Alema 11–16 (Iunite 16)

Sauniuniga o Anomea mo le Faiaoga o Suesuega e Faia i le Aiga

Aotelega o Lesona o Suesuega e Faia i le Aiga i Aso Taitasi

E le o faamoemoeina e aoao atu le aotelega lenei o aoaoga faavae ma mataupu faavae na aoaoina e tamaiti aoga a o latou suesue i le Alema 11–16 (iunite 16) e avea o se vaega o lau lesona. O le lesona e te aoao atua o le a taulai atu lava i nisi o nei aoaoga faavae ma mataupu faavae. Mulimuli i musumusuga a le Agaga Paia a o e mafaufau i manaoga o tamaiti aoga.

Aso 1 (Alema 11)

E ala atu i le faataitaiga o le finauga a Amoleka ma Seseroma, ua aoao ai e tamaiti aoga afai tatou te faalagolago i le Agaga Paia, o le a mafai ona tatou manumalo i faaosoosoga. O le aoao atu o Seseroma ma le nuu o Amonaea, ua faamamafa mai ai e Amoleka ia aoaoga faavae nei e faatatau i le matafaioi o le Faaola: O le faatuatua moni ia Iesu Keriso o le amataga lea o le faasologa o le togiolaina mai a tatou agasala. E ala atu i le Togiola a Iesu Keriso, o le a toetutu tagata uma ma faamasinoina e tusa ma a latou galuega.

Aso 2 (Alema 12)

E pei o Amoleka, na aoao atu e Alema Seseroma ma le nuu o Amonaea. Na ia faamatalaina ia faamoemoega o le tiapolo ma faailoa mai o Seseroma o loo aafia i le mana o le tiapolo. Na faaalia e Alema ma Amoleka e mafai ona fesoasoani mai le Agaga Paia ina ia tatou iloa faaosoosoga a le fili. Na fesoasoani Alema i tagata ina ia malamalama o le a faaalia e le Alii ia upumoni faaleagaga ia i tatou e tusa ai ma lo tatou usiusitai ma le filifiliga i Ana afioga. Na ia aoao atu foi e uiga i le Faamasinoga Mulimuli, ma faamatala atu o le a tatou tutu e tali atu i luma o le Atua mo a tatou upu, galuega, ma manatu. Na ia faamamafa mai o le olaga faaletino o le taimi lea tatou te saunia ai e feiloai ma le Atua.

Aso 3 (Alema 13)

Na faamanatu atu e Alema ia Seseroma ma tagata faapea ua faauuina e le Atua e umia le perisitua mai le faavaega o le lalolagi. O alii o loo faatinoa le faatuatua tele ma filifili le amiotonu o le a maua le Perisitua Mekisateko e aumai isi i le Atua. O le a aoao tamaiti aoga e uiga ia Mekisateko ma lona nuu ma toe manatunatu i lenei upumoni: A o tatou tali atu ma le faamaulalo i le valaau ina ia salamo, o le a taitaiina i tatou e le Agaga Paia i le malologa o le Alii.

Aso 4 (Alema 14–16)

Ua faitau tamaiti aoga e uiga i fafine ma fanau e leai se agasala o loo feoti i lima o tagata amioleaga. Ua latou mafaufau loloto i faamatalaga faaperofeta o loo aoao atu faapea e faataga e le Alii le tiga o e amiotonu i lima o e amioleaga ina ia sa’o ai Lana faamasinoga. Na sailiili tamaiti aoga i olaga o Alema ma Amoleka afai tatou te faalagolago i le Alii, o le a Ia faamalosia i tatou i le taimi o o tatou luitau. Afai tatou te valaau atu ia te Ia i le faatuatua, o le a Ia faamalosia i tatou i o tatou mafatiaga ma laveai i tatou i Lana ala ma i Lona lava taimi.

Faatomuaga

A o amata ona aoao atu e Alema ma Amoleka ia tagata o Amonaea, sa la fetaiai ma e na le fiafia. Ina ua uma ona la faamatalaina atu le tele o upumoni e faavavau, sa toatele tagata na “amata ona salamo, ma suesue i tusitusiga paia” (Alema 14:1). O tala o loo i le Alema 11–16 o loo faailoa mai ai ia osigataulaga na malilie tagata e fai mo lo latou molimau e uiga i le upumoni. Na tuuina mai foi e nei mataupu se faamautinoaga afai e “tutuli ese i fafo…e ua amiotonu,” e tagata amioleaga o le a taia e le Alii i latou “i le oge, ma faamai, ma le pelu” (Alema 10:23). Na lapatai e Alema ma Amoleka ia le nuu o Amonaea afai latou te le salamo, o le a oo atu le faamasinoga a le Atua i o latou luga. O le teenaina o le valaau ina ia salamo, na faaumatiaina ai mulimuli ane e le autau a sa Lamana le nuu o Amonaea.

