Lesona mo Suesuega e Faia i le Aiga
Alema 25–32 (Iunite 18)
Sauniuniga o Anomea mo le Faiaoga o Suesuega e Faia i le Aiga
Aotelega o Lesona o Suesuega e Faia i le Aiga i Aso Taitasi
E le o faamoemoe le aotelega lenei o aoaoga faavae ma mataupu faavae lea na aoao e tamaiti aoga a o latou suesue i le Alema 25–32 (iunite 18) ina ia aoao atu o se vaega o lau lesona. O le lesona e te aoao atua ua na o ni nai vaega o aoaoga faavae ma mataupu faavae nei e taulai atu i ai. Mulimuli i uunaiga a le Agaga Paia a o e mafaufau i manaoga a au tamaiti aoga.
Aso 1 (Alema 25–29)
O le a aoaoina e tamaiti aoga ia mataupu faavae nei pe a latou suesue i le olioli o Amona i le lagona faamanuiaina o ia ma ona uso i le talaiga o le talalelei. A o tatou faalotomaualalaloina i tatou lava, o le a faamalolosia i tatou e le Alii ma faaaogaina i tatou e avea ma meafaigaluega i Ona aao; o le a tatou mauaina le olioli pe a tatou auauna atu ma le faamaoni i le Alii ma Ana fanau. Ao faaliliuina ia sa Lamana i le talalelei ma mumusu e ave i luga a latou auupega, ua aoaoina tamaiti afai tatou te liua atoatoa i le Alii, o le a tatou tausia ia feagaiga na tatou osia ma Ia. Mai le faataitaiga a Alema, ua iloa e tamaiti o le a tatou lagonaina le olioli pe a tatou fesoasoani atu i isi ina ia salamo ma o mai ia Iesu Keriso.
Aso 2 (Alema 30)
O le faitau i aoaoga a Korioa, o se aneti-Keriso, ua iloa ai e tamaiti e faaaogaina e Satani ni aoaoga faavae sese e faatosinaina ai i tatou e faia le agasala. Na tali atu Alema i aoaoga a Korioa e ala i le folafola atu o loo molimau mai mea uma lava i le Atua o se Foafoa Silisiliese. Ina ua uma ona faitau i le solia i lalo o Korioa ma oti ai, ua malamalama ia tamaiti aoga i le mataupu faavae na faamaumauina e Mamona. “E le lagolagoina e le tiapolo ana fanau [tagata e mulimuli ia te ia] i le aso gataaga” (Alema 30:60).
Aso 3 (Alema 31)
A o faitau tamaiti aoga e uiga i faamoemoega a Alema e toe aumai sa Sorama ua liliuese, ua latou iloa ai ia mataupu faavae nei: A o tatou suesue i le afioga a le Atua, o le a taitaiina atu i tatou e fai le mea sao. O taumafaiga e tatalo i aso taitasi ma tausia ia poloaiga o le a faamalosia ai i tatou e tetee atu i faaosoosoga. Afai tatou te tatalo ma galulue i le faatuatua, o le a tatou mauaina le fesoasoani paia i taimi o o tatou faaosoosoga.
Aso 4 (Alema 32)
A o faitau tamaiti aoga e uiga i le manuia o le talaiga a Alema i tagata matitiva o sa Sorama, ua aoaoina ai tamaiti aoga o le lotomaualalo e saunia ai i tatou ina ia mauaina le afioga a le Atua. Ua faatusatusa e Alema le faaaogaina o le faatuatua i le totoina o se fatu ma faafaileleina. Ua aoaoina e tamaiti aoga afai tatou te tausia ma le filiga le afioga a le Atua i o tatou loto, o le a tuputupu ae lo tatou faatuatua ma la tatou molimau e uiga ia Iesu Keriso ma Lana talalelei.
Faatomuaga
Amata le lesona lenei i se gaoioiga e fesoasoani ai i tamaiti e saili ina ia avea ma meafaigaluega i aao o le Atua. O le vaega tele o le lesona o le a taulai atu lea i taunuuga o le talitonu ma le faatinoina o manatu sese e ese mai ai i le talitonu ma le faatinoina o le afioga a le Atua, e pei ona faailoa mai i le Alema 30–32.
Fautuaga mo le Aoaoga
Alema 25–29
Ua mitamita Amona ma atalii o Mosaea i le Alii ina ua toatele sa Lamana ua liliu mai i le talalelei
E pei ona faamaumauina i le Alema 26, ua olioli Amona ma ona uso i le faamanuiaina o i latou i le galuega a le Alii. Tuu atu i tamaiti e faitau le Alema 26:1–4, 11–13 ma tagai i mea na ausia e Amona ma ona uso ma pe na faapefea ona latou ausiaina. Toe faamanatu atu i tamaiti o nei mau o loo aoao atua ia mataupu faavae nei: A o tatou faalotomaualalaloina i tatou lava, o le a faamalolosia ma faaaogaina i tatou e le Alii e avea ma meafaigaluega i Ona aao.
Alema 30
Ua faatauemu Korioa i le aoaoga faavae a Keriso
Faaali i le vasega se fatu. Fai i ai latou te lisiina mai ni faataitaiga o ni mea latou te fiafia i ai e sau mai ni fatu. E ese mai nisi o laau, fua, ma laau fai supo ia atonu na ta’ua e tamaiti, faasino atu i ai e mafai foi ona tupu mai i se fatu se laau e oona ona fua po o le faatamaia ai foi o nisi o laau lelei.
