Lesona 55
Mosaea 5–6
Faatomuaga
O le Mosaea 5 o loo i ai le faaiuga o le saunoaga a le Tupu o Peniamina i lona nuu, le faamaumauga lea e amata i le Mosaea 2. O le taunuuga o lo latou faatuatua i upu a le Tupu o Peniamina, na iloa ai e tagata se suiga tele o le loto. Sa latou ulu atu i se feagaiga ma le Atua ma tauaveina i o latou lava luga le suafa o Iesu Keriso. E pei ona tusia i le Mosaea 6, na faaui atu e le Tupu o Peniamina lona malo i lona atalii o Mosaea, o le na pule e tusa ai ma le faataitaiga na faatuina e lona tama.
Fautuaga mo le Aoaoga
Mosaea 5:1–4
Ua faamatala e le nuu o le Tupu o Peniamina le suiga tele na latou maua e ala i le Agaga
A o lei amataina le vasega, tusi le faamatalaga lenei i luga o le laupapa:
Pe na e lagonaina ea ua manaomia ona e suia faaleagaga?
O le a sau mea na fai i ai?
Afai na e oo i se suiga, pe o e tausisia ea lena suiga e oo mai i le aso?
Fai i tamaiti e tali fesili nei i a latou api talaaga mo le suesueina o tusitusiga paia. Ona faitau lea o le saunoaga lea a Elder David A. Bednar o le Korama a Aposetolo e Toasefululua:
“O le natura moni o le talalelei a Iesu Keriso e afua ai se suiga taua ma le mautu i o tatou lava natura, e mafai i lo tatou faalagolago ‘i taui , ma le alofa mutimutivale ma le alofa tunoa o le Mesia Paia’ (2 Nifae 2:8). A o tatou filifili e mulimuli i le Matai, ua tatou filifili ina ia suia —ia toefuataiina faaleagaga.” (“E Ao Ina Toe Fanau Mai Outou,” Ensign po o le Liahona, Me 2007, 20).
E mafai ona e fautuaina e tusi e tamaiti le upusii lea i a latou tusitusiga paia i autafa o le Mosaea 5:2 po o a latou api talaaga mo le suesueina o tusitusiga paia: “A tatou filifili e mulimuli i le Matai, ua tatou filifili ina ia suia” (Elder David A. Bednar).
-
O a auala ua tatou filifili ai ina ia suia pe a tatou filifili e mulimuli ia Iesu Keriso?
Tuu i tamaiti ni nai minute e iloilo ai le Mosaea 2–4. E mafai ona e fautuaina i latou e faitau ia aotelega o mataupu. Fesili i ai po o a mea o latou manatua e uiga i anotusi o nei mataupu. Ona valaaulia lea o i latou e faitau lemu le Mosaea 5:1.
-
O le a le mea na manao le Tupu o Peniamina e iloa mai lona nuu?
Fai i tamaiti e faitau lemu le Mosaea 5:2–5, ma vaavaai mo tali a tagata i le fesili a le Tupu o Peniamina. A o le’i faitau tamaiti, atonu e te manao e faamalamalama o le fuaiupu e 2, o le upu manao ua faasino i se natura o se tagata—o lona faanaunauga ma ona uiga. A uma ona faitau, fai atu fesili nei e fesoasoani ai i lo latou faavasegaina o fuaiupu:
-
O le a le tala a tagata e uiga i lo latou manao?
-
O le a le mea na mafua ai lenei suiga i o latou manao? (Sa latou talitonu i aoaoga a le Tupu o Peniamina e uiga ia Iesu Keriso ma le Togiola, ma sa suia e le Agaga o latou loto.)
Faamamafa atu o se suiga o le loto e tele atu nai lo le na o se suiga o le amio. A tatou oo i le suiga o le loto, ua avea i tatou ma tagata fou, ua suia e ala i le mana o le Togiola a le Faaola. Ina ia fesoasoani ia malamalama tamaiti i lenei upumoni, valaaulia tamaiti e faitau le saunoaga lea a Elder David A. Bednar o le Korama a Aposetolo e Toasefululua:
“O le talalelei a Iesu Keriso e aofia ai le anoanoai o mea nai lo le aloese, faatoilalo, ma le faamamaina mai agasala ma uunaiga leaga i o tatou olaga; e aofia ai foi ma le faia o mea lelei, amiolelei, ma le avea ma tagata sili atu. O lenei suiga tele ua le na o se taunuuga o le galue malosi po o le atiina ae o se amio pulea sili atu o le tagata lava ia. Ae o le taunuuga o se suiga taua i o tatou faanaunauga, o o tatou faamoemoega, ma o tatou natura ia ua mafai ona o le Togiola a Keriso le Alii. O lo tatou faamoemoega faaleagaga o le faatoilaloina o le agasala ma le manao e fai le agasala, e le gata i le pisia a o le puleaina e le agasala” (“O Lima Mama ma se Loto Mama,” Ensign po o le Liahona, Nov. 2007, 81–82).
