Lesona 118: 3 Nifae 6–7

Lesona 118

3 Nifae 6–7

Faatomuaga

Ina ua mavae lo latou laveaiina ofoofogia mai le au faomea a Katianetona, na fiafia sa Nifaē i le filemu mo le tusa o le tolu tausaga. Peitai o le faamaualuga, faavasegaina o tagata, ma sauaga na faapea ona tulai mai i le nuu. E ui sa i ai nisi na tumau le faatuatua i le Alii, sa toatele na ulufale atu i le faia o faapotopotoga faalilolilo. Talu ai faapotopotoga faalilolilo, na fasiotia le faamasino sili ma faapea ona suia le faigamalo a sa Nifae. Ua vaevaeina le nuu i ituaiga, ma ua tofia o latou lava taitai. Ua auauna atu Nifae i tagata faatasi ma le mana ma le pule tele.

Fautuaga mo le Aoaoga

3 Nifae 6:1–18

I le mavae ai o se vaitaimi o le faamanuiaina, na amata ona faamaualuluga sa Nifaē ma ua malepe le Ekalesia

Tusi fesili nei i luga o le laupapa ae le’i amataina le vasega. Fai atu i tamaiti e tali fesili ma faamalamalama mai a latou tali.

Faamata e mafai e se tasi ona …

Mauoa ma lotomaualalo?

Mativa ma faamaualuga?

Aoaoina ma lotomaualalo?

Lē aoaoina ma faamaualuga?

Fautuaina tamaiti e faaauau ona manatunatu e uiga i nei fesili, a o latou suesueina le 3 Nifae 6. Otooto le 3 Nifae 6:1–9 e ala i le famalamalamaina faapea, ina ua uma ona faatoilaloina le au faomea a Katianetona, na latou faatuina le filemu i le laueleele ma ua amata ona manuia. Ae ina ua mavae sina taimi puupuu, na faamata’uina lo latou filemu ma le manuia.

Valaaulia se tamaitiiti e faitau leotele le 3 Nifae 6:5, 10–12 ma fai atu i le vasega e vaavaai mo mea na amata ona faamata’uina ai le filemu ma le manuia o le nuu.

O le a le mea na amata ona tupu lea na faamata’uina ai le filemu ma le manuia o le nuu?
Pe ua e vaaia ea le faateleina o le oa po o le aoaoina ua taitai atu ai i faafitauli faapea i lau a’oga, nuu, po o le atunuu? Afai o tupu, e faapefea?

Tusi se laina sa’o i luga ma lalo i le totonugalemu o le laupapa ina ia maua ai ni koluma se lua. Tusi le Faamaualuga i le pito i luga o le tasi koluma ma le Lotomaualalo i le pito i luga o le isi koluma. Valaaulia tamaiti e suesue le 3 Nifae 6:13–14, ma vaavaai mo upu ma fuaitau ia e faamatala ai le auala na tali atu ai le nuu, a o amata ona fevaevaeai i latou e le oa ma le aoaoina. (Atonu e manaomia lou faamalamalamaina faapea o le faatiga po o le tali atu i le faatiga o lona uiga o le faitioina ma le ita po o le tautala ma le saua i se tasi.) Pe a uma ona faitau tamaiti aoga, valaaulia i latou e tusi i le koluma talafeagai i luga o le laupapa upu po o fuaitau na latou mauaina.

O le a le faamaoniga ua e vaaia i le 3 Nifae 6:13 faapea o nisi o i latou sa sauaina e le au faamaualuluga, sa faapea foi ona latou tali atu i le faamaualuga?
Aisea e te manatu ai o le tali atu o le “faatiga i le faatiga” (po o faitioga mo faitioga) o se faaaliga o le faamaualuga?
O le a se mea ua faafiafiaina ai oe e uiga i le auala na tali atu ai tagata sa Lamana na liua i lea taimi?
O a mataupu faavae e mafai ona tatou aoaoina mai le 3 Nifae 6:13–14? (Atonu e eseese lava tali a tamaiti, ae e tatau ona latou faailoa mai le mataupu faavae lenei: E mafai ona tatou filifili e lotomaualalo ma faatuatua e tusa lava po o a o tatou tulaga e i ai.)

