Lesona 100

Alema 43–44

Faatomuaga

A o faaauau pea ona talai atu le talalelei e Alema ma ona atalii, na tuufaatasia autau a sa Sorama ma sa Lamana e osofaia ia sa Nifae. Na faaalia e Kapeteni Moronae le faatuatua ma le atamai i le taitaiga o sa Nifae i le puipuiga o i latou lava mai le autau a sa Lamana. E ui sa toalaiti i latou, ae o le sauniuniga ma le faatuatua o fitafita sa Nifae ia Iesu Keriso na latou maua ai se fesoasoani i le taimi o le taua. Ina ua feagai sa Lamana ma se toilalo patino, sa latou osia se feagaiga o le filemu ma o ese atu mai le laueleele mo se vaitau.

Fautuaga mo le Aoaoga

Alema 43

O sauniuniga ma metotia a Kapeteni Moronae na fesoasoani i le faafememeaiina o faatulagaga o autau a sa Lamana

Fai i tamaiti e tusi i totonu o a latou api o le vasega po o api talaaga mo le suesueina o tusitusiga paia se lisi o fuafuaga, sini, ma ni manaoga mo o latou lumanai. Ao latou tusiina, toe faamanatu atu ia i latou e mafaufau i sini ma manaoga faaleagaga e pei o le aveina o se misiona, faamauina i le malumalu, ma le tausiaina o se aiga. Ao lei amataina le vasega, atonu e te manao e tusi sea ituaiga lisi o sini ma manaoga mo lou lava lumanai. Atonu e te manao e faasoa atu nisi o au fuafuaga ma manaoga e avea ma ni faataitaiga ina ia fesoasoani ai i tamaiti aoga e amata ona tusi.

A uma ona faia e tamaiti a latou lisi, fai atu ia i latou e faailoa mai ia manaoga ma sini ia latou te lagona e le manao Satani latou te faataunuuina. Fai atu i nai tamaiti e faasoa mai ni sini sa mafai ona latou iloaina. Fai atu ia i latou e faamatala mai pe aisea e le manao ai Satani latou te faataunuuina na sini. Atonu e te manao foi e fesiligia i latou pe aisea e matuai malosi ai lava o latou lagona e uiga i le faataunuuina o na sini. Tau atu o le suesueina o le Alema 43–44 o le a fesoasoani lea ia i tatou ia iloa le auala e mafai ona tatou faataunuuina ai a tatou sini amiotonu e ui i taumafaiga faataumaoi a le fili.

Aotele le Alema 43:1–4 e ala i le faamatalaina atu faapea, e ui i taumafaiga a Alema e toe aumai sa Sorama i le Ekalesia, o le toatele o i latou na liliu atu ia sa Lamana ma saunia e osofaia ia sa Nifae. Sa latou faatasi foi ma sa Amaleka, o e, faapei o sa Sorama, na avea muamua ma sa Nifae ae ua se ese mai le upu moni.

Valaaulia se tamaitiiti aoga e faitau leotele le Alema 43:5–8. Fai i le vasega e mulimuli i le faitauga, ma tagai mo fuafuaga, po o “mamanu,” a le taitai sa Lamana o, Seraemina.

Faamatala atu faapea a o tatou suesue i tala o taua faaletino i le Tusi a Mamona, e mafai ona tatou faatusaina i taua faaleagaga o fetaiai ma i tatou.

• Faamata o faapefea ona faatusatusa ia mamanu a Seraemina ia na faasagatau atu ai ia sa Nifae ma mamanu a Satani ia o loo faasagatau mai ia i tatou?

Valaaulia se tamaitiiti aoga e faitau leotele le Alema 43:9–12. Fai i le vasega e faailoa mai ia mamanu a sa Nifae.

• O a ni mamanu a sa Nifae?

Valaaulia tamaiti e faitau le leoa le Alema 43:16–19. Fai atu ia i latou e tagai mo le mea na faia e Moronae, le kapeteni sili a sa Nifae, e saunia ai tagata i le puipuiga o lo latou laueleele ma aiga.

