Lesona 103
Alema 52–55
Faatomuaga
O le taimi lenei i le taua ma sa Lamana, na aveesea ai le tele o aai a sa Nifae ona o finauga i totonu o i latou lava. Na maua e Moronae, Teanekuma, ma Liae le aai o Moleka ma faatoilalo o se tasi o autau sili ona toatele a sa Lamana. Na teena e Moronae le talosaga a Amorona, le taitai sa Lamana, e fesuiai a latou pagota ma faatulagaina se fuafuaga e faasaoloto ia pagota sa Nifae e aunoa ma le faamasaatoto. Na tu mausali Moronae ma e lei fetuunaia ma le amioleaga o Amorona ma e na mulimuli ia te ia.
Faaaliga: O lenei lesona e taulai atu i mea na tutupu i olaga o Moronae, Teanekuma, ma Liae. O le lesona e sosoo, o le a aoao atili ia tamaiti aoga e uiga i le autau talavou malolosi e 2,000 a Helamana o loo ta’ua i le Alema 53:16–23.
Fautuaga mo le Aoaoga
Alema 52–53
Moronae, Teanekuma, ma Liae o loo galulue faatasi i le faatoilaloina o sa Lamana.
A o lei amataina le vasega, tusi le faamatalaga lenei i luga o le laupapa:
“O le autalavou o aso nei ua ola ae i teritori a le fili” (Peresitene Boyd K. Packer).
I le amataga o le vasega, fai atu i se tamaitiiti aoga e faitau mai le faamatalaga lenei. Ona fesili atu lea:
-
O ai le fili? (Satani.)
-
O le a se faamaoniga o le aafiaga a Satani o e vaaia i le lalolagi o siomia ai oe? (Atonu o le a ta’u mai e tamaiti aoga ia gagana le talafeagai ma lavalava, o le le faamaoni ma amioga le lelei, ma faaosoosoga e masani ona faalauiloa mai e ala i faasalalauga ma tekinolosi.)
Fautuaina tamaiti aoga e mafaufau i ni auala e mafai ona latou faatusatusa ai ia luitau o feagai ma i latou i mea na tutupu ma tulaga o loo faamatalaina mai i le Alema 52–55. Ona faitau lea o le faaauauina o le faamatalaga a Peresitene Packer:
“O le autalavou o aso nei ua ola ae i teritori a le fili faatasi ma se faaitiitia o tulaga faatonuina o le ola mama. Ae i le avea ai ma auauna a le Alii, ou te folafola atu o le a puipuia outou ma leoleoina mai osofaiga a le fili pe afai o le a outou faalogo atu i uunaiga ia e sau mai le Agaga Paia.” (“Fautuaga i le Autalavou,” Ensign po o le Liahona, Nov. 2011, 18).
Fautuaina tamaiti aoga e saili le taitaiga a le Agaga Paia ina ia mafai ona latou tetee atu i le amioleaga.
Faamanatu atu i tamaiti ao taumafai Moronae e taofia i lalo le tetee a tagata-tupu, na maua e sa Lamana le tele o aai na tuiolo malolosi a sa Nifae (tagai i le Alema 51:26). Fai i tamaiti e faitau le leoa le Alema 52:14, vaavaai i le faamatalaga a Mamona e faatatau i le tulaga na oo i ai sa Nifae i lena taimi. Ona fai atu lea i se tamaitiiti aoga e faitau leotele mai le Alema 53:9. Fai i le vasega e faailoa mai le mafuaaga na matautia ai ia tulaga na i ai ia sa Nifae.
-
O a ni auala o tuu ai e tagata i latou lava i tulaga matautia faaleagaga?
