Lesona 99: Alema 42

Lesona 99

Alema 42

Faatomuaga

Na faaiu e Alema lana apoapoaiga i lona atalii o Korianetona i le faamalamalama atu faapea o le Tama Faalelagi na sauniaina se ala mo i latou o e agasala ina ia mauaina le alofa mutimutivale. Na ia aoao atu faapea o le faamasinotonu o le Atua ua manaomia ai le aveese atu o le tagata agasala mai luma o le silafaga a le Atua. Ona ia molimau atu lea o Iesu Keriso o le a “faamalieina manaoga o le faamasinotonu” (Alema 42:15) e ala i puapuagatia mo tagata uma o e ua agasala ma i le sauniaina o le alofa mutimutivale i le tagata ua salamo.

Fautuaga mo le Aoaoga

Alema 42:1–14

Ua aoao atu e Alema Korianetona e uiga i le faamasinotonu o le Atua

Ao lei atamaina le vasega, tusi ni ata faigofie o ni seti o fua i luga o le laupapa, e pei ona faaalia i le itulau o loo sosoo ai. (Aua nei tusiina ni upu i le ata seia faatonuina i le taimi o le lesona. Atonu e te manao e uunaia tamaiti aoga e kopi le ata lenei i totonu o a latou api o le vasega po o api talaaga mo le suesueina o tusitusiga paia.)

I luga ae o ata o fua, tusi le faamatalaga lenei: Ou te manao ia tonu le Faamasinoga Mulimuli.

Fai i tamaiti e sii i luga o latou lima pe afai latou ioe i le faamatalaga o i le laupapa.

Aisea e te manao ai ia tonu le Faamasinoga Mulimuli?
O le a le uiga o le upu tonu?

Fautua atu o le upu tonu atonu o lona uiga o le mauaina o se mea na e galue i ai. O le manatu o le fai mea tonu e faatatau i le faaupuga faatusipaia o le faamasinotonu. Tusi le upu Faamasinotonu i luga o le laupapa i lalo ifo o ata o fua.

Ina ia fesoasoani i tamaiti ia malamalama i le mataupu o le faamasinotonu, fai i se tamaitiiti e faitau le faamatalaga lenei a Elder Dallin H. Oaks o le Korama a Aposetolo e Toasefululua:

“O leFaamasinotonu e tele ona faauigaga. O se tasi [o ia uiga] o le paleni. O se faatusa tautaua o le faamasinotonu o fua ia o loo paleni tutusa. O lea la, afai ua solia ia tulafono a tagata, e masani lava ona manaomia e le faamasinotonu le tuuina atu o se faasalaga, o se faasalaga o le a toe faapaleni ai [ia le fua]. …

“[O] tulafono a le Atua e tutusa lava le fesootaiga i le faamasinotonu. O le faamoemoega o le faamasinotonu o le tuuina atu lea i se tagata o se mea na ia galue i ai ma o le manatu faavae lea o loo talanoa i ai ia tusitusiga paia uma lava e uiga i le faamasinoina o le tagata e tusa ai ma a latou galuega” (“Sins, Crimes, and Atonement” [lauga i faiaoga faalelotu a le OAE, Fep. 7, 1992], 1, si.lds.org).

Faamatala atu sa popole le atalii o Alema o Korianetona e uiga i le tonu o le Faamasinoga Mulimuli. Fai i se tamaitiiti aoga e faitau leotele mai le Alema 42:1 ao vaavaaia e le vasega le mea na manatu Korianetona o se mea e le tonu, pe le talafeagai, e uiga i le Faamasinoga Mulimuli.

O le a se mea na lagona e Korianetona e le tonu? (O le a tofia, pe auina atu ia tagata agasala i se tulaga o le pagatia.)
Aisea atonu na manao ai Korianetona ina ia talitonu e le o se mea tonu le faasalaina o i latou ua agasala? (Afai e manaomia le toe faamanatu atu i tamaiti faapea o Korianetona sa tauivi ma le tele o agasala, faasino i latou i le Alema 39:2–3.)
Afai o le faamasinotonu o le mauaina lea o mea ua tonu mo i tatou ma ua faasalaina mo a tatou agasala, o faapefea lava ona avea lenei mea ma se faapopole mo i tatou? (Tatou te agasala uma lava ma e tatou te aafia i le faamalieina o le faamasinotonu.)

