Lesona 148
Eteru 7–11
Faatomuaga
Sa faanoanoa le uso o Iareto i le mananao a ona tagata e taitaia i latou e se tupu. Na ia faapea mai, “E tau moni lava lenei mea i le faatagataotauaina” (Eteru 6:23). Na faataunuuina lana valoaga i augatupulaga e lua mulimuli ane. I le aluga o nofoaiga a tupu e tele, na i ai sa Iareto i nai faatamilosaga o le gauai atu i perofeta ma ola amiotonu ona teena lea o perofeta ma ola ai i le amioleaga.
Fautuaga mo le Aoaoga
Eteru 7
Ua nofotupu Oraea ma Kipi i le amiotonu; ua faatuiese Kori’oa ma mauaina le malo, ma na toefuatai mai e lona uso o Sule; ma na teenaina e perofeta le amioleaga o tagata
Tusi se ata faigofie o se potu o le falepuipui i luga o le laupapa.
Fai i tamaiti aoga e faamatala pe faapei faalogona o tagata ao faatagataotauaina i latou. Faamanino atu o amioga leaga e mafai ona taitai atu ai tagata i le faatagataotauaina faaleagaga ma le faaletino.
-
O a auala e taitaiina ai i le faatagataotauaina ia amioga leaga?
E mafai ona taua e tamaiti aoga manatu e pei o nei: Filifili e soli le Upu o le Poto po o le matamata i ponokarafi e mafai ona taitai atu i le faatagataotauaina o le fai ma vaisu. O tulaga uma o agasala e faaitiitia ai le mana o le Agaga Paia i o tatou olaga. Faamalamalama atu o le a fesoasoani lenei lesona i tamaiti aoga e vaai mo auala e mafai ai ona latou aloese mai le faatagataotauaina.
Faamalamalama atu ina ua iloa e le uso o Iareto ua mananao tagata i se tupu, sa ia lapataiina i latou o lo latou filifiliga o le a taitai atu ai i latou i le faatagataotauaina (tagai Eteru 6:22–23). E ui lava i lenei mea, na filifili le nuu o sa Iareto ia i ai se tupu. O lo latou tupu muamua o Oraea, o se tasi o atalii o Iareto. O lo latou tupu lona lua o le atalii o Oraea o Kipi.
Valaaulia tamaiti aoga e faitau leleoa le Eteru 7:1–2 ia aoao ai pe na faataunuuina le valoaga a le uso o Iareto i aso o Oraea. Fai atu ia i latou e lipoti mai mea ua latou aoaoina.
-
O le a lau tala e fai atu i se tasi na soifua i vaitaimi o le Tupu o Oraea ma na le talitonu o le a faataunuuina le valoaga a le uso o Iareto?
Valaaulia tamaiti aoga e faitau leleoa Eteru 7:3–7, ma vaavaai mo le ala na amata ai ona faataunuuina le valoaga a le uso o Iareto. Fai atu ia i latou e lipoti mai mea ua latou mauaina. Ia mautinoa ua latou malamalama na faatagataotauaina le Tupu o Kipi ma lona nuu—“Na nofo Kipi faatagataotaua, ma lona nuu” (Eteru 7:7).
-
O a mataupu faavae ua e vaaia i le Eteru 7? (Ao faasoa e tamaiti aoga mea ua latou aoaoina, ia mautinoa o loo manino le mataupu faavae lenei: O le tetee atu i afioga a perofeta e mafai ona taitai atu i le faatagataotauaina.)
Valaaulia tamaiti aoga e faitau le Eteru 7:8–13 ia aoao ai e uiga ia Sule, o le na fanauina e Kipi ao faatagataotauaina Kipi. Ao le i faitauina e i latou, fai atu ia i latou e vaai faalemafaufau o i latou o ni tagata faasalalau ua atofaina e faamatalaina le tala i le Eteru 7:8–13. Ona fai atu lea i tamaiti aoga taitasi e lipoti atu i se tasi o sui o le vasega mea o le a ia taulai i ai mai le tala.
Otooto le Eteru 7:14–22 e ala i le faamalamalamaina atu ina ua maea ona avea Sule ma tupu ma salamo Kori’oa i mea na ia faia, na taitaia e le atalii o Kori’oa o Noa le faatuiese e faasaga ia Sule ma Kori’oa. Na faatagataotauaina ia Sule. Na mafai ona fasiotia e atalii o Sule ia Noa ma faasaoina Sule, ma na toe foi Sule i lona lava malo o se tupu. Peitai, na pulea lava e le atalii o Noa o Ko’oro le malo na puleaina e Noa. Sa vaeluaina le atunuu i le va o tupu e lua ma nuu e lua seia fasiotia e Sule ia Ko’oro i se taua. Na tuuina atu e le atalii o Ko’oro o Nimarota vaega o le malo ia Sule.
