3 Nifae 2–5

Faatomuaga

Ina ua mavae le vaaia e tagata o faailoga o le soifua mai o Iesu Keriso, na amata ona faaitiitia lo latou ofo i faailoga, ma ua latou faamaaa o latou loto. O le toatele o tagata na teena nisi o faailoga ma mea ofoofogia, ma faateleina le amioleaga. O se taunuuga, na matuā faateleina le malolosi o au faomea a Katianetona, o le mea lena na faamalosia ai sa Nifaē ma sa Lamanā e toe fetagofi atu i auupega faasaga ia te i latou. O tagata liliu a sa Lamanā ua aufaatasi ma tagata sa Nifaē ma avea ma tagata ua taua o sa Nifaē. O Lakoneu, le faamasino sili o sa Nifaē, na valaau i tagata ia salamo ma saunia i latou mo le taua. Talu ai ona o lo latou salamo, lo latou faatuatua i le Alii, ma a latou sauniuniga filigā, na manumalo ai sa Nifaē i aufaomea a Katianetona. I le mavae ai o lo latou laveaiina, na faailoa ai e tagata le mana o le Atua i lo latou faasaoina.

Fautuaga mo le Aoaoga

3 Nifae 2

O tagata liliu o sa Lamanā na aufaatasi ma sa Nifaē e puipui i latou lava mai aufaomea a Katianetona

Valaaulia tamaiti aoga e faaalu ni nai minute e lisi ai i totonu o a latou api po o api talaaga mo le suesueina o tusitusiga paia nisi o aafiaga faaleagaga na latou mauaina. Faamanatu ia i latou o aafiaga faaleagaga e le manaomia se mea iloga pe tulaga ese ina ia ‘anoa ai. Fautua atu ina ia latou mafaufau loloto i taimi na latou lagonaina ai le alofa o lo latou Tama Faalelagi, po o le uunaiga a le Agaga Paia. Mo se faataitaiga, atonu latou te tusia aafiaga na oo ia i latou ina ua latou mauaina tali i tatalo, ina ua latou mauaina faamanuiaga faaleperisitua, pe ina ua latou auauna atu i isi. Pe a uma ona latou tusia, fesili atu ia i latou pe aisea latou te manatu ai atonu e taua le manatuaina o nei aafiaga faaleagaga i le asō, ma i le 10 po o le 20 tausaga i le lumanai.

Valaaulia se tamaitiiti aoga e faitau leotele le 3 Nifae 2:1–3. Fai atu i le vasega e mulimuli i le faitauga, ma vaai mo mea na tutupu ina ua amata ona galo i tagata ia faailoga e faatatau i le soifua mai o le Faaola.

O a upumoni ua aoao mai e lenei tala ia i tatou e uiga i le matautia o le faagaloina o aafiaga faaleagaga?

A o faasoa mai e tamaiti ia upumoni na latou mauaina, faamamafa atu le mataupu faavae lenei: Pe afai e galo ia i tatou aafiaga faaleagaga ua mavae, o le a faasolo ina sili atu ona tatou vaivai i faaosoosoga ma faiga taufaasese a Satani. Atonu e te manao e tusi lenei mataupu faavae i luga o le laupapa. Atonu foi e te manao e uunaia tamaiti aoga e tusia lenei mea, i lalo o a latou lisi o aafiaga faaleagaga.

Aisea e te manatu ai o le faagaloina o aafiaga faaleagaga, e mafai ona faavaivaia i tatou ia Satani?
O le a se mea e mafai ona tatou faia, e faamautinoa ai o le a tatou lē faagaloina aafiaga faaleagaga na tatou mauaina? (O tali e mafai ona aofia ai le faasoa atu o aafiaga i isi pe a talafeagai ai, o le tusia i totonu o se api talaaga a le tagata lava ia, pe tusia foi i lalo o aafiaga mai le Tiute i le Atua, po o gaoioiga mai le Alualu i Luma o le Tagata lava Ia.)

