Lesona 134
3 Nifae 28
Faatomuaga
Ina ua fesiligia taitasi e Iesu Keriso Lona au soo e toasefululua sa Nifaē, mo mea na latou mananao ai mai ia te Ia, e toaiva na talosagaina le vave foi atu ia te Ia, pe a uma la latou auaunaga i luga o le fogaeleele. E toatolu na talosaga e nonofo ai pea i luga o le fogaeleele ina ia aumaia agaga ia te Ia seia oo i Lona Afio Mai Faalua. Na faamamaluina uma e le Alii ia ituaiga o manaoga amiotonu. Na tuuina mai e Mamona nisi o auiliiliga o le auaunaga a Nifae e Toatolu, ma na ia faasoa mai foi mea na faaalia e le Alii ia te ia, e uiga i le suiga faaletino na mauaina e Nifae e Toatolu, ina ia mafai ai ona latou tumau i luga o le fogaeleele.
Fautuaga mo le Aoaoga
3 Nifae 28:1–11
Ua tuu atu e Iesu Keriso manaoga o Ona soo sa Nifae
Valaaulia tamaiti e mafaufau loloto pe faapefea ona latou tali atu pe a faaali mai Iesu Keriso ia i latou ma fesili mai, “O le a se mea e te manao i ai mai ia te a’u?” Fai atu ia i latou e tusi a latou tali i totonu o api po o api talaaga o le suesueina o tusitusiga paia. Tuu atu ia i latou le avanoa e faasoa mai ai mea na latou tusia, pe a latou mananao ai.
Valaaulia tamaiti e faitau lē leoa le 3 Nifae 28:1–3 ma vaavaai mo le tali a soo sa Nifaē e toaiva, ina ua fesiligia i latou e le Alii i lenei fesili. Pe a uma ona lipoti mai e tamaiti mea na latou aoaoina, fesili atu:
-
O le a le lagona o le Faaola e uiga i le manao o nei soo e toaiva?
Valaaulia tamaiti e faitau lē leoa le 3 Nifae 28:4–9 ma vaavaai mo mea na mananao ai isi soo e toatolu na totoe, mai le Faaola. Fai atu i tamaiti e lipoti mai mea ua latou mauaina. (Atonu e fesoasoani le tata’i atu o mafaufau o tamaiti i le faamatalaga lenei o loo i le 3 Nifae 28:9: “Ua outou mananao ia mafai ona outou aumai o agaga o tagata ia te au.”)
-
O le a le lagona na i ai o le Faaola e uiga i le manaoga o nei soo e toatolu?
-
E tusa ai ma le 3 Nifae 28:8–9, o le a le mea na folafola atu e le Faaola i le au Nifae e Toatolu ina ia mafai ona faataunuuina ai o latou manaoga amiotonu?
Valaaulia se tamaititi e faitau leotele le 3 Nifae 28:10 ma fai atu e vaavaai mo faamanuiaga na folafola mai e le Alii i le au Nifae e Toatolu.
-
O le a le mea na folafola atu e le Alii le au Nifae e Toatolu? O anafea na e vaaia ai faapea, o le auauna atu i isi e taitai atu ai i le olioli?
-
O le a se mea e mafai ona tatou aoaoina e uiga i le Alii mai le 3 Nifae 28:1–10? (O tali a tamaiti i lenei fesili atonu e aofia ai le faapea e faamanuia e le Alii i tatou e tusa ma o tatou manaoga amiotonu ma faapea e fiafia le Alii pe a tatou mananao e fesoasoani i isi e o mai ia te Ia.)
Ina ia fesoasoani i tamaiti ia malamalama i le taua o manaoga amiotonu, faitau faamatalaga nei:
Na saunoa mai Elder Neal A. Maxwell o le Korama a Aposetolo e Toasefululua:
“O le mea lea, o mea tatou te naunau lava e mananao i ai, i le aluga o taimi, o mea ia o le a le pine ae avea ai i tatou ma o mea foi ia o le a tatou mauaina i le faavavau. … …
“O le mea lea, o manaoga amiotonu e manaomia le lē fesuisuiaia” (“E Tusa Ma o [Matou] Manao,” Liahona, Ian. 1997, 23–25).
Na aoao mai Peresitene Polika Iaga:
“O alii ma tamaitai, o e mananao ia maua nofoaga i le malo selesitila, o le a iloaina e ao ona latou tau ma le fili o le amiotonu uma i aso uma” (“Remarks,” Deseret News, Tes. 28, 1864, 98).
-
Aisea e te manatu ai e tatau ona tatou tau i aso uma, ina ia faataunuu ai o tatou manaoga amiotonu?
-
O anafea na e lagonaina ai ua faamanuia oe e le Alii, ona o ou manaoga amiotonu?
Faasino tamaiti i manaoga na latou tusia i le amataga o le vasega. Valaaulia i latou e tusi ni nai fuaiupu e uiga i mea o le a amata ona latou faia i le asō, e faamautinoa ai le faataunuuina o na manaoga amiotonu.
