2 Nifae 32

Faatomuaga

Ina ua uma ona aoao atu Nifae e uiga i le “ala lauitiiti ma le vaapiapi e tau atu i le ola e faavavau” (2 Nifae 31:18), na ia iloaina sa tuu fesili lona nuu pe o a mea e tatau ona latou faia pe a amata i luga o lena ala. Sa ia taliina a latou fesili e ala i le uunaia o i latou ia “taumamafa i afioga a Keriso” ma “tatalo e le aunoa” (2 Nifae 32:3, 9). Na ia faamautinoa atu ia i latou afai o le a latou faia nei mea, o le a fesoasoani le Agaga Paia ia i latou ia iloaina mea e ao ona fai.

Fautuaga mo le Aoaoga

2 Nifae 32:1–7

Ua fautua mai Nifae ia i tatou ia saili atu i le taitaiga faalelagi e ala i afioga a Iesu Keriso ma uunaiga a le Agaga Paia

Valaaulia tamaiti aoga ia mafaufau i se taimi na latou faamalamalamaina ai le ala e sau ai mai le tasi nofoaga i le isi. Fai atu ia i latou e faamalamalama mai pe aisea sa faigofie ai pe faigata ai foi ona tuu atu na taitaiga.

Faamanatu atu i tamaiti aoga e faapea i le lesona na sei mavae atu, sa latou suesueina ai taitaiga na tuu atu e Nifae i lona nuu. Ina ua uma ona faasoa atu nei taitaiga, sa ia faapea mai, “O le ala lenei” (2 Nifae 31:21). Ina ia fesoasoani i tamaiti aoga e iloilo mea na latou aoaoina, ia fai atu i ai fesili nei:

Afai tatou te mulimuli i taitaiga a Nifae, o fea o le a latou taitai atu i ai i tatou? (I le ola e faavavau; tagai i le 2 Nifae 31:20.)
E tusa ai ma le 2 Nifae 31:17–18, e faapefea ona tatou amata i luga o le ala lea e tau atu i le ola e faavavau?

Faamalamalama atu e faapea o le 2 Nifae 32 o se faaauauga o aoaoga a Nifae i le 2 Nifae 31. Fai atu i tamaiti aoga e tagai i le 2 Nifae 32:1 mo se fesili lea sa i ai i le nuu o Nifae e tusa ai ma mea na ia aoao atu ia i latou. Valaaulia ni nai tamaiti aoga e faamatala lenei fesili i a latou lava upu. (Ia mautinoa ua malamalama tamaiti aoga e faapea na tuu fesili tagata pe o a mea e tatau ona latou faia pe a uma ona latou amata i luga o le ala i le ola e faavavau.)

Valaaulia se tamaitiiti aoga e faitau leotele le 2 Nifae 32:2–3. Fai atu i le vasega e tagai mo le tali a Nifae i le fesili a tagata. Faailoa atu o le 2 Nifae 32:3 o se mau tauloto. E mafai ona e uunaia tamaiti aoga e faailoga lenei mau i se ala e iloagofie ai ina ia faigofie ona latou mauaina.

O a upu i le 2 Nifae 32:3 o loo faamatala ai le auala e tatau ona tatou maua ai afioga a Keriso? E faapefea ona ese le taumamafa mai le tau ina tofo?
O le a sou manatu i le uiga o le taumamafa i afioga a Keriso?
O le a le tala a Nifae e uiga i le taunuuga o le a oo i ai pe a tatou taumamafa i afioga a Keriso?
O a nisi o nofoaga e mafai ona tatou maua ai afioga a Iesu Keriso? (O tali e mafai ona aofia ai tusitusiga paia, o upu a perofeta o aso nei, ma musumusuga mai le Agaga Paia.)

Faamautinoa ua malamalama tamaiti aoga e faapea pe a tatou taumamafa i afioga a Keriso, o le a tau mai e afioga a Keriso ia i tatou mea uma e tatau ona tatou faia.

Ina ia fesoasoani i tamaiti aoga e mafaufau pe faape’i le lelei o lo latou taumamafa i afioga a Iesu Keriso, faitau atu i ai le lisi lenei, ma taofi i aitema taitasi. Fai atu i tamaiti aoga e tusi le lisi i a latou api talaaga mo le suesueina o tusitusiga paia po o le api e tusi ai faamatalaga i le vasega po o se fasi pepa.

