Lesona 4: Itulau Autu, Faatomuaga, ma Mau a Molimau

Lesona 4

Itulau Autu, Faatomuaga, ma Mau a Molimau

Faatomuaga

A o e aoaoina atu le Tusi a Mamona, o le a e fesoasoani i tamaiti aoga ia maua upu moni o le a aumaia faalatalata atili ai i latou i le Atua. Mai le amataga o le tusi, e manino lava na naunau tusitala o le Tusi a Mamona e molimau mai o Iesu o le Keriso. Ua toe faamautinoa mai foi e le tusi ia feagaiga a le Atua ma le aiga o Isaraelu ma faaali mai le manaomia ona osia ma tausia e fanau uma a le Atua ia feagaiga paia. Ao suesue ma le agaga tatalo tamaiti aoga i le Tusi a Mamona, o le a latou mauaina se molimau sili atu o le talalelei a Iesu Keriso ma le Toefuataiina o Lana Ekalesia i aso e gata ai. O le a latou aoao ai foi e faaaoga le faatuatua sili atu ia Iesu Keriso ma Lana Togiola.

Fautuaga mo le Aoaoga

O fautuaga mo le aoaoina atu o lenei lesona e ono umi atu le taimi e aoao atu ai nai lo le taimi faaatulagaina mo lau vasega. Mafaufau ma le agaga tatalo po o a ni vaega e sili ona manaomia e lau vasega.

Itulau Autu

Valaaulia tamaiti aoga e sue i le itulau autu o le Tusi a Mamona. O lenei itulau e amata i upu “O le Tusi a Mamona, o se tala na tusia e le lima o Mamona i luga o papatusi na sii mai papatusi a Nifae.” Sa faamalamalama mai e le perofeta o Iosefa Samita le mafuaaga o le itulau autu.

“O le itulau autu o le Tusi a Mamona o se faaliliuga sao lava, sa aumaia mai le itulau mulimuli lava, o le itu agavale o le … tusi o papatusi, lea o loo i ai le faamaumauga ua faaliliuina, … ma … o le itulau autu e le o se tuufaatasiga faaonaponei, e au po o se isi lava tagata na soifua po o loo soifua foi i lenei tupulaga” (i le History of the Church, 1:71).

Valaaulia ia tamaiti aoga e faitau lemu le itulau autu o le Tusi a Mamona. Fai atu ia i latou e vaavaai mo fuaiupu o loo ta’ua ai ia faamoemoega o le Tusi a Mamona. (Atonu e te manao e tuuina atu i tamaiti aoga o se faaataataga o nei faamoemoega o loo faaalia o ni mea o le a “faaalia” e le Tusi a Mamona ia i latou o e faitau i ai.) Valaaulia ni nai tamaiti aoga e tusi a latou sailiiliga i luga o le laupapa. A maea ona, fai atu lea i tamaiti aoga e toe faitau ia i latou lava le palakalafa lona lua, ma tuu i ai o latou igoa e suitulaga i le “toe vaega o le Aiga o Isaraelu”

A o e faitau i le Tusi a Mamona, o le fea o nei faamoemoega ua faataunuuina i lou olaga? Na faapefea ona faataunuuina?
E faapefea ona fesoasoani ia te oe ia iloa o i latou o osia feagaiga ma le Alii ua le “lafoaiina ese e faavavau”?

Fai atu i tamaiti aoga atonu o le a i ai ni taimi latou te lagona ai le tuuatoatasi po o le “lafoaiina ese.”

Aisea e taua ai le iloa i taimi faapenei e le o “lafoaiina ese [outou] e faavavau”?
E faapefea ona avea lenei folafolaga ma faaaliga o le alofa o le Atua mo oe?

Ina ia fesoasoani i tamaiti aoga e faafetaia le faamoemoega autu o le Tusi a Mamona, fai atu i se tamaitiiti aoga e faitau le faamatalaga mai ia Peresitene Ezra Taft Benson:

Ata

Peresitene Ezra Taft Benson

“O le misiona autu a le Tusi a Mamona, e pei ona tusia i ona itulau autu,‘o le faatalitonuina lea o tagata Iutaia ma tagata o Nuu Ese o Iesu o le Keriso lea, le Atua e Faavavau, ua faaali mai o ia i atunuu uma.’

“E mafai e soo se tasi faamaoni e saili i le upu moni, ona ia maua le molimau o Iesu o le Keriso, pe a ia manatunatu ma le agaga tatalo i upu musuia o le Tusi a Mamona.

“E sili atu ma le afa ia fuaiupu uma o le Tusi a Mamona e faatatau i lo tatou Alii. E sili atu le tele o suafa ua taua ai Keriso i fuaiupu o le Tusi a Mamona, nai lo le Feagaiga Fou.

“E sili atu i le 100 suafa eseese ua taua ai o ia i le Tusi a Mamona. E i ai se uiga taua faapitoa o Lona natura paia, ua faamatala mai i ia igoa taitasi” (“O Mai ia Keriso,” Liahona, Ian. 1988, 83).

Faasoa atu lau molimau o le Tusi a Mamona o se molimau o Iesu o le Keriso.

