Lesona 101
Alema 45–48
Faatomuaga
Ina ua uma ona tuu atu e Alema ni aoaoga faaiu i lona atalii o Helamana, na ia aluese mai le nuu o Nifae ma e lei toe faalogo lava ia te ia. Na avea Helamana ma taitai taua faaleagaga ae avea Kapeteni Moronae ma taitai militeli taua i le aluga o se taimi faigata mo sa Nifae. O Amalekia, o se taitai o se vaega o sa Nifae faatupu faalavelave, lea na faatulagaina se fuafuaga faapiopio ina ia maua ai le pule ia sa Nifae. Na fesoasoani Kapeteni Moronae ia sa Nifae e faamalolosia i latou lava e tetee atu ai i osofaiga a o latou fili ina ia mafai ona latou faatumauina pea lo latou aia tatau ma le saolotoga e tapuai ai.
Fautuaga mo le Aoaoga
Alema 45
Talitonu Helamana i upu a Alema ma amataina lana talaiga
Fai i tamaiti e mafaufau e uiga i se faatalanoaga sa latou faia ma se matua po o se taitai perisitua.
-
O a ituaiga fesili e masani ona fesiligia e matua po o taitai perisitua i se faatalanoaga?
Pe a uma se talanoaga puupuu, faamalamalama atu ao lei tuuina atu e Alema i lona atalii o Helamana le tausiga o faamaumauga paia ma aluese atu ai mai le laueleele (tagai i le Alema 45:18–19), na ia tuuina atu ni fesili ia Helamana. Fai atu i tamaiti e faitau le leoa le Alema 45:2–8, vaavaai i fesili a Alema ma tali a Helamana.
-
Na fetauai sa Nifae ma sa Lamana i le taimi na faia ai le talanoaga lenei a Alema ma Helamana. O le a sou manatu na faapefea ona fesoasoani le faatuatua a Helamana ia te ia i le taimi o le taua ma i lana galuega?
-
O ana fea na e maua ai le malosi mai lou faatuatua ia Iesu Keriso ma upu a perofeta ma mai lou tautinoga ina ia tausia ia poloaiga?
Otooto mai le Alema 45:9–19 e ala i le faamatala atu i tamaiti aoga ina ua uma ona vavalo atu Alema e uiga i faatafunaga o le a oo mai lava i le malo o sa Nifae, na ia aluese mai le laueleele ma e lei toe faalogo lava ia te ia. Ao lei aluese atu o ia, na ia tuuina atu se valoaga faaiu. Fai i se tamaitiiti e faitau leotele le Alema 45:16.
-
O a upumoni e mafai ona tatou aoao mai lenei valoaga? (E mafai ona tau mai e tamaiti nisi o mataupu faavae, ae ia mautinoa o latou faaalia le malamalama faapea e le mafai ona silasila atu le Alii i le agasala ma talia sina vaega itiiti.)
Faamalamalama atu na amatalia e Helamana lana galuega i le tofiaina o ni ositaulauga ma aoao i le Ekalesia i le laueleele atoa. Fai atu i tamaiti e suesue i le Alema 45:23–24, vaavaai i le ala na tali mai ai tagata i nei taitai o le Ekalesia.
-
Na faapefea ona tali mai tagata i o latou taitai o le Ekalesia? Aisea na mumusu ai nisi tagata e faalogo i taitai o le Ekalesia?
Alema 46
Na faapotopoto e Kapeteni Moronae e amiotonu e puipui o latou aia tatau ma lo latou tapuaiga
Otooto le Alema 46:1–3 e ala i le faamatala atu o i latou o e e lei faalogo i taitai o le Ekalesia na taitaiina ese tagata e igoa ia Amalekia. Fai i tamaiti e faitau le leoa le Alema 46:4–5, tagai i le mea na mananao i ai Amalekia ma e na mulimuli ia te ia. Fai atu i tamaiti e faamatala mai mea na latou mauaina.
Fai i tamaiti e faitau le leoa le Alema 46:6–7, tagai i taunuuga o aafiaga a Amalekia ia i latou o e na mulimuli ia te ia.
-
O le a se mea na tupu o se taunuuga o le aafiaga a Amalekia?
Fai i tamaiti e faitau le leoa le Alema 46:8–10, tagai i lesona na manao Mamona ina ia tatou aoao mai amioga a Amalekia. Atonu e te manao e faasino atu o le tele o nei lesona e faafeiloai mai e upu “faapea ona tatou vaai” po o le “tatou vaai”. (Atonu e te manao e fautuaina tamaiti aoga e faailoga nei lesona i totonu o a latou tusitusiga paia.) E ono iloa ai foi e tamaiti aoga ia lesona nei:
O le toatele o tagata e vave ona galo le Alii ae fai le agasala.
E mafai e se tagata amioleaga e toatasi ona aumai le amioleaga tele.
