Alema 17

Faatomuaga

I le sauniuniga e talai atu le talalelei i sa Lamana, na sailia ai e atalii o Mosaea le taitaiga a le Alii e ala i le anapogi ma le tatalo. Na faamafanafanaina e le Alii i latou ma folafola atu o le a avea i latou ma meafaigaluega i Ona aao “mo le olataga o agaga e toatele” (Alema 17:11). I se taimi muamua atu na Ia folafola atu ai ia i latou, e ala atu i se faaaliga i lo latou tama, o le a Ia “laveaiina [latou] mai lima o sa Lamana” (Mosaea 28:7). O le a faamalolosia e ala i folafolaga a le Alii ma le faalagolago o le a i ai se aso latou te toe feiloai ai, sa eseese mea latou te o i ai e faasoa atu ai le talalelei i eria eseese. Na alu Amona i le laueleele o Isamaeli, lea na ia saunia ai e aoao atu ia tagata e ala i le auauna atu i lo latou tupu.

Fautuaga mo le Aoaoga

Alema 17:1–16

Na suesue ia atalii o Mosaea i tusitusiga paia, tatalo, ma anapopogi ina ia latou iloa le afioga a le Atua ma aoao atu ma le mana

A o lei amataina le vasega, tusi le faamatalaga lenei e le’i uma i luga o le laupapa: “O le mea e tasi e sili ona taua e mafai ona e faia e saunia ai mo se valaauga e auauna atu [i se misiona] o le …” (O le a toe ta’ua le mea lea i sina taimi mulimuli ane o le lesona.)

Fai i tamaiti aoga pe na latou auai i le taimi na toe foi mai ai ni tagata o le aiga po o ni uo mai a latou misiona ina ua uma ona auauna atu ma le faamaoni. Valaaulia ni nai tamaiti aoga e faamatala mai ia ni uiga faaKerisiano o nei faifeautalai ina ua latou toe foi mai.

O a ni suiga lelei sa e vaaia ia i latou ina ua uma a latou misiona? O le a se mea e te manatu na mafua ai nei suiga?

Faamatala atu ina ua uma ona talaiina le talalelei mo le 14 tausaga i le nuu o Nifae, o le toe foi o atalii o Mosaea i Saraemila lea na latou toe feiloai ai ma Alema. Afai e manaomia e tamaiti aoga se toe faamanatu puupuu o le tala ia Alema ma atalii o Mosaea, fesili:

O le a se fegalegaleaiga i le va o Alema ma atalii o Mosaea? (Afai e manaomia e tamaiti aoga le fesoasoani i le taliina o lenei fesili, mafaufau e fesili atu ia i latou e faitau le aotelega o le mataupu mo leMosaea 27.)

Faamatala atu ao talai atu e Alema le salamo ma faatulaga le Ekalesia i sa Nifae i le laueleele o Saraemila ma isi laueleele, na talai e atalii o Mosaea le talalelei i sa Lamana i le laueleele o Nifae. (Atonu e te manao e faasino i le faailogatusi a le Tusi a Mamona o se vaega o lenei faamatalaga.) O igoa o atalii o Mosaea o Amona, Arona, Ominea, ma Himinae (tagai i le Mosaea 27:34). Alema 17–26 o loo faamatalaina ai nisi o a latou aafiaga faafaifeautalai.

Valaaulia se tamaitiiti aoga e faitau leotele le Alema 17:1–2.

O le a se lagona o Alema ina ua ia toe vaai i ana uo? Aisea e te manatu ai na faapena ona lagona?

Taulai atu le vaaiga a tamaiti aoga i le faamatalaga lea e le’i uma na e tusia i luga o le laupapa a o lei amataina le vasega. Valaaulia tamaiti aoga e fautua mai ni auala e faamaea ai le faamatalaga. Ona faasoa atu lea ia i latou o le auala na faamaea ai e Elder David A. Bednar o le Korama a Aposetolo e Toasefululua le faamatalaga: “O le mea sili ona taua e tasi e mafai ona e faia ina ia saunia ai mo se valaauga e auauna atu [i se misiona] o le avea lea ma se faifeautalai a o lei taitai ona e alu i se misiona” (“Avea ma se Faifeautalai,” Ensign po o le Liahona, Nov. 2005, 45). Faamaea le faamatalaga o loo i luga o le laupapa.

Faailoa atu o se tasi o auala e mafai ai ona tatou iloa le auala e avea ai ma se faifeautalai o le aoao lea e uiga i auaunaga a faifeautalai faamaoni o loo i tusitusiga paia. Fai i le vasega e faitau lemu le Alema 17:2–4, vaavaai mo ni mafuaaga na faamanuiaina ai atalii o Mosaea i le aumaia o tagata i le malamalama o le upu moni.