O lenei lesona o le a taulai atu i le Alema 14–15. E le gata i lea, atonu e te fia aoaoina atu pe toe faamanatu foi ia upumoni mai isi matupu lea na atofaina atu i lenei vaiaso.

Fautuaga mo le Aoaoga

Alema 14–15

E faamanuia e le Atua i latou e faalagolago ia te Ia i o latou puapuaga

Fuafua e amata le lesona o le asō i le tauina atu o ni mea na tutupu i le taimi nei lea na puapuagatia ai ni tagata e leai ni agasala ona o filifiliga a isi. Pe atonu foi e te fai i ni tamaiti aoga e faasoa mai ni faataitaiga mai tusitusiga paia o ni tagata amiotonu o e na sauaina ona o a latou molimau e uiga i le talalelei. A uma ona talanoaina nisi o faataitaiga, valaaulia ni nai tamaiti aoga e feauauai i le faitauina leotele mai o leAlema 14:7–11 ma le Alema 60:13.

Fesili: O a mafuaaga ua tuuina mai i nei fuaiupu i le pogai e faatagaina ai i nisi taimi ona puapuagatia e amiotonu i lima o e amioleaga? (O se tasi o upumoni na aoaoina e tamaiti aoga ao suesueina lenei vaega o le Alema 14 e faapea o le a faatagaina e le Alii e amiotonu e puapuagatia i lima o e amioleaga ina ia tonu Lana faamasinoga.)

Faamalamalama atu o le a oo atu i tua atu o le oti le faamasinogatonu ma le alofa mutimutivale o le Atua ina ia tali atu i latou o e na agasala ma ina ia faaalia ai le alofa mutimutivale i e amiotonu. Ona faasoa atu lea o le saunoaga lenei a Peresitene James E. Faust o le Au Peresitene Sili:

“O lenei puapuaga uma e mafai ona moni e le fetaui pe ana fai e muta mea uma i le oti, ae leai. O le olaga e le pei o se tala e tasi le vaega. E tolu ona vaega. Sa i ai la tatou vaega ua mavae atu a o tatou i ai i le muai olaga; ma o loo tatou i ai nei i le vaega o loo faatinoina, o le olaga faaletino lea; ma o le a i ai foi se tatou vaega faatino i le lumanai, pe a tatou toe foi atu i le Atua. … Na auina mai i tatou i le olaga faaletino ina ia suesueina ma tofotofoina ai [tagai Aperaamo 3:25]. …

“O o tatou puapuaga i le taimi ua tuanai ma le taimi nei, e le mafai, e pei ona fai mai Paulo, ‘ona faatusaina i le manuia atali e faaalia mai ia te i tatou’ [Roma 8:18] i le faavavau. ‘Aua e oo mai faamanuiaga pe a mavae atu puapuaga e tele. O lea o le a oo mai le aso e faapaleina ai outou i le mamalu.’ [MFF 58:4.] O lea, o puapuaga e aoga i le lagona faapea e fesoasoani ai ina ia oo atu ai i le malo selesitila. …

“E le o i le ituaiga o mea e tupu ia i tatou, ae o i le auala tatou te taulimaina ai mea e tutupu ia i tatou” (“O Fea Ou Te Tu Ai?” Ensign po o le Liahona, Nov. 2004, 19–20).

Faamatala atu o le puapuaga ma le tiga e mafai ona fesoasoani ia i tatou i le mauaina o le faaeaga e ala i le faamalosia o lo tatou faatuatua. O le tumau ai ma le faamaoni i taimi o luitau ma faigata e faaalia ai le faalagolago moni atu i le Atua ma Lana fuafuaga, ma o le a faamalosia ai lo tatou faatuatua ma lo tatou gafatia e tumau ai e oo i le iuga.

