Lesona 115

Helamana 15–16

Faatomuaga

Sa lapataiina e Samuelu le sa Lamana ia sa Nifae e faapea, afai latou te le salamo, o le a faaumatia i latou. Sa ia folafola atu o le a faaumiumi e le Alii ia aso o sa Lamana, o e sa sili atu ona amiotonu nai lo sa Nifae. Sa talitonu nisi o sa Nifae i aoaoga a Samuelu ma sa papatisoina ai e Nifae. O i latou o e sa le’i talitonu ia Samuelu sa taumafai e fasioti o ia. Ae sa puipuia Samuelu e le mana o le Atua, ma toe foi atu ai i lona lava nuu.

Fautuaga mo le Aoaoga

Helamana 15

Ua lapataia e Samuelu ia sa Nifae ma faamatala atu le avea o sa Lamana ma tagata o le folafolaga

Faitau leotele faamatalaga nei:

O se tasi o alii talavou sa tausia e ni matua e le auai i le Ekalesia ma sa le’i faamamafaina atu i ai aoaoga a Iesu Keriso. Sa laua faatagaina o ia e inu ava malosi, o se amioga sa ia faaauauina i le kolisi. Ona feiloai atu lea o ia i faifeautalai o le Au Paia o Aso e Gata Ai. Ina ua uma ona latou feiloai ma faifeautalai mo ni nai taimi, sa tautino atu o ia e lafoai le inu ava malosi. O ni nai aso mulimuli ane, sa i ai faatasi o ia ma se vaega o ana uo. Sa latou ofo atu ia te ia se mea inu malosi.

O se isi alii talavou sa ola ae i se aiga o le Au Paia o Aso e Gata Ai. Sa fai e ona matua a latou afiafi faaleaiga ma suesue faaleaiga i tusitusiga paia. Sa ia atinaeina se masani o le suesue i aso uma i tusitusiga paia ma tatalo a le tagata lava ia. Sa auai i le Peraimeri, auauna atu i korama a le Perisitua Arona, ma faauu mai le seminare, maua se malamalamaaga i poloaiga ma ala a le Alii. A o aoga ai i le kolisi, sa ia faia ni faauoga fou. I se tasi po sa ofo atu ai ia te ia e sana uo se mea inu malosi.

• Mata o le taliaina o le mea inu malosi o le a avea ma se solitulafono mamafa a le alii talavou muamua po o le lona lua? Aisea pe aisea foi e leai ai?

Tusi le faamatalaga lenei i luga o le laupapa:

Tulaga faaleagaga o sa Nifae—Helamana 15:1–3, 17

Tulaga faaleagaga o sa Lamana—Helamana 15:4–6

Fai atu i tagata o le vasega e faitau filemu fuaitau o mau o loo lisiina i luga o le laupapa. (Ae latou te le’i faitaua, atonu e te manao e tata’i atu o latou mafaufau i le upu migao i le Helamana 15:5. Ina ia faia se mea ma le migao o lona uiga o le faia ma le faaeteete tele.) Fai atu i tagata o le vasega e tusi ni fuaiupu se lua—o le tasi e otooto ai le tulaga faaleagaga o sa Nifae ma le isi e otooto ai le tulaga faaleagaga o sa Lamana. A ua lava loa se taimi sa tuu i ai, ia fesili atu:

• O ai o alii talavou e toalua sa tatou talanoaina i le amataga o le lesona e talitutusa ma sa Nifae o loo faamatalaina i nei fuaiupu? O ai e talitutusa ma sa Lamana?

• E ui ina sa i ai se talaaga umi o le amioleaga o sa Lamana, ae aisea sa mafai ai ona latou maua le tele o faamanuiaga?

• Aisea na oo ai sa Nifae i le matautia o le faatamaiaina?

• E mafai faapefea ona avea le aoaiga a le Alii ma se faailoga o Lona alofa? (Atonu e te manaomia ona faamalamalama atu o le upu aoaiga o lona uiga o le faasa’o o se tagata e ala i le faasalaina po o se ituaiga mafatiaga foi.)

Tusi le faamatalaga lenei i luga o le laupapa:

A iloa e tagata le upumoni ma talitonu i tusitusiga paia, e taitaiina atu i latou i … ma le … , lea e aumai …

Fai atu i tagata o le vasega e faitau filemu le Helamana 15:7, ma vaavaai pe mafai faapefea ona latou faaumaina ia faamatalaga o loo i luga o le laupapa. A ua lava se taimi na tuu atu i ai, fai atu i nai tagata o le vasega pe o le a sa latou faaumaga o le faamatalaga. (Mo se faataitaiga, e ono ta’ua e tagata o le vasega le mataupu faavae lenei: A iloa e tagata upumoni ma talitonu i tusitusiga paia, e taitaiina atu i latou i le faatuatua ma le salamo, lea e aumai ai se suiga o le loto.)