Suesuega faaletagata lava ia o tusitusiga paia
Sauniga faamanatuga
Konafesi aoao
Suesuega faaleaiga o tusitusiga paia
Seminare
Afiafi faaleaiga
Fonotaga a le korama a le Perisitua Arona po o le vasega a Tamaitai Talavou
Tatalo faaletagata lava ia

Valaaulia tamaiti aoga e mafaufau pe faape’i le lelei latou te sailia ai afioga a Iesu Keriso i mea taitasi o faatulagaga nei. Mo aitema taitasi, tuu atu ia i latou e tusi ai le taumafa, sina tofo, po o le matelaina. Mo se faataitaiga, e mafai ona taumafa se tamaitiiti aoga i suesuega faaletagata lava ia o tusitusiga paia ae na o sina tofo lava i konafesi aoao. O se tamaitiiti aoga e le o gauai atu i le sauniga faamanatuga e mafai ona tusia le upu matelaina e sosoo ma lena aitema.

Fai atu i tamaiti aoga e filifili se tasi o gaoioiga lea o loo latou ta’u na ona “sina tofo” i ai po o “matelaina” ai foi i le taimi nei, ma valaaulia i latou e fai ni sini o le a fesoasoani ai ia i latou e atili “taumamafa ai i afioga a Keriso” i lena faatulagaga. (E mafai ona e uunaia i latou e mafaufau i a latou sini o le Tiute i le Atua po o le Alualu i Luma o le Tagata Lava Ia e fesootai ma nei sini).

Ina ia faamalosia le malamalama o tamaiti aoga i o latou tiutetauave e saili le taitaiga patino mai le Agaga Paia, tuu atu ia i latou e faitau le leoa le 2 Nifae 32:4–7. Ona fai atu lea ia i latou e talanoaina ia fesili nei ma se paga. (Atonu e te manao e tuuina atu nei fesili i luga o se tufaaga pe tusi i luga o le laupapa a o lei amataina le vasega.)

I le fuaiupu 4, o le a sou manatu i le uiga o le “ole atu” po o le “tu’itu’i atu”? O le a le tala a Nifae e uiga i taunuuga o i latou o le a le ole atu pe tu’itu’i atu?
O le a le faamanuiaga ua folafola mai e Nifae e mafai ona tatou maua pe a tatou talia le Agaga Paia?
Aisea na faanoanoa ai Nifae mo lona nuu?

Faailoa atu lou talitonuga e faapea a o taumamafa tamaiti aoga i afioga a Iesu Keriso, o le a fesoasoani le Agaga Paia ia i latou e mulimuli i le ala i le ola e faavavau.

2 Nifae 32:8–9

Ua fautua mai Nifae ia i tatou ia tatalo e le aunoa

Faamalamalama atu e faapea na sosoo ai ma le taulai atu o Nifae i le mea e tasi e mafai ona tatou faia e maua ai afioga a Iesu Keriso. Valaaulia tamaiti aoga e faitau le leoa le 2 Nifae 32:8, tagai mo mea na fai mai Nifae e tatau ona tatou faia. A uma ona latou faailoa maia le tali, fai atu ia fesili nei e fesoasoani ai ia i latou e mafaufau loloto i le taua o le tatalo:

Aisea e te manatu ai e finagalo le Agaga Paia ia tatou tatalo?
Aisea e te manatu ai e le manao Satani ia tatou tatalo? O a ni auala e ono taumafai ai Satani e faatalitonu tagata ia aua nei tatalo?

Valaaulia se tamaitiiti aoga e faitau leotele le 2 Nifae 32:9. Faailoa atu o le 2 Nifae 32:8–9 o se mau tauloto. Atonu e te manao e fautua atu i tamaiti aoga e faailoga lenei mau i se ala e iloagofie ai ina ia faigofie ona latou mauaina.

E faafia ona tatou tatalo? O le a sou manatu i le uiga o le “tatalo e le aunoa”?