Aotele le Alema 42:2–11 e ala i le faamatalaina na talanoaina e Alema ia popolega o Korianetona. Na ia aoao atu o le Pau a Atamu na aumaia ai i tagata uma le tulaga o le pau lea e tatau ai ona latou tofo i le oti faaletino ma le oti faaleagaga (tagai i le Alema 42:9). Na ia faamatalaina foi a aunoa ma se auala e toefuatai mai ai mai lenei tulaga pau, o le a pagatia ia agaga o tagata uma ma vavae ese mai luma o le Atua e faavavau (tagai i le Alema 42:11).

Valaaulia se tamaitiiti aoga e faitau leotele le Alema 42:12. Faamatala atu o lenei mau o loo faamamafaina atu ai faapea o le Pau ma ona taunuuga, e aofia ai le vavae ese mai luma o le Atua, na oo mai ona o le le usitaia e Atamu o le poloaiga a le Atua. Fesoasoani i tamaiti ia malamalama afai tatou te le usiusitai i le poloaiga a le Atua—pe a tatou agasala—ua tatou tuumamaoeseina ai i tatou lava faaleagaga mai le Atua ma ua tatou tuuina atu ai i tatou lava i manaoga o le faamasinotonu. (Atonu e te manao e fai atu i se tamaitiiti aoga e faitau leotele mai le Mataupu Faavae o le Faatuatua 1:2.) Fai i tamaiti e faitau le leoa le Alema 42:14, tagai mo le taunuuga lea e manaomia e le faamasinotonu mo le le usiusitai.

O le a le uiga o le “vavae ese” mai luma o le Atua? (O le aveesea mai le Atua ma ua le mafai ona toe foi atu e nofo i Lona afioaga. Atonu e te manao e tau atu afai tatou te agasala, ua tatou aveesea mai i tatou lava mai le mafutaga a le Agaga Paia, o ia o se tasi o le Aiga Atua.)

I luga o le laupapa, faaopoopo atu i ai ia fasifuaitau Le usiusitai po o le agasala ma le Vavae ese mai luma o le Atua i le siata, e pei ona faaalia i lalo.

Ata

fua

Mai mea sa e aoaoina i le Alema 42:1–14, e faapefea ona e aoteleina i se fuaiupu se tasi po o le a le mea e manaomia mai e le tulafono o le faamasinotonu pe afai e le usiusitai se tagata? (Tusi le upu moni lenei i luga o le laupapa i lalo ifo o fua: Ona o lo tatou le usiusitai, e manaomia e le tulafono o le faamasinotonu le vavae ese o i tatou mai luma o le Atua. Atonu e te manao e fautuaina tamaiti e tusi le upu moni lenei i totonu o a latou tusitusiga paia i talaane o le Alema 42:1–14.)

Fai i tamaiti e faitau le leoa le Alema 42:18, tagai mo se isi taunuuga o le agasala.

O le a le uiga o le faanoanoa o le mafaufau?

Fai i tamaiti e mafaufau i se taimi na latou oo ai i le faanoanoa ma le faavauvau po o le leai o le Agaga Paia ona ua latou agasala. Fai atu ia i latou e mafaufau e faateleina lena lagona i mea sese uma lava sa latou faia. Ona fai atu lea ia i latou e mafaufau i lena lagona o loo tumau pea ia i latou e faavavau.

Ina ia fesoasoani i tamaiti ia malamalama ma lagona le manaomia o le alofa mutimutivale, atonu e te manao e fai atu le fesili lenei:

E tusa ai ma le mea sa e aoaoina i le Alema 42:1–14, e te manao i le Faamasinoga Mulimuli ina ia faatatau tonu lava i le faamasinotonu?

Alema 42:15–31

Ua aoao atu e Alema ia Korianetona e uiga i le fuafuaga o le alofa mutimutivale

Ina ia fesoasoani i tamaiti ia malamalama e tatau ona faamalieina ia manaoga o le faamasinotonu, faasino i le itu o faasalaga o fua o i le laupapa. Atonu e te mafaufau e uu i luga se titina e pei o le a e tapeina ia manaoga o le faamasinotonu. Fesili atu:

E i ai se auala e tapeese ai pe aveesea ai ia manaoga o le faamasinotonu? (Leai. Afai ae solia ia tulafono a le Atua, e manaomia e le faamasinotonu se faasalaga. E tatau lava ona faamalieina ia manaoga o le faamasinotonu.)

