauniga o Lana talalelei.

Tusi le fesili lenei i luga o le laupapa: Valaaulia tamaiti aoga e tusi a latou tali i le fesili i api po o api talaaga o le suesueina o tusitusiga paia.

E tusa ai ma le Mamona 7:7, o a faamanuiaga mo i latou o le a maua e “lē tausalaina” i luma o le Atua?

Valaaulia ni nai tamaiti aoga e faasoa mai mea ua latou tusia.

Mamona 8:1–11

Ina ua maliu Mamona, ua tuua toatasi lona atalii o Moronae e tusia le faaumatiaga o lona nuu

Fai atu i tamaiti aoga e mafaufau i se taimi na tuua toatasi ai i latou i se tulaga na luitauina ai lo latou faatuatua—atonu o se tulaga o le a faigofie ai lava ona latou faia se mea sese e aunoa ma se isi o iloa mai i latou. Valaaulia i latou e mafaufau pe o lo latou naunautaiga e mulimuli i le Faaola ma tausi Ana poloaiga i lena taimi na faateleina, tumau i le mea e tasi, pe na faaitiitia.

Aisea e ono filifili ai nisi tagata e le tumau i le faatuatua pe afai ua tuua na o i latou i se tulaga e luitauina ai lo latou faatuatua?
Aisea e ono filifili ai nisi tagata e tumau i le faatuatua i le tulaga lava lena e tasi?

Faamalamalama atu na fasiotia Mamona ina ua uma le taua mulimuli i le va o sa Nifae ma sa Lamana, ma na tuua toatasi ai lona atalii o Moronae, e aunoa ma se tasi o le aiga po o nisi o ona tagata. Valaaulia se tamaitiiti aoga e faitau leotele upu a Moronae i le Mamona 8:1–9, ma fai atu i le vasega e vaavaai mo faamatalaga o tulaga o Moronae. Fai atu ia i latou e lipoti mai mea ua latou maua.

Mata o le a sou manatu i ou lagona pe ana faapea na e i ai i le tulaga o Moronae?

I le faaaogaina o aso i lalo o itulau po o aotelega o mataupu, fesoasoani i tamaiti aoga ia iloa e atoa lelei lava le 16 tausaga i le va o upu mulimuli a Mamona ma le taimi na amata ai ona tusitusi Moronae i luga o papatusi. Ona valaaulia lea o tamaiti aoga e toe vaai i le Mamona 8:1–4 e vaai po o le a le mea na naunau Moronae e fai, e ui lava ina sa tuuatoatasi o ia mo se taimi umi. Fai atu ia i latou e lipoti mai mea ua latou maua. (E tatau ona latou iloa na naunau o ia e usiusitai i lona tama ma tusitusi i luga o papatusi.)

O a mataupu faavae e mafai ona tatou aoao mai i le usiusitai o Moronae e ui lava i ona tulaga na i ai? (A o faasoa mai e tamaiti aoga o latou manatu, faamamafa atu le upumoni lenei: E tusa lava pe tuuatoatasi i tatou, e mafai ona tatou filifili e tumau i le faatuatua. Atonu e te manao e valaaulia tamaiti aoga e tusi lenei upumoni ia latou tusitusiga paia i autafa o le Mamona 8:1–4.)

Tau atu na i ai se misiona faapitoa a Moronae. Na “totoe ai [na o ia lava] e tusi le tala faanoanoa o le faaumatiaga o [ona] tagata” (Mamona 8:3). E ui lava o le a le feagai tamaiti aoga ma ni tulaga tutusa faapena, ae atonu latou te feagai ma tulaga e tuua ai na o i latou ma manaomia ai le tumau i le faamaoni. Atonu latou te feagai foi ma ni tulaga ua latou lagona ai le tuuatoatasi e tusa lava pe o la e i ai nisi tagata—e pei o ni taimi ua latou i ai faatasi ma tagata e le ola i tulaga faatonuina ua faatuina e le Alii ma Ana perofeta.

O ai tou te iloa na faamaoni e tusa lava pe na tuuatoatasi i tulaga faigata?

Pe a tali mai tamaiti aoga i lenei fesili, fai atu nisi po o fesili-tulitataouma nei:

O a mea na fai e lenei tagata i na tulaga?
Na faapefea ona faamanuiaina mulimuli ane le tagata ona o le faia o mea na poloaiina ai o ia e le Atua e fai?
E faapefea ona fesoasoani nei faataitaiga ia te oe?

Valaaulia tamaiti aoga e faitau le leoa le Mamona 8:10–11. Fai atu ia i latou e faailoa mai se auala se tasi na lagolagoina ai Moronae e le Alii ma Mamona i tulaga faigata na la feagai. (Na auina mai e le Alii le au Nifae e Toatolu e auauna atu ia Mamona ma Moronae; tagai foi 3 Nifae 28:25–26.) Faamamafa atu faapea afai tatou te faatuatua i le Atua i tulaga tuuatoatasi pe faigata, o le a Ia fesoasoani ia i tatou e tumau i le faamaoni. Faaaoga fesili nei e talanoaina ai lenei upumoni:

O anafea na e usiusitai ai i se tasi o poloaiga a le Tama Faalelagi i se tulaga na faapitoa le faigata? E faapefea ona e lagonaina ua faamanuiaina oe i le faia o lena mea?
Aisea e te manatu ai e taua le saunia nei ia faamaoni i tulaga faigata i le lumanai?