Faasoa atu le saunoaga lenei a Elder David A. Bednar o le Korama a Aposetolo e Toasefululua: (Afai e mafai, ia fai ni kopi o le upusii lenei ina ia mafai ona faitau faatasi ma tamaiti aoga ma taulai atu ai i upu a Elder Bednar. Afai e te faia ni kopi, ia matau o le upusii o loo faaauau i se taimi o mulimuli mai i le lesona pe a uma sina talanoaga puupuu. Faaaofia ai foi ma lena vaega o le saunoaga.) Valaaulia tamaiti aoga e faalogo mo le fautuaga a Elder Bednar pe faapefea ona “tatalo e le aunoa.”

Ata

Elder David A. Bednar

“Atonu o loo i ai ni mea i o tatou uiga faaalia, i a tatou amioga, pe faatatau i lo tatou tuputupu ae faaleagaga lea e manaomia ai ona tatou talanoa ma le Tama Faalelagi i le tatalo i le taeao. …

“I le gasologa o le aso, tatou te teuina pea se tatalo i o tatou loto mo se fesoasoani ma se tomatauga faifai pea. …

“Tatou te matauina i le aso tonu lava lea e i ai taimi semanu tatou te soona tautala ai ona ua masani ai, ae e lei tupu; pe atonu na tauau ai tatou te feitai, ae e lei tupu foi. Tatou te iloatino lava le fesoasoani faalelagi ma le malosi, ma tatou iloaina ma le lotomaualalo ia tali i a tatou tatalo. E oo lava i lena taimi ua iloaina ai, tatou te ofo atu ai lava se tatalo le leoa o le agaga faafetai” (“Tatalo e le Aunoa,” Ensign po o le Liahona, Nov. 2008, 41–42).

Ina ia fesoasoani i tamaiti aoga ia mafaufau loloto i lenei fautuaga, fesili atu i ai:

E mafai ona e mafaufau i ni taimi o lenei aso po o ni aso talu ai lea semanu e mafai ona e mulimuli ai i le fautuaga lenei mai ia Elder Bednar? (Atonu e te manao e fai atu i tamaiti aoga e mafaufau loloto lemu i lenei fesili nai lo le tali leotele mai.)

Faaauau pea ona faitau le fautuaga a Elder Bednar:

“I le faaiuga o le aso, tatou te toe tootutuli ai foi ma toe lipoti atu i lo tatou Tama. Tatou te toe iloiloina mea na tutupu o le aso ma faailoa atu le faafetai mai le taele o o tatou loto mo faamanuiaga atoa ai ma fesoasoaniga na tatou maua. Tatou te salamo ma, faatasi ai ma le fesoasoaniga a le Agaga o le Alii, iloa auala e mafai ai ona tatou faia ma lelei atili ai taeao. O lea, ua fausia ai a tatou tatalo o le afiafi i luga o a tatou tatalo o le taeao, ma o se faaauauga lena. Ma o a tatou tatalo o le afiafi o se sauniuniga foi lea mo tatalo anoa o le taeao.

“O tatalo o le taeao ma le afiafi—atoa ai ma tatalo uma i le va—e le o ni mea ua tuueseese e le feaiaa’i; ae, e fesootai faatasi i aso taitasi ma aluga o aso, vaiaso, masina, e oo lava i tausaga. O le auala lea e faataunuu ai i vaega le apoapoaiga faatusitusiga paia ia ‘tatalo e le aunoa’ (Luka 21:36; 3 Nifae 18:15, 18; MF&F 31:12). O ia tatalo anoa o ni meafaigaluega i le mauaina o faamanuiaga aupito sili ona maualuluga o loo faapolopolo e le Atua mo Ana fanau faamaoni” (“Tatalo e le Aunoa,” 42).

Ina ia fesoasoani i tamaiti aoga ia malamalama i le vaega mulimuli o le 2 Nifae 32:9, ia faamalamalama atu i ai o le upu faapaia o lona uiga “ia faasaina, ia faia ia paia, pe ia avea ma tagata amiotonu” (Taiala i Tusitusiga Paia, “Faapaia, Tulafono o le Faapaiaga,” scriptures.lds.org).

Aisea e tatau ona tatou tatalo ai i soo se taimi tatou te “faatino ai soo se mea i le Alii”?
O le a sou manatu i le uiga o le faapaiaina e le Alii o mea tatou te faia mo le manuia o o tatou agaga?
E mafai faapefea e le fautuaga a Elder Bednar ona fesoasoani ia i tatou ia ola i se olaga e sili atu ona faapaiaina?