Fesoasoani atu i tamaiti ia malamalama e le talafeagai le tapeese o taunuuga ia e manaomia e le faamasinotonu. Valaaulia se tamaitiiti aoga e faitau leotele le Alema 42:25.

E tusa ai ma Alema, o le a se mea o le a tupu pe afai o le a aveesea ia taunuuga o le agasala ma ua le faamalieina le faamasinotonu?

Fai i tamaiti e mafaufau loloto i le fesili lenei ao lei tuuina atu ia i latou le mau faasino e sue ai le tali:

Afai e le mafai ona tapeese ia manaoga o le faamasinotonu, ona faapefea lea e i latou ua agasala (o i tatou taitoatasi) ona mauaina le filemu o le mafaufau ma toe faatuina i luma o le Atua? (A ua lava loa le taimi e mafaufau loloto ai tamaiti i le fesili, fai i se tamaitiiti aoga e faitau le Alema 42:15. Atonu o le a fesoasoani le faamatalaina atu faapea o le fuaitau “e faamalie ai manaoga o le faamasinotonu” o lona uiga o le totogiina lea o le tau, pe mafatia i le faasalaga, lea e manaomia e le faamasinotonu.)

E tusa ma le Alema 42:15, e mafai faapefea ona faalauaitele mai le alofa mutimutivale ia i tatou?

O le matamata i tali a tamaiti, tapeese le fuaitau “Vavae ese mai luma o le Atua” mai le laupapa ma tusi ai Togiola a Iesu Keriso ma le Alofa Mutimutivale. I lalo ifo o ata o fua, tusi ai le upu moni lenei: O le Togiola a Iesu Keriso ua faamalieina ai ia manaoga o le faamasinotonu ina ia mafai ona faalauaitele mai le alofa mutimutivale ia i tatou.

Ata

fua

O le a se a uiga ia te oe o le iloaina ua mafatia ma le naunautai le Faaola i lou tulaga ina ia mafai ai ona faalauaitele atu ia te oe le alofa mutimutivale?

Fai i tamaiti e faitau le Alema 42:22–24 ma tagai mo le mea e manaomia ina ia mafai ai ona faalauaitele mai ia i tatou le alofa mutimutivale.

O le a se mea e manaomia e i tatou e maua ai le alofa mutimutivale ma aloese mai ai i manaoga atoatoa o le faamasinotonu? (Afai ua iloaina e tamaiti o le salamo o le ala lea e mafai ai ona tatou maua le alofa mutimutivale, tusi le mataupu faavae lenei i luga o le laupapa i lalo ifo o ata o fua: Afai tatou te salamo, o le a tatou mauaina le alofa mutimutivale e ala mai i le Togiola a le Faaola. Atonu e te manao foi e fautuaina i latou e tusi i totonu o a latou tusitusiga paia i talaane o le Alema 42:22–24.

O le sou iloa o le uiga o le fuaitau “salamo moni”? (Salamo faamaoni.)
Aisea e taua ai lo tatou iloaina na mafatia le Faaola i faasalaga mo a tatou agasala i lo tatou tulaga?

Faamatala atu o Iesu Keriso o lo tatou Puluvaga. O se puluvaga o se tasi lea e tu i le va o ni tagata se toalua e fesoasoani i le foia o se faafitauli. Fai i se tamaitiiti e faitau leotele mai le saunoaga lenei a Peresitene Boyd K. Packer o le Korama a Aposetolo e Toasefululua: Fai i le vasega e faalogologo mo ni mafuaaga e manaomia ai se tagata lona tolu ina ia mafai ai ona faalauaitele mai le alofa mutimutivale i le tagata agasala:

“Ma e tusa ai ma le tulafono e faavavau, e le mafai ona faaalia le alofa mutimutivale vagana ua i ai se tasi o le ua i ai le naunau ma e mafai ona ia tauaveina a tatou aitalafu ma totogi le tau, ma faia se fuafuaga mo lo tatou togiolaina.

“Vagana ua i ai se puluvaga, vagana ua i ai sa tatou uo, ma le tulaga atoatoa o le faamasinoga tonu, o le a leai se alofa i o tatou luga. O le tulaga atoatoa mo le faaleleia o la tatou soligatulafono, e tusa lava pe itiiti, po o le a le tele, o le a faamalosia mai ia i tatou le totogi e oo i ona o’oo’oga.