Ina ia faatusatusa ia Amalekia ma Kapeteni Moronae, fai i tamaiti e faitau le leoa le Alema 46:11–18 ma le Alema 48:11–13, 17. Valaaulia le afa o le vasega e saili le mea na manao i ai Moronae. Valaaulia le isi afa o le vasega e vaavaai mo upu ma fuaitau o loo faamatala ai le tulaga e i ai Moronae. (Fesoasoani i tamaiti aoga e vaai i le eseesega o faamoemoega amiotonu a Moronae ma faamoemoega amioleaga a Amalekia. Na lagolagoina e Moronae le mafuaaga o le saolotoga ma le amiotonu, ao Amalekia na moomoo i le pule ma saili e aumai sa Nifae i le nofopologa.)
-
E tusa ai ma mea sa e faitauina, e faapefea ona e faamatalaina ia Kapeteni Moronae? O a mataupu faavae e mafai ona tatou aoaoina mai nei fuaiupu?(E mafai ona fautua mai e tamaiti ni mataupu faavae se tele, e aofia ai le upumoni faapea e mafai ona aumaia e se alii amiotonu se toatasi le amiotonu tele.)
-
E tusa ma le Alema 46:11–18, o le a se mea na tatalo ai Moronae? (Mo faamanuiaga o le saolotoga ma le aia tatau ina ia i ai pea ia sa Nifae ma mo le “faamoemoe mo le au Kerisiano” ina ia alofagia e le Atua.)
Na tatalo Moronae e uiga i le “faamoemoe mo le au Kerisiano”. E tusa ai ma le Alema 46:12, o a ni mataupu taua se tolu na lagona e Moronae e tatau ona puipuia ma faatumauina e le au Kerisiano? (Fesoasoani i tamaiti aoga ina ia iloa o lo tatou tiute le puipuia o aiga, a tatou tapuaiga, ma lo tatou saolotoga. Tagai foi i le Alema 43:45–48.)
-
O a ni luitau o i ai o loo tetee i aiga, au Kerisiano, ma le saolotoga i lenei vaitaimi? O a nisi o auala talafeagai e mafai ona tatou puipuia ai o tatou aiga, la tatou tapuaiga, ma o tatou saolotoga?
Fai i tamaiti e faitau le leoa le Alema 46:18–22, vaavaai mo le mea na talosaga ai e Moronae lona nuu e fai. (Atonu e te manao e fautuaina tamaiti e faailoga le upu feagaiga o i nei mau.)
-
O le a se mea na osi feagaiga tagata e fai? (Faatumauina a latou aia ma la latou tapuaiga; aua nei tuulafoaiina lava le Alii; aua nei solia poloaiga a le Atua; ma aua nei mama e ave i o latou luga le suafa o Keriso.)
-
E tusa ai ma le Alema 46:22, o le a se mea na faia e tagata e avea ma se faatusa o le feagaiga na latou osia? (Na latou saeia o latou ofu ma lafo i vae o Moronae.)
Tuu i luga se fasi ieie, ma sasaeina i le afa. Atonu e te manao e faamalamalama atu o le saeina o o latou ofu, na faailoa atu ai e tagata lo latou tautinoga i le feagaiga na latou osia.
-
E tusa ai ma le Alema 46:21–22, o le se mea na fai mai tagata e tatau ona tupu pe afai latou te solia la latou feagaiga?
-
O le a se mea o fesoasoani ai lenei mea ia te oe ina ia malamalama i le tuga o le natura o feagaiga na tatou osia ma le Atua?
Toe faamanatu atu i tamaiti na feagai Moronae ma lona nuu ma tagata leaga o e na mananao e faaumatia i latou.
-
E tusa ma le Alema 46:18, o le a se mea na fai mai Moronae e mafai ona aumaia ai le malaia i lona nuu?
Tusi mea nei i le laupapa: Afai tatou te tausia a tatou feagaiga, o le a… e le Atua
Fai i tamaiti e faasoa mai se auala latou te ono faamaea ai le faamatalaga lea e tusa ai ma mea sa latou aoaoina mai le Alema 46:18–22. Fai atu foi ia i latou e aumai se faataitaiga o le ala latou te iloa ai e moni le faamatalaga. E ono eseese ia tali. Aotele mai ia tali e ala i le faamaeaina o le fuaitau o i le laupapa faapenei: Afai tatou te tausia a tatou feagaiga, o le a faamanuiaina i tatou e le Atua. Uunaia ia tamaiti e tagai mo se faamaoniga e lagolago ai lenei mataupu faavae ao latou suesue i mataupu o toetoe o le Alema. Atonu e te manao e faamatala atu e uiga i se taimi na faamanuia ai oe e le Alii i le faamamaluina o au feagaiga.