Valaaulia se tamaitiiti aoga e faitau le faamatalaga lenei, lea na faamalamalama mai ai e Peresitene Henry B. Eyring, o le Au Peresitene Sili, le auala na fesoasoani ai le tusiaina i lalo o aafiaga faaleagaga ia te ia. Fai atu i le vasega e faalogologo mo faamanuiaga e mafai ona o’o mai, e ala i le tausiaina o sea ituaiga o talafaamaumau.

“Sa ou tusia ni nai laina i aso taitasi mo le tele o tausaga. Ou te lei misia lava se aso tusa lava po o le a lo’u le lava, po o le a foi le vave ou te usua’i ai i le taeao e sosoo ai. Ae ou te lei tusia se mea, ou te mafaufau lava i le fesili lenei: ‘Pe na ou vaaia le aao o le Atua o aapa mai e pa’i mai ia i maua po o le ma fanau po o le matou aiga i le aso?’ A o faaauau pea ona ou faia lenei mea, sa amata ona tupu se mea. Pe a ou mafaufau i mea na tutupu i le aso, ou te vaaia faamaoniga o mea sa faia e le Atua mo se tasi o i matou ae ou te lei iloaina i taimi pisi o le aso. A o tupu lena mea, ma e tele lava taimi e tupu ai, sa ou iloaina ai o le taumafai e manatua, na mafai ai e le Atua ona faasino mai ia te au le mea sa Ia faia.

“E sili atu i le na o le lotofaafetai na tupu ae i lo’u loto. Sa tupu ae le molimau. Sa amata ona ou mautinoa atili e faafofogaina e lo tatou Tama Faalelagi tatalo ma tali mai i ai. Sa tele atu lo’u lotofaafetai ona o le faamaluluina ma le faaleleia e oo mai ona o le Togiola a le Faaola o Iesu Keriso. Ma sa atili ai ona ou mautinoa e mafai e le Agaga Paia ona faamanatu maia mea uma ia i tatou—e oo lava i mea tatou te lei matauina pe gauai atu i ai pe a tutupu” (“E! Ia Manatua, Ia Manatua Lava,” Ensign po o le Liahona, Nov. 2007, 67).

Valaaulia tamaiti aoga e faasoa mai pe na faapefea ona fesoasoani le manatuaina o aafiaga faaleagaga—e ala i le tusiaina o se api talaaga po o isi auala—e tumau ai i le faatuatua, e ui i taumafaiga a Satani e faaosooso ma faasese i latou.

Otooto le 3 Nifae 2:4–19 e ala i le faamalamalama atu faapea, a o faaauau e tagata le faia o le amioleaga, sa faateleina le faitau aofai ma le malosi o le au faomea a Katianetona. Sa faasolo ina sili atu le faasaua tele o le au faomea a Katianetona, ma o tagata liliu mai a sa Lamanā ua aufaatasi ma sa Nifaē e tau faasaga ia i latou. E ui lava sa faamanuiaina i latou mo sina taimi, i le tuliesea o au faomea a Katianetona mai o latou laueleele, ae sa tumau sa Nifaē (faatasi ai ma tagata liliu mai o sa Lamanā, lea ua faaigoaina o sa Nifaē) i tulaga mafatia mo le 15 tausaga ina ua mavae faailoga o le soifua mai o Iesu Keriso.

3 Nifae 3:1–10

Ua poloaiina e le taitai o le au faomea a Katianetona le tuuina atu e sa Nifae o i latou lava ia i latou

Faamalamalama atu faapea, i le 3 Nifae 3:1–10, tatou te vaaia ai se faataitaiga o le auala e mafai ai e le tiapolo i nisi taimi ona galue e ala i isi, e taumafai ai e faavaivaia lo tatou faatuatua ma taitai ese ai i tatou. O Kitianae, le taitai o le au faomea a Katianetona, na tusi atu se tusi ia Lakoneu, le faamasino sili o sa Nifaē, ina ia faatauanauina o ia e tuu mai i latou lava i le au faomea a Katianetona.