3 Nifae 28:12–35
Ua faamatala e Mamona le auaunaga a le au Nifae e Toatolu
Valaaulia se tamaitiiti aoga e faitau leotele le 3 Nifae 28:12–16. Fai atu i le vasega e mulimuli i le faitauga, ma vaavaai mo mea na tutupu i le au soo sa Nifaē, ina ua mavae le tuumuli ese o le Faaola mai ia te i latou. Faamalamalama atu na maua e le au soo le tulaga o le liliuga—o se suiga le tumau i o latou tino.
-
E tusa ai ma le 3 Nifae 28:15, o le a le mafuaaga e tasi na manaomia ai le liuaina o le au soo? (Ina ia “mafai ona latou vaai i mea a le Atua.”)
Faamalamalama atu faapea i le amata mai ai i le 3 Nifae 28:17, tatou te faitau ai i le faamatalaga a Mamona e uiga i le auaunaga a le au Nifae e Toatolu. Valaaulia tamaiti e faitau lē leoa le 3 Nifae 28:17 ma vaavaai mo mea sa le’i iloaina i Mamona e uiga i le tulaga faaletino o le au Nifae e Toatolu, ina ua ia tusia lenei tala. (Atonu e te manao e ta’u atu i tamaiti faapea, i se taimi mulimuli ane o le lesona, o le a latou aoao atili ai e uiga i le suiga na maua e le au Nifae e Toatolu.)
Valaaulia ni nai tamaiti aoga e feauauai i le faitauina leotele mai o le 3 Nifae 28:18–23. Fai atu i le vasega e mulimuli i le faitauga, ma vaavaai mo le auala na faamanuia ai e le Alii le au Nifae e Toatolu, ina ia mafai ona latou faatinoina o latou manaoga amiotonu.
-
O a mea na faia e le au Nifae e Toatolu, e faataunuu ai lo latou manaoga e aumai isi i le Faaola?
-
O a auala na faamanuia ai e le Alii i latou, ina ia mafai ona faataunuu lo latou manaoga?
Valaaulia tamaiti e faitau lē leoa le 3 Nifae 28:25–32 ma faailoa mai tagata, o e ua faamanuiaina, ma o le a faapea ona faamanuiaina mai le auaunaga a le au Nifae e Toatolu. Atonu e te manao e fautuaina tamaiti e faailoga mea ua latou mauaina. (Manatua o le 3 Nifae 28:27–28 o loo faaali mai ai se mafuaaga se tasi e ala ai ona tatau ona tatou faaeteete e uiga i le talitonu ma le faasoaina o tala mai tagata, o e faapea mai na latou feiloai ma le au Nifae e Toatolu: Na saunoa mai Mamona faapea o tagata na auauna atu i ai le au Nifae e Toatolu “o le a lē iloa i latou”)
3 Nifae 28:36–40
Ua aoao Mamona e uiga i le natura o tagata liua
Fesili atu i tamaiti pe na i ai ea se taimi na i ai sa latou fesili e uiga i le talalelei pe, na latou faitau ea i se mea i totonu o tusitusiga paia sa latou le malamalama ai. Faamanatu atu ia i latou faapea na tusitusi muamua Mamona e uiga i le liliuga o le au Nifae e Toatolu, na ia saunoa faapea sa ia le’i malamalama atoatoa i le suiga i o latou tulaga faaletino i le taimi o la latou auaunaga i luga o le fogaeleele (tagai i le 3 Nifae 28:17).
-
O ai e masani ona e liliu atu i ai, pe a i ai ni au fesili e uiga i le talalelei, pe uiga i mau i tusitusiga paia? Aisea?
Valaaulia tamaiti e faitau lē leoa le 3 Nifae 28:36–37 ina ia maua ai le mea na faia e Mamona e saili ai le tali i lana fesili.
-
O le a le mataupu faavae e mafai ona tatou aoaoina mai ia Mamona e uiga i le auala e maua ai le malamalamaaga faaopoopo? (E ui atonu e tali mai tamaiti i lenei fesili i ni auala eseese, ia mautinoa ua latou faailoa mai le mataupu faavae lenei: Pe a le lava lo tatou malamalamaaga, e tatau ona tatou fesili atu i le Tama Faalelagi ma o le a tatou mauaina le taitaiga.)
-
O a nisi o faataitaiga e faapupula ai lenei mataupu faavae?
-
O a nisi o tulaga ia atonu e manaomia ai lo tatou fesili atu i le Tama Faalelagi mo le malamalamaaga sili atu?