Tusi upu nei manatu ma le talitonuga i luga o le laupapa ma fesili atu: E faapefea ona faapei se manatu po o se talitonuga ma se fatu?
Faamalamalama atu ao suesue ma talanoaina e tamaiti le Alema 30–32 i le vasega i le asō, o le a latou faatusatusaina ia taunuuga o manatu sese ma taunuuga o le mulimuli i le afioga a le Atua.
Fai i tamaiti e faamatala mai po o ai Korioa. Valaaulia i latou e faitau le Alema 30:12–18, 23 ma faailoa mai ia manatu sese ia na aoao atu e Korioa. A ua lava so latou taimi e faitau ai, valaaulia i latou e lisi i luga o le laupapa po o i se fasi pepa ni manatu sese se lua po o le tolu foi a Korioa lea latou te manatu e matuai lamatia ai lava se talitonu faalelotu a se tagata. Ona fai atu lea o fesili nei:
-
O a ni gaoioiga e ono taitaiina atu i ai e nei manatu? (A o tali mai tamaiti, faasino atu o se manatu e taitaiina atu ai i se gaoioiga e faapei o se fatu o loo tuputupu ae i se laau.)
-
E tusa ai ma le Alema 30:18, o le a se mea na taitaiina ai e aoaoga a Korioa ia tagata e faia? (A o tali mai tamaiti, faamamafa atu faapea e faaaogaina e Satani ni aoaoga faavae sese e faaosoosoina ai i tatou i le faia o le agasala.)
Valaaulia se tamaitiiti e aotele mai le mea na tupu ia Korioa. (Afai e manaomia e tamaiti aoga se fesoasoani, valaaulia i latou e faaaoga le ulutala o le mataupu mo le Alema 30 pe faitau le Alema 30:52–53, 59–60.)
Alema 31
Ua taitaia e Alema se misiona e toe aumai sa Sorama ua liliuese
Toe faamanatu atu i tamaiti aoga na talitonu sa Sorama i manatu sese ma sa latou pauu atu i gaoioiga pepelo po o le liliuese. I le Alema 31:5 ua tatou aoao ai a o tatou suesue i le afioga a le Atua, o le a taitaiina atu i tatou i le faia o le mea sao.
Alema 32
Ua aoaoina e Alema ia tagata matitiva o sa Sorama i le auala e faaaoga ai le faatuatua
Toe faamanatu atu i tamaiti e ui na mumusu le toatele o sa Sorama e maua le afioga a le Atua, ae na amata ona faamanuiaina Alema i tagata matitiva. Na ia aoaoina i latou i le auala e faaaoga ai le faatuatua. Tuu atu i tamaiti e toe iloilo le Alema 32:21, o se fuaiupu o le mau tauloto. Fai atu i ai e faamatala mai po o le a se mea o aoao mai e lenei mau ia i latou e uiga i le faatuatua.
Toe faamanatu atu i tamaiti o loo faaaogaina e Alema se fatu e aoao atu ai e uiga i le faagasologa o le atinaeina o le faatuatua. Ona fai atu lea o fesili nei:
-
O a fasifuaitau o i le Alema 32:28 o loo faailoa mai ai o se fatu, pe i lenei tulaga o le afioga a le Atua, e lelei?
-
O le a se aafiaga o le afioga a le Atua o i ai ia i tatou pe a tatou tuuina e toto i totonu o o tatou loto?
Tau atu i tamaiti na uunaia e Alema ia sa Sorama e tofotofo i le afioga, po o le totoina i o latou loto e ala i le talitonu i ai ma galue i ai. Valaaulia i latou e faitau le Alema 33:22–23, tagai po o le a le “afioga” lea na matuai manao lava Alema e toto e tagata i o latou loto. Atonu e te manao e uunaia ia tamaiti e tusi mau nei e avea o se mau fefaasinoai i autafa o le Alema 32:28.
Tuu atu i tamaiti e faitau le Alema 32:28–29, 31, 37, 41–43, tagai mo taui ia tatou te mauaina mai le talitonu ma le galue ai i le afioga a le Atua. A o tali mai tamaiti, ia faamautinoa atu e manino le mataupu faavae lenei: Afai tatou te tausia ma le filiga le afioga a le Atua i o tatou loto, o le a tuputupu ae lo tatou faatuatua ma la tatou molimau e uiga ia Iesu Keriso ma Lana talalelei.
Ina ia faaiuina lenei lesona, valaaulia ia tamaiti aoga e faasoa mai o latou lagona i le lesona 4, galuega 4 i a latou api talaaga mo le suesueina o tusitusiga paia —e uiga i taunuuga ua latou vaaia i o latou olaga a o latou mulimuli ai i faataitaiga ia na faamatalaina mai e Alema i le Alema 32.
Le Isi Iunite (Alema 33–38)
O le a le tulaga lamatia o le faatuai ona salamo? Na tali e Amoleka le fesili lenei ma tuuina mai ai se lapataiga. Na faapea foi, ona fautuaina e Alema ni ona atalii se toalua ao pulapula lagoto lona soifua. Na ia tuuina mai ni faamatalaga auiliili e uiga i lona liua —le suia mai se tagata sa faasagatau i le Atua i se tagata o tau mo le Atua —ma ona lagona ina ua ia saoloto mai le tausalaina ma le tiga o ana agasala.