Tusi le mau faasino lenei i luga o le laupapa: Alema 52:5–10, 16–19. Ina ia fesoasoani i tamaiti ia malamalama i le talaaga ma laina o le tala o loo siomia ai nei fuaiupu, fai atu i ni tamaiti aoga se toalua e faitau leotele mai ia aotelega o mataupu mo leAlema 52 ma le 53. Ona valaaulia lea o tamaiti e suesue i mau ia na e tusiaina i luga o le laupapa, vaavaai mo mataupu faavae lea e mafai ona fesoasoani ia i latou e aloese mai ai pe tetee atu ai i le amioleaga. Pe a lava se taimi, fesili atu:
-
O a ni mataupu faavae e mafai ona tatou aoaoina mai nei fuaiupu?(Faatasi ai ma isi mataupu faavae, atonu o le a faailoa mai e tamaiti aoga le upu moni lenei: Afai tatou te aloese mai i malutaga a le fili, o le a sili atu ona mafai ona tatou aloese mai ma tetee atu i faaosoosoga.)
Valaaulia ia tamaiti e toe mafaufau i ni nofoaga faaletino, siosiomaga faaagafesootai, po o ni tulaga e aofia ai le faaaogaina o tekinolosi (e pei o le Initoneti) latou te lagona e ono taitai ai atu ai i ni tulaga matautia i lo latou olaga.
Faamalamalama atu na faamatalaina e Mamona le tu tetee atu o Teanekuma ia sa Lamana e faaaoga ai ia ituaiga upu e pei o le puipui, tuiolo malolosi, malupuipuia, susunu, ma le faamalosia. Fai atu i tamaiti e mafaufau loloto po o ni mea e tatau ona “susunuina,” pe tulieseina, mai o latou olaga ina ia fesoasoani ia i latou ia malupuipuia atili faaleagaga.
Valaaulia se tamaitiiti aoga e faitau leotele le Alema 52:19. Fesili i le vasega:
-
O le a se mea na faia e taitai sa Nifae ao lei o atu e tau? (Sa latou faia se fono o le taua.)
-
O a ni auala e ono tutusa ai se fono faaleaiga po o se fono a le Ekalesia i se “fono o le taua”? E mafai faapefea e ia ituaiga fono ona faamalosia i tatou i o tatou fetauaiga ma le fili?
Aotele le Alema 52:20–40 ma le Alema 53 e ala i le faamatalaina ina ua maea le fono o le taua, na toe ave e Kapeteni Moronae lana autau i le aai o Moleka e ala i le tutuliesea o sa Lamana mai o latou olo malolosi. Na faapagotaina e sa Nifae le tele o sa Lamana ma auina atu i latou e galulue e tuioloina le aai o Nuumau. Ae peitai, na faaauau pea ona manumalo sa Lamana i isi aai ona o faatuiesega i totonu o sa Nifae.
Alema 54–55
Na teena e Moronae ia tuutuuga a Amorona e faafesuiai pagota ae faaaoga se togafiti e faasaoloto ai ia pagota sa Nifae.
Faamalamalama atu o le Alema 54 o se faamaumauga lea o ni tusi na auina atu i le va o Amorona (le tupu sa Lamana) ma Kapeteni Moronae. I luma atu o lenei mea, na maua ai e sa Lamana ma sa Nifae le tele o pagota o le taua. O lenei mataupu o loo faamaumau ai le tali atu a Moronae i le talosaga a Amorona ina ia faafesuiai ia pagota sa Lamana ma sa Nifae.
Faamalamalama atu o le Alema 54:9–12 o loo aofia ai ni upu a Kapeteni Moronae ia Amorona. Fai i se tamaitiiti e faitau leotele mai nei fuaiupu. Ona fai atu lea i se isi tamaitiiti e faitau mai le tali a Amorona ia Kapeteni Moronae i le Alema 54:18–20.
-
Na faapefea ona ese mai faamoemoega a Kapeteni Moronae ina ia fesuiai ia pagota mai ia Amorona? (Atonu e te manao e faasino atu o Moronae na popole e uiga i aiga, ao Amorona na pau lava le mea na popole i ai o tagata o lana autau aua sa ia manao e faatoilalo sa Nifae.)
