Alema 56–58

Faatomuaga

Na tau Helamana ma Kapeteni Moronae ma sa Lamana i vaega eseese o le laueleele. Na auina atu e Helamana ia Moronae se tusi e faamatala ai ia taua a lana autau ma sa Lamana ma faailoa atu lona talitonuina o le faatuatua o le autau malolosi e 2,060 lea na auai faatasi ma lana autau. Na faamatalaina foi e Helamana le mea na faia e lana autau e manumalo ai i taua ma le mauaina o le faamoemoe ma le malosi i taimi o o latou mafatiaga.

Fautuaga mo le Aoaoga

Alema 56

Ua manumalo ia autau a Anetipa ma Helamana i autau sili ona malolosi a sa Lamana

Fesili atu i tamaiti pe sa i ai se taimi sa latou mauaina ai se tusi po o se savali lea na faamalosia ai i latou ina ia onosaia se faigata faapitoa. Faamalamalama atu o le Alema 56–58 o loo aofia ai ni anotusi o se savali, po o se tusi, lea na tusia e Helamana ia Kapeteni Moronae i le taimi o se periota faigata o taua. Fai i tamaiti e faitau le leoa le Alema 59:1–2 e iloa ai le auala na tali ai e Kapeteni Moronae le tusi. Fautuaina tamaiti aoga ao latou suesue i le tusi ina ia matau mai ia mafuaaga na olioli ai Kapeteni Moronae e ui i tulaga faigata na ia oo i ai.

Aotele mai le Alema 56:2–17 e ala i le faamatala mai na taitaiina e Helamana se tamai autau e 2,000 o atalii o tagata Aneti-Nifae-Lifae, po o le nuu o Amona. O nei fitafita e masani lava ona faasino i ai o le autau talavou malolosi e 2,000. (Atonu e te manao e faamatala atu o le upu talavou o lona uiga e laitiiti.) O matua o nei alii talavou na osi feagaiga e le toe fetagofi lava i a latou auupega o le taua. O alii talavou la, o e e lei noatia i lenei lava feagaiga, na ofo mai e puipuia o latou matua ma isi sa Nifae ina ua faamatauina i latou e autau a sa Lamana.

Faamatala atu na taitaia e Helamana le autau talavou malolosi e 2,000 i le aai o Iutaia e fesoasoani i le autau a sa Nifae lea na taitaia e Anetipa. Na mauaina e sa Lamana le tele o aai o sa Nifae ma na faaitiitia le autau a Anetipa. Na fiafia le autau a Anetipa ina ua taunuu atu Helamana ma lana autau e fesoasoani.

Fai i tamaiti e faitau le leoa le Alema 53:17–21, vaavaai mo upu ma fuaitau e faamatalaina ai le malosi faaleagaga lea a aumai e nei alii talavou i le autau. Ao latou faitau, kopi le siata lenei i luga o le laupapa: Valaaulia nisi o tamaiti aoga e o mai i le laupapa ma tusi ni upu ma ni fuaitau sa latou mauaina i lalo o le ulutala “Ao lei amataina le taua”.

Ata

ata o le fitafita

O le a sou manatu o le uiga o le tala a Helamana ina ua ia faamatalaina le autau talavou e 2,000 o ni “alii o le faamaoni ma le mamalu”? (Atonu e te manao e faamatala mai o le upu mamalu e faailoa ai le faamaoni, toafimalie, ma le loto pulea patino.)
E mafai faapefea e uiga o loo lisiina i luga o le laupapa ona fesoasoani ia i tatou e fetaiai ai ma taua faaleagaga ma isi luitau?

