Lesona 126
3 Nifae 17
Faatomuaga
A o faasolo ina faaiuina le aso muamua o le Faaola ma le au sa Nifaē, na Ia silafia e toatele na lē malamalama atoatoa i Ana fetalaiga. Na Ia aoao i latou i le auala e maua ai le malamalamaaga faaopoopo, ma sa Ia faamamafa atu le taua o le tatalo ma le mafaufau loloto. Na fetagisi tagata ina ua Ia faailoa atu faapea o le a Ia tuumuli. I le faatumulia ai i le agaalofa, na nofo ai pea le Faaola mo sina taimi teisi atu e faamalolo o latou tagata mamai, tatalo mo i latou, ma faamanuia o latou tamaiti. Na faatumulia le au sa Nifaē i le olioli.
Fautuaga mo le Aoaoga
3 Nifae 17:1–3
Ua faatonu e Iesu le au sa Nifaē e mafaufau loloto i Ana upu ma tatalo mo le malamalamaaga
Valaaulia tamaiti e vaai faalemafaufau ia i latou lava i tulaga nei: O oe ma se uo ua maua nofoa pito i luma i le konafesi aoao po o se konafesi faarisone, lea o loo saunoa mai ai le perofeta. A oulua i ai iina, ua oulua maua uma le avanoa e feiloai ai ia te ia. Ina ua uma le konafesi, ona oulua o atu lea ma lau uo i le fale.
-
O le a sou manatu i le mea o le a oulua talanoa ai ma lau uo pe a uma le fonotaga?
Toe faamanatu i tamaiti faapea, na aoao atu e Iesu Keriso le au sa Nifaē mo le tusa o le vaega tele o le aso. A o Ia sauni e tuumuli, na Ia silafia sa le’i malamalama atoatoa tagata i mea na Ia aoaoina atu. Valaaulia tamaiti aoga e faitau lē leoa le 3 Nifae 17:1–3 ma vaavaai mo mea na ta’u atu e le Faaola i le au sa Nifaē e tatau ona latou faia, ina ia mafai ai ona maua le malamalama sili atu. (Atonu e te manao e fautuaina tamaiti aoga e faailoga mea latou te mauaina.) Pe a uma ona lipoti mai e tamaiti aoga mea na latou mauaina, fesili atu:
-
O le a le uiga ina ia mafaufau loloto?
Valaaulia se tamaitiiti aoga e faitau leotele le faamatalaga lenei mai ia Peresitene Henry B. Eyring o le Au Peresitene Sili. Fai atu i le vasega e faalogologo mo mea na ia aoaoina mai e faatatau i le uiga o le mafaufau loloto.
“O le faitau, suesue, ma le manatunatu loloto e le tutusa. Tatou te faitau i upu ma mafai ona maua ai ni manatu. Tatou te suesue ma maua ai manatu ma sootaga o mau. Ae a tatou manatunatu loloto, ua tatou valaaulia faaaliga e ala i le Agaga. Ia te au, o le manatunatu loloto, o le mafaufau lea ma le tatalo ou te faia pe a uma ona ou faitau ma suesue ma le faaeteete i tusitusiga paia” (“Auauna atu ma le Agaga,” Ensign po o le Liahona, Nov. 2010, 59).
-
E te manatu e mafai faapefea ona galulue faatasi le mafaufau loloto ma le tatalo, e fesoasoani ia i tatou e malamalama ai i mea tatou te aoaoina i le lotu po o le seminare?
Faamanino atu le faatonuga a le Faaola o loo i le 3 Nephi 17:3 faapea e tatau i tagata sa Nifaē ona “saunia [o latou] mafaufau mo a taeao,” pe a Ia toe sau e a’oa’o i latou.
-
Faamata e mafai faapefea e se tagata ona saunia lona mafaufau mo le auai atu i le lotu po o le seminare?
-
O le a se eseesega e i ai, pe a tatou saunia o tatou mafaufau mo ia ituaiga avanoa e a’oa’o ai?
Ina ia fesoasoani i tamaiti aoga e faailoa mai se mataupu faavae na aoaoina i le 3 Nifae 17:1–3, tusi le faamatalaga lenei e le i uma i luga o le laupapa, ma fai atu i tamaiti aoga e faauma mai, e faalagolago i mea ua latou aoaoina.
E ala i le mafaufau loloto ma le tatalo i le Tama, e mafai ona …
E ui lava atonu e faaaoga mai e tamaiti aoga ni upu eseese, e tatau ona latou faailoa mai le mataupu faavae lenei: E ala i le mafaufau loloto ma le tatalo i le Tama, e mafai ai e i tatou ona maua le malamalamaaga sili atu.