Faatomuaga i le Tusi a Mamona

Tusi i luga o le laupapa se ata o se faitotoa faaofuofu (vaai i le ata o loo i ai), pe fai se faatusa o se faitotoa faaofuofu mai se laupapa po o nisi mea.

Ata

faitotoa maa faaofuofu

Fai atu i se tamaitiiti aoga e faitau leotele le faamatalaga mai ia Iosefa Samita i le faatomuaga o le Tusi a Mamona (tagai i le palakalafa ono). Atonu e te manao e fautuaina ia tamaiti aoga e faailoga le faamatalaga i totonu o a latou tusitusiga paia.

O le a le faamoemoega o se maaauau?

Faamalamalama atu o le maaauau o le maa ogatotonu lea i luga o le faitotoa faaofuofu. A fausiaina se faitotoa faaofuofu, e fausia i luga ia itu e lua faatasi ai ma lagolago e taofiaina. O le avanoa pito i luga o le faitotoa e fuaina ma le faaeteete, ma e tipiina le maaauau ina ia fetaui tonu lava i ai. A tuu loa i ai le maaauau i lona tulaga, o le a mafai loa ona tu le faitotoa faaofuofu e aunoa ma se lagolago.

O le a le mea e tupu i le faitotoa faaofuofu pe a aveese le maaauau? (Afai o loo e faaaogaina se mea faitino, ia faaali atu e ala i lou aveesea o le maaauau)
E faapefea ona galue le Tusi a Mamona e pei o se maaauau e faatatau lea i le talalelei toefuataiina?

Valaaulia se tamaitiiti aoga e faitau leotele le faamatalaga mai ia Peresitene Ezra Taft Benson. (Atonu e te manao e saunia le faamatalaga i luga o se pepa e tufa atu mo tamaiti aoga e tuu i totonu o a latou tusitusiga paia. I le isi itu, atonu e te manao e valaaulia tamaiti aoga e tusi le saunoaga a Peresitene Benson i a latou tusitusiga paia, i luga po o lalo o le itulau muamua o le faatomuaga.)

“O loo i ai ala e tolu ua avea ai le Tusi a Mamona ma maaauau o la tatou faatuatuaga. O le maaauau lea i lona molimau mai o Keriso. O le maaauau lea o a tatou mataupu. O le maaauau lea o la tatou molimau” (“O Le Tusi a Mamona —O Le Maa’au’au o lo Tatou Faatuatuaga,” Liahona, Ian. 1987, 6).

Ina ia fesoasoani i tamaiti aoga ia malamalama pe faapefea ona avea le Tusi a Mamona ma maaauau o le molimau, valaaulia se tamaitiiti aoga e faitau le faamatalaga lenei a Peresitene Benson:

“O le Tusi a Mamona o le maaauau lea o le molimau. E faapei ona pau le faitotoa faataliolio faaafa masina pe a aveese le maaauau, e faapea foi mea uma lava ua aoaoina ma faia e le Ekalesia pe a ave ese le moni o le Tusi a Mamona. … ae a faapea ua moni le Tusi a Mamona … e tatau i le tagata ona ia talia talitonuga o le toefuataiga faapea ma mataupu uma ua ala mai ai” (“O Le Tusi a Mamona—O Le Maaauau o lo Tatou Faatuatuaga,” 6).

Na faapefea ona uunaia e lau molimau i le Tusi a Mamona lau molimau o aoaoga faavae ma mataupu faavae o le talalelei?
Na faapefea ona aumai faalatalata oe i le Atua e le Tusi a Mamona?

Atonu e te manao e faamatala atu le auala na faamalosia ai e lau suesuega i le Tusi a Mamona lau molimau ma aumai faalatalata atili ai oe i le Atua.

Valaaulia tamaiti aoga e auai i se faatinoga o se tala. Fai i ai e mafaufau o loo latou tuuina atu se Tusi a Mamona i se tasi e le auai i le Ekalesia. Fesoasoani ia i latou e saunia mo le faatinoga o le tala e ala i le vaevaeina o i latou i ni vaega se lua. Fai atu i le vaega muamua e faitau ia palakalafa e 2–4 o le faatomuaga o le Tusi a Mamona. Fai atu i le vaega e lua e faitau ia palakalafa 5–8. Fai atu i vaega uma e lua e vaavaai mo ni faamatalaga latou te lagona e taua le faasoa atu pe a aoao atu e uiga i le Tusi a Mamona.

A uma ona tuuina atu se taimi i tamaiti aoga e suesue ai ma saunia ai, valaaulia se tamaitiiti aoga e sau i luma o le vasega e faatino le vaega a se tagata e le auai i le Ekalesia. Ia tofu mai vaega e lua ma se tamaitiiti aoga e sau i luma o le vasega. Faamalamalama atu o le a avea nei tamaiti aoga e toalua ma soa faifeautalai. O le a la faaaogaina mea sa maua mai e le latou vaega i le faatomuaga e aoao ai le tamaitiiti aoga muamua e uiga i le Tusi a Mamona.

A maea ona faatinoina e tamaiti aoga le tala, atonu o le a e manao e fesili atu i le isi vaega atoa o le vasega pe e i ai nisi aitema mai le faatomuaga latou te mananao e faasoa atu pe ana filifilia i latou e faiaoga.