Faasino tamaiti aoga i le koluma o loo i luga o le laupapa lea o loo lisi ai tali lotomaualalo. Fai atu fesili nei:

O a gaoioiga e mafai ona tatou faia, e fesoasoani ai ia i tatou lava e tumau i le lotomaualalo ma le faatuatua i soo se tulaga tatou te i ai? (Lisi tali a tamaiti i luga o le laupapa i le koluma ua faaigoaina Lotomaualalo.)
Mafaufau i se tagata, e te manatu o se faataitaiga lelei o le filifili e lotomaualalo ma faatuatua, e tusa lava po o a ona tulaga o i ai. E faapefea ona avea lenei tagata ma faataitaiga o le lotomaualalo?

Faamalamalama atu faapea talu ai o le toatele o sa Nifaē sa le’i salamo mai lo latou faamaualuluga, na atili leaga ai lo latou tulaga na i ai. Valaaulia ni nai tamaiti aoga e feauauai i le faitauina leotele mai o le 3 Nifae 6:15–18. Fai atu i le vasega e mulimuli i le faitauga, ma vaavaai mo le auala na faatagaina ai e le faamaualuluga o le nuu ia Satani e uunaia i latou.

O le a le mea ua a’oa’o mai e nei fuaiupu e uiga i le sootaga o le faamaualuga ma le mana o Satani e faaosoosoina i tatou? (A o tali mai tamaiti aoga, fesoasoani ia i latou e faailoa mai le upumoni lenei: Pe a tatou faamaualuga, ua tatou faatagaina le mana sili atu ia Satani e faaosooso ma taitai i tatou e faia isi agasala. Atonu e te mana’o e uunaia i latou e tusi lenei mataupu faavae i totonu o a latou api po o api talaaga mo le suesueina o tusitusiga paia.
E tusa ai ma le 3 Nifae 6:15–18, o a upu ma fuaitau o loo faamatalaina ai le liuaina amioletonu o loto, na oo i nei tagata ona o le faamaualuluga? (Na latou “tuuina atu … ina ia feaveai solo … i soo se mea e loto [Satani] e ave i ai i latou, ma fai soo se amioletonu sa mana’o i ai o ia ia latou faia.” Sa latou i ai i “se tulaga o le amioleaga matautia tele” ma na “latou fouvale ai e faasaga i le Atua ma le loto i ai.”)
Aisea e te manatu ai o le faamaualuga e aafia ai le maualuga o le tulaga e mafai ai e Satani ona uunaia i tatou?

Ata

Peresitene Henry B. Eyring

I le faaopoopo atu i tali e tuuina mai e tamaiti aoga, mafaufau e valaaulia se tamaitiiti aoga e faitau le saunoaga lenei a Peresitene Henry B. Eyring o le Au Peresitene Sili. Fai atu i tamaiti e faalogologo mo le mea na lapatai mai Peresitene Eyring, o se tasi o tulaga matautia o le faamaualuga.

“O le faamaualuga e faatupu ai se leo i totonu o i tatou lea e faigata ai ona lagona le leo filemu o le Agaga. Ma e le pine, i lo tatou faasausili le aoga, tatou te le toe faalogo atu ai. E mafai ona vave ona tatou manatu ifo faapea tatou te le manaomiaina” (“Tatalo,” Liahona, Nov. 2001, 16).

Aisea e matautia ai le lē toe faalogo atu mo le leo o le Agaga? (Fesoasoani i tamaiti ia malamalama faapea, pe a tatou lē amanaiaina musumusuga a le Agaga Paia, o le a sili atu ona tatou gauai gofie i faaosoosoga a le tiapolo.)

Toe faasino tamaiti aoga i le lisi o tali lotomaualalo o loo i luga o le laupapa. Valaaulia i latou e filifili se tali lotomaualalo se tasi latou te manatu o le a sili ona fesoasoani patino ia i latou taitoatasi. Tuu atu ia i latou ni nai minute, e tusitusi ai e uiga i le vave e mafai ai ona amata lo latou faaaogaina o lena fautuaga i le aoga, po o le aiga.