-
Aisea tou te manatu ai tatou te manaomia le Togiola a Iesu Keriso ina ia matua suia moni ai?
Faagauai atu tamaiti i le fasifuaitau “ona o le Agaga o le Alii Mamana Aoao” i le Mosaea 5:2. Atonu e manaomia ona e faamalamalamaina le Mamana Aoao, o lona uiga e i ai le mana uma.
-
O le a se mea e mafai ona tatou aoao mai le Mosaea 5:2–4 e uiga i le ala e mafai ona tatou iloa ai se suiga tele i o tatou olaga?
A o talanoaina e tamaiti lenei fesili, ia mautinoa ua latou malamalama a tatou faaaogaina le faatuatua ia Iesu Keriso ma maua le Agaga Paia, e mafai ona tatou iloaina se suiga tele o le loto.
Faamatala o le iloa o se suiga tele o le loto o se faagasologa e tupu i o tatou olaga atoa, e le o se mea e tupu i le taimi e tasi. Faasoa atu le saunoaga lea a Peresitene Ezra Taft Benson:
“O le avea e faapei o Keriso o se sailiga o le olaga atoa ma e masani lava ona aofia ai le tuputupu ae ma le suia lea e telegese, e toetoe lava a le iloaina. … …
“… O le salamo moni e aofia ai le liua o le loto a e le na o le suia o amioga….O le tele lava o le salamo, e le aofia ai se liua maoae pe matautia, ae e aofia ai le liua i sea laasaga ma sea laasaga, ma mausali, ma tumau i le faaleatua.” (“O se Liua Maoae O le Loto,” Liahona, Mati. 1990, 7).
Ina ia fesoasoani i tamaiti e faaaoga lenei mataupu faavae ma iloilo lo latou alualu i luma i le iloa o se suiga tele i o latou loto, fai i ai e tali i a latou api talaaga mo suesuega o tusitusiga paia i fesili nei. (Atonu e te manao e tusi fesili nei i luga o le laupapa a o lei amataina le vasega, saunia se tufaaga ua i ai fesili, pe faitau lemu atu i ai fesili ina ia mafai ona tusia e tamaiti i a latou api talaaga mo le suesueina o tusitusiga paia.)
-
Ua faapefea ona suia ou manao ina ua e mulimuli i le faaola?
-
O le a le mea e te manaomia ona fai ina ia faaauau ai pea ona fesoasoani mai le Alii ia e iloa lenei suiga?
Tuu atu i se tamaitiiti se tasi pe lua le avanoa e faasoa mai ai a latou tali i fesili nei. Ia mautinoa ua latou malamalama latou te le tau faasoa maia o latou aafiaga po o ni mafaufauga e patino ia i latou pe le fia faalauaiteleina.
Mosaea 5:5–15
Ua ulu atu le nuu o le Tupu o Peniamina i se feagaiga ma le Atua ma ua tuu atu i ai se igoa fou
Valaaulia se tamaitiiti e faitau leotele le Mosaea 5:5Fai i le vasega e vaavaai mo mea sa naunau le nuu o le Tupu o Peniamina e fai ona ua suia o latou loto.
-
O a mea na naunau tagata e fai ina ua suia o latou manao e ala i le Togiola a Iesu Keriso?
Ina ia fesoasoani i tamaiti e faateleina lo latou malamalama i feagaiga, tuu atu i ai ni nai minute e suesue ai taitoatasi i le mataupu. Atonu e te fautuaina ina ia suesue le mataupu i le Bible Dictionary po o le Faamaoni i le Faatuatua pe vaavaai foi mo mau e uiga i le mataupu i le faasino upu i le Tusi a Mamona po o le fusitolu. A uma se taimi ua lava, ona vaevae lea o tamaiti i ni paga ma faamalamalama ia feagaiga i le tasi ma le isi i a latou lava upu.