O a ni mea na faia e atalii o Mosaea na fesoasoani ai ia i latou i le avea ai ma ni faifeautalai faamanuiaina? (O tali e ono aofia ai sa latou “ suesue ma le filiga i tusitusiga paia,” tatalo, ma le anapogi.)
O a ni faamanuiaga sa latou mauaina ona o lo latou suesue, anapogi, ma le tatalo? (A o tali mai tamaiti i lenei fesili, fesoasoani atu ia i latou e faailoa mai le mataupu faavae lenei: A o tatou saili i tusitusiga paia, tatalo, ma anapogi, o le a mafai ona tatou maua le Agaga Paia ma aoao atu faatasi ma le mana.)

Fai i se tamaitiiti aoga e faitau le faamatalaga lenei mai ia Elder Bednar, ma faamamafa atu le mea e mafai ona tatou faia e avea ai ma faifeautalai:

Ata

Elder David A. Bednar

“E mafai ona faateleina lou naunau e auauna atu i le Atua (tagai MF&F 4:3), ma e mafai ona amata ona e mafaufau e pei ona mafaufau faifeautalai, faitau mea e faitauina e faifeautalai, tatalo e pei ona tatalo ia faifeautalai, ma lagona mea o loo lagonaina e faifeautalai. E mafai ona e aloese mai aafiaga faalelalolagi lea e mafua ai ona aluese le Agaga Paia, ma e mafai ona e tuputupu ae i le mautinoa i le iloaina ma tali atu i uunaiga faaleagaga. O le upu ma le upu ma le mataupu ma le mataupu, sina mea itiiti ii ma sina mea itiiti i o, o le a iu ai ina ave oe ma faifeautalai lea e te faamoemoe e avea ai ma o loo faamoemoeina mai e le Faaola. …

“O le sauniuniga o loo o’u faamatalaina atu e le o matele atu i lau auaunaga faafaifeautalai o se alii talavou ua 19 po o le 20 po o le 21 tuasaga. … O loo outou sauniuni atu mo se galuega faafaifeautalai o le olaga atoa. … Ua avea ai pea i tatou ma faifeautalai” (“Avea ma se Faifeautalai,” 46).

Ina ia fesoasoani i tamaiti e faaaoga ia mataupu faavae na aoao atu e Elder Bednar ma i le Alema 17:2–4, ma fai ia i latou e tusi i totonu o api o le vasega po o api talaaga mo le suesueina o tusitusiga paia mea o le a latou faia e avea ai ma faifeautalai a o lei valaauina i latou.

Fai i tamaiti aoga e faitau le leoa le Alema 17:9, faailoa mai po o a ni mea na tatalo ai ia atalii o Mosaea ma a latou soa. A uma ona lipoti mai e tamaiti aoga mea na latou maua, fai i ai e faitau le Alema 17:10–12, vaavaai mo le tali a le Alii i a latou tatalo.

Aisea tou te manatu ai na “lotoa [o latou] loto” ina ua tali mai le Alii i a latou tatalo?
Alema 17:11 o aofia ai le folafolaga a le Alii o le a Ia faia nei faifeautalai ma meafaigaluega i Ona aao. O le a le uiga o lenei fuaitau ia te oe? O a ni auala e mafai ai ona avea i tatou ma meafaigaluega i aao o le Alii?
Na faatonuina e le Alii nei faifeautalai ina ia “faaali atu faataitaiga lelei” (Alema 17:11). Aisea e te manatu ai o le faatuina o se faataitaiga lelei sa avea ma se vaega taua i la latou galuega faafaifeautalai? (A o tali mai tamaiti i lenei fesili, fesoasoani atu ia i latou e faailoa mai le mataupu faavae lenei: Pe a tatou faatuina se faataitaiga lelei, o le a faia e le Alii i tatou ma meafaigaluega i Ona lima. Atonu e te manao e tusi le upu moni lenei i luga o le laupapa.)
O a nisi mea e mafai e tagata ona aoao i ai e uiga i le talalelei ao latou vaai i a tatou faataitaiga lelei?
O ana fea na fesoasoani ai faataitaiga lelei a isi ia te oe?

Molimau atu i le taua o le faatuina o se faataitaiga lelei, ma uunaia ia tamaiti aoga e avea ma ni faataitaiga lelei ia i latou o siomiaina i latou. Afai e mafai ona e mafaufau i ni taimi faapitoa na e vaaia ai o faatutuina e tamaiti aoga ni faataitaiga lelei, atonu e te manao e faamalo atu i tamaiti aoga mo le mea sa latou faia. Ae peitai, aua nei faasoaina atu ni upu faalaeiau lautele pe pupuu foi, lea atonu e le faamaoni.

Fai i tamaiti e faitau le leoa le Alema 17:13–16, mafaufau e uiga i le faigata o le aoaoina o sa Lamana i lena taimi.

Aisea na mananao ai ia atalii o Mosaea ia oo i faigata ma o atu i sa Lamana? (Tagai Alema 17:16; tagai foi Mosaea 28:1–3.)

