Faatomuaga i Le Tusi a Moronae
Aisea e suesueina ai lenei tusi?
A o suesueina e tamaiti aoga le tusi a Moronae, e mafai ona latou maua le malosiaga mai faataitaiga maoae ma aoaoga a Moronae ma lona tama, o Mamona. O le a latou aoao e uiga i sauniga autu ma tu masani a le Ekalesia a Iesu Keriso; le taua o le faia o galuega amiotonu ma le manatu moni i ai; le auala e faamasino ai i le va o le lelei ma le leaga; le sootaga i le va o le faatuatua, faamoemoe, ma le alofa mama; ma le faaolaina o fanau laiti. O le a faitau foi tamaiti aoga i apoapoaiga a Moronae ina ia tatalo ia latou iloa ai mo i latou lava e moni le Tusi a Mamona (tagai Moronae 10:3–5) ma ia “o mai ia Keriso, ma faaatoatoaina ia te ia” (Moronae 10:32).
O ai na tusiaina lenei tusi?
Na tusia e Moronae lenei tusi, o loo aofia ai ana lava upu, afioga a Iesu Keriso i Ona soo sa Nifae e toasefululua (tagai Moronae 2), ma upu a lona tama, o Mamona (tagai Moronae 7–9). A o lei faaumatia sa Nifae, na auauna atu Moronae ia i latou o se taitai au ma se taitai o le Ekalesia (tagai Mamona 6:12; Moronae 8:1). E faapei o isi tusitala ma tagata autu na tuufatasia le Tusi a Mamona, o Moronae o se molimau i le Faaola. Na ia molimau mai, “Sa ou vaai ia Iesu, ma … sa ia fetalai mai ia te au faafesagai lava” (Eteru 12:39). Sa faamaoni Moronae i lana molimau, na musu e faafitia Keriso i se taimi a o fasiotia e sa Lamana sa Nifae uma lava o e le faafitia o Ia (tagai Moronae 1:1–3). I le 1823, i le 1,400 tonu lava o tausaga talu ona faamaeaina le talafaamaumau o le Tusi a Mamona, na faaali mai ai Moronae i le Perofeta o Iosefa Samita o se tagata toetu ma tauina atu ia Iosefa Samita faapea o le talafaamaumau na teuina i se mauga e latalata ane i lona aiga (tagai Iosefa Samita —Talafaasolopito 1:29–35). I lena taimi ma isi tausaga taitasi na sosoo ai e fa, na faatonutonuina ai e Moronae Iosefa Samita “e faatatau i mea o le a faia e le Alii, ma pe faapefea ma o le a le ala e taitaia ai lona malo i aso e gata ai” (Iosefa Samita—Talafaasolopito 1:54).
O ai na faatatau i ai le tusiaina o lenei tusi, ma pe aisea foi?
Na taua e Moronae, “O le a ou tusia ni nai faaopoopo itiiti, atonu o le a aoga i ou uso, o sa Lamana, i se aso i le lumanai” (Moronae 1:4; tagai foi Moronae 10:1). Na ia tautino mai foi na ia tautala atu “i tuluiga uma o le lalolagi,” ma lapatai atu faapea i le pa faamasino o le Atua, o le a tauia tagata uma e tusa ma upu na ia tusia (tagai Moronae 10:24, 27). I le sauniuniga mo lenei faamasinoga, na valaaulia ai e Moronae tagata uma ia “o mai ia Keriso” (Moronae 10:30, 32).
O anafea ma o fea foi na tusia ai lenei tusi?
Atonu lava na tusia e Moronae ma tuufaatasia lenei tusi i le va o tausaga T.A 401 ma T.A 421 (tagai Mamona 8:4–6; Moronae 10:1). Na te lei tauina mai po o fea na i ai o ia ao tusia le tusi —vagana ai sa ia fealuai solo i soo se mea e mafai ona ia alu i ai mo le puipuia o lona ola (tagai Moronae 1:1–3).
O a nisi o vaaiga iloga o lenei tusi?
O lenei tusi ua saunia ni auiliiliga e uiga i faatonuga a Iesu Keriso i Ona soo sa Nifae e toasefululua a o Ia tuuina atu ia i latou le mana e faaee ai le meaalofa o le Agaga Paia (tagai Moronae 2; tagai foi 3 Nifae 18:36–37). O loo aofia ai foi le pau lava ia o faatonuga i le Tusi a Mamona e faatatau i le taulimaina o sauniga o le perisitua ma tatalo e faaaoga i le sauniga o le faamanatuga (tagai Moronae 3–5). O isi vaaiga iloga o lenei tusi e aofia ai aoaoga a Mamona i le iloaina o le lelei mai le leaga (tagai Moronae 7:12–19), le auaunaga a agelu (tagai Moronae 7:29–39), o le alofa mama i le avea ai ma le alofa mama o Keriso (tagai Moronae 7:44–48), ma le faaolaina o fanau laiti (tagai Moronae 8). O loo aofia ai foi le faamatalaga a Mamona i le leaga o sa Nifae ma sa Lamana a o lei tauina le taua mulimuli i Kumora (tagai Moronae 9). Na faaiuina e Moronae ana lava aoaoga i meaalofa o le Agaga (tagai Moronae 10:8–26). Na ia faamaumauina foi se valaaulia, o loo maua i Moronae 10:3–5, lena e saunia se saofaga autu i le Tusi a Mamona. E tusa ai ma lenei fuaitau, na faamatala mai e Peresitene Gordon B. Hinckley “e na o le pau lea o le tusi o loo i ai i totonu se folafolaga, e mafai e le na te faitauina e ala i le mana faalelagi ona iloa ma le mautinoa lona moni” (“O Se Molimau Moni ma Faamaoni,” Liahona, Aok. 2005, 4).
1. Otootoga
Moronae 1–6 A o ia fealuai solo mo le puipuiga o lona ola, na faamaumauina e Moronae sauniga ma aoaoga o le Ekalesia a Iesu Keriso. E aofia ai le faaeeina o le meaalofa o le Agaga Paia, taulimaina o faauuga o le perisitua, faamanuiaina o le faamanatuga, ma le agavaa mo le papatisoga. O loo talanoaina foi e Moronae le fafagaina faaleagaga o tagata o le Ekalesia faapea foi faamoemoega o sauniga o le Ekalesia ma le auala e taitaia ai.
Moronae 7 O loo faamaumauina e Moronae se lauga na tuuina atu e Mamona, o le na aoao mai e uiga i le Malamalama o Keriso, le taua o le faia o le amiotonu ma le manatu moni i ai, iloaina o le eseesega i le va o le lelei ma le leaga, taofi mau i mea lelei uma, ma le sootaga i le va o le faatuatua, faamoemoe, ma le alofa.
Moronae 8–9 O loo faamaumauina e Moronae tusi mai ia Mamona e faamatalaina ai pe aisea e le manaomia ai e fanau laiti le papatisoga ma faamatalaina le leaga inosia i sa Nifae ma sa Lamana.
Moronae 10 Ua apoapoaiina e Moronae tagata uma o le a faitau i le Tusi a Mamona e tatalo ina ia iloa lona moni, ia le faafitia le mana o meaalofa a le Atua, ma ia o mai ia Keriso ma faaatoatoaina ia te ia.