Faamalamalama atu ina ua maea ona toe maua mai e Sule le malo, na o mai perofeta i le nuu. Fai i tamaiti aoga e faitau leleoa le Eteru 7:23–25, ma faaailoa mea na fetalai ai perofeta ma pe na faapefea ona gaoioiga a tagata. Pe a maea ona lipoti e tamaiti aoga mea ua latou mauaina, fesili atu:
-
Na faapefea ona tali atu tagata i perofeta? Na faapefea ona tali atu Sule?
-
E faapefea ona avea le puipuiga e Sule o perofeta na faamanuia ai lona nuu?
Valaaulia se tamaitiiti aoga e faitau leotele le Eteru 7:26–27. Fai i le vasega e mulimuli i le faitauga, ma vaavaai mo mea na tutupu ina ua usiusitai tagata i afioga a perofeta. A o lipoti mai e tamaiti aoga mea sa latou mauaina, ia mautinoa ua latou faailoaina mataupu faavae nei: Ao tatou mulimuli i fautuaga a perofeta ma manatua le Alii, e amata ona tatou uluola.
-
Na faapefea ona faamanuiaina oe ona o lou usiusitai i fautuaga a perofeta?
Fautuaina tamaiti aoga e mafaufau i se auala se tasi e mafai ona lelei ai lo latou faalogo ma usiusitai i upu a perofeta.
Eteru 8:1–9:13
Sa avea Iareto ma Akiso ma tupu o sa Iareto e ala i faapotopotoga faalilolilo
Otooto le Eteru 8:1–14 e ala i le faamalamalama atu ina ua maliu Sule, sa avea Omera ma tupu. Na faatuiese Iareto le atalii o Omera i lona tama ma manao lona loto ia avea ma tupu. Na mafai ona ia maua le afa o le malo mo se taimi, ae na faatoilaloina mulimuli ane ma faamalosia e tuu atu le afa o lona malo. Ona fuafuaina lea e le afafine o Iareto se auala ia avea ai Iareto ma tupu. Sa ia faamanatu atu i lona tama faapotopotoga faalilolilo na lauiloa i aso anamua. Ona ia fai atu lea o le a ia siva i luma o se alii e igoa ia Akiso, o le na ia iloaina o le a manao ia te ia i se faaipoipoga. Ina ua talosagaina o ia e Akiso la te faaipoipo, na tatau ia Iareto ona tau atu ia Akiso e ao ona ia fasiotia Omera le tupu. Na lagolagoina e Iareto ma lona afafine lenei faamoemoe. Na fia faaipoipo atu Akiso i le afafine o Iareto ma ulufale atu ai i se faapotopoto faalilolilo ma ana uo ia fasiotia Omera le tupu.
Faamanino atu ona o lenei fuafuaga, na amata ai faapotopotoga faalilolilo i sa Iareto ma iu ai na faaumatia ai i latou. Faamalamalama atu o se faapotopotoga faalilolilo o se “faapotopotoga o tagata ua tuufaatasia i se feagaiga e faataunuuina faiga faatiapolo o le faapotopotoga” (Guide to the Scriptures, “Secret Combinations,” scriptures.lds.org). O le aufaomea a Katianetona o se faataitaiga lea o ni faapotopotoga i le Tusi a Mamona na faaaogaina faapotopotoga faalilolilo e ausia ai ona faamoemoega faatiapolo.
Valaaulia tamaiti aoga e faitau leleoa le Eteru 8:15–19, ma vaavaai mo mea na faia e Akiso e atiina ae ai faapotopotoga faalilolilo. Fai atu i tamaiti aoga e vaavaai mo mea ua aoao mai e nei fuaiupu e uiga i faapotopotoga faalilolilo.
-
O a faamoemoega o i latou o e lagolagoina faapotopotoga faalilolilo? (Ia maua le pule ina ia mafai ai ona latou faatinoina galuega amioleaga.)
-
O ai e ona le mana o loo i tua atu o faapotopotoga faalilolilo? (O le tiapolo.)
-
O le fea fasifuaitau i le Eteru 8:18 ua faaalia ai faalogona o le Alii e uiga i faapotopotoga faailolilo? (“Ua sili ona inosia ma amioleaga i mea uma.”)
Valaaulia se tamaitiiti aoga e faitau leotele le Eteru 8:20–22, 25. Fai atu i le vasega e mulimuli i le faitauga, ma vaavaai mo mea faaopoopo e mafai ona latou aoaoina e uiga i faapotopotoga faalilolilo. Fai atu i ai latou e matauina faapitoa le aafiaga ua faia e faapotopotoga faalilolilo i sosaiete. (Matau le fuaitau “atiina ae i luga” i le amataga o le Eteru 8:25 ua faatatau i le atiina ae o faapotopotoga faalilolilo.)