3 Nifae 6:19–7:14

O faapotopotoga faalilolilo ua lepetia ai le faigamalo a sa Nifaē, ma ua vaevaeina tagata i ituaiga

Kopi le faasologa o taimi lenei i luga o le laupapa:

Ata

faasologa o taimi

Vaevae le vasega i ni vaega se fa, ma tuu atu i vaega taitasi se mau se tasi o loo i luga o le laupapa. Fai atu i tamaiti aoga e faitau lē leoa la latou fuaitau faatonuina, ma vaavaai mo mea taua na tutupu i totonu o sa Nifaē. Pe a uma ona tuuina atu se taimi ia lava mo tamaiti aoga e faitau ai, valaaulia se tamaitiiti mai vaega taitasi e tusia mea taua na tutupu mai lana fuaitau faatonuina, i lalo o le vaega fetaui o le faasologa o taimi (atonu e mafai e isi tamaiti o le vaega ona fesoasoani). Pe a uma, faamalamalama atu faapea o le lisi o mea na tutupu o loo faaalia ai le auala na taitai atu ai e faapotopotoga faalilolilo i le pa’ū o le faigamalo a sa Nifaē, ma le vaevaeina o tagata i ituaiga.

Valaaulia ni nai tamaiti aoga e feauauai i le faitauina leotele mai o le 3 Nifae 6:27–30. Fai atu i le vasega e mulimuli i le faitauga ma faailoa mai le tagata na faavaeina faapotopotoga faalilolilo ma lona faamoemoega. Pe a uma ona faailoa mai e tamaiti le tagata na faavaea faapotopotoga faalilolilo (o le tiapolo), fesili atu:

O fea upu ma fuaitau o loo faamatalaina ai faamoemoega o faapotopotoga faalilolilo? (O tali atonu e aofia ai le “auaufaatasi e faasaga i le amiotonu uma,” “faaumatia” tagata o le Alii, “faatautee i le tulafono ma aia a lo latou atunuu,” ma le “ina ia le toe saoloto le laueleele.”)
Na faapefea ona alofia e i latou o ē na fasiotia perofeta ia faasalaga? (O a latou uo ma aiga, o e na avea foi ma sui o faapotopotoga faalilolilo, na lotogatasi e fesoasoani ia i latou ia tausia faalilolilo a latou gaoioiga, ma aloese ai mai taunuuga o a latou gaoioiga.)
Mafaufau faapea e i ai ni au uo, o ē manana’o e aloese mai taunuuga o a latou gaoioiga. E mafai faapefea ona e fesoasoani ia i latou ia ola i le talalelei ma ona alafua nai lo le faia o lena tulaga?

Valaaulia ni nai tamaiti aoga e feauauai i le faitauina leotele mai o le 3 Nifae 7:1–8. Fai atu i le vasega e mulimuli i le faitauga, ma vaavaai mo le aafiaga o nei faapotopotoga faalilolilo i tagata sa Nifaē. Faamalamalama atu faapea e faaosooso e le tiapolo tagata ina ia faia faapotopotoga faalilolilo i se taumafaiga e faatoilalo ai le amiotonu ma faateleina le amioleaga. Fesoasoani i tamaiti aoga ia malamalama o metotia ma faamoemoega o faapotopotoga faalilolilo, e masani lava ona tau lē iloa, ma e faigata ona mateia i taimi uma. Ia uunaia i latou e aloese mai le mafuta ma soo se vaega, po o tagata taitoatasi, e faia faiga faalilolilo i soo se ituaiga auala.

3 Nifae 7:15–26

I se taimi ua toaitiiti ai le au faatuatua, ua faaauau ai pea e Nifae ona auauna atu, ma o nisi sa liua

Faamata o le a sou manatu i se lagona atonu e te mauaina, pe ana faapea e te ola faatasi ma le au sa Nifaē, i le taimi na faatoilaloina ai lo latou malo? Aisea?
O fea e te manatu atonu o le a e liliu atu i ai mo le taitaiga ma faatonuga?

Valaaulia ni nai tamaiti aoga e feauauai i le faitauina leotele mai o le 3 Nifae 7:15–20. Fai atu i le vasega e mulimuli i le faitauga, ma vaavaai mo mafuaaga atonu o le a latou mananao ai e mulimuli ia Nifae i nei ituaiga tulaga. Mafaufau e tuu atu i tamaiti e fai ma malolo pe a uma ona faitau se fuaiupu se tasi pe lua, ina ia mafai ona e fai atu i tamaiti e faamalamalama mai le mafuaaga atonu o le a musuia ai i latou e mulimuli ia Nifae.

O le a le savali na tuuina atu e Nifae i le nuu i lea taimi? (Tagai 3 Nifae 7:16.)
O faapefea ona tutusa taitai o le Ekalesia i aso nei ma Nifae?
O le a se taimi na e vaaia ai se taitai o le Ekalesia o “auauna atu i le mana ma le pule tele”? 3 Nifae 7:17).

