Mosaea 7–17 (Iunite 12)

Anomea o Sauniuniga mo le Faiaoga o Suesuega e Faia i le Aiga

Aotelega o Lesona o Suesuega e Faia i le Aiga

O le aotelega lenei o aoaoga ma mataupu faavae na aoao e tamaiti a o latou suesueina le Mosaea 7–17 (iunite 12) e le o fuafuaina ina ia aoao atu o se vaega o lau lesona. O le lesona e te aoao atu o loo taulai i na o ni nai aoaoga faavae ma mataupu faavae nei. Mulimuli i uunaiga a le Agaga Paia a o e mafaufau i manaoga o tamaiti aoga.

Aso 1 (Mosaea 7–8)

A o latou suesueina le Mosaea 7–8, e taulai atu tamaiti i le sootaga i le va o le amioleaga ma le pologa. Latou te aoaoina foi mai upu a le Tupu o Limae e faapea, o le iloaiina o a tatou amioleaga ma lagonaina le salamo mai ai, e mafai ona taitai atu ai i tatou e liliu atu i le Alii mo le faasaolotoina. Na faamautinoa atu e Amona ia Limae, ua saunia e le Alii ia perofeta, tagatavaai, ma talifaaaliga ia manuia ai le tagata.

Aso 2 (Mosaea 9–10)

E tele mea e aoaoina e tamaiti e uiga i le ala na nonofo ai se vaega o sa Nifae, ua ta’ua o tagata o Senifa ma le au sa Lamana. Na iloga mai le mea moni lea ina ua o atu Senifa ma ona tagata e tau faasaga ia sa Lamana: O le a faamalolosia e le Alii i tatou pe a tatou faia mea uma tatou te mafaia ma tuu atu lo tatou faatuatuaga ia te Ia.

Aso 3 (Mosaea 11–14)

Na taitai e le Tupu o Noa lona nuu e faia mea inosia ma le amioleaga. Na iloa e tamaiti le auina mai e le Atua o perofeta e fesoasoani ia i tatou ia salamo, taumamao mai le faanoanoa, ma ia maua le faaolataga. O aoaoga a le perofeta o Apinati, na aoao ai e tamaiti afai tatou te tausia poloaiga a le Atua, o le a faasaoina i tatou. Sa latou aoaoina foi o le Togiola a Iesu Keriso o le puna lea o le faaolataga.

Aso 4 (Mosaea 15–17)

A o lei faamaturoina o ia, sa tautino atu ma le le fefe e Apinati, o le Togiola a Iesu Keriso e faamalieina ai manaoga o le faamasinotonu mo i latou uma o e talitonu i le mana togiola o le Faaola, salamo mai a latou agasala, ma tausi poloaiga. Na aoao mai foi e Apinati, ona o le Togiola a Iesu Keriso, o le a toetutu ai tagata uma. E ala i le suesue i nei aoaoga faavae, e toe fafagu mai ai i tamaiti le taua o le faalagolago i le Faaola ma le faamaoni i le Atua i tulaga uma.

Faatomuaga

Ua faamatala e Mosaea 7–17 ia malaga ma aafiaga o vaega eseese o tagata taitoatasi ma vaega eseese o tagata. O le filifiliga a Senifa e taitai se vaega o sa Nifae e nonofo ma tagata sa Lamana, sa i ai se aafiaga i ia malo e lua. Mo se faataitaiga, na feagai tagata o Senifa ma e na tutupu mai ia te i latou ma faigata, liliuese, nofopologa, toefanauina faaleagaga, ma le faasaolotoina. O le vaega muamua o lenei lesona o le a maua ai e tamaiti se avanoa e toe iloilo ai igoa, nofoaga, ma mea na tutupu ia sa latou aoaoina i le vaiaso lenei. O le vaega e lua o le lesona o le a fesoasoani e iloa ai e tamaiti le autu tutotonu o le savali a le perofeta o Apinati i tagata —o Iesu Keriso ma Lana Togiola. O se savali na naunau ia Apinati e oti ai.