Alema 17:17–39

Ua avea Amona ma auauna a le Tupu o Lamonae ma ua faasaoina ia lafu a le tupu

Aotele le Alema 17:18–20 e ala i le faamatalaina mai ao lei o eseese nei faifeautalai e talai atu le talalelei i nofoaga eseese, na aoaoina ma faamanuiaina i latou e Amona. Ona ia alu lea i se nuu e ta’ua o Isamaeli. Ina ua ulufale atu o ia i lena laueleele, sa pueina o ia ma avatu i luma o le tupu. Valaaulia ni tamaiti aoga se toalua e feauauai i le faitauina leotele mai o le Alema 17:21–25.

O le sou manatu e taua e uiga i le fai atu o Amona i le tupu “O le a ou avea ma au auauna”? (Alema 17:25).
O anafea na e vaaia i le auaunaga ua taitaiina atu ai i avanoa e faasoa atu ai le talalelei?

Aotele puupuu mai le Alema 17:26–27 e ala i le faamatala mai faapea ao vaaia e Amona le lafu manu a le tupu, na faasalalauina e sa Lamana le lafu.

Vaevae le vasega i ni vaega e taitoatolu tamaiti. Tusi ia mau faasino nei i luga o le laupapa: Alema 17:28–32; Alema 17:33–35; Alema 17:36–39. Fai i tamaitai i vaega taitasi e vaevae ia fasifuaitau nei ia i latou. Tuu atu i tamaiti aoga e faitau le leoa a latou fasifuaitau lea na atofaina atu, vaavaai mo ni tali i fesili nei. (Atonu e te manao e tusi fesili nei i luga o le laupapa.)

O le a le mea na tupu i lau vaega o le tala?
O faapefea ona fesoasoani lenei mea i le sauniaina o tagata i le mauaina o le talalelei?
O a ni uiga faaletagata na faaalia e Amona?

Tuu atu i vaega se taimi e talanoaina ai a latou tali. Ona fesili lea:

O le a se mea e mafai ona tatou aoao mai lenei tala? (E mafai ona faasoa mai e tamaiti aoga ni tali eseese. Mo se faataitaiga, atonu latou te fai mai e ala atu i le auaunaga, e mafai ona tatou fesoasoani atu i isi ina ia saunia e talia le talalelei po o le pe a tatou i ai i le galuega a le Alii, e mafai ona tatou maua le lototoa ma le fiafia. Atonu e te manao e uunaia ia tamaiti aoga e tusi ia mataupu faavae nei i totonu o a latou tusitusiga paia.)

Valaaulia ia tamaiti e tusi i totonu o a latou api talaaga mo le suesueina o tusitusiga paia ia mea e mafai ona latou faia e faatuina ai ni faataitaiga lelei o le ola ai i le talalelei. Mo tamaitai talavou, e mafai ona fesoasoani lenei sini ia i latou e faatumu ai se mea e fai mo le tulaga faatauaina faaopoopo i le Alualu i Luma o le Tagata Lava Ia i lalo o “Galuega Lelei.” Mo ositaulaga, e mafai ona fesoasoani lenei sini ia i latou i le aoaoina ma le faataunuuina o a latou tiute o loo lisiina atu i le tamaitusi o le Tiute i le Atua i lalo o “Tiute o le Perisitua” ma le “Valaau Atu i Tagata Uma ia O Mai ia Keriso.”

Tala ma Faamatalaga o Talaaga

Alema 17 Auaunaga faafaifeautalai faamisiona a alii talavou ma tamaitai talavou

Na tuuina mai e Peresitene Thomas S. Monson le fautuaga lenei i alii talavou ma tamaitai talavou e uiga i le tiutetauave o le auauna atu faafaifeautalai faamisiona:

“I alii talavou o le Perisitua Arona ma outou na alii talavou o le a avea ma toeaina: Ou te toe fai atu i mea ua loa ona aoao mai e perofeta—o alii talavou agavaa uma lava, ma malolosi e tatau ona saunia e auauna atu i se misiona. O le galuega faafaifeautalai o se tiute faaleperisitua—o se matafaioi ua faamoemoeina e le Alii mai ia i tatou ua tele naua mea ua tuuina mai i ai. Alii talavou, ou te apoapoai atu ia te outou ia saunia mo le galuega faafaifeautalai. Ia tausisia lo outou mama ma le atoatoa ma le agavaa e avea ma sui o le Alii. Tausisia le ola maloloina ma le malosi. Suesue i tusitusiga paia. Afai o i ai, ia auai i le seminare po o le inisitituti. Faamasani i le tusitaulima a faifeautalai Talai La‘u Talalelei.

“O se upu ia te outou tuafafine talavou: E ui tou te le maua le tiutetauave lava lea e tasi a le perisitua e pei o alii talavou o le auauna atu i se galuega faafaifeautalai faamisiona, ae ua outou faia foi ni sao taua i le avea ai ma ni faifeautalai, ma e matou te talisapaia la outou auaunaga” (“A o Tatou Toe Potopoto Faatasi Ai,” Ensign po o le Liahona, Nov. 2010, 5–6).