Molimau atu e faapea a tatou tatalo e le aunoa, o le a mafai ona tatou faia mea uma ua finagalo le Alii tatou te faia mo le manuia o o tatou agaga.

Ata

Elder Spencer J. Condie

Ina ia aotele mea na talanoaina e tamaiti aoga i lenei lesona, faasoa atu le saunoaga lenei a Elder Spencer J. Condie o le Fitugafulu:

“Atonu e te feagai ma ni faaiuga e faatatau i se misiona, sau galuega i le lumanai, ma, mulimuli ane, o se faaipoipoga. A e faitau i tusitusiga paia ma tatalo mo se taitaiga, atonu e te le vaai tino i le tali i se ituaiga o upu ua lomia i luga o itulau, ae a o e faitau o le a e mauaina ni uunaiga uigaese, ma ni musumusuga, ma, e pei ona folafola mai, o le Agaga Paia ‘o le a faaali mai e ia ia te outou mea uma e tatau ona faia.’ [2 Nifae 32:5.]” (“O Le Avea ma Faamanuiaga Tele i o Tatou Uso a Tagata,” Liahona, Iul. 2002, 50).

Mau Tauloto—2 Nifae 32:3

Fai atu i tamaiti aoga po o le a le umi latou te manatu e mafai ona latou faaaluina e tauloto ai le 2 Nifae 32:3 pe a latou taulotoina i taimi taitasi latou te aai ai. Luiina i latou e toe iloilo lenei mau—taumamafa i afioga a Keriso—i taimi taitasi latou te taumafaina ai se meaai mo ni nai aso o sosoo ai. A uma ona latou taulotoina le fuaiupu, valaaulia i latou e lipoti mai pe fia ni taumafataga na faaaluina ai.

Mau Tauloto—2 Nifae 32:8–9

Fai atu i tamaiti aoga pe sa latou taumafai e fai se tatalo i o latou loto mo se aso atoa po o se vaiaso atoa. Valaaulia i latou e faasoa mai o latou aafiaga. Valaaulia le vasega e mafaufau i ni auala e mafai ai ona latou “tatalo e le aunoa” mo le isi 24 itula. Lui i latou e fai ma lipoti mai o latou aafiaga i le amataga o le vasega e sosoo ai.

Manatua: Afai e le lava se taimi e faaaoga ai ni manatu faaleaoaoga i lenei lesona, mafaufau ia faaaogaina o ni iloiloga i lesona o lumanai.

Tala ma Faamatalaga o Talaaga

2 Nifae 32:2. O le a le uiga o le tautala i le gagana a agelu?

Atonu e tuufesili nisi po o le a le uiga o le “tautala i le gagana a agelu.” Sa aoao mai Peresitene Boyd K. Packer e faapea o le tautatala i gagana a agelu “o lona uiga e mafai ona e tautala i le mana o le Agaga Paia” (“O Le Meaalofa o le Agaga Paia: O Le Mea e Ao Ona Silafia e Tagata Uma o le Ekalesia,” Liahona, Aok. 2006, 19).

2 Nifae 32:3. O le a sou manatu i le uiga o le taumamafa i afioga a Keriso?

Sa aoao mai Elder Russell M. Nelson o le Korama a Aposetolo e Toasefululua: “O le taumafa o lona uiga e sili atu nai lo le na ona tofo. O le taumafa o lona uiga o le fiafia i ai. Tatou te fiafia i tusitusiga paia e ala i le suesue i ai i se agaga o mea fou matagofie ua maua atoa ma le usitai faamaoni. Pe a tatou taumamafa i afioga a Keriso, o lona uiga ua tusia ai “i papatusi maa o le loto.’ [2 Korinito 3:3.] E avea ai ia mea ma se vaega taua o o tatou natura” (“Ola i le Taitaiga Faatusitusiga Paia,” Liahona, Ian. 2001, 21).

Sa fautua mai foi Elder Robert D. Hales, o le Korama a Aposetolo e Toasefululua, e faapea, “Afai ta te taumamafa i afioga a Keriso, e tatau la ona ta suesue i tusitusiga paia ma teuloto Ana afioga e ala i le mafaufau loloto i ai ma avea o se vaega o manatu uma ma amioga” (“Faamaloloina o le Agaga ma le Tino,” Liahona, Ian. 1999, 16).