Fautuaga mo le Aoaoga

Mosaea 7–17

Toe iloiloina o le nofoaga faasolopito ma le aoaoga faavae

Ina ia fesoasoani ia te oe e faamatala mea na tutupu i lenei lesona, toe iloilo le siata o i le “Vaaiga aoao i le Mosaea 7–24” i le iunite 12, aso 1 o le taiala suesue a le tamaitiiti aoga. Valaaulia tamaiti e faitau le Mosaea 7:1–2, ma faailoa mai laueleele e lua o loo ta’ua ai. Fai i ai e faamatala pe na mananao i se a vaega eseese e lua o tagata sa Nifae e malaga mai le tasi nuu i le isi.

Tusi ia igoa o nuu e lua i pito eseese e lua o le laupapa (po o se fasipepa):

Nuu o Saraemila

Nuu o Nifae (Liae-Nifae)

O fesili nei e mafai ona fesoasoani a o outou iloiloina ma tamaiti ia mea na tutupu. Tusi i luga o le laupapa ia igoa o tagata taitoatasi tou te talanoaina. E mafai ona e faaaogaina uma pe na o ni nai fesili nei, faalagolago i manatu o tamaiti:

Aisea na manao ai Senifa e tuua le nuu o Saraemila? (tagai Mosaea 9:1, 3.)
O le a le sootaga o Senifa, Noa, ma Limae? (tagai Mosaea 7:9.)
O le a le ituaiga o tupu na i ai Noa? (tagai Mosaea 11:1–5, 11.)
O le a le mea na faia e le Atua e faatauanau ai Noa ma lona nuu ia fulitua mai a latou amioleaga ma le inosia? (Na Ia auina atu Lana perofeta o Apinati e ta’u atu ia latou salamo.)
O le a se mea e mafai ona e ta’u mai e uiga ia Alema? (O tali e mafai ona aofia ai, o ia o se tasi o faitaulaga a le Tupu o Noa, sa talitonu o ia ma tusia upu a Apinati, ma sa solaese o ia ina ia le fasiotia.)
Aisea e taua ai Mose ma Isaia i nei mataupu, e ui sa soifua i la’ua i tausaga ua leva a o lei oo mai Apinati, ma i se isi vaega o le lalolagi?
Aisea na auina atu ai e Limae ona tagata e 43 i le vao? (Sa nofopologa ia Limae ma ona tagata i tagata sa Lamana, ma sa latou sailia se fesoasoani mai tagata i Saraemila.) Ae o le a le mea sa latou mauaina nai lo Saraemila? (Sa latou mauaina se malo ua faatafunaina ma ni papatusi auro e 24 o i ai ni tusitusiga.)
O le a le mea sa faia e Amona ma isi tagata e 15? (Sa auina mai i latou e Mosaea e sue po o le a le mea ua tupu i tagata o Senifa. Sa latou mauaina i latou na tupuga mai i na tagata, o nofopologa. O Limae le atalii o lona atalii, lo latou tupu.)
O ai na avea ma tupu i Saraemila ma o se perofeta, tagatavaai, ma talifaaaliga? (Mosaea.) Aisea sa taua ai lana matafaioi o se tagatavaai ia Limae? (Na faalogo Limae faapea o Mosaea e mafai ona faaliliuina ia tusitusiga o i luga o papatusi auro e 24.)

Ta’u i ai pe tusa ma le 80 tausaga na mavae talu ona o ese Senifa ma ona tagata mai Saraemila ae taunuu atu Amona ma ana soa i le nuu o Nifae.

A uma ona e fesoasoani i tamaiti ia malamalama i le talafaasolopito, faamanatu i ai e i ai se isi tagata na latou suesue i ai i lenei vaiaso, e le o i ai lona igoa i luga o le laupapa.