Aotele faapuupuu mai le amataga o le taua muamua a le autau malolosi talavou o i le Alema 56:29–43. Na faaaoga e Anetipa le autau totoa e 2,000 a Helamana e avea o se togafiti e tatai mai ai i fafo o le aai o Anetipara le autau sili ona malolosi a sa Lamana. O le toatele o le autau a sa Lamana na o ese mai Anetipara i le tuliloaina o le autau a Helamana, ma maua ai e le autau a Anetipa le avanoa e mulimuli atu ai ma osofaia i latou mai tua. Ina ua maua e le autau a Anetipa le autau a sa Lamana, sa latou osofaia loa e tusa ai ma la latou fuafuaga. Ina ua taofia e le autau a sa Lamana le latou tuliloaga o le autau a Helamana, sa le iloa e Helamana pe o taumafai le autau a sa Lamana e faaosooso ana fitafita i se mailei pe le o osofaia mai e le autau a Anetipa ia sa Lamana mai tua. Na filifili Helamana ma ana fitafita talavou pe faaauau pea ona sosola pe osofaia loa sa Lamana.

Valaaulia tamaiti e faitau le leoa le Alema 56:44–48. Fai atu ia i latou e tagai i ni upu ma ni fuaitau e faailoa ai le faamaoniga o le auala na faatino ai e nei alii talavou le faatuatua. Fai i ni nai tamaiti aoga e tusi ni mea sa latou mauaina i luga o le laupapa i lalo o le ulutala “I le taimi o le taua”.

O le a se mea e lei masalosalo i ai nei alii talavou? (O le a laveaiina i latou e le Atua.)
Aisea latou te lei masalosalo ai o le a laveaiina i latou e le Atua?
Na faapefea ona fesoasoani ni uiga na latou atinaeina ao lei amataina taua ia i latou i le taimi o le taua?

Tusi le upu moni lenei i luga o le laupapa: Afai tatou te galulue i le faatuatua, o le a mafai ona tatou maua le malosi mai le Atua. Fai i tamaiti e vaai mo le faamaoniga o lenei upumoni ao latou suesueina le Alema 56.

Aotele mai le Alema 56:49–53 e ala i le faamatalaina faapea na maua atu e le autau a Helamana le autau a Anetipa o i se tulaga faigata. Na maliliu Anetipa ma le toatele o isi taitai o le autau, ma na vaivai ma le mautonu sa Nifae ma ua lata i le toilalo.

Valaaulia se tamaitiiti aoga e faitau leotele le Alema 56:54–56. Fai i le vasega e mulimuli i le faitauga, tagai i le auala na faamanuia ai e le Atua ia fitafita a Helamana ona o lo latou faatuatua.

O le a sou manatu na faapefea ona saofaga atu ia uiga faaleagaga o i le laupapa i mea na tutupu o loo faamaumauina i le Alema 56:56?
O anafea na e galue ai i le faatuatua po o se tasi e te iloa ma maua ai le malosi mai le Atua i se tulaga faigata?

Alema 57

Na toe maua e Helamana ma lana autau talavou malolosi le aai o Kumenae ma ua faasoaina i le taua

Faamalamalama atu o le Alema 57 o se faaauauina o le tusi a Helamana ia Kapeteni Moronae. O loo amataina i se faamatalaga e uiga ia sa Nifae ma le toe mauaina o aai mai ia sa Lamana. I lenei vaitaimi, na maua ai e Helamana ni alii e 6,000 e faamalosia ai lana autau, faatasi ai ma le isi 60 o atalii o tagata o le nuu o Amona. Na maua foi e sa Lamana ni faamalosiauga ma faaauau ai pea ona tuiolo malolosi ia aai ia na latou mauaina.

Faasino atu i se tasi o taua, na toeitiiti lava a faatoilaloina e sa Lamana ia sa Nifae (tagai i le Alema 57:18). Fai i tamaiti e faitau le leoa le Alema 57:19–22, tagai mo le mafuaaga na mafai ai ona manumalo sa Nifae.

Aisea na mafai ai e sa Nifae ona manumalo ia sa Lamana?
Fai mai Helamana ona sa “usiusitai ma tausisi [ana fitafita] e fai upu uma o poloaiga ma le sao atoatoa” (Alema 57:21). O le a sou manatu i le uiga o lenei saunoaga?Na faapefea ona avea lenei usiusitai ma faaaliga o lo latou faatuatua?