Tusi le faamatalaga lenei i luga o le laupapa:
Saunia lo’u mafaufau a o le’i auai atu i le lotu po o le seminare
Mafaufau loloto i mea ou te faalogo ai i le lotu po o le seminare
Tatalo e uiga i mea ou te faalogo ai i le lotu po o le seminare
Valaaulia tamaiti aoga e filifili se tasi o gaoioiga ua tusia i luga o le laupapa. Tuu atu ia i latou e manatunatu e uiga i le (1) auala latou te faia ai lena mea ma le (2) auala ua fesoasoani ai ia i latou e aoao atili mai lo latou aafiaga i le lotu po o le seminare. Valaaulia ni nai tamaiti aoga e faasoa mai a latou tali i le vasega. Uunai tamaiti aoga e mafaufau i le auala atonu e mafai ona latou faaleleia atili ai se tasi o vaega e tolu, ma ia faia fuafuaga mo le auala o le a latou faia ai. Atonu e te fautua atu ina ia latou tusia a latou fuafuaga i totonu o api po o api talaaga o le suesueina o tusitusiga paia. Ta’u atu i tamaiti aoga o le isi vaega o le lesona, o le a tuuina atu ai se avanoa mo i latou e faataitai ai le mafaufau loloto.
3 Nifae 17:4–25
Ua faamalolo e le Faaola tagata mama’i o sa Nifaē, tatalo i le Tama mo tagata, ma faamanuia o latou tamaiti
Faaali atu le ata o Iesu o loo Aoao Atu i le Itulagi i Sisifo (62380; Tusi Ata o le Talalelei [2009], nu. 82). Valaaulia se tamaitiiti e faitau le 3 Nifae 17:4. Faasino i le fuaitau “o le a ou alu atu nei i le Tamā.” Fai atu i tamaiti aoga e vaai faalemafaufau ua faatoa uma lava ona latou faaaluina se aso faatasi ma le Faaola, ma ua Ia faailoa mai faapea ua o’o i le taimi mo ia e aluese ai. Valaaulia ni nai tamaiti aoga e faasoa mai lagona atonu latou te mauaina i lenei tulaga. Valaaulia se tamaitiiti e faitau leotele le 3 Nifae 17:5 ma fai atu i le vasega e faailoa mai le auala na tali atu ai tagata sa Nifaē ina ua faailoa atu e le Faaola lona faamoemoega e aluese.
Faamalamalama atu faapea ana leai manaoga amiotonu o tagata sa Nifaē, o mea na tutupu o loo faamauina i le 3 Nifae 17 ma le 18 atonu o le a le tupu lava. O lenei gaoioiga ua fuafuaina e fesoasoani ai i tamaiti aoga ina ia malamalama atoatoa i le alofa o Iesu Keriso mo Ona tagata, ma fesoasoani ia i latou taitoatasi e saili upumoni i tusitusiga paia e faatatau i uiga o Iesu Keriso. Tusi le mau taiala lenei i luga o le laupapa, ma fai atu i tamaiti aoga e kopi i totonu o api po o api talaaga o le suesueina o tusitusiga paia:
Faitau le saunoaga lenei mai ia Peresitene Ezra Taft Benson:
“E pito sili lava ma pito i faamanuiaina ma olioli le tagata e pito i latalata ona mulimuli lona olaga i faataitaiga a Keriso. E leai se faiā o lea tulaga ma oa o le lalolagi, ma le malosi, po o le lauiloa. Na o le pau le suega moni o lo tatou maoae, manuia, ma le olioli, o le tele lea e mafai ona tatou ola latalata atu ai e faapei o le Matai, o Iesu Keriso. O Ia o le ala sa’o, tumu i le upumoni, ma le olaga fetiitii” (“O Meaalofa a Iesu Keriso—ma Mea e Faamoemoeina mai ia i Tatou,” Liahona, Tes. 1987, 3).
Tuu atu i tamaiti aoga le 5 i le 10 minute e suesue lē leoa ai mau fuaitau taitasi na e tusia i luga o le laupapa. Valaaulia i latou e faailoa mai upumoni e faatatau i uiga o le Faaola. A o latou suesueina, e tatau ona latou mauaina mai pe tasi lava se upumoni mo mau fuaitau taitasi. Fai atu ia i latou e tusi i lalo upumoni ua latou mauaina.
Pe a uma suesuega a tamaiti aoga, valaaulia nisi o i latou e tusi i luga o le laupapa, i lalo o mau taiala talafeagai, se upumoni se tasi ua latou aoaoina e uiga i le Faaola. Pe a uma ona faia e tamaiti lenei gaoioiga, fai atu fesili nei:
-
Aisea e taua ai mo i tatou le iloaina o nei upumoni e uiga i le Faaola?