Fai i tamaiti e tofu faitau i le Mosaea 16:6–8 ma faailoa mai le igoa o lena tagata. Ta’u i tamaiti e uiga lava o lenei vaega o le Tusi a Mamona o loo aofia ai le tele o le talafaasolopito, ae o loo faamamafa mai ai lava le aoaoga faavae o le faaolataga e ala ia Iesu Keriso.

Ina ia faamamafa le taua o le faaolataga e ala ia Iesu Keriso, kopi le siata lea i luga o le laupapa pe saunia e fai ma tufaaga. Valaaulia tamaiti e galulue i paga e suesue ai mau faasino o loo lisi i luga o le siata ma talanoaina mea latou te maua. Ona o nisi o fesili faatatau e patino lo latou natura, o lea e mafai ai e tamaiti ona filifili pe tali leotele atu e le tasi i le isi, pe tusi ia tali i a latou api talaaga mo le sueuseina o tusitusiga paia, pe mafaufau lemu foi i a latou tali.

Mau	O A Mea e Saili	Fesili Faatatau
Mosaea 7:33	Faapefea ona faasaolotoina i tatou mai le nofopologa faaleagaga ma le faaletino.	Mai nei manatu e tolu na faamamafa e Limae, o le fea e te manatu e manaomia ona e galue ai e faamalosia i le taimi lenei?
Mosaea 13:11	Aisea na le malamalama ai le Tupu o Noa ma le toatele o ona tagata i le misiona a Iesu Keriso.	O a faamaoniga i lou olaga ua tusia poloaiga i lou loto? O a ni auala e mafai ona e suesue ma aoao atu le amiotonu?
Mosaea 14:3–7	O upu ma fasifuaitau anoa e uiga i le mafatiaga ma le teena o le Faaola.	O a ni auala o ta’ufaatauvaaina ai ma teena le Faaola i nei ona po? E faapefea ona lafi se tagata mai ia te Ia? E faapefea e se tasi ona faia le mea faafeagai?
Mosaea 15:6–9, 11	O le mea na “motusia” e Iesu Keriso ma le mea na Ia “mauaina”; e le gata i lea, o le mea na tatou maua ona o le taulaga a le Faaola.	O a ni mea na pulavagaina ai e le Alii oe talu ai nei? Na faapefea ona tu o Ia i lo oulua va ma le manaoga o le faamasinotonu?

Ina ia fesoasoani i tamaiti e toe manatunatu i mea sa latou aoaoina i lenei gaoioiga mo mau ma a latou lesona mo le vaiaso, fesili: E faapefea ona fesoasoani mataupu faavae ma aoaoga faavae na outou suesueina i lenei vaiaso ia te oe e te sagisagi atu ai mo se faamagaloga o au agasala?

Tuu i tamaiti se avanoa e molimau atu ai ia Iesu Keriso.

O se tasi o ala e mafai ai ona faauma le lesona o le aso o le faitau lea o le Mosaea 16:13–15 ma faasoa lau molimau i lo tatou manaomia o le Faaola. O se tasi ala o le faamamafa atu i tamaiti o aoaoga faavae ma mataupu faavae e lua sa latou aoaoina i lenei vaiaso: e faapea o le Togiola a Iesu Keriso o le puna lea o le faaolataga ma o Iesu Keriso ua faamalieina manaoga o le faamasinotonu mo i latou uma o e salamo.

Le Isi Iunite (Mosaea 18–25)

Ua faailoa mai i le Mosaea 18–25 le ala na sosola ai vaega e lua mai le nofopologa i o latou fili ma toe foi saogalemu atu ai i Saraemila. O le a e iloa ai le ala na taialaina ai e le Atua vaega taitasi e sosola. O le tasi vaega na mulimuli i le fuafuaga a Kiteona e faaonana ia leoleo, a o le isi vaega na sosola e ala i le mulimuli ia Alema a o momoe ia sa Lamana. O ai na faamomoeina sa Lamana?