Ina ia fautuaina tamaiti aoga ia tumau i le faatuatua e ui lava i tulaga latou te tutu taitoatasi ai, faasoa atu le saunoaga lenei a Peresitene Thomas S. Monson:

Ata

Peresitene Thomas S. Monson

“A o tatou ola ai mai lea aso i lea aso, e toetoe lava a muai iloaina o le a luitauina lo tatou faatuatua. Atonu o nisi taimi tatou te iloa ai le siosiomia o i tatou lava e isi ae o loo tutu pea o ni vaega toalaiti pe oo foi lava i le tutu na o i tatou e tusa ma mea ua taliaina ma mea e le taliaina. Pe i ai ea so tatou lototele a’ia’i e tutu mausali ai mo o tatou talitonuga, e tusa lava pe afai o le faia o lea mea e tatau ai ona tatou tutu na o i tatou? … Tau ina ia tatou lototetele pea ma saunia e tutu mo mea ua tatou talitonu i ai, ma afai e tatau ona tatou tutu na o i tatou i le faagasologa, tau ina ia tatou faia ma le lototele, ua faamalosia e lo tatou iloa, e moni lava e le o tuua na o i tatou pe a tatou tutu faatasi ma lo tatou Tama o i le Lagi” (“Ia Lototele e Tu Na o Oe,” Ensign po o le Liahona, Nov. 2011, 60, 67).

Ia faaiu i le faasoa atu o se aafiaga na faamanuiaina ai oe e le Alii ona o lou faamaoni i se tulaga na tuua toatasi ai oe po o se tulaga faigata.

Iloiloga o le Mau Tauloto

Tusi le apoapoai i luga o le laupapa. Faamalamalama atu o le upu apoapoai o lona uiga ina ia uunai malosi isi ina ia amio i se tulaga faapitoa. Faamalamalama atu faapea o upu mulimuli a Mamona i Mamona 7 o ni faataitaiga lelei o se apoapoaiga. Tuu atu ni fasi pepa i tamaiti aoga ma tau atu ia te i latou o le a latou tusia se apoapoaiga e faaautu i se tasi o fuaitau i a latou mau tauloto e fiafia i ai i le Tusi a Mamona. I le pito i luga o le fasi pepa, tuu atu i tamaiti aoga e tusi: “Ou te fia tautala teisi atu i le autalavou i aso e gata ai.” Valaaulia tamaiti aoga taitoatasi e filifili se fuaitau o se mau tauloto e sili ona fiafia i ai ona tusi lea o se apoapoaiga i le autalavou o aso e gata ai e faaautu i le fuaitau ua latou filifilia. O la latou apoapoaiga e mafai ona aofia ai se otootoga o mea moni autu e maua i le fuaitau o le mau tauloto, se faamalamalamaga pe aisea e taua ai nei mea moni mo le autalavou o aso nei, ma se valaaulia ia amio e tusa ai ma nei mea moni. O apoapoaiga e ono faaiu i se folafolaga e pei o lea e maua i le Mamona 7:7 po o le Mamona 7:10. E mafai ona e fai atu i nai tamaiti aoga e faasoa mai a latou apoapoaiga i le vasega. E mafai foi ona e aoina nei apoapoaiga e faaaoga o ni faailoilo mo gaoioiga o suega mau i le lumanai pe faapipii foi i luga o le potu aoga.

Manatua: E te ono faaaogaina lenei gaoioiga i soo se taimi o le lesona. Mo se faataitaiga, e te ono faaaogaina i le faaiuga o le lesona, pe e te ono faaaogaina pe a uma le talanoaina o le Mamona 7.

Tala ma Faamatalaga o Talaaga

Mamona 7. O le aioiga mulimuli a Mamona ia talitonu ia Keriso

Na faamatala e Elder Jeffrey R. Holland o le Korama a Aposetolo e Toasefululua le aioiga mulimuli a Mamona ia talitonu ia Keriso, o se aioiga na ia tusia i tagata o o tatou aso ina ua uma ona matamata i le faaumatiaga o lona nuu atoa:

“I sana lava fāsāga e uiga i le oti, na oo atu ai Mamona i tagata uma o taimi ma itu, aemaise o ‘e totoe o le aiga o Isaraelu’ o e o le a i ai se aso latou te faitau ai i lana faamaumauga ofoofogia. O latou o se isi taimi ma nofoaga e tatau ona aoao i mea na galo ia i latou o e ua taooto i ona luma—e tatau i tagata uma ona ‘talitonu ia Iesu Keriso, o ia lava o le Alo o le Atua,’ mulimuli ane i lona faasatauroga i Ierusalema, ‘i le mana o le Tama … na ia toetu mai ai, o lea ua ia manumalo ai i le tuugamau; o ia foi ua faaumatia ai le tui o le oti.

“‘Ma na ia aumaia le toetu o e ua oti … [ma] le laveaiina o le lalolagi.’ O i latou o e ua laveaiina e ono mafai, ona o Keriso, ona olioli ‘i se tulaga o le fiafia e leai se iuga.’[Mamona 7:2, 5–7.] …

“Ia ‘talitonu ia Keriso,’ ae maise lava pe a fuaina i na taunuuga matautia ae le maalofia, le aioiga mulimuli a Mamona ma lona toe faamoemoe. O le faamoemoega autu lea o le tusi atoa lena o le a oo mai i le lalolagi o aso e gata ai e tauaveina lona igoa”(Christ and the New Covenant: The Messianic Message of the Book of Mormon [1997], 321–22).