-
Mai mea na e faitauina, o a aafiaga o faapotopotoga faalilolilo ua i ai i sosaiete? (Ao faasoaina mai e tamaiti aoga o latou manatu, ia mautinoa ua latou faailoaina mea moni nei: O le lagolagoina o faapotopotoga faalilolilo e taitaiina atu i le faaumatiaina o sosaiete.)
Valaaulia le vasega e faitau leleoa le Eteru 8:23–24, 26, ma vaavaai mo mea na manao Moronae ia tatou faia o se taunuuga o ana lapataiga e uiga i faapotopotoga faalilolilo.
-
O a mea na tau mai e Moronae ia tatou faia? (Ia faaeteete i faapotopotoga faalilolilo ma saili ia mautinoa ua lafoai ese mai i o tatou sosaiete.)
-
E pei ona faamaumauina i le Eteru 8:26, o a faamoemoega a Moronae mo i tatou i aso amuli?
Otooto le Eteru 9:1–13 e ala i le faamalamalama atu ona o se tauuuga o lo latou faapotopotoga faalilolilo, na mafai ai e Akiso ma ana uo ona pulea le malo a Omera. Peitai, na lapatai atu le Atua ia Omera ia sosola ese ma lona aiga, o lea na faasaoina ai o latou ola. O le atalii amioleaga a Omera o Iareto na avea ma tupu ma tuuina atu lona afafine i a Akiso e ala i le faaipoipoga. Na faaauau pea le fuafuaina e Akiso ma ana uo o faiga faatiapolo, i le fasiotia o Iareto e oo lava i le atalii o Akiso. O nei amioga na taitai atu ai i se taua i le va o Akiso ma ona atalii lea na iu ai na toeitiiti faatamaia ai le tele o sa Iareto ma toefuatai ai Omera i le nofoalii. Faamamafa atu o nei mea na tutupu ua faalia ai le taitai atu e faapotopotoga faalilolilo i le faatamaiaina o sosaiete.
Eteru 9:14–11:23
Ua manumalo le tasi tupu i le isi, o nisi e pulea i le amiotonu ma isi i le amioleaga
Faamalamalama atu o mataupu e 9–11 o Eteru ua faamaumauina faapea e 24 isi tupu na pulea sa Iareto ina ua maea Iareto—o nisi i le amiotonu ma nisi i le amioleaga. Faamanatu i tamaiti aoga le mataupu faavae o loo i lalo, lea na talanoaina muamua: O le tetee i upu a perofeta e mafai ona taitaiina ai i le faatagataotauaina. Fai atu i le afa o le vasega e suesue le Eteru 9:26–35 (ao nofo tupu ia Hetu), ma fai atu i le isi afa e suesue le Eteru 11:1–8 (ao nofo tupu ia Komi ma Sepeloma). Fai atu i vaega uma e lua e vaai mo faamautinoaga o lenei mataupu faavae. Valaaulia tamaiti aoga e lipoti puupuu mai mea ua latou maua.
Faasoa lau molimau e uiga i le taua o le mulimuli i fautuaga a perofeta. Atonu e te manao e faasoa se aafiaga mai lou olaga na aoaoina ai oe i le taua o le mulimuli i fautuaga a perofeta.
Tala ma Faamatalaga o Talaaga
Eteru 7:23–27; 9:28–31. O Perofeta ma a latou savali e masani lava ona teena
Aisea e talai ai e perofeta savali e le taualoa i le toatele o tagata i le lalolagi? Na faamalamalamaina e Elder Robert D. Hales o le Korama a Aposetolo e Toasefululua:
“E ao i perofeta ona lapatai mea o le a oo mai pe a solia poloaiga a le Atua. Latou te le talaiina atu mea e fiafia i ai le lalolagi. Aisea e folafola mai ai e perofeta poloaiga e le fiafia i ai tagata na valaau atu i nuu e salamo i lo latou teena, fesuiaia, e oo lava i le faagalogalo o poloaiga? E faigofie lava le mafuaaga. E ala i le mauaina o faaaliga, e leai se filifiliga a perofeta ae ao ona folafola atu ma faamautu mea ua tuuina atu e le Atua ia i latou e ta’u atu i le lalolagi” (“Afai E Te Fia Oo I Le Ola, Ia E Tausi I Poloaiga,” Liahona, Iulai 1996, 44).
Na aoaoina e Elder L. Aldin Porter o le Au Peresitene o Fitugafulu:
“Ua faitio nisi ma faapea a saunoa mai perofeta ma le manino ma le maua’i, ua latou aveeseina lo tatou saolotoga. O loo tatou saoloto lava e filifili. Peitai, e tatau ona tatou taliaina taunuuga o na faaiuga. E le aveeseina e perofeta lo tatou saolotoga. Ua na ona latou lapataia i tatou i taunuuga o a tatou filifiliga. E maeu le faavalevalea o le ta’useseina o perofeta i a latou lapataiga” (“O Lo Tatou Taunuuga,” Liahona,Ian. 2000, 79).