Tusi le ua faaosoosoina e Kitianae ia Lakoneu i luga o le laupapa. Fai atu i le afa o le vasega e faitau lē leoa le 3 Nifae 3:2–5 ma le isi afa o le vasega e faitau lē leoa le 3 Nifae 3:6–10. A o faitau tamaiti aoga, fai atu ia i latou e vaavaai mo upu po o fuaitau o loo faaalia ai togafiti na faaaogaina e Kitianae, e taumafai e faavaivaia ai le faatuatua o Lakoneu ma taitai ese ai o ia. Pe a uma ona faitau tamaiti aoga, fai atu ia i latou e lipoti mai mea na latou mauaina. Fai i se tamaitiiti e tusi a latou tali i luga o le laupapa.

Ina ia otootoina togafiti na maua e tamaiti aoga i le 3 Nifae 3:2–10, tusi le upumoni lenei i luga o le laupapa i lalo o le lisi a tamaiti: E masani ona faaaogaina e Satani ma ana vaega upu faaviivii, folafolaga le sa’o, ma taufaamata’u e taitai ese ai tagata. Valaaulia tamaiti e piki se togafiti se tasi a Kitianae ua tusia i luga o le laupapa, ma faamalamalama mai le auala atonu e faaaoga ai e Satani ma ana vaega se togafiti faapea, i le autalavou o aso nei. Ina ia fesoasoani i tamaiti aoga e mauaina nisi o nei faatusatusaga, atonu e te manao e fai atu fesili e pei o fesili nei:

O a nisi o faataitaiga o auala atonu e faaaogaina ai e le tiapolo upu faaviivii (upu faaviivii lē moni pe soona fai) i le autalavou o aso nei? O a nisi o folafolaga le sa’o po o taufaamata’u e leai se uiga atonu e faaaogaina e le tiapolo? E te manatu e mafai faapefea e le autalavou ona teena nei togafiti?

3 Nifae 3:11–5:7

Ua sauni le nuu o Lakoneu e puipui i latou lava, ma ua latou faatoilaloina le au faomea a Katianetona

Valaaulia se tamaitiiti aoga e faitau leotele le 3 Nifae 3:11–12 . Fai atu i le vasega e mulimuli i le faitauga, ma vaavaai mo le auala na tali atu ai Lakoneu i le tusi taufaamata’u a Kitianae.

O a upumoni e mafai ona tatou aoaoina mai i le auala na tali atu ai Lakoneu i a Kitianae? (O se tasi o upumoni atonu e faailoa mai e tamaiti aoga o le faapea o alii ma tamaitai amiotonu e le manaomia ona matata’u i e amioleaga, ma e le tatau ona latou tuuina atu i latou i a latou faiga taufaamatau.)

Vaevae le vasega i vaega e fa. Tuu atu i vaega taitasi se fasi pepa tele. Fai atu i vaega e vaevae a latou fasi pepa i ni koluma se lua, o le tasi e faaigoaina o le Sauniuniga a Lakoneu ma le isi e faaigoaina o Faatusatusaga i Ona Po Nei. Tusi mau fuaitau nei i luga o le laupapa, ma tuu atu se mau se tasi i vaega taitasi: 3 Nifae 3:12–15; 3 Nifae 3:16–21; 3 Nifae 3:22–26; 3 Nifae 4:1–4. Valaaulia tamaiti e faitau a latou fuaiupu na faatonuina, ma vaavaai mo auala na saunia ai e Lakoneu lona nuu faaleagaga ma faaletino, ina ia mafai ona tatalia le osofa’i mai o le au faomea a Katianetona. I lalo ifo o le Sauniuniga a Lakoneu, fai atu i se tamaitiiti aoga mai vaega taitasi e tusi le mea na faia e le nuu ina ia saunia ai. (Manatua: A o suesueina e tamaiti aoga nei fuaiupu, ia mautinoa ua latou iloaina le eseesega i le va o Kitianae, le taitai o le au faomea a Katianetona, ma Kitikitonae, le perofeta sili ma le taitaiau sili i le nuu o sa Nifaē.)