-
O a faamaoniga ua e mauaina faapea e manatu popole mai le Faaola i mea tatou te manaomia ma faanaunauga?
-
O a vaega o lenei tala ua sili ona faafiafiaina ai oe? Aisea?
-
Aisea e te manatu ai na faatumulia tagata i le olioli? (Tagai 3 Nifae 17:18.)
-
Aisea e te manatu ai na faatumulia le Faaola i le olioli atoatoa i lena aso? (Tagai 3 Nifae 17:20.)
Fai i tamaiti aoga e otooto mai mea ua latou aoaoina mai le 3 Nifae 17:6–25. Atonu e tuuina mai e tamaiti aoga ni tali eseese. O se tasi o upumoni atonu latou te faailoaina mai o le e lagona e le Faaola le agaalofa tele mo i tatou. Tusi lenei upumoni i luga o le laupapa. Atonu e te manao e fautua i tamaiti aoga e tusi lenei upumoni, po o se isi upumoni na latou faailoaina mai, i autafa o le 3 Nifae 17:6.
Ina ia fesoasoani i tamaiti aoga e faafetaia le auala o loo fesoasoani ai le malamalamaaga i uiga o Iesu Keriso ia i tatou, e faateleina lo tatou faatuatua, faitau le faamatalaga lenei:
“E mafai ona e faaaogaina le faatuatua ia Keriso, pe a maua le faamautinoaga o loo i ai o Ia, o se manatu sa’o o Lona uiga, ma se malamalamaaga o loo i ai o Ia, e tauivi e ola e tusa ma Lona finagalo” (Faamaoni i Le Faatuatua: O Se Tusitaiala o le Talalelei [2004], 54).
-
E faapefea e le malamalama i le natura agaalofa o le Faaola, ona fesoasoani ia te oe e faatino ai le faatuatua ia te Ia?
Faasino i le fuaitau “puapuagatia i soo se ala” o loo i le 3 Nifae 17:9.
-
O a ituaiga o ma’i e ono aofia ai i puapuagatia o “soo se tulaga”? (O ituaiga uma o ma’i faaletino, faalelagona, faalemafaufau, ma le faaleagaga.)
Fai i tamaiti aoga e mafaufau loloto i auala atonu o loo latou “puapuagatia” ai ma, mea atonu na latou talosaga i le Faaola e faamalolo ai i latou, pe ana faapea Na te faamaloloina i latou taitoatasi. Toe faamanatu ia i latou faapea, e ui e le o iinei le Faaola e auauna patino mai ia i tatou, ae o Lona mana e faamanuia ma faamalolo ai o loo maua e ala i le perisitua.
-
O ai e te alu i ai mo faamanuiaga faaleperisitua?
-
O anafea le taimi mulimuli na e lagonaina ai le uunaiga faamalolo a le Faaola i lou olaga?
Toe faamanatu i tamaiti aoga e uiga i le mataupu faavae o le mafaufau loloto na latou talanoaina i le amataga o le vasega. Fautua atu faapea o le tasi auala e mafai ai ona mafaufau loloto o le vaai faalemafaufau o i latou lava i tulaga ua faamatalaina mai i tala o tusitusiga paia o loo latou faitau i ai. Valaaulia tamaiti aoga e vaai faalemafaufau ia i latou lava o faatasi ma tagata sa Nifaē, i le taimi o mea na tutupu e pei ona faamatalaina i le 3 Nifae 17. Tuu le taimi i tamaiti e tusi ai i totonu o api po o api talaaga o le suesueina o tusitusiga paia mea atonu na latou faalogoina, vaaia, lagonaina, ma aoaoina mai, pe ana faapea na latou i ai faatasi ma sa Nifaē ma feutagai ma le Faaola i lena taimi. E mafai ona e fautua atu ia i latou e tusi e uiga i se mafatiaga o le a latou talosagaina le Faaola e faamaloloina. Pe a uma ona latou tusitusi, mafaufau e valaaulia ni nai tamaiti e faitau mea na latou tusia i le vasega. Ia mautinoa ua latou malamalama faapea, e le tatau ona latou lagona faapea e manaomia le faasoaina mai o soo se mea e patino i le tagata lava ia, pe le tatau ona faalauaiteleina.
Pe a uma ona faasoa mai e ni nai tamaiti mea na latou tusia, atonu e te manao e valaaulia se toatasi po o se toalua o i latou, e faasoa mai le auala ua latou iloa ai e alofa Iesu Keriso, ma i ai Lona lagona agaalofa mo i latou. Uunai tamaiti e mafaufau loloto i lenei lesona ma ia talitonu i le agaalofa o le Faaola, a o latou faalagolago ia te Ia mo le fesoasoaniga i o latou manaoga, vaivaiga, mafatiaga, ma tofotofoga.