• O a ni mea faapitoa na faia e sa Nifae e saunia ai mo le osofaiga a sa Lamana?

Fai i tamaiti e faitau leotele mai le Alema 43:20–22, ma fai atu i le vasega e saili i le auala na tali mai ai sa Lamana i sauniuniga a sa Nifae.

• Aisea na sosola ai sa Lamana mai a latou osofaiga e ui sa toatele atu i latou nai lo sa Nifae?

• O le a se mea o tatou aoaoina mai lenei mea na tupu e uiga i le puipuia o i tatou lava mai mamanu a Satani?

Fai i tamaiti aoga e faitau le leoa le Alema 43:23–24 ina ia iloa ai le mea na faia e Moronae ina ua ia le mautinoa pe na faapefea ona fuafua e lona fili le isi osofaiga.

• Aisea na auina atu ai e Moronae ni avefeau e talanoa ma Alema?

• O le a se mea o loo aoao mai ia tatou e faataitaiga a Moronae e uiga i le auala e mafai ona tatou saunia ai faaleagaga e tetee atu ai i le fili? (Fesoasoani i tamaiti e faailoa mai le mataupu faavae lenei: Afai tatou te saili ma mulimuli i le fautuaga faaperofeta, o le a sili atu ona mafai ona tatou puipuia i tatou lava e tetee atu ai i le fili.)

Aotele puupuu mai le Alema 43:25–43 i le faamatalaina mai o Moronae sa galue i le malamalama lea sa ia mauaina mai mai le perofeta. Na vaevaeina lana autau i ni vaega se lua. O nisi o fitafita na nonofo i le laueleele o Seasona e puipuia le nuu o Amona. O le autau atoa na savavali atu i le laueleele o Maneti. Na auina atu e Moronae ni sipai ina ia iloa ai po o fea o i ai sa Lamana, ma sa ia faalalafiina isi o lana autau i le auala o le a uia e sa Lamana. Ina ua agai mai sa Lamana, na siomia i latou e autau a sa Nifae. Ina ua iloa atu e sa Lamana lo latou siomia, sa latou matuai tau malolosi. O le toatele o sa Nifae na feoti, peitai na sili atu ona toatele sa Lamana na feoti ma manunua.

Valaaulia ni tamaiti aoga e feauauai i le faitauina leotele o le Alema 43:43–54. Fai i le vasega e tagai po o le a se eseesega i le va o mea na uunaia ai sa Lamana ma le puna o le malosiaga faapea foi ma le mea na uunaia ai sa Nifae ma le puna o le malosiaga.

• O le a se mea na e matauina e uiga i mafuaaga na tau ai sa Lamana? O le a se mea na e matauina e uiga i mafuaaga na tau ai sa Nifae? Na faapefea ona ese le puna o le malosiaga a sa Nifae mai ia sa Lamana? (Pe a manaomia, faasino atu faapea ao tau sa Lamana ona o le feita, o sa Nifae na uunaia e se mafuaaga lelei [tagai i le Alema 43:45–47]. Na latou tagi atu i le Alii mo se fesoasoani, ma sa Ia faamalolosia i latou [tagai i le Alema 43:49–50].)

• O le a se mea o tatou aoaoina mai i faataitaiga a Moronae ma lana autau ina ia fesoasoani ia i tatou i a tatou fetauaiga ma le fili?

Fai tamaiti e tusi a latou tali i le fesili lenei: Ona talosagaina lea o i latou e faasoa mai mea ua latou tusiina. Atonu o le a latou tau maia nisi o mataupu faavae nei:

A o tatou tatalo atu mo se fesoasoani i le faataunuuina o o tatou fuafuaga ma manaoga amiotonu, o le a fesoasoani mai le Atua ia i tatou i le faataunuuina.

Ua uunaia i tatou e se mafuaaga lelei nai lo i latou o loo tetee i le upu moni.

O le a fesoasoani mai le Alii ia i tatou i le faataunuuina o le puipuiga o o tatou aiga, lo tatou saolotoga, ma la tatou tapuaiga.