A mae’a ona tuuina atu i tamaiti le taimi ia lava e faauma ai a latou lisi i lalo ifo o le Sauniuniga a Lakoneu, valaaulia i latou e lisi i lalo ifo o le Faatusatusaga i Ona Po Nei sauniuniga faaleagaga ma faaletino lea ua fautuaina i tatou e faia i aso e gata ai. Pe a uma ona tuuina atu le taimi ia lava mo tamaiti aoga e faauma ai lenei galuega, valaaulia se tamaitiiti se toatasi mai vaega taitasi e faasoa mai i le vasega mea na aoaoina e lana vaega. Ina ia fesoasoani i tamaiti aoga ia filifili le auala e mafai ai ona latou faaaogaina mea ua latou aoaoina, fai atu fesili e pei o fesili nei, i le taimi o la latou faatinoga po o le taimi pe a uma:

E mafai faapefea ona tatou faamalolosia o tatou aiga e faasaga i osofaiga a le tiapolo?
Aisea ua taua ai sauniuniga faaletino—e pei o le mauaina o se aoaoga ma le teuina o meaai i le fale—i aso mulimuli?
E faapefea e le faapotopotoina i aiga ma uarota po o paranesi, ona tuuina mai ai le puipuiga mo i tatou?
O anafea na fesoasoani ai le tatalo ia te oe e maua le malosi faaleagaga?
E mafai faapefea e le salamo ona saunia i tatou mo le lumanai?
O a faamanuiaga e o’o mai pe a tatou mulimuli i perofeta soifua ma aposetolo?
E mafai faapefea ona tatou valaauliaina le agaga o faaaliga i o tatou olaga?

Valaaulia ni nai tamaiti aoga e feauauai i le faitauina leotele mai o le 3 Nifae 4:7–12. Fai atu i le vasega e mulimuli i le faitauga, ma vaavaai mo auala na faamanuiaina ai tagata ona o la latou sauniuniga faaleagaga ma faaletino.

O a upumoni ua e aoaoina mai lenei tala? (A o faasoa mai e tamaiti aoga a latou tali, faamamafa atu le mataupu faavae lenei: A o tatou saunia i tatou lava faaleagaga ma faaletino, o le a faamalolosia e le Alii i tatou ina ia faatoilaloina luitau.)

Otooto le 3 Nifae 4:13–29 e ala i le faamalamalama atu faapea o Lakoneu ma lona nuu na faatoilaloina le au faomea a Katianetona ma fasiotia o latou taitai. Faitau leotele le 3 Nifae 4:30–33 Valaaulia tamaiti aoga e mulimuli i le faitauga, ma vaavaai mo le auala na tali atu ai tagata i lenei manumalo.

Na faapefea ona tali atu le nuu ina ua mae’a ona faasaoina mai i latou e le Alii mai o latou fili?
O a mea na faaalia e le nuu faapea o mafuaaga o lo latou faasaolotoina mai mai le au faomea a Katianetona? (O lo latou salamo ma le lotomaualalo ma le agalelei o le Atua. Atonu e te manao e faamanino atu faapea a tatou salamo ma faamaualalo i tatou lava, o le a lagolagoina ma faasaoina i tatou e le Atua mai o tatou tofotofoga.)

Atonu e te manao e faasoa atu se aafiaga na e faalagolago ai i le Atua, ma na Ia fesoasoani ai ia te oe e onosaia pe faatoilaloina se tofotofoga. Atonu foi e te manao e valaaulia se tamaitiiti aoga se toatasi pe toalua e faasoa mai sea ituaiga o aafiaga.

Valaaulia se tamaitiiti aoga e faitau leotele le 3 Nifae 5:1–4. Fai atu i le vasega e mulimuli i le faitauga, ma vaavaai mo mea na faia e sa Nifaē, o se taunuuga o le fesoasoani ma faamanuiaga na latou maua i la latou taua faasaga i au faomea a Katianetona. A o faasoa mai e tamaiti aoga mea na latou mauaina, faamamafa atu o le tasi o auala na tali atu ai le nuu o le talai atu lea o le talalelei i isi.