Atonu e te fia faailoa atu faapea o le Tusi a Mamona e le o folafolaina maia le tuuina atu o se talafaasolopito o tagata uma sa nonofo muamua i le Itulagi i Sisifo. Ua na o se faamaumauga lava o e tupuaga mai ia Liae (o le au sa Nifae ma le au sa Lamana) ma le nuu o Iareto. Atonu na i ai nisi tagata na nofoia ia konetineta i le Itulagi i Sisifo ao lumanai, faia, ma maea ai o mea ia na tutupu o loo faamaumauina i le Tusi a Mamona.

Valaaulia ia tamaiti aoga e faitau lemu le Moronae 10:3–5 .

E tusa ai ma Moronae, e faapefea ona tatou iloa o le Tusi a Mamona e moni?

Valaaulia tamaiti aoga e faitau ia palakalafa 8–9 i le faatomuaga o le Tusi a Mamona. Fai atu ia i latou e vaai mo upumoni faaopoopo e tolu lea o le a latou maua ai se molimau pe a latou taliaina le lu’i a Moronae.

Molimau atu i tamaiti aoga faapea a tatou faitau, mafaufau loloto, ma tatalo e uiga i le Tusi a Mamona, o le a molimau mai le Agaga Paia e moni, o Iesu o le Keriso, o Iosefa Samita o se perofeta a le Atua, ma o Le Ekalesia a Iesu Keriso o le Au Paia o Aso e Gata Ai o le malo lea o le Alii i luga o le fogaeleele.

Mau a Molimau e Toatolu ma le Molimau a le Toavalu

Fai atu i tamaiti aoga e vaai faalemafaufau faapea sa latou molimauina se tasi o loo gaoia se mea taua mai le fale o lo latou tuaoi.

I le foiaina o se solitulafono, aisea e taua ai le i ai o se molimau?
Aisea e lelei ai le tele atu o molimau nai lo le tasi?

Fai atu i tamaiti aoga e faitau le leoa “Le Mau a Molimau e Toatolu”. Valaaulia i latou e vaai mo ni fuaiupu e faapitoa lava le taua ia i latou. Atonu e te fia fautuaina i latou e faailoga nei fuaiupu.

O a fuaiupu sa e faailogaina? Aisea e taua ai ia te oe? (Atonu e te fia faailoa atu o le siufofoga o le Atua sa folafolaina atu i Molimau e Toatolu o papatusi na faaliliuina e ala i le meaalofa ma le mana o le Atua)

Fai atu i se tamaitiiti aoga e faitau leotele “Le Mau a Molimau e Toavalu”. Valaaulia le vasega atoa e faalogologo mo ni mea e eseese ai i le va o mau a Molimau e Toatolu ma le Toavalu.

O a ni eseesega sa e matauina?

Valaaulia tamaiti aoga e tusi i lalo a latou molimau po o lagona e uiga i le Tusi a Mamona. Atonu latou te fia mananao e tusi i totonu o a latou api talaaga mo le suesueina o tusitusiga paia po o se itulau avanoa i totonu o a latou tusitusiga paia. Atonu e lagona e nisi o tamaiti aoga lo latou lei iloaina lava o le moni o le Tusi a Mamona. Faamalosiau atu ia i latou ia saili ia maua se molimau i lenei tausaga.

Tala ma Faamatalaga o Talaaga

Itulau Autu

E mafai ona fesoasoani ia faauigaga nei pe a suesueina le itulau autu o le Tusi a Mamona.

O Le Aiga o Isaraelu e faatatau i e tupuga mai ia Aperaamo, Isaako, ma Iakopo. O le atalii o le atalii o Aperaamo o Iakopo, o le na suia lona igoa ia Isaraelu, e toasefululua ona atalii. O e na tupuga mai ia i latou ua lauiloa o ituaiga e sefululua o Isaraelu. I le avea ai ma fanau a Aperaamo, o le Aiga o Isaraelu na avea foi ma nuu o le feagaiga a le Alii. I lenei vaitaimi, o le Aiga o Isaraelu e aofia ai i latou e osia feagaiga ma le Alii ma tausia Ana poloaiga. “O le mea lea, o le igoa Isaraelu e masani ona faaaogaina e faailoa ai (1) le alii o Iakopo, (2) e tupuga moni lava mai ia Iakopo, ma (3) e talitonu moni ia Keriso, po o le a lava lo latou tupuaga po o nuu e nonofo ai” (Bible Dictionary, “Isaraelu”).

O Tagata Iutaia na muai faatatau lava i soo se tasi mai le ituaiga o Iuta (o se tasi o ituaiga e sefululua o Isaraelu). Ua faauigaina o soo se tasi lava mai le malo o Iuta (i vaitaimi o le Feagaiga Tuai, o le vaega i saute o le malo ua vaeluaina o Isaraelu), e tusa lava pe latou te le o mai le ituaiga o Iuta. E faatatau foi i “tagata o ola i tapuaiga, ituaiga o olaga, ma tu ma aga faa-Iutaia ae atonu o se Iutaia i lona fanau mai pe leai foi” (Taiala i Tusitusiga Paia, “Tagata Iutaia,” scriptures.lds.org).