-
O le fea upu po o fasifuaitau i le Mosaea 5:5 o loo faaalia ai le faamaoni o le manao o tagata ina ia osia ma tausia feagaiga ma le Atua? (O tali e mafai ona aofia ai le “faia o lona finagalo,” “i mea uma,” ma “i o matou aso uma o totoe.”)
-
O le fea upu po o fasifuaitau i le Mosaea 5:5 e faamanatu atu ai ia te oe ia folafolaga tatou te faafouina i taimi uma tatou te aai ai ma feinu i le faamanatuga?
-
O le a sou manatu e faapefea ona fesoasoani le osia ma le tausia o feagaiga tatou te faaauau ai pea i le faagasologa o le iloa o se suiga o le loto?
Valaaulia tamaiti e faitau le leoa le Moronae 1:11. Fai i ai e vaavaai mo se mafuaaga se tasi na faapotopoto ai e le Tupu o Peniamina ia tagata. (Ina ia avatu ai ia te i latou se igoa.) Faamatala o le Mosaea 5:7–15 o loo tusia ai le faamalamalamaga a le Tupu o Peniamina o le igoa na ia folafola atu e tuu atu i lona nuu. Tuu atu i tamaiti ni nai minute e faitau faatopetope ai i le Mosaea 5:7–14, vaavaai mo upu igoa ma le valaau. Atonu e te manao e fautua atu ia maka e tamaiti upu nei i taimi taitasi e vaaia ai.
Valaaulia ni nai tamaiti e faamatala atu pe aisea na faaigoa ai i o latou igoa. Mo se faataitaiga, e mafai ona e fesili i ai e faamatala pe na faapefea ona filifili o latou matua i le faaigoaina o i latou, pe fesili foi i ai pe i ai ni uiga faapitoa o o latou igoa. Ona fesili lea i le vasega:
-
O le a le taua o se igoa? (I luga o le laupapa, aotele ai tali a tamaiti i le fesili lea. O tali e ono aofia ai faapea o se igoa e iloa ai i tatou, e ogatusa ma lo tatou faasinomaga, o se tasi lea o auala e ese ai i tatou mai i isi, ma e tele lava ina tauaveina ai se tulaga tauleleia ma faamoemoega ona o le aiga e faasino i ai.)
Valaaulia se tamaitiiti e faitau leotele le Mosaea 5:7–8Fai i le vasega e vaavaai mo le igoa na tuu atu e le Tupu o Peniamina i lona nuu. Fai foi i ai e vaavaai mo upu ma fasifuaitau o loo ta’u mai ai le taua o lena igoa. Atonu e te manao e fautuaina i latou e maka upu na ma fasifuaitau.
-
O le a le igoa na tuu atu e le Tupu o Peniamina i lona nuu?
-
O a upu ma fasifuaitau na e matauina? O a ni mea ua aoao ai oe e na upu ma fasifuaitau e uiga i le suafa o Keriso?
-
O a taimi tatou te tauaveina ai i o tatou luga le suafa o Iesu Keriso? (Ia mautinoa ua malamalama tamaiti tatou te tauaveina i o tatou luga le suafa o Iesu Keriso pe a tatou osia ma tausia feagaiga paia.)
A o talanoaina e tamaiti nei fuaiupu, atonu e manaomia le fesoasoani ia malamalama i le aoaoga faavae faapea e mafai ona avea i tatou ma “fanau a Keriso” (Mosaea 5:7). Atonu e te manao e ta’u atu e tuu atu e se tamā le ola i se atalii. O i tatou o fanau agaga a le Tama Faalelagi. O i tatou foi o fanau a o tatou tamā faalelalolagi, o ē, faatasi ai ma o tatou tina, na tuuina mai le avanoa mo i tatou e ola ai i le fogaeleele i o tatou tino faitino. I le ta’ua ai o le Mosaea 5:7, na aoao mai ai Peresitene Iosefa Filitia Samita e faapea, o Iesu Keriso foi ua “avea mo tatou Tama” aua na Ia “ofoina mai mo i tatou le ola, le ola e faavavau, e ala i le togiola lea na ia faia mo i tatou.” Na faamalamalama e Peresitene Samita, “Ua avea i tatou o fanau, atalii ma afafine o Iesu Keriso, e ala i a tatou feagaiga o le usiusitai ia te ia” (Doctrines of Salvation, comp. Bruce R. McConkie, 3 vols. [1954–56], 1:29).