Fai atu i se tagata o le vasega e faitau leotele le Helamana 15:8. Fai atu i le vasega e mulimuli i le faitauga, ma vaavaai mo le faamatalaina e Samuelu o sa Lamana o e sa oo i ai se suiga o le loto. (Sa latou “tutumau ma mausali i le faatuatua.”)

Tuu atu i tagata o le vasega se taimi e mafaufau loloto ai pe ua taitaiina atu i latou e le suesueina o tusitusiga paia ina ia maua ai se faatuatua sili atu i le Alii. Fai atu foi ia i latou e mafaufau loloto pe o lenei mea ua taitai atu ai i latou ia tutumau ma mausali i le faatuatua. Mafaufau e fai atu i se tagata e toatasi pe toalua e faamatala atu le auala ua faateleina ai e le suesue i tusitusiga paia o latou faatuatua ia Iesu Keriso.

Tata’i atu mafaufau o tagata o le vasega i le Helamana 15:9–17. Faamatala atu i nei fuaiupu, o le upu outou e faatatau ia sa Nifae ae o upu latou e faatatau ia sa Lamana. Faitau leotele fuaiupu nei i le vasega, ma malolo pe a manaomia e tuuina atu ni faamalamalamaga pe tali ni fesili. Ona tuu atu lea i tagata o le vasega le taimi e toe tilotilo ai i fuaiupu ma tusi se fuaiupu e faaalia ai se upumoni o loo aoao mai i nei fuaiupu.

Fai atu i nisi o tagata o le vasega e faitau mea ua latou tusia. Faatasi ai ma isi upumoni, e ono tusia e tagata o le vasega se mea faapei o lenei: Afai e le talitonu tagata ina ua uma ona latou maua le atoatoaga o le talalelei, o le a latou maua se tausalaga sili atu. Atonu e te manao e fautua atu i tagata o le vasega e tusi lenei upumoni i totonu o a latou tusitusiga paia i autafa o le Helamana 15:9–17.

A o talanoaina e tagata o le vasega lenei upumoni, ia faamamafa atu ia faamanuiaga maoae e oo mai mai le malamalama ma le ola ai i le talalelei i le taimi nei. O aoaoga a Samuelu e le mafai ona tuusaunoa ai se tagata fou o le Ekalesia e fai le agasala. Pe latou te faatatau foi faapea e mafai ona tatou aloese ai mai le tali atu ma le tausalaga e ala i le mumusu e aoao e uiga i le talalelei. E ui e moni o le i ai o se malamalamaaga o le talalelei e taitai atu ai i le faateleina o le tali atu pe a tatou faia se mea sese, ae e taitai atu ai foi i le malosi sili atu i a tatou taumafaiga e fai le mea sa’o. Ma pe a tatou mulimuli i le finagalo o le Atua ma fesoasoani i isi ia fai foi o lea, Na te faamanuiaina i tatou i le filemu ma le fiafia lea e le mafai ona tatou mauaina i se isi lava ala.

Helamana 16

O i latou o e talitonu ia Samuelu sa salamo ma ua papatisoina, ae o isi sa faamaaa lava o latou loto

Faaali atu se ata o le Peresitene o loo i ai nei o Le Ekalesia a Iesu Keriso o le Au Paia o Aso e Gata Ai. Fai atu i tagata o le vaega e faamatala ni auala eseese ua latou vaai ai i tagata (i totonu ma fafo o le Ekalesia) o tali atu i savali a le perofeta.

Fai atu i le afa o le vasega e faitau filemu le Helamana 16:1–5, ma vaavaai mo gaoioiga a tagata o e sa talitonu i le savali a Samuelu. Fai atu i le isi afa o le vasega e faitau filemu le Helamana 16:2–3, 6–7, ma vaavaai mo gaoioiga a tagata o e sa le talitonu i le savali a Samuelu. (Atonu e te manao e tusi nei mau i luga o le laupapa.) Fai atu i ni nai tagata o le vasega e lipoti atu mea ua latou aoaoina.

• Aisea e te manatu ai sa tali atu ai tagata i perofeta ma a latou savali i ni auala eseese?

• E te manatu, aisea e feita ai nisi o tagata pe a tuuina atu e perofeta ia fautuaga e pei o upu o loo i le tamaitusi Mo Le Malosi o le Autalavou?