Nuuese o lona uiga “o malo.” E faasino ia i (1) latou o e e le o le aiga o Isaraelu, (2) latou o e le talitonu i le Atua o Isaraelu, po o e e le o mauaina le talalelei, e tusa po o le a lo latou gafa, ma (3) tagata o e le mai le, pe le o nonofo i le laueleele o Iuta. Mo se faataitaiga, o tagata femalagaai ma tagata fai mai e ta’ua o tagata o Nuuese i le 1 Nifae 13:3–13. O i latou o e na aumaia le Tusi a Mamona ua taua o Nuuese i le 1 Nifae 13:34. O le Mataupu Faavae ma Feagaiga ma le Penina Tau Tele, sa faapea foi ona aumaia e Nuuese (tagai i le 1 Nifae 13:39). O le Iunaite Setete o Amerika ua taua o se malo nuuese i le 1 Nifae 13:34, 39.

O se otootoga o se tusiga o se mea ua faapuupuu.

O se toe vaega o le vaega o totoe. I le itulau autu o le Tusi a Mamona, o le fuaitau “o se toe vaega o le Aiga o Isaraelu” e faatatau i tagata ua faataapeapeina o Isaraelu ma a latou fanau. Ao faaiuina faamaumauga a Moronae ma faamaufaailogaina papatusi auro ina ia aumaia i aso e gata ai, na faapitoa lava lona popole i sa Lamana o soifua ma o latou tupuaga, ia na faapea mai lona tama o se “toe vaega o le aiga o Isaraelu” (Mamona 7:1). Na tulimatai atu le vaai a Moronae i se aso o le a toe talia ai le talalelei a Iesu Keriso e sa Lamana (tagai i le Moronae 1:4).

Folasaga. O tupuaga o aso-nei o Sa Lamana

O sa Lamana o loo aofia ai tuaa o Initia Amerika. Ae ui i lea, e le o faapea mai le Tusi a Mamona o Initia Amerika uma o tupuaga o sa Lamana. Na saunoa mai Peresitene Anthony W. Ivins o le Au Peresitene Sili:

“E tatau ona tatou faaeteete i a tatou faaiuga tatou te faia. O le Tusi a Mamona o loo aoao mai ai le talafaasolopito o tagata ma’oti e toatolu … o e na o mai i lenei konetineta mai le lalolagi tuai. E le o ta’u mai ai faapea, sa leai se tasi iinei na muamua mai ia i latou. E le o ta’u mai ai faapea e lei o mai ni tagata mulimuli ane. Ma o lea, afai na i ai ni mea fou na maua o loo ta’u mai ai le eseesega i le amataga o ni tagata lanu, e faigofie lava ona mafai ona tusia se tala, ma alagatatau ai, aua ua tatou talitonu na i ai isi tagata na o mai i lenei konetineta” (i le Conference Report, Apr. 1929, 15).

Mau a Molimau e Toatolu. “Faaliliuina e ala i le meaalofa ma le mana o le Atua”

Na faailoa mai e Elder Neal A. Maxwell o le Korama a Aposetolo e Tosefululua e ui lava o le Tusi a Mamona sa faaliliuina e ala i le meaalofa ma le mana o le Atua, tatou te le iloaina le auiliiliga o le faagasologa o le faaliliuga.

“O le toatele o e faitau i le Tusi a Mamona e malamalama lava i lo latou manao e fia iloa atili e uiga i lona oo mai, e aofia ai le faagasologa moni lava o le faaliliuga. E faapena tonu lava ia le tagata faatuatua ma le lotonuu o Ailama Samita. Ina ua [ia] fesili atu, sa tau atu e le Perofeta o Iosefa Samita ia Ailama ‘e lei fuafuaina e ta‘u atu i le lalolagi ia mea auiliili uma e uiga i le oo mai o le Tusi a Mamona’ ma ‘sa le tatau ai mo ia ona faamatala atu nei mea’ (Talafaasolopito o le Ekalesia, 1:220). O lea la o le mea ua tatou iloa e uiga i le oo moni mai o le Tusi a Mamona ua lava, ae le o atoatoa. …

“Ua na o le Perofeta o Iosefa na silafia le faagasologa atoa, ma sa matuai le manao lava o ia e faamatala auiliili mea uma. Tatou te faaaogaina upu a Tavita Uitimera, Iosefa Naite, ma Matini Harisi, o e na vaavaai i ai, ae le o ni faaliliu. Na faaali mai e Tavita Uitimera faapea ao faaaogaina e le Perofeta meafaigaluega mamana na tuuina atu e fesoasoani ia te ia, ‘o tusitusiga faafaatusa e oso mai, faapena foi ma le faaliliuga i le gagana Peretania … i mataitusi malamalama ma susulu.’ Ona faitau atu lea e Iosefa upu ia Oliva (sii mai le James H. Hart, “About the Book of Mormon,” Deseret Evening News, 25 Mat. 1884, 2). Na faamatala e Matini Harisi e uiga i le maa a le tagatavaai: ‘E faaali mai fuaiupu, ma sa faitau mai e le Perofeta ae tusia e Matini’ (na sii mai i le Edward Stevenson, “One of the Three Witnesses: Incidents in the Life of Martin Harris,” Latter-day Saints’ Millennial Star, 6 Fep. 1882, 86–87). Na faapena foi mea na maitau a Iosefa Naite (see Dean Jessee, “Joseph Knight’s Recollection of Early Mormon History,” BYU Studies 17 [Autumn 1976]: 35).