Fai atu i tamaiti e faitau lē leoa le 3 Nifae 7:21–26 ma faailoa mai pe na faapefea ona faamanuiaina i latou o e na liua ona o le mulimuli ia Nifae ma salamo mai a latou agasala. Valaaulia ni nai tamaiti e faamalamalama mai mea na latou mauaina.

O a mataupu faavae e mafai ona tatou aoaoina mai le faataitaiga a i latou o ē na salamo ma mulimuli ia Nifae?

E mafai ona faasoa mai e tamaiti ni upumoni eseese, ae e tatau ona latou faailoa mai le mataupu faavae lenei: Afai tatou te salamo ma mulimuli i auauna a le Alii, o le a tatou maua le uunaiga a le Agaga Paia.

Aisea e taua ai le salamo, ina ia mafai ai ona tatou ona maua le Agaga Paia e faatasi ma i tatou?
Aisea e te manatu ai o le mulimuli i auauna a le Alii e fesoasoani ia i tatou ina ia sili atu ona taliaina le taitaiga mai le Agaga Paia?

Faitau le saunoaga lenei a Peresitene James E. Faust o le Au Peresitene Sili:

Ata

Peresitene James E. Faust

“Na ou faaiuina ai faapea o le taitaiga faaleagaga e matuai faalagolago tele i le lotogatasi ma le Peresitene o le Ekalesia, ma le Korama a le Toasefululua—o e uma ua lagolagoina … o ni perofeta, tagatavaai, ma talifaaaliga. Ou te le iloa pe mafai faapefea ona tatou faamoemoe ina ia lotogatasi ma le Agaga o le Alii pe afai tatou te le o lotogatasi ma le Peresitene o le Ekalesia ma isi perofeta, tagatavaai, ma talifaaaliga” (“Valaauina ma Filifilia,” Ensign poo le Liahona, Nov. 2005, 53).

O anafea na e lagonaina ai le uunaiga a le Agaga Paia, ona ua e filifili e usitai i auauna a le Alii?

Fautuaina tamaiti e tusi i lalo uunaiga na latou mauaina e uiga i mea e mafai ona latou faia, e faaaoga ai upumoni ua latou aoaoina i le asō. Faamamafa atu faapea e tusa lava pe filifili isi e ola faatuiese i poloaiga a le Alii, e pei ona sa i ai i tagata sa Nifaē, e mafai ona tatou filifili e mulimuli ma le faamaualalo i le Atua ma Ana auauna filifilia.

Tala ma Faamatalaga o Talaaga

3 Nifae 6:10–18. O aafiaga o le faamaualuga

I le 3 Nifae 6:10–18, tatou te faitau ai e uiga i le auala na mafai ai e le faamaualuga ona faatupu ia fevaevaeaiga i tagata. Na aoao mai Peresitene Ezra Taft Benson faapea, o le taumafai e faatusatusa i tatou i isi tagata, e mafai ona faailoa mai ai le faamaualuga. Na ia lapatai mai foi e uiga i auala e faaaafia ai e le faamaualuga a tatou sootaga ma le Atua ma isi:

“O le tagata faamaualuga, e fai tagata uma ma ona fili e ala i le sueina o ō latou atamai, manatu, galuega, oa, taleni, po o soo se isi fua faalelalolagi e faasaga i isi. I upu a C. S. Lewis: ‘O le faamaualuga na te le maua se fiafia mai le mauaina o se mea, na o le mauaina o mea e tele atu nai lo le isi tagata. … O le tulaga faatusatusa lea e fai ai oe ma tagata faamaualuga: o le fiafia i le iloa ai ua sili atu oe nai lo isi. O le taimi lava e aluese ai le agaga o le faatautava, ua aluese foi le faamaualuga.’(Mere Christianity, Niu Ioka: Macmillan, 1952, itu. 109–10.) …

“E faa-aafia ma le le iloa e le faamaualuga a tatou sootaga—o la tatou sootaga ma le Atua ma Ana auauna, i le va o le tane ma le avā, matua ma le tamaititi, tagata e ana galuega ma le tagata faigaluega, faiaoga ma le tamaitiiti aoga, ma tagata uma. O le tele o lo tatou faamaualuga, e fua i le auala tatou te taulimaina ai le Atua ma o tatou uso ma tuafafine” (“Faaeteete i le Faamaualuga,” Liahona, Iulai 1989, 4, 6).