Fai i tamaiti e tau mai e uiga i taimi sa latou lagonaina ai le fesoasoani a le Alii i le faataunuuina o ni sini amiotonu. Mafaufau e faasoa atu ni au oe lava aafiaga. Molimau atu i le tomai o i le Alii ina ia fesoasoani ia i tatou i le faataunuuina o ni mamanu amiotonu. Fai i tamaiti e fai ni sini amiotonu e avea o se vaega faifai pea o a latou tatalo.

Alema 44

Ua faatonuina e Kapeteni Moronae ia sa Lamana e osia se feagaiga o le filemu

Fai i se alii talavou o loo manao e faitau leotele ina ia sau i luma o le potu ma ana tusitusiga paia. Faamanatu atu i le vasega ina ua vaai Kapeteni Moronae i le fefefe o sa Lamana, na ia faatonuina ana autau e aua nei toe tau (tagai i le Alema 43:54). Tuu atu i le alii talavou e faitau mai upu a Moronae o i le Alema 44:1–6. Fai atu i le vasega e faalogologo i le faamatalaga a Moronae e uiga i le manumalo a sa Nifae.

• O le a se mea na manao Moronae ia Seraemina ina ia malamalama i ai e uiga i le puna o le malosiaga o sa Nifae i le taimi o taua? O le a se mea na ofoina atu ia sa Lamana? (Na ia tau atu e le toe faamanuaina i latou e sa Nifae pe afai latou te lafoai a latou auupega ma ulu atu i se feagaiga o le filemu.)

• O a upu moni e mafai ona tatou aoao mai le Alema 44:4–6 e mafai ona fesoasoani ia i tatou i a tatou taua faaleagaga? (E mafai ona faasoa mai e tamaiti le tele o mataupu faavae, o nisi ua uma ona lavea i lenei lesona. Ia faamautinoa ua latou faaofia ai le upu moni lenei: O le a faamalolosia ma faasaoina i tatou e le Alii e tusa ai ma lo tatou faatuatua ia te Ia. Atonu e te manao e fautuaina ia tamaiti aoga e faailoga ia upu o i nei mau lea o loo aoaoina ai le upu moni lenei.)

Valaaulia se tamaitiiti aoga e faitau leotele mai le apoapoaiga lenei i le autalavou o le Ekalesia, mai ia Peresitene Boyd K. Packer o le Korama a Aposetolo e Toasefululua: Atonu e te manao e saunia se kopi mo tamaiti taitasi.

Peresitene Boyd K. Packer

“I le faaitiitia o tulaga faatonuina o amioga mama, o outou le autalavou ua ola ae i teritori o le fili. Ae i le avea ai ma auauna a le Alii, ou te folafola atu o le a puipuia outou ma leoleoina mai osofaiga a le fili pe afai o le a outou faalogo atu i uunaiga ia e sau mai le Agaga Paia.

“Oofu i laei talafeagai; tautala ma le faaaloalo; faalogologo i musika musuia. Aloese mai le ola le mama ma faatinoga leaga patino uma. Ia e puleaina lou olaga ma poloaiina oe lava ia ina ia faamaoni. Talu ai matou te faalagolago tele atu ia te outou, o le a matua faamanuiaina lava outou. E le o tuuaunoaina lava outou e le silafaga a lo outou Tama Faalelagi agaalofa” (“Fautua i le Autalavou,” Ensign po o le Liahona, Nov. 2011, 18).

• I upu a Peresitene Packer, o le a se mea o tu matilatila mai ia te outou? Aisea?

Aotele le Alema 44:7–10 e ala i le faamatala atu faapea na folafola atu e Seraemina lo latou le talitonu ma lona nuu sa faamalosia e le Atua sa Nifae. Na ia ofoina atu o le a lafoai e sa Lamana a latou auupega, peitai na musu o ia e osia le feagaiga o le filemu. Fai i le tamaitiiti lea na faitauina le Alema 44:1–6 e faitau leotele mai le tali a Moronae ia Seraemina, lea o loo maua i le Alema 44:11. Fesili i le vasega:

• Aisea e te manatu ai sa matuai taua lava ia Moronae le osiaina e sa Lamana o le feagaiga o le filemu?