“Na lipotia mai sa tuuina atu e Oliva Kaotui se molimau i le faamasinoga e faapea, o le Urima ma le Tumema na mafai ai e Iosefa ‘ona faitau i le gagana Peretania, i togitogiga fou a tagata Aikupito ia na vaneina i luga o papatusi’ (“Mormonites,” Evangelical Magazine and Gospel Advocate, 9 Apr. 1831). Afai e sa’o nei lipoti, ua latou tuuina mai se faagasologa e faaalia ai le tuuina atu e le Atua ia Iosefa o le ‘vaaiga ma le mana e faaliliu ai’ (MF&F 3:12). …

“O le faagasologa faafaaaliga na mautinoa ai lava le le manaomia o se tomai o le Perofeta i le gagana anamua. O le faatuatuaina o faaaliga na sili atu le taua nai lo le i ai o papatusi o loo tatalaina, ia na faatonuina e aua nei vaai i ai ni mata e lei faatagaina.

“E ui o le faaaogaina o meafaigaluega mamana e ono faamatalaina ai le vave tele o le faaliliuga, atonu na faaaogaina e le Perofeta i nisi taimi se metotia faitino. E mautinoa lava lo tatou le iloaina o ni faamatalaga auiliili.

“E ui i lea, tatou te iloaina e le’i faigofie lenei faagasologa e faatumulia i le faatuatua. O lenei mea moni na faaalia manino mai i le taumafaiga a Oliva Kaotui lava ia e faaliliu. Na le faamanuiaina Oliva ona sa ia ‘le faaauau pea e pei ona sa [ia] amata mai,’ ma ona sa leai se faatuatua ma galuega, na te ‘le’i mafaufau i ai ae na o le ole mai’ (MF&F 9:5, 7). E lei saunia lelei o ia e faia le galuega. …

“Po o le a lava ni faamatalaga auiliili o le faagasologa, na manaomia ni taumafaiga malosi ma le patino a Iosefa faatasi ai ma le fesoasoani a meafaigaluega faalelagi. Atonu na suia le faagasologa ao faateleina le gafatia o Iosefa, i le aofia ai o le Urima ma le Tumema ae atonu sa itiiti le faalagolago i ia meafaigaluega i isi faaliliuga mulimuli ane a le Perofeta. Na faapea mai Elder Orson Pratt o le Korama a Aposetolo e Toasefululua na ta’u atu e Iosefa Samita ia te ia na ia faaaogaina le Urima ma le Tumema pe afai e le lava lona malamalama i le faaliliuga ae na mulimuli ane na te le’i manaomia, lea na tupu i le galuega faaliliu a Iosefa i le tele o fuaiupu o le Tusi Paia (tagai i le Latter-day Saints’ Millennial Star, 11 Aok., 1874, 498–99)” (“By the Gift and Power of God,” Ensign, Ian. 1997, 39).

Manatu Faaopoopo Faafaiaoga

Itulau Autu

Faasino tamaiti aoga i le afa mulimuli o le palakalafa lona lua i le itulau autu o le Tusi a Mamona.

O le a se mea na mananao le au tusitala o le Tusi a Mamona e iloa e Tagata Iutaia ma Nuuese e uiga ia Iesu Keriso?

Atonu e te fia faamalamalamaina atu o “ Keriso (o se upu Eleni) ma le Mesia (o se upu Eperu) o lona uiga ‘o le ua faauuina.’ O Iesu Keriso o le Ulumatua a le Tama i le agaga (Epe. 1:6; MF&F 93:21). E na o Ia lava le Alo e Toatasi na Fanaua e le Tama i le tino (Ioane 1:14;; 3:16 ). O Ia o Ieova (MF&F 110:3–4) ma sa muai faauuina mo lona valaauga maoae ae lei faia le lalolagi” (Taiala i Tusitusiga Paia, “Iesu Keriso,” scriptures.lds.org; tagai foi i le “Mesia”).

Faaaoga le siata lenei e fesoasoani e faailoa ai le taulai atu a le Tusi a Mamona ia Iesu Keriso.

O Maufaasino o le Tusi a Mamona ia Iesu Keriso
Tusi	O Maufaasino i Suafa ma Faalaniga o Keriso	Numera o Fuaiupu i totonu o le Tusi	Numera o Fuaiupu i Maufaasino
1 Nifae	474	618	1.3
2 Nifae	591	779	1.32
Iakopo (TM)	156	203	1.3
Enosa	22	27	1.23
Iaroma	8	15	1.88
Ominae	20	30	1.5
Upu a Mamona	15	18	1.2
Mosaea	492	785	1.6
Alema	1,013	1,975	1.95
Helamana	225	497	2.21
3 Nifae	293	788	2.69
4 Nifae	42	49	1.17
Mamona	188	227	1.21
Eteru	220	433	1.97
Moronae	166	163	0.98
Aofaiga	3,925	6,607	1.68

(Sii mai le Susan Easton Black, Finding Christ through the Book of Mormon [1987], 16.)