Aotele mai le Alema 46:29–41. Faamatala atu na iloa e Amalekia ma tagata na mulimuli ia te ia ua toatele atu [le autau a Moronae] nai lo i latou, o lea sa latou o ai i le laueleele o Nifae, e saili e faatasi ma sa Lamana. Na taofia e le autau a Moronae le toatele o vaega a Amalekia mai le taunuu atu i le laueleele o Nifae. Toatele e na mulimuli ia Amalekia na ulu atu i se feagaiga e lagolagoina le saolotoga. O tagata toalaiti o e e lei osia le feagaiga na fasiotia. Na sosola ese Amalekia ma se vaega toalaiti o lana autau ma faatasi atu ma sa Lamana.
Alema 47
O se auala faapiopio, na avea ai Amalekia ma tupu i sa Lamana
Fesili atu i tamaiti po o le a so latou lagona pe afai o loo latou tauva i se taaloga po o se isi tauvaga ma sa i ai ia i latou se tusi o loo aofia ai se lisi o mea o loo faamoemoe le au tauva e fai ina ia manumalo ai i le tauvaga. Faamatala atu i tamaiti o le faatusaina o le Alema 47 ia i tatou lava, o le a tatou aoao ai i nisi o lesona taua e uiga i metotia a Satani o loo taumafai e faatoilalo i tatou.
Aotele le Alema 47:1–6 e ala i le faamatala atu i tamaiti e lei faavaivai Amalekia i lana sini ina ia pulea sa Nifae. Na ia fatuina se fuafuaga faapiopio e aveesea ai le tupu o sa Lamana ae avea ai o ia ma o latou tupu ina ia mafai ai ona ia taitaia sa Lamana e tau faasaga atu ia sa Nifae. Ina ua faatasi atu Amalekia ia sa Lamana, na fiafia le tupu ia te ia, lea na ia tuuina atu i ai e pule i se vaega o le autau a sa Lamana. Na faatonu e le tupu ia Amalekia ma lana autau e tuliloa se vaega o le autau a sa Lamana ua le usiusitai, lea na taitaia e se tagata e igoa ia Leoneti. Na faatonuina Amalekia e faamalosia le autau a Leoneti e ave a latou auupega ma tau faasagatau atu ia sa Nifae, peitai na ese fuafuaga a Amalekia.
Fai i tamaiti e suesue i le Alema 47:7–19 e pei o latou o Leoneti ao Amalekia o Satani. Fai atu ia i latou e faitau le leoa le Alema 47:7–10, vaavaai i le nofoaga lea na alu i ai Leoneti e puipuia ai lana autau ma le mea na taumafai Amalekia ia Leoneti e fai.
-
O fea na faapotopoto ai e Leoneti lana autau e sauniuni ai mo le taua? O le a se faamanuiaga e maua e se autau e maualuga se nofoaga o i ai nai lo lona fili?
-
O le a se mea na manao Amalekia e fai e Leoneti? O a nisi o metotia e faaaoga e Satani tatou te o mai ai i lalo mai nofoaga maualuluga? (O tali e ono i ai e aofia ai le faaosoosoina o i tatou ina ia tuuina i lalo o tatou tulaga faatonuina ma faatosina i tatou e o i nofoaga tatou te le maua ai le saogalemu faaleagaga.)
Valaaulia nisi o tamaiti aoga e feauauai i le faitauina leotele o le Alema 47:11–19. Fai i le vasega e mulimuli i le faitauga, mafaufau i le auala e ono faapei ai metotia a Amalekia e pei o metotia na faaaoga e Satani e faatoilalo ai i tatou.
-
O a ni auala na tutusa ai ia metotia a Amalekia i metotia ia na faaaoga e Satani e faatoilalo ai i tatou? (O tali e ono i ai e aofia ai le le malolo o Satani, pepelo, piopio, ma le saua.)
-
O a nisi o faataitaiga o auala na sailia e Satani e faaona ai i tatou i “ni tiketi”?
Aotele le Alema 47:20–36 e ala i le faamatalaina mai faapea na faaauau pea ona faatosina ma fasioti tagata ia Amalekia seia oo ina avea ma tupu o sa Lamana. Faamamafa atu o faamoemoega ma metotia a Amalekia e pei lava o faamoemoega ma metotia a Satani ia i tatou. Tusi le mataupu faavae lenei i le laupapa: Na saili Satani e faatoilalo i tatou, ma sa ia faaosoosoina i tatou i ni tulaga e tuu ai i lalo o tatou tulaga faatonuina.
Alema 48
Uunaia e Kapeteni Moronae ia sa Nifae ina ia saunia ma faamaoni
Fai i tamaiti e faitau le leoa le Alema 48:7–10, vaavaai i le mea na faia e Moronae ao sailia e Amalekia le pule i sa Lamana.