Aotele le Alema 44:12–20 e ala i le faamatala mai e ui o le toatele o sa Lamana na osia le feagaiga o le filemu, ae na faapotopoto faatasi e Seraemina le vaega na totoe o alii ina ia tau ma le autau a Moronae. A o amata ona fasiotia i latou e sa Nifae, na iloaina e Seraemina le faamalumalu mai o le faaumatiaina o i latou ma folafola atu ai o le a ulu atu i le feagaiga o le filemu.

Molimau atu e uiga i le i ai o aao puipui o le Alii i olaga o i latou o e faamaoni ia te Ia. Uunaia ia tamaiti e tau malosi mo a latou sini ma manaoga amiotonu ma ia faalagolago i le folafolaga a le Atua o le a “lagolagoina, ma tausia, ma faasaoina i matou [e le Atua] pe afai matou te faamaoni ia te ia” (Alema 44:4).

Tala ma Faamatalaga o Talaaga

Alema 43:3. O le taua o loo tatou tauina na amataina i lo tatou muai olaga

Na saunoa mai Peresitene Gordon B. Hinckley e uiga i le tulaga moni o le taua ua tatou auai talu mai le taimi a o lei amataina le lalolagi:

“O loo i ai [se] taua na amata mai a o lei faavaeina le lalolagi, e foliga mai e umi lava le taimi o le a tau pea lea taua. …

“O lena taua… o le taua i le va o le upu moni ma le sese, i le va o le saolotoga ma le pologa, i le va o soo o Keriso ma e tetee ia te Ia. Ua faaaoga e ona fili ala eseese uma. …

“… O loo tau pea e pei ona i ai i le amataga. O e ua toilalo nei i le taua e taua e pei foi o e na toilalo i aso ua mavae. O se taua e faifai pea. …

“O loo tau pea le taua.… O loo tauina i o tatou olaga, i lea aso ma lea aso, o o tatou aiga, ia tatou galuega, ia tatou uo i aoga; o loo tauina i fesili o le alofa ma le faaaloalo, o le faamaoni ma le faatuatua, o le usiusitai ma le amiotonu. O loo aafia ai i tatou uma i lenei taua. O loo tatou manumalo, e ui lava ina le mavae faigata i le lumanai” (“O Le Taua o loo Tatou Manumalo Ai,” Liahona, Ian. 1987, 45–48).

Alema 43:9, 45. Puipuia ma le faamalosia o le aiga

Na ta’ua e Sister Virginia U. Jensen o le au peresitene aoao o le Aualofa se lapataiga i le folafolaga i le aiga faapea “o le faamalepeina o le aiga o le a aumai ai i tagata taitoatasi, alalafaga, ma malo, faafanoga ia na uluai tau mai e perofeta anamua ma aso nei” (“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129). Na matauina e Sister Jensen: “Uso e ma tuagane, ua tatou i ai nei i le totonugalemu o na mea moni i le taimi nei. O se tiute o tagata uma le puipuia ma le faamalosia o aiga” (“O Maia Ina Faalogo i le Siufofoga O Se Perofeta,” Liahona, Ian. 1999, 15).

Manatu Faaopoopo Faafaiaoga

Alema 44. Ata vitio

Ina ia faaali atu i tamaiti le talanoaga i le va o Seraemina ma Kapeteni Moronae o pueina i le Alema 44, mafaufau e ta le ata vitio “Firm in the Faith of Christ,” lea e maua i Ata Vitio DVD o le Tusi a Mamona 1–19 (54011) ma le LDS.org. Atonu e te manao e taofi le vitio pe a uma le tautalaga faaiu a Moronae. Ona fai atu lea o fesili togitogi o i le lesona lea e fesoasoani i tamaiti ia iloa o le a faamalolosia ma faasaoina i tatou e Alii e tusa ma lo tatou faatuatua ia te Ia. Ona toe amata lea o le vitio.