Faamalamalama atu o tusitala o le Tusi a Mamona e faia se latou faamatalaga agai ia Iesu Keriso e faaaogaina ai se tasi o Ona suafa po o isi ona faalaniga pe tusa ma le faatasi i fuaiupu uma e 1.7. A faatusa, i le Feagaiga Fou o le au tusitala “sa faaaogaina se vaega o Lona suafa i le averesi o le faatasi i fuaiupu uma e 2.1” (tagai ia Susan Easton Black, Finding Christ through the Book of Mormon,15).

Faasino atu le fasifuaitau “o Iesu o le Keriso, le Atua Faavavau, na faaali atu o ia lava i nuu uma.” Molimau atu o Iesu Keriso o le a faaalia o Ia lava (po o le a ia faailoa atu o Ia) ia i latou uma e o mai ia te Ia. Valaaulia le vasega e suesue ia mau ia, ma saili ni auala e faaali ai le Alii lava Ia ia i latou e saili ia te Ia:

1 Nifae 2:16 (e ala i tali o tatalo)
2 Nifae 11:2–3 (e ala i faaaliga vaaia)
Iakopo 4:7 (e ala i Lona alofa tunoa, po o le mana malosi)
Enosa 1:4–5, 10 (e ala i faaaliga i o tatou mafaufau)
Mosaea 4:2–3 (e ala i le faamagaloina o a tatou agasala)
3 Nifae 11:8–10 (o se tagata)

Valaaulia ni nai tamaiti aoga e faasoa mai mea sa latou maua. Ina ia faamalosiau i tamaiti aoga e molimau faalauaitele atu i le auala na aoao ai i latou e le Tusi a Mamona e uiga ia Iesu Keriso, mafaufau e tuuina atu ia fesili nei:

Na faapefea ona faamalosia e le Tusi a Mamona lau molimau ia Iesu Keriso?

Valaaulia se tamaitiiti aoga e faitau le faamatalaga a Elder Jeffrey R. Holland o le Korama a Aposetolo e Toasefululua:

“O le ki ma le tagata autu i totonu o le Tusi a Mamona, mai le mataupu muamua e oo i le mataupu mulimuli, o le Alii o Iesu Keriso. O le tusi o loo totonugalemu i luga o molimau faaletusitusiga paia e masani lava ona faaautu ai e amata mai lava i taimi o Atamu ma Eva—o le folafolaga i tagata uma e ala atu i le togiola a le Alo o le Atua, ‘aua talu ai ona ua e pau ia mafai ona laveaiina oe, ma tagata uma, le toatele lava e mananao i ai’ [Mose 5:9]. …

“… O le Tusi a Mamona o le faamatalaga silisili lea o le feagaiga ma le alofa o le Atua mo ana fanau iinei i le lalolagi.” O lana folafolaga mamalu i aso e gata ai e faatatau i le togiola a lona Alo” (Christ and the New Covenant: The Messianic Message of the Book of Mormon [1997], 3–4).

Valaaulia se tamaitiiti aoga e faitau le 3 Nifae 5:25–26.

E tusa ai ma nei fuaiupu, o le a le taunuuga o le toefuataiina e le Atua o Lana feagaiga ma Lona nuu?
E tusa ai ma le 3 Nifae 5:26, o le a le taunuuga pe a tatou osia ma tausia a tatou feagaiga?

O Le Faatomuaga

Valaaulia se tamaitiiti aoga e faitau leotele le faamatalaga lea a Peresitene Ezra Taft Benson. (Atonu e te fia tusia lenei faamatalaga i luga o le laupapa a o le i amataina le vasega.)

“O le Tusi a Mamona o le maaauau lea o lo tatou faatuatuaga. O le faamatalaga lenei a le Perofeta o Iosefa Samita. Na ia molimau mai ‘o le Tusi a Mamona o le tusi lea ua sili atu ona sa’o nai lo soo se isi lava tusi o i le lalolagi, ma o le maaauau lea o lo tatou faatuatuaga’ (Itulau Tomua o le Tusi a Mamona). O le maaauau o le maa tutotonu lea o se faitotoa faataliolio faaafamasina. O le maa lena na te taofia maa uma lava o le faitotoa, a aveese, o le a pau le faitotoa atoa.

“O loo i ai ala e tolu ua avea ai le Tusi a Mamona ma maaauau o la tatou faatuatuaga. O le maaauau lea i lona molimau mai o Keriso. O le maaauau lea o a tatou mataupu. O le maaauau lea o la tatou molimau” (“O Le Tusi a Mamona—O Le Maa’au’au o lo Tatou Faatuatuaga,” Ensign, Nov. 1986, 5).

Lisi i luga o le laupapa ni auala se tolu sa tuuina mai e Peresitene Benson e uiga i le Tusi a Mamona o le “maaauau o lo tatou faatuatuaga.”

Molimau ia Keriso
Aoaoga faavae
Molimau

O a nisi o upumoni o loo aoao mai e le Tusi a Mamona e uiga ia Iesu Keriso? (Ina ia fesoasoani i tamaiti aoga e tali fesili, atonu e te manao e valaaulia i latou e sue i le faasino upu o a latou tusitusiga paia ma vaai i vaega o loo faatatau ia Iesu Keriso.)