Fai atu i se tagata o le vasega e faitau le saunoaga lea a Peresitene Ezra Taft Benson:

Peresitene Ezra Taft Benson

“Ina ua ta’u atu e perofeta agasala a le lalolagi, o tagata o le lalolagi, nai lo le salamo i a latou agasala, a le o le manao e faatapuni le fofoga o le perofeta po o le amio foi e pei lava e le’i i ai le perofeta. O le lauiloa e le’i avea lava ma se suega o le upumoni. E toatele perofeta ua fasiotia pe tutulia i fafo. A o tatou latalata atu i le afio mai faalua o le Alii, e mafai ona e iloa, a o faateteleina le amioleaga o tagata o le lalolagi, o le a faaitiitia ai foi le lauiloa o perofeta ia i latou” (The Teachings of Ezra Taft Benson [1988], 133).

• O a nisi o faataitaiga o tagata e mulimuli i fautuaga a perofeta e ui lava ina teena na fautuaga e isi tagata?

Fai atu i tagata o le vasega e tapuni a latou tusitusiga paia. Fai atu i se tamaitiiti e toatasi e susue ana tusitusiga paia ma faitau mai le Helamana 16:13–14 a o faalogologo isi tagata o le vasega. Fai atu i le vasega po o le a so latou mafaufau o le a se tali o le a tali ai le au le talitonu i nei faailoga ma faaaliga.

Fai atu i tagata o le vasega e susue a latou tusitusiga paia ma mulimuli i le faitauga a o e faitau atu le Helamana 16:15–16 ia i latou. Ona fai atu lea i ai e vaai faalemafaufau e faapea, ua faatagaina i latou e talanoa ma tagata sa i Saraemila i le taimi sa tuuina atu ai faailoga. Fai atu ia i latou e mafaufau i fesili o le a latou mananao e fai atu i se tagata talitonu po o se tagata e le talitonu. A uma ona tuu atu se taimi i tagata o le vasega e mafaufau ai i ni fesili, ona fai atu lea i ni isi o i latou e faasoa atu a latou fesili i le vasega.

Fai atu i tagata o le vasega e mafaufau loloto i le fesili lenei ae aua le tali leotele mai i ai:

• Afai sa e i ai iina ma molimauina na faailoga ma mea ofoofogia, o le a sou manatu, o le a sau tali i ai?

A uma se taimi na tuu atu e mafaufau loloto ai tagata o le vasega, ia fesili atu:

• E tusa ai ma le Helamana 16:16, aisea na teena ai e nisi o tagata le faataunuuga o valoaga a perofeta e aofia ai ma faailoga mai le lagi?

Tuu atu i tagata o le vasega ni nai minute e faitau filemu ai le Helamana 16:17–21, ma vaavaai mo ni ‘alofaga faaopoopo e fai e tagata amioletonu mo le le talitonu i valoaga a Samuelu. Valaau atu i ni nai tagata o le vasega e ta’u atu po o a ‘alofaga na latou maua i nei fuaiupu.

• O le fea o nei ‘alofaga po o finauga faasaga i perofeta e te manatu e sili ona taatele i o tatou vaitaimi?

Fai atu i se tagata e faitau leotele le Helamana 16:22–23, ma fai atu i le vasega e vaavaai po o le a le mea sa tupu ina ua faaauau e le toatele ona le amanaia lapataiga a Samuelu. Fai atu i le vasega e lipoti atu i mea na latou maua.

• O le a le mea e tupu ia i tatou pe afai tatou te teena perofeta a le Alii o aso e gata ai?

A o tali atu le vasega, ia faamamafa atu le mataupu faavae lenei: A tatou teena molimau a le Alii, ua tatou faatagaina Satani e uumau i o tatou loto. (Atonu e te manao e tusi lenei faamatalaga i luga o le laupapa.)

Ina ia faamaeaina le lesona o le asō, fai atu i se tagata o le vasega e faitau le faamatalaga lenei mai ia Peresitene Henry B. Eyring o le Au Peresitene Sili. Fai atu i isi tagata uma o le vasega e faalogo mo le mea o loo tatou filifilia moni pe a tatou teenaina fautuaga mai le Atua, o le tele lava e ala mai i perofeta o aso e gata ai:

“A tatou teenaina le fautuaga lea e mai le Atua, tatou te le filifili la ia tutoatasi i aafiaga o loo i fafo atu. Tatou te filifilia se isi aafiaga. Tatou te teenaina le puipuiga a se Tama Faalelagi e atoatoa lona alofa, e i ai le mana uma, ma o lona faamoemoega atoa lava, e pei ona i ai Lona Alo Pele,o le tuuina mai lea ia i tatou o le ola faavavau, ia tuu mai ai ia i tatou mea uma o loo ia te Ia, ma toe aumaia i tatou i lona afioaga o ni aiga i aao o Lona alofa. A teenaina Lana fautuaga, ua tatou filifilia le aafiaga a se isi mana, o lona faamoemoega o le aumaia lea o le faanoanoa ma o ona faamoemoega e inosia lea. Ua ia i tatou le filifiliga saoloto o se meaalofa a le Atua. O le aia lena tatou te filifili ai ina ia tatou saoloto mai aafiaga, o le aia lena e le mafai ona aveesea lea tatou te gauai atu ai po o fea o na mana tatou te filifilia” (“Mauaina O Le Saogalemu i Fautuaga,” Liahona, Iulai 1997, 29).

• E tusa ai ma le saunoaga a Peresitene Eyring, o le a tonu le mea o loo tatou filifilia pe afai tatou te teena le fautuaga mai le Atua ma Ana perofeta?

Fai atu i tagata o le vasega e mafaufau filemu pe na faamaaa o latou loto i soo se itu i fautuaga ua tuuina mai e le Atua e ala i perofeta ma aposetolo. Uunai i latou ia tutumau ma mausali i le ola ai i le talalelei ma i le gauai atu ai i fautuaga a le Alii mai Ana perofeta. Molimau atu e uiga i upumoni sa outou talanoaina i lenei lesona.

Toeiloiloina o le Helamana

Faaalu sina taimi e fesoasoani ai i tagata o le vasega e fai se aotelega o le tusi a Helamana. Fai atu ia i latou e mafaufau i mea ua latou aoaoina mai lenei tusi, i suesuega i tusitusiga paia i le seminare ma a latou lava suesuega faaletagata lava ia. Fai atu ia i latou e aotele faapuupuu nisi o otootoga o mataupu i le Helamana e fesoasoani latou te manatua ai. Fai atu i nisi o tamaiti e faasoa atu ni mea mai le Helamana sa musuia ai i latou pe ua fesoasoani ia i latou e maua ai se faatuatua sili atu ia Iesu Keriso. A ua lava se taimi na tuu atu i ai, fai atu i nisi o tamaiti e faasoa atu o latou manatu ma lagona.

Tala ma Faamatalaga o Talaaga

Helamana 15:3–4. O le alofa paia o le Atua

E ono fesili tagata o le vasega e uiga i le faamatalaga a Samuelu e faapea, sa alofa le Alii ia sa Nifae ae inoino ia sa Lamana (tagai i le Helamana 15:3–4). E alofa le Alii i tagata uma ae e le taliaina le agasala. Sa aoao mai Samuelu, “Sa inoino o ia ia sa Lamana ona sa leaga e le aunoa a latou mea sa fai,” ae sa fai mai foi o Ia, sa “faalevalevaina e le Alii o latou aso” ina ia mafai ona latou maua le talalelei (tagai i le Helamana 15:4).

Sa molimau mai Elder Russell M. Nelson o le Korama a Aposetolo e Toasefululua e uiga i le alofa o le Faaola mo tagata uma ma aoao mai e faapea, o faamanuiaga atoatoa o le alofa paia o le Alii e na o i latou lava o e taumafai e tausi Ana poloaiga ma salamo ia latou agasala e oo mai i ai:

“O le alofa paia e le muta ma e aoao. E alofa le Faaola i le au paia ma tagata agasala. Na faamautu mai e le Aposetolo o Ioane, ‘Ua tatou alolofa ia te ia, aua na ia muai alofa mai ia te i tatou.’[1 Ioane 4:19.] Ma Nifae, ina ua vaai i le faaaliga i le galuega a le Alii i le tino, sa tautino mai: ‘Ma o le lalolagi, ona o lo latou amioletonu, o le a faamasino ia te ia o se meanoa; o le mea lea latou te sasa ai ia te ia, ae tuu atu e ia i ai. Ioe, latou te tuufeanu ia te ia, ae tuu atu e ia i ai, ona o lona agalelei alofa ma lona tali-tiga i le fanauga a tagata.[1 Nifae 19:9; ua faaopoopo faatusilima.] Ua tatou iloa le lautele o le alofa o le Togiola aua sa maliu o Ia ina ia toe ola ai o e uma e oti.

“… O le matala atoa o le alofa paia ma o tatou faamanuiaga silisili mai lena alofa e le faatuaoia—e faavae lea i lo tatou usiusitai i le tulafono e faavavau” (“Alofa Faalelagi,” Liahona, Fep. 2003, 12–15).