Ina ia faaopoopo i ai fesili nei i tali a tamaiti, faitau le saunoaga lenei mai ia Elder Russell M. Nelson o le Korama a Aposetolo e Toasefululua:

Ata

Elder Russell M. Nelson

“O le a [e] filifili po o le fea poloaiga latou te tausia ae le ano i isi poloaiga latou te fili e soli. Ou te taua lenei mea o le ‘ai filifili i poloaiga e usitai i ai. O lenei faiga o le ilo ma filifili o le a le manuia. O le a oo atu ai i le faanoanoa. Ina ia saunia e fetaiai ma le Atua, o lea e tausi ai e se tagata ia Ana poloaiga uma. E manaomia ai le faatuatua e usitaia ai, ma o le tausia o Ana poloaiga o le a faamalosia ai lena faatuatua” (“Faasaga Atu ma le Faatuatua i le Lumanai,” Ensign po o le Liahona, Me 2011, 34).

Valaaulia se tamaitiiti aoga e faitau leotele le Alema 57:23–27. Fai i le vasega e tagai i le auala na laveaiina ai e le Alii ia fitafita talavou a Helamana ma pe aisea na Ia laveaiina ai i latou. Ina ia fesoasoani ia i latou e talanoa i mea sa latou mauaina, fai atu ia fesili tulitatao nei:

E uiga ia ana fitafita, na fai mai ai Helamana faapea, “Na mausali o latou mafaufau.” O le a sou manatu i le uiga o lenei saunoaga?Aisea e manaomia ai lo tatou tausia ia mausali o tatou mafaufau pe a tatou feagai ai ma luitau?
Na faapefea ona faaalia e fitafita a Helamana lo latou “tuuina atu pea e le aunoa o lo latou faatuatua i le Atua”?

Atonu o le a fesoasoani le faamatalaina faapea i nisi o tulaga, o le a pagatia pe feoti foi ia tagata amiotonu, e pei foi ona pagatia ia fitafita talavou ma e pei lava foi ona fasiotia ia nisi o le autau a sa Nifae. Ae peitai, o le a faamamaluina pea e le aunoa e le Atua i latou o e faamamalu ia te Ia, ma o le a faamanuiaina tagata amiotonu o e na feoti.

O a ni tulaga tutusa o e vaaia i le va o taua a fitafita talavou ma o latou fili faapea o tatou taua ma le fili?

Valaaulia se tamaitiiti aoga e faitau leotele mai le faamatalaga lenei mai ia Elder M. Russell Ballard o le Korama a Aposetolo e Toasefululua:

“O aso nei o lo o tatou tauina ai se taua, e tele atu auala e sili ai ona matautia … nai lo le taua i le va o sa Nifae ma sa Lamana. O lo tatou fili e atamai ma e tele ana auala. Tatou te faasaga tau atu ia Lusifelo, le tama o pepelo uma, o le fili o mea lelei ma mea tonu ma mea paia uma. …

“… Ua tatou tau ma le faamaoni mo agaga o tagata. O le fili e le alofa ma e le faavaivai. O loo ia aveina atu pagota e faavavau i se televave maoae lava. Ma na te le o faaalia mai lava ni foliga o le faavaivai.

“A o tatou faaalia le agaga faafetai tele i le toatele o tagata o le Ekalesia o e o loo faia mea e tele mo le taua mo le upumoni ma le mea sao, ou te fia tau atu ma le faamaoni ia te outou, e le o taitai ona lava. Tatou te manaomia nisi fesoasoani se tele atu. … Matou te manaomia outou.E pei o le 2,000 fitafita totoa talavou a Helamana, …e mafai foi ona faauuina outou i le mana e fausia ai ma leoleoina ai Lona malo. Matou te manaomia ona outou osia feagaiga paia, e pei ona latou faia. Matou te manaomia ona outou usiusitai ma faatuatua atoatoa, e pei ona sa i ai i latou” (“O Se Tupulaga Sili ona Maoae o Faifeautalai,” Ensign po o le Liahona, Nov. 2002, 46–49).