-
O le a se mea na faia e Moronae ao sailia e Amalekia le pule i sa Lamana?
-
O le a se mea na faia e Moronae e faamalolosia ai lona nuu ma o latou aai e tetee atu ai i osofaiga o i le lumanai? O a nofoaga faapitoa ia na taulai atu i ai ia Moronae?
Tuu atu i tamaiti se taimi e mafaufau ai i vaega i latou olaga o loo vaivai ai ma le mea e mafai ona latou faia e faamalolosia ai na eria. Fai atu ia i latou e tusi o latou manatu.
-
E tusa ma le Alema 48:10, aisea na galue malosi ai Moronae e faamalosia lona nuu e tetee atu ai i osofaiga a o latou fili? (Faamamafa atu sa manao Moronae e fesoasoani i le faasaoina o le saolotoga a sa Nifae e fai pea a latou tapuaiga.)
-
O a nisi o faataitaiga o mea o loo aoao mai e taitai o le Ekalesia i nei ona po ina ia fesoasoani ia i tatou e faamalosia o tatou eria o vaivaiga faaleagaga?
-
Aisea e matua galulue malolosi ai taitai o le Ekalesia ina ia faamalolosia i tatou faaleagaga?
Faamautinoa atu i tamaiti aoga faapea ao tatou mulimuli i le fautuaga a auauna a le Alii, o le faamalolosia i tatou ina ia tetee atu i faaosoosoga.
Fautuaina tamaiti aoga e vaavaai ma le faaeteete i mataupu o totoe o le Alema mo mataupu faavae e uiga i le taua o le tausiga o feagaiga ma le taua o le faamalolosia o i tatou lava ina ia tetee atu ia Satani.
Tala ma Faamatalaga o Talaaga
Alema 46:21–22. O le tuga o feagaiga
Na molimau mai Elder Paul E. Koelliker o le Fitugafulu i le taua o le osiaina o ni feagaiga:
“O le ua’i atu ma le totoa i le osiga o feagaiga, e taua i lo tatou faaolataga e faavavau. O feagaiga o maliliega ia ua tatou faia ma lo tatou Tama Faalelagi, lea e tautino atu ai o tatou loto, mafaufau, ma amioga i le tausia o poloaiga ua faataatitia mai e le Alii. A tatou faamaoni i le tausiga o la tatou maliliega, ua Ia folafola mai pe ua tautino mai, i le iuga, e faamanuia i tatou i mea uma ua ia te Ia” (“O Feagaiga o le Talalelei e Aumaia Ai Faamanuiaga Folafolaina,” Ensign po o le Liahona, Nov. 2005, 94).
Alema 48:19. “Ua le itiiti le auaunaga”
Na faamatala mai e Peresitene Howard W. Hunter faapea o le uiga o le tala Mamona ina ua ia tusia faapea “sa le itiiti foi le auaunaga a Helamana…i le nuu nai lo Moronae”:
“E ui lava e lei amanaiaina tele Helamana pe lauiloa e pei o Moronae, ae sa aoga o ia, o lona uiga, sa loto fesoasoani o ia pe sa aoga e pei o Moronae. …
“E le o i tatou uma o le a avea e pei o Moronae, e viia e a tatou uo i le aso atoa i aso uma. O le toatele o i tatou o ni tagata o le a le lauiloa tele i a tatou mea e fai, e o mai ma o ma faia a tatou galuega e aunoa ma le amanaiaina e tagata. Mo i latou o e atonu e lagonaina le tuuatoatasi po o le fefe pe le mata’ina foi, ou te fai atu, ‘sa le itiiti [lo outou] auaunaga’ nai lo le toatele o au uo mata’ina. O oe foi o se vaega o le autau a le Atua.
“Ia mafaufau, mo se faataitaiga, i galuega maeaea a se tina po o se tama o loo faia ma le leleoa i totonu o se aiga agavaa o le Au Paia o Aso e Gata ai. Mafaufau i faiaoga o Aoaoga Faavae o le Talalelei ma taitai pese o le Peraimeri ma Taitai Sikauti ma faiaoga asiasi o le Aualofa o loo auauna atu ma faamanuiaina ai le faitau miliona o tagata ae o le a le faamamaluina lava o latou igoa faalauaitele pe faailoa foi i faasalalauga a le malo.
“E fiasefulu afe tagata le mavaaia o loo mafai ai ona tatou maua avanoa ma le fiafia i aso uma. E pei ona tau mai e tusitusiga paia, ‘sa le itiiti le auaunaga’ o i latou nai lo i latou o loo i luga o itulau i luma o nusipepa o latou olaga.
“O le logologoa o le talafaasolopito ma le gauai atu i ai i le taimi lava lea e tasi e masani lava ona taulai i le tasi nai lo le toatele” (“No Less Serviceable,” Ensign, Ape. 1992, 64).