Alema 43:45–47. O la tatou tiute o le puipui o o tatou aiga, lo tatou saolotoga, ma la tatou tapuaiga

Faitau le saunoga lenei a Peresitene Boyd K. Packer, Peresitene o le Korama a Aposetolo e Toasefululua:

“Ina ua 18 ou tausaga, sa ave faamalosi au i le militeli. E ui e lei i ai se mafuaaga ou te mafaufau i ai muamua, ae ua amata ona ou popole tele pe o se mea sao mo au lou alu e tau. I le taimi, sa ou maua lau tali i le Tusi a Mamona: [sii mai i le Alema 43:45–47].

“O le iloaina o lenei mea, sa mafai ai ona ou auauna atu ma le naunautai ma le faamamaluina [i le militeli]” (“O Le Tusi a Mamona: O Se Tasi Molimau ia Iesu Keriso—O Mea Malamalama ma le Taua,” Ensign po o le Liahona, Me 2005, 7–8).

Fai i tamaiti e faitau le leoa le Alema 43:45-47. Fai atu ia i latou e mafaufau po o le a se mafuaaga na mafai ai ona fesoasoani nei mau ia Peresitene Packer i lenei vaitaimi o lona soifuaga.

Tusi i le laupapa. O le fesoasoani mai le Alii ia i tatou e faataunuu o tatou tiute …

Fai atu i tamaiti e toe iloilo le Alema 43:46–47 ma faamaea le fuaiupu na e tusiaina i le laupapa. (Ia mautinoa o malamalama ia tamaiti o le a fesoasoani mai le Alii ia i tatou i le faataunuuina o la tatou tiute o le puipuiga o o tatou aiga, lo tatou saolotoga, ma la tatou tapuaiga.)

• O a ni auala o e maua ai se tiute e puipui ai tagata o le aiga? E mafai faapefea ona e faia lena mea i le taimi nei, i le taimi o e talavou ai?

Ina ia tuuina atu ai se ata faataitai o la tatou tiute o le puipuia o le aiga, faitau i le saunoaga lenei a Elder M. Russell Ballard o le Korama a Aposetolo e Toasefululua:

“Ou te toe fia fai atu faapea o le aiga o le autu lea o osofaiga a le tiapolo ma o lea e tatau ai ona avea ma autu o la tatou puipuiga ma le saogalemu. E pei ona sa ou fai atu muamua, afai e te faatali ma mafaufau i ai mai se vaaiga faaletiapolo, o le faasagatau i le aiga o se mea lelei ia Satani. … Afai e manao le tiapolo e faaleaga ma faalavelaveina le ute o le galuega a le Atua, na te osofaia lava le aiga. Na te osofaia i le taumafai lea ia le amanaiaina le tulafono o le legavia, Ia faafenumiai kenera, ia tuumaualaloina le matautia o le faatupu vevesi, ia avea le gagana masoa ma le upu vale ma mea e masani ai, ma ia avea amioga le mama ma le leaga ma mea sili ona taua nai lo le teenaina” (“Ia Lagonaina o Tatou Leo,” Ensign po o le Liahona, Nov. 2003, 18).

• O le a se mea e mafai ona faia e tagata talavou e puipui ai o latou aiga mai ituaiga o aafiaga ia na faamatalaina e Elder Ballard?

Fai atu i tamaiti aoga e faasoa mai ni taumafaiga sa latou faia e puipui ai tagata o latou aiga po o uo faaleagaga. Atonu e mafai ona e fai atu i tamaiti aoga e tusi se parakalafa i totonu o a latou api talaaga mo le suesueina o tusitusiga paia e uiga i le auala latou te fuafuaina e puipui ai o latou aiga ma uo e faasagatau atu i osofaiga a Satani. Molimau atu faapea o le a fesoasoani le Alii ia i latou ina ia faamanuiaina ao latou faataunuuina lenei tiute.