A maea ona tuuina atu ni nai tali a tamaiti aoga, valaaulia se tamaitiiti aoga e faitau le faamatalaga lea a Peresitene Benson:

“O le Tusi a Mamona o le maaauau o la tatou molimau ia Iesu Keriso, o Ia lava o le maatulimanu o mea uma tatou te faia. O le Tusi a Mamona e molimau i Lona moni ma le mana ma le manino. E le pei o le Tusi Paia, lea sa pasi mai i augatupulaga o le au fai kopi, faaliliu, ma le au failotu leaga lea sa suia ni vaega i tusitusiga, o le Tusi a Mamona na sau sao mai lava i le tusitala agai i le e faitau i se laasaga musuia e tasi o le faaliliuga. O lona uiga ua manino atoatoa ma lē nenefu ma tumu i le mana lana molimau o le Matai. Ae e sili atu i lena. Ua teena e le toatele o le lalolagi Kerisiano o ona po nei le paia o le Faaola. Ua latou masalomia Lona fanau mai, le atoatoa o Lona soifuaga, ma le moni o Lona toetu mamalu mai. Ua aoao mai e le Tusi a Mamona i upu manino ma lē masalomia e uiga i le moni o ia mataupu. Ua tuuina mai ai foi se faamalamalamaga atoatoa o le mataupu o le togiolaina. E moni o lenei tusi paia musuia, o se maaauau lea o le molimau atu i le lalolagi o Iesu o le Keriso lava lea” (Liahona, Ian. 1987, 6).

Faamanatu atu i tamaiti aoga o Peresitene Benson sa faapea mai foi o le Tusi a Mamona o le “maaauau o la tatou aoaoga faavae.” Valaaulia se tamaitiiti aoga e faitau le saunoaga lenei a Peresitene Ezra Taft Benson:

“Ua fetalai mai le Alii lava Ia o loo i le Tusi a Mamona le ‘atoaga o le talalelei a Iesu Keriso’ (MF&F 20: 9). E le faapea o loo i ai aoaoga ma mataupu uma lava ua faaalia mai. Ae o lona uiga, o loo i le Tusi a Mamona le atoatoa o mataupu tatou te maua ai le olataga. Ma ua aoao manino ai ini auala faigofie e oo i fanau laiti e mafai ona latou aoao ia iloa ai ala i le faaolataga ma le faaeaga. E tele mea ua aoaoina mai i le Tusi a Mamona e faalautele ai lo tatou malamalamaaga o mataupu o le faaolataga. A aunoa i tatou ma le Tusi a Mamona, o le a le manino ma taua le tele o mataupu ua aoaoina i isi tusitusiga paia ” (Liahona, Ian. 1987, 6).

O a ni aoaoga faavae taua e aoao mai e le Tusi a Mamona? (Ina ia fesoasoani i tamaiti aoga e tali lenei fesili, atonu e te fia valaauliaina i latou e suesue i mau nei.)
- 1 Nifae 3:7; Alema 37:35 (tausia o poloaiga)
- 2 Nifae 2:25 (o le Pau)
- 2 Nifae 2:27 (filifiliga saoloto )
- 2 Nifae 9:23; 31:17 (papatisoga)
- 2 Nifae 32:8–9 (tatalo)
- Alema 7:11–13 (o le Togiola)
- Alema 13:7–9 (o le perisitua)
- Alema 32:21 (faatuatua)
- Helamana 5:10–11 (salamo)
- 3 Nifae 9:15 (o le Foafoaga)
- Mamona 7:5–6 (o le Toetu)

Faamanatu atu i tamaiti aoga sa faapea mai Peresitene Benson o le Tusi a Mamona foi “o le maaauau o le molimau.”

Aisea e te manatu ai e taua le i ai o sau molimau o le Tusi a Mamona?

Valaaulia se tamaitiiti aoga e faitau le saunoaga lenei a Peresitene Ezra Taft Benson:

“O le Tusi a Mamona o le maaauau lea o le molimau. E faapei ona pau le faitotoa faataaliolio faaafa masina pe a aveese le maaauau, e faapea foi mea uma lava ua aoaoina ma faia e le Ekalesia pe a ave ese le moni o le Tusi a Mamona. Ae a faapea ua moni le Tusi a Mamona … e tatau i le tagata ona ia talia talitonuga o le toefuataiga faapea ma mataupu uma ua ala mai ai” (Liahona, Ian. 1987, 6).

E faapefea ona uunaia e lau molimau o le Tusi a Mamona lau molimau o aoaoga ma mataupu faavae o le talalelei?
Na faapefea ona aumaia faalatalata atili oe e le Tusi a Mamona i le Atua?

Fai atu i tamaiti aoga e faitau ia palakalafa mulimuli e lua o le faatomuaga o le Tusi a Mamona.

Afai e moni le Tusi a Mamona, o a foi la nisi mea e tatau ona moni?