3 Nifae 5:8–26

Ua toefaatuina le filemu i le nuu; ua faamalamalama mai e Mamona lana otootoga o talafaamaumau

Ta’u atu i tamaiti aoga faapea o le vaega o totoe o le 3 Nifae 5 e aofia ai le faamalamalamaga a Mamona o le mafuaaga na ia otootoina ai lenei talafaamaumau. Valaaulia tamaiti aoga e faitau lē leoa le 3 Nifae 5:12–15 ma vaavaai mo le mea na saunoa mai ai Mamona, e uiga i lona tiutetauave e tusia se otootoga o talafaamaumau a sa Nifaē.

O a upumoni ua e aoaoina mai nei fuaiupu lea ua faamatalaina ai o tatou tiutetauave i le avea ai ma soo o Iesu Keriso? (E ui atonu e faaaogaina e tamaiti aoga ni upu e ese ai, e tatau lava ona latou iloa lenei upumoni: I le avea ai ma soo o Iesu Keriso, ua ia i tatou se tiutetauave e aoao atu i isi le auala i le ola e faavavau. Atonu e te manao e tusi lenei upumoni i luga o le laupapa.)

Faamanino atu faapea, o se tasi o auala sili ona taua e mafai ona tatou faaali atu ai lo tatou agaga faafetai i le Alii mo faamanuiaga ua Ia tuuina mai ia i tatou, o le fesoasoani lea i isi e o mai ia te Ia ma maua na faamanuiaga e tasi. Fai atu i tamaiti aoga e fautuaina mai ni nai auala i le avea ai ma soo o Iesu Keriso, e mafai ona latou aoao atu ai i isi le ala i le ola e faavavau. Uunai tamaiti aoga e filifili se fautuaga se tasi pe lua mai nei fautuaga mo le faasoaina atu o le talalelei, ma ia saili ma le agaga tatalo le fesoasoani a le Alii i le faataunuuina o le mea ua latou filifili e fai.

Tala ma Faamatalaga o Talaaga

3 Nifae 2:15. “Sa aveesea lo latou fetuu mai ia te i latou”

Mo se fesoasoani ina ia malamalama ai i le fetuu na tuuina atu i luga o sa Lamanā, tagai i le faamatalaga mai ia Peresitene Iosefa Filitia Samita i le lesona 27, i lalo o le manatu faafaiaoga mo le 2 Nifae 5:19–25. Tagai foi i le tala ma faamatalaga o talaaga mo le Alema 3:6–17 i le faaiuga o le lesona e 70.

3 Nifae 2:5–8. Kalena a sa Nifaē

I lo latou talafaasolopito atoa, na faaaoga ai e sa Nifaē taiala o vaitaimi eseese e tolu mo le fuaina o a latou kalena: (1) o le taimi na tuua ai e Liae Ierusalema; (2) o le taimi na suia ai le faigamalo mai tupu i faamasino; ma le (3) taimi na tuuina mai ai le faailoga o le soifua mai o Iesu Keriso. E le o iloa tonu le taimi na amata ai e sa Nifaē ona aloaia la latou kalena mai le taimi o le soifua mai o Iesu Keriso, peitai ua faailoaina mai e Mamona lenei suiga i le 3 Nifae 2:7–8.

Tulaga e Faasino I Ai	Taimi Talifetaui Na Faaaogaina Ai	O Poloka Tusitusiga Paia
Mai le taimi na tuua ai e Liae ia Ierusalema	600–92 T.L.M.	1 Nifae 1–Mosaea 29
Mai le taimi na suia ai le faigamalo mai tupu i faamasino	92 T.L.M.–T.A. 1	Mosaea 29–3 Nifae 1
Mai le taimi na tuuina mai ai le faailoga o le soifua mai o Iesu Keriso	T.A. 1–421	3 Nifae 1–Moronae 10