Tusi le faamatalaga lenei i luga o le laupapa: Afai tatou te faalagolago i le Alii ma usiusitai ia te Ia ma le atoatoa, …

E tusa ai ma mea ua e faitauina e uiga i fitafita a Helamana, e faapefea ona e faamaeaina le fuaiupu lenei? (Faamaea le fuaiupu o i le laupapa e tusa ai ma fautuaga mai tamaiti aoga. Mo se faataitaiga, e mafai ona e tusia le upumoni lenei: Afai tatou te faalagolago i le Alii ma usiusitai ia te Ia ma le sao atoatoa, o le a Ia lagolagoina i tatou i o tatou taua.)

Fai i tamaiti e toe mafaufau i se taimi na latou usiusitai ai ma le atoatoa po o se tagata foi latou te iloa i se tulaga faigata i le aoga, i le aiga, po o se nofoaga faaagafesootai. Fai i ni nai tamaiti e faasoa mai ni o latou aafiaga. Fesili atu pe na faapefea ona fesoasoani le Alii ia i latou i lea tulaga.

Tuu atu i tamaiti se taimi e tusi ai i totonu o a latou api o le vasega po o api talaaga mo le suesueina o tusitusiga paia ia mea o le a latou faia e usiusitai ai i poloaiga a le Atua “ma le sao atoatoa” (Alema 57:21) ma “tuu atu o latou faalagolago i le Atua e le aunoa” (Alema 57:27).

Alema 58

Na faalagolago ia fitafita sa Nifae o le a laveaiina i latou e le Atua i o latou puapuaga

Faamalamalama atua o le Alema 58 o loo aofia ai le faaiuga o le tusi a Helamana ia Moronae. Na faamatala e Helamana le ala na fetaiai ai autau a sa Nifae ma tulaga faigata lea na atili faafaigata ai ia tulaga ogaoga lea ua leva ona feagai ma i latou. Fai i ni nai tamaiti e auauai e faitau leotele mai le Alema 58:2, 6–9, ma fai atu i le vasega e faailoa mai na tulaga faigata (o le le lava o meaai, leai ni ono malolosi, fefefe o le a faaumatiaina i latou e o latou fili).

Fai atu i tamaiti e faitau le leoa le Alema 58:10–12, vaavaai mo tali i fesili nei. (Tusi fesili nei i luga o le laupapa ao lei amataina le vasega. Faitau fesili i le vasega ae latou te lei faitauina ia fuaitau o mau, ona iloiloina lea faatasi ma i latou pe a uma ona latou faitaua. O le a fesoasoani lenei mea i tamaiti e taulai atu ai i le ala na tali atu ai le autau a Helamana i lenei taimi faigata.)

O le a se mea na faia e sa Nifae ina ua latou feagai ma lenei tulaga faigata?

Na faapefea ona tali mai le Alii i a latou olega ma tatalo faamaoni?

Na faapefea e faamautinoaga a le Alii ona fesoasoani ia Helamana ma lana autau?

Fai i tamaiti e aotele mai se upumoni sa latou aoaoina mai le Alema 58:10–12. (Atonu e eseese upu o le a faaaogaina e tamaiti aoga, ae ia faamautinoa atu latou te faailoa mai le mataupu faavae lenei: Afai tatou te liliu atu i le Atua i taimi faigata, o le a mafai ona tatou maua le faamautinoaga paia lea e mafai ona faamalosia ai lo tatou faatuatua ma aumaia ia i tatou le faamoemoe.)

O ana fea na faamanuia ai oe e le Alii i le filemu ma le faamautinoaga i le taimi o se aafiaga faigata?

Faamalamalama atu o le vaega o totoe o le Alema 58 o loo toe faamatala ai ia taumafaiga faamanuiaina a le autau a sa Nifae ina ia toe maua mai ia aai ia na ave e sa Lamana (tagai i le Alema 58:31). Valaaulia se tamaitiiti aoga e faitau leotele le Alema 58:39–40.

Na faapefea ona faaalia e le autau talavou a Helamana lo latou faatuatua i le Atua, e ui i “manua e tele” na latou mauaina?
Ao tou feagai ai ma luitau o le olaga, e mafai faapefea ona faamanuia oe mai le mulimuli i faataitaiga o atalii a Helamana?

Faaiu e ala i le faasoaina atu o lau molimau e uiga i mataupu faavae na aoaoina i lenei lesona.