Atonu e te fia faasoaina atu le apoapoaiga lea mai ia Peresitene Ezra Taft Benson, lea sa aoaoina i tatou pe faapefea ona avea le Tusi a Mamona ma maaauau o la tatou molimau ma le tali i soo se feteenaiga:

“O faitioga uma, pe latou te faapau pepe, pe tele faaipoipoga, pe tapuai i le aso-fitu, ma isi., ua faatulagaina ma fua pe o Iosefa Samita ma i latou na faamanuiaina ia te ia sa o ni ma o ni perofeta a le Atua latou te mauaina faaaliga paia. O se ala la lenei e taulimaina ai faitioga e ala i le faaaogaina o le Tusi a Mamona.

“Muamua, malamalama i le mafuaaga o le tetee po o le faitioga.

“Lona Lua, ia tuuina atu i ai le tali mai le faaaliga.

“Lona tolu, ia faaali atu e faapea e mafai ona iloa le sao atoatoa o le tali, i lo latou faalagolago lea e tusa ai ma le i ai po o le leai o ni faaaliga o ona po nei e ala mai i ni perofeta o ona po nei.

“Lona fa, faamalamalama atu e tusa pe i ai ni perofeta po o ni faaaliga i ona po nei, peitai o le a matua faalagolago atu lava i le moni o le Tusi a Mamona.

“O le mea la lea, ua na o le pau lava le faafitauli e tatau ona iloilo e le o loo tetee mo ia lava, pe moni le Tusi a Mamona. Aua a moni le Tusi a Mamona, e moni foi o Iesu le Keriso, ma o Iosefa Samita o Lana perofeta, o Le Ekalesia a Iesu Keriso o le Au Paia o Aso e Gata Ai e moni, ma o loo taitaia i ona po nei e se perofeta o loo ia mauaina faaaliga” (“O Le Tusi a Mamona o le Afioga a le Atua,” Liahona, Aok 1975, 22–24).

O Le Mau a Molimau e Toatolu

Valaaulia se tamaitiiti aoga e faitau le tala lenei, lea e ta’ua ai le fiafia o Iosefa Samita ina ua faatagaina isi e vaai i papatusi auro ma tutu atu faatasi ma ia o ni molimau i le lalolagi i lo latou tulaga moni aiai:

Ina ua uma ona vaai Molimau e Toatolu i papatusi auro, o le tina o Iosefa Samita, o Lusi Maka Samita, sa ia matauina: “Ina ua latou foi i le fale sa i le va o le tolu ma le fa i le afiafi. O le tina ia Uitimera, le Tama ia Samita ma au, sa matou nonofo i le potu moe i le taimi lea. I le oo mai i totonu, sa faapau Iosefa i lalo o ou autafa, ma fai mai leotele, ‘Tama, Tina, e te lua le iloa lo’u fiafia ua i ai: ua faatagaina nei e le Alii le faaalia o papatusi i isi e toatolu e ese mai ia te au. Ua latou vaai i se agelu, o le na molimau mai ia i latou, ma e tatau ona latou molimau atu i le moni o mea na ou fai atu ai, aua ua latou iloa nei mo i latou lava, ou te le fealuai ma faasese tagata, ma ua ou lagona e pei lava sa faamatuu atu se avega lea na toetoe lava a mamafatu ona ou tauaveina, ma ua olioli ai lou agaga, ua le toe tuua na o au i le lalolagi.’” (History of Joseph Smith by His Mother, Lucy Mack Smith, ed. Preston Nibley [1958], 152).

Aisea e te manatu ai sa lagonaina e Iosefa Samita se faamama avega maoae i le i ai o ni molimau faaopoopo o papatusi auro?
O le a le taua o le aofia ai o molimau a le Toatolu ma le Toavalu i le amataga o le Tusi a Mamona?
E mafai faapefea ona avea oe o se molimau i le lalolagi o le Tusi a Mamona e moni?

Faitau leotele le Moronae 10:3–5. Faamalamalama atu i tamaiti aoga e mafai foi ona avea i latou ma molimau o le Tusi a Mamona. Atonu latou te le vaai lava pe pa’i foi i papatusi, ae e mafai ona latou maua se molimau mamana mai le Agaga Paia e moni le Tusi a Mamona. Ina ia fesoasoani i tamaiti aoga e faamalolosia a latou molimau o le Tusi a Mamona, faamalosiau atu ia i latou e faitau i ai i aso uma. Valaaulia se tamaitiiti aoga e faitau le faamatalaga lea a Peresitene Henry B. Eyring:

“O taimi taitasi ou te faitau ai e tusa lava pe na o ni nai laina i le Tusi a Mamona, ou te lagonaina le faamalosia o la’u molimau e moni le tusi, o Iesu o le Keriso, ma e mafai ona tatou mulimuli ia te Ia e toe foi atu ai. Ua avea ma tusi o tusi ia te au. O le afioga lava a le Atua.

“Ou te tatalo ina ia tatou feinu ai faatasi ma e pele ia i tatou i aso uma. (“O Le Tusi a Mamona o se Taiala Patino,” Liahona, Set. 2010, 5).

Talosaga atu i tamaiti aoga e faia se tautinoga faaletagata lava ia e faitau atoa le Tusi a Mamona i lenei tausaga. Atonu e te manao e faamanatu atu i tamaiti aoga o le faatuina ma le tausia o se sini o le faitauina atoa o le Tusi a Mamona e mafai ai ona fesoasoani e faataunuu mea e manaomia o le Alualu i Luma o le Tagata Lava Ia ma le Tiute i le Atua.