-
E faapefea ona atagia mai i le faamatalaga a Amorona i leAlema 54:18–20 ia faamoemoega a Satani i lana taua mai i tatou?
Valaaulia se tamaitiiti aoga e faitau leotele le Alema 55:1–2. Fai i le vasega e tagai i le tali a Moronae i manaoga a Amorona.
-
Aisea na le manao ai Moronae e fai le mea na fai mai ai Amorona? (Na ia iloa o loo pepelo ia Amorona, ma na te lei manao e toe tuu atu seisi malosiaga ia Amorona nai lo le tulaga lea o loo ia i ai.)
-
O le a se mea e mafai ona tatou aoao mai i le tali a Moronae ia Amorona? (E ui e ono tau mai e tamaiti aoga nisi o upumoni, ae ia mautinoa o latou malamalama a tatou tutu mausali mo le mea sao, o le a mafai ona tatou taofia ia faatosinaga amioleaga mai le mauaina o le malosi ia i tatou.)
O le saunoaga lenei mai ia Iosefa Samita e mafai ona fesoasoani i lau talanoaga o nei mau:
“E le mafai e Satani ona maileia i tatou i ana faatosinaga sei vagana ua tatou ioe i o tatou lava loto ma gauai atu i ai” (Aoaoga a Peresitene o le Ekalesia: Iosefa Samita [2007], 227).
“O le tiapolo e leai sona mana ia i tatou sei vagana ua tatou faatagaina ai o ia” (Aoaoga a Peresitene o le Ekalesia: Iosefa Samita [214], 227).
Tusi le mau faasino lenei i luga o le laupapa: Alema 55:15–24, 28–31.
Faamalamalama atu o le Alema 55 tatou te aoao ai i le faasaolotoina e Kapeteni Moronae o pagota sa Nifae i le aai o Kita e ala i le togafiti (o se metotia e faaaogaina i taimi o taua e faasese ai se fili). I le Alema 55:3–14, tatou te aoao ai na mafai na faaaogaina e Moronae se fitafita sa Nifae e igoa ia Lamana e faaonana ia fitafita sa Lamana lea na leoleoina ia pagota sa Nifae. Fai i tamaiti e faitau le leoa ia mau ia sa e tusiaina i luga o le laupapa, vaavaai mo le mea na faia e Kapeteni Moronae ina ua ia siomiaina sa Lamana i le aai o Kita. Faamanatu i tamaiti e vaavaai ni mataupu faavae ao latou suesue. A lava se taimi, fai atu ia i latou e lipoti mai mea sa latou mauaina. Atonu e te fesili atu foi:
-
O le a se mea o aoaoina ai oe e nei mau e uiga ia Moronae?
Tusi ia faamatalaga nei i luga o le laupapa ma fai atu i tamaiti e faatumu ia avanoa:
Matou te le mitamita i … ; nai lo lena, matou te mitamita i …
-
E faapefea ona tatou faaaogaina ia faataitaiga a Moronae o le le mitamita i le faamasaatoto? Mo se faataitaiga, e faapefea ona tatou faaaogaina ia faataitaiga a Moronae i mea tatou te faitau ma matamata i ai po o taaloga tatou te taaalo ai?
Fai i tamaiti e manatunatu i le fesili lenei:
-
O le a se mea o e lagona na manao Moronae e te aoaoina i le lesona i lenei aso lea o le a fesoasoani ia te oe ina ia faamaoni ao e tau ma le fili?
Mafaufau e tuu atu i tamaiti se taimi e tusi ai ia latou api o le vasega po o api talaaga mo le suesueina o tusitusiga paia e uiga i mea o le a latou faia e teena ai le ulu atu i teritori a Satani ma tu mausali ai e faasagatau atu i ana osofaiga.
Faaiu e ala i le molimau atu e uiga i upumoni na e talanoaina i le vasega i lenei aso.