“Ae ia iloa le mea lenei: o upu moni, o upu moni paia, o loo folafola mai ai o loo i ai se Puluvaga. …

“E mafai e ala mai ia te Ia ona matua faailoa mai le alofa mutimutivale ia i tatou taitoatasi e aunoa ma le solia ai o le tulafono e faavavau o le faamasinotonu. …

“O lenei faailoa mai o le alofa mutimutivale e le otometi. O le a ala mai i se feagaiga na osia ma Ia. O le i ai lea i Ona tuutuuga, i Ona tuutuuga agaalofa” (“O Le Puluvaga,” Liahona, Oketopa 1977, 55–57).

Fai i tamaiti e faitau le leoa le Alema 42:29–31, tagai mo le mea na manao i ai Alema mo Korianetona. (Atonu e te manao e fautuaina tamaiti e faailoga mea sa latou mauaina.)

O le a sou manatu o le uiga o le tuu atu i le faamasinotonu ma le alofa mutimutivale ma le puapuagatia o le Faaola e “tosina atoa ai lou loto”?

Fai i tamaiti e tusi se fuafuaga puupuu o se lesona e faaalia ai le auala e ono mafai ona latou aoao atu ai ni mataupu o le faamasinotonu ma le alofa mutimutivale i isi. Uunaia i latou e aoao atu o latou aiga i mea sa latou aoaoina i le aso.

Toe faamanatu i tamaiti e uiga i popolega o Korianetona e uiga i le tonu o le faamasinotonu o le Atua. Atonu e te manao e molimau atu faapea o le Faamasinoga Mulimuli o le a tonu ma sao ma o le a iu lava ina tatou maua mea e talafeagai mo i tatou, e tusa ai ma le faamasinotonu ma le alofa mutimutivale o le Atua. Atonu foi e te manao e faasino atu faapea na salamo Korianetona i ana agasala ma sa i ai se aafiaga lelei i le tuputupu ae o le Ekalesia (tagai i le Alema 49:30). Fai i tamaiti e mafaufau loloto i le auala atonu latou te amatalia ai lo latou lava faagasologa o le salamo.

Valaaulia ni nai tamaiti e faasoa mai lo latou agaga faafetai ma le molimau i le naunautaiga o le Faaola e togiola mo a tatou agasala ma faamalieina ia manaoga o le faamasinotonu mo i tatou. Faasoa atu lau molimau e uiga i le alofa mutimutivale ma le faaolataga o loo avanoa e ala mai i le taulaga togiola a le Faaola.

Tala ma Faamatalaga o Talaaga

Alema 42:1. O le faamasinotonu o le Atua

Na aoao mai e Elder D. Todd Christofferson o le Korama a Aposetolo e Toasefululua faapea ua na o le salamo lava e mafai ai ona maua le fiafia:

“O le fiafiaga moni o loo taoto lea i lo tatou le teenaina o le faamasinoga tonu a le Atua, po o le taumafai lea e aloese mai taunuuga o le agasala, ae o loo i le salamo ma le faamagaloga e ala i le alofa tunoa togiola a le Alo o le Atua” (“O Le Faamanuiaga o Tusitusiga Paia,” Ensign po o le Liahona, Me 2010, 34).

Alema 42:15. “Ua togiola ai e le Atua lava ia mo agasala a le lalolagi”

Ina ia fesoasoani i tamaiti ia malamalama i le fuaitau o le “Atua lava ia” ua togiola mo a tatou agasala, faitau le saunoaga lenei a Elder Jeffrey R. Holland o le Korama a Aposetolo e Toasefululua:

“O Keriso ua le gata o se puluvaga ae o se faamasino foi. O lena matafaioi o se faamasino ua tatou iloa atili ai le uiga o le faaupuga o le “Atua lava ia” o le a afio mai i lalo nei e togiola lona nuu. E foliga mai o le faamasino i lena potu faamasino tele i le lagi, na te le o talosagaina se tagata ae tau lava na o ia e tauaveina ia avega a tagata agasala o loo tutu i le uafu, ua ia tatala ese lona ofu talaloa faamasino ma afio mai i le lalolagi e tauave patino a latou ta. O Keriso o se faamasino alofa mutimutivale e matagofie ma e agalelei e pei o Keriso o se fesoasoani, puluvaga, ma le faufautua” (Christ and the New Covenant: The Messianic Message of the Book of Mormon [1997], 81).