Faasino tamaiti i upu o loo i luga o le laupapa e faamatala ai le taua o se igoa.
-
E mafai faapefea ona fesoasoani upu o i luga o le laupapa tatou te malamalama ai i le taua o le tauaveina i o tatou luga o le suafa o Iesu Keriso?
Fai i tamaiti e faitau lemu le Mosaea 5:9–13 ma vaavaai mo nisi fautuaga mai le Tupu o Peniamina e uiga i le tauaveina o le suafa o Iesu Keriso i o tatou luga. Atonu e te manao e fautuaina le faitau e tamaiti o nei fuaiupu e faapei o loo tautala atu le Tupu o Peniamina ia i latou lava. Vaevae le vasega i ni paga, ma fai i ai e talanoaina fesili nei e faatatau i mea sa latou faitauina. (Atonu e te manao e tusi fesili nei i luga o le laupapa pe saunia i se pepa e tufatufa i ai.)
-
Mafaufau i le taua o le tauaveina i o tatou luga o le suafa o Keriso. O le a sou manatu o le a le uiga o le tusia o le suafa o Keriso i lou loto? O a faamanuiaga e maua e i latou ua tusia le suafa o Keriso i o latou loto?
-
Mafaufau i tagata e te iloa e faamamaluina le suafa o Keriso. O a mea e fai e nei tagata e faaalia ai le migao ma lo latou alolofa i le suafa o Keriso?
Fai i se tamaitiiti e faitau leotele le Mosaea 5:15. Valaaulia le vasega e vaavaai mo taga e iloa ai i latou o loo tausia a latou feagaiga.
-
O a ni fesili e mafai ona tatou fesili ifo ai ia i tatou lava e iloilo ai po o le a le lelei ua tatou tauaveina ai i o tatou luga le suafa o Keriso?
Faasoa o outou lagona po o le a le uiga o le tauaveina i ou lava luga le suafa o Iesu Keriso. Molimau atu i lona taua i lou olaga.
Mosaea 6:1–7
Ua amata le nofoaiga a Mosaea o se tupu
Fai i tamaiti e faitau lemu le Mosaea 6:1–3, faailoa po o le a le mea na fai e le Tupu o Peniamina a o le’i faataapeina le motu o tagata.
-
E te manatu aisea na taua ai le tusi faamaumauina o igoa o tagata uma sa ulu atu i le feagaiga? Aisea na tofia ai e le Tupu o Peniamina ia faitaulaga i le nuu?
Faamatala ina ua uma ona saunoa i tagata, ona faaee atu lea e le Tupu o Peniamina le malo i lona atalii o Mosaea. I le tolu tausaga mulimuli ane, ona maliu ai lea o le Tupu o Peniamina. Valaaulia tamaiti e faitau leotele le Mosaea 6:6–7. Fai i le vasega e vaavaai mo upu ma fasifuaitau o loo faaalia ai na mulimuli Mosaea i faataitaiga a lona tama ma sa fesoasoani o ia i tagata ia i ai pea le suiga i o latou loto.
Tala ma Faamatalaga o Talaaga
Mosaea 5:15. “Tutumau ma lē masi’i ese”
Na faamatala e Elder David A. Bednar o le Korama a Aposetolo e Toasefululua le uiga o le “tumau ma lē masi’i ese”:
“O le upu ’tutumau’ ua faaaoga e fautuaina ai le tumau i le tulaga, malo ma mautu, e le maluelue ma ua mausali (Oxford English Dictionary Online, 2nd ed. [1989], “Tutumau”). O le upu ‘lē masi’i ese’ ua faaaogaina e ta’u mai ai ua le mafetu’una’ia se tagata po o se mea, ua mautu lelei, ma ua le mafai ona toe suia. E ta’u mai ai foi le uiga auaumama o le le mafaamatuu atu ma e le mafai foi ona suia mai le faamoemoe ua i ai (Oxford English Dictionary Online, “Immovable”). O le mea lea, o se tagata ua tumau ma lē masi’iese, ua mausali, mautu, tonu a’ia’i, ma maopo lelei, ma ua le mafai ona toe suia mai se faamoemoega autu po o se misiona” (“Steadfast and Immovable, Always Abounding in Good Works,” New Era, Jan. 2008, 2).