Fai atu fesili nei:

E mafai faapefea e le mauaina o se molimau o le ata o le faaolataga, e aofia ai le muai olaga ma le olaga a sau, ona faamāmāina puapuaga tatou te oo i ai i le olaga faaletino?
Mafaufau i mea sa e suesueina i lenei vaiaso i le Alema 14–15, o a ni auala sa faamanuiaina ai e amiotonu i o latou mafatiaga?
I taimi o puapuaga, e mafai faapefea ona tatou faaalia o loo tatou faalagolago i le Atua?

Tuu atu i tamaiti e faatusatusa le fesili na fesili ai Alema i le Alema 14:26 ma le fesili na fesili ai Iosefa Samita i le Mataupu Faavae ma Feagaiga 121:3. Ona fesili lea: E tusa ai ma le Alema 14:26, na mafai faapefea ona faatoilaloina e Alema ma Amoleka o la puapuaga?

Faamalamalama atu ina ua faafalepuipuiina ma le le sao ia le Perofeta o Iosefa Samita i Misuri, sa ia fesili atu i se fesili lea o loo faamaumauina i le Mataupu Faavae ma Feagaiga 121:3. E lei faapei o Alema ma Amoleka, e lei vave ona tatalaina mai o ia mai le falepuipui. O le a se mea tatou te aoao mai le tali a le Atua i lana tatalo? (Tagai MF&F 121:7–9; 122:4–9.) O nei upumoni na faamamafaina i lenei vaiaso i le suesuega patino a tamaiti aoga: Afai tatou te valaau atu ia te Ia i le faatuatua, o le a Ia faamalosia i tatou i o tatou mafatiaga ma laveai i tatou i Lana ala ma i Lona lava taimi.

Fai atu fesili nei:

Na faapefea ona fesoasoani le Alii ia te oe pe a e oo i tofotofoga?
O a ni mea na fesoasoani ia te oe e talia ai Lona finagalo ma ioe i Lona taimi?

Fesoasoani tamaiti ia malamalama na faalagolago uma lava Seseroma ma Amoleka i le Atua i o laua mafatiaga ma sa tauia e tusa ai ma Lona finagalo ma i Lona lava taimi.

Faatonu le afa o le vasega e faitau le Alema 15:5–12 ma faailoa mai le faamatalaga e uiga ia Seseroma lea na faaalia ai le tuputupu ae o lona faalagolago i le Alii. Faatonu le isi afa e suesue i le Alema 15:16, 18 ma faailoa mai le faamatalaga e uiga i le mea sa ositaulagaina e Amoleka e auauna atu ai i le Alii.

Uunai ia tamaiti aoga ina ia faalagolago i le Alii ma talia Lona finagalo ma le taimi pe a oo mai ia faigata ma mafatiaga i o latou luga. Faamautinoa atu ia i latou o le a faalauaitele mai e le Atua Lona mana ma le malosi i ni auala eseese patino ma faavavega.

Iloiloga o le Mau Tauloto

O lenei lesona o loo faailogaina ai le tulaga ogatotonu o le mataupu aoaoina o le seminare o le Tusi a Mamona. Ina ia faamalosia ia taumafaiga a tamaiti aoga ina ia aoao ma malamalama i fasifuaitau o mau tauloto, mafaufau e tuu atu ia i latou se suega puupuu e fua i ai lo latou masani i fasifuaitau e 13 ia ua uma ona latou suesueina. E mafai ona avea ma se suega tusitusi faigofie pe tautala foi, o le a tuu atu ai i tamaiti aoga se faaiteite mai faailogatusi ma tuuina atu ia i latou e tusi se faasinoala i lalo, pe e mafai foi ona avea o se toe faamanatu o nisi o fasifuaitau sa latou taulotoina. O le umi o lenei lesona atonu o le a maua ai se taimi e tuuina atu ai se suega i lenei vaiaso, pe e te faailoaina atu foi o le a faia se suega puupuu i se taimi o i luma ina ia saunia i ai tamaiti aoga.

Iunite e Sosoo Ai (Alema 17–24)

Na o atalii o Mosaea e talai i tagata amioleaga ma taufeaai. I le taimi muamua lava sa latou mafatia ai i le tele o puapuaga, peitai ao latou talai atu le talalelei i sa Lamana, na tutupu ni vavega. Manatu le tulaga o le tuuto atu o Amona i le Atua faapea ma le tupu lea na oo mai ai le tele o le amiotonu.