Faitau le saunoaga lenei, lea na faamaoti mai ai e Peresitene Spencer W. Kimball ni nai tulaga e tatau ai ona tatou tatalo atu mo se fesoasoani:
“E tele naua ni mea e tatau ona tatou manaomia ai lana fesoasoani e pei ona tatou saili atu mo le aoaoina o upu moni o le talalelei ma ia tatou ola ai, ma a o tatou saili mo lana fesoasoani i filifiliga e tele o le olaga, o filifiliga ma faaiuga e aafia ai aoga, o faaipoipoga, o galuega e faigaluega ai, nofoaga e nonofo ai, faaalualuina i luma o tatou aiga, o le auauna atu o le tasi i le tasi i le galuega a le Atua, ma saili lana faamagaloga ma faaauau atili le taitaiga ma le puipuiga i mea uma tatou te faia. O le lisi o mea tatou te manaomia e umi ma moni ma e ootia ai le loto. …
“I le mavae ai o se olaga tatalo, ua ou mautinoa ai le alofa ma le mana ma le malosi e oo mai ona o le tatalo faamaoni ma le agaga atoa i ai. Ou te iloa le nofo saunia o le Tama e lagolagoina i tatou i lo tatou olaga faaletino, e aoao ma taitai i tatou. O lenei, i le alofa silisili o lo tatou Faaola na ia fetalai ai, ‘O le mea Ou te fai atu ai i le toatasi, Ou te fai atu ai i tagata uma; ia tatalo e le aunoa.’ (MF&F 93:49.)” (“Tatalo E Le Aunoa,” Liahona, Mat. 1982, 1, 8).
-
E mafai faapefea ona faateleina lou faatuatua i le mana o le tatalo? O anafea na maua ai e oe ma lou aiga tali i a outou tatalo?
Uunai tamaiti e o atu i le Tama Faalelagi i le tatalo, a o latou saili ia malamalama i le talalelei ma faafetaiaia luitau o le olaga. Molimau atu i faamanuiaga ua oo mai i lou olaga, a o e aveina atu ou luitau ma fesili i le Tama Faalelagi.
Faamalamalama atu o le suiga na maua e le au Nifae e Toatolu ua ta’ua o le faaliliuina. Ua faaliliuina nisi o auauna faamaoni a le Alii ina ia mafai ai ona faaauau a latou galuega i le lalolagi. A o faaauau e Mamona ona fesili atu e uiga i lenei suiga, na ia aoaoina ai e uiga i le natura o tagata faaliliuina.
Tusi le Tagata Faaliliuina i luga o le laupapa. Valaaulia se tamaitiiti aoga e faitau leotele le 3 Nifae 28:37–38. Fai atu i le vasega e mulimuli i le faitauga, ma vaavaai mo mea na aoaoina e Mamona e uiga i le suiga lea na tupu i tino o le au Nifae e Toatolu.
-
O le a le mea na aoaoina e Mamona e uiga i tagata faaliliuina? (Fai atu i se tamaititi e avea o se failautusi, ma tusi tali a isi tamaiti i luga o le laupapa. O tali e tatau ona aofia ai le faapea o tagata faaliliuina e le “tofo i le oti,” e le lagonaina le tiga, ma faapea latou te le lagonaina le faanoanoa, vagana ai le faanoanoa latou te lagonaina ona o agasala a le lalolagi.)
-
Aisea na tatau ai lenei suiga i o latou tino? (Atonu e te manao e fai atu i tamaiti e iloilo le 3 Nifae 28:6–7. Sa tatau le i ai o le suiga, ina ia mafai ai ona faataunuu lo latou manaoga amiotonu e tumau i le lalolagi, ma faaauau e aumai agaga ia Keriso seia oo i le Afio Mai Faalua o le Faaola.)
Valaaulia tamaiti e faitau lē leoa le 3 Nifae 28:39–40 ma vaavaai mo faamatalaga faaopoopo e uiga i tagata faaliliuina. A o lipoti mai tamaiti, fai atu i se isi e avea ma failautusi e tusi mea ua latou mauaina i luga o le laupapa. (O tali e tatau ona aofia ai le faapea e le mafai ona faaosoosoina e Satani tagata ua faaliliuina, faapea ua faapaiaina ma paia, ma faapea “[e le] mafai e mana o le lalolagi ona taofi i latou.”) Atonu e manaomia lou faamalamalama atu faapea, e ui o tagata ua faaliliuina e le mafatia i tiga o le oti, ae e le o i latou o ni tagata toetutu. O le a latou le mauaina lena “suiga tele” seia oo i le Aso Faamasino, lea o le a suia vave ai i latou mai le tino faitino i le tino ola pea—“e pei o le emo o le mata” (tagai i le 3 Nifae 28:8, 40).
Faaiu e ala i le molimau atu e uiga i mataupu faavae ma aoaoga faavae na talanoaina i le vasega. Valaaulia tamaiti e faatino i luga o uunaiga na latou mauaina mai le Agaga.
Tala ma Faamatalaga o Talaaga
3 Nifae 28. Liua ma le faaliliuina
O le au Nifae e Toatolu na liua ma faaliliuina.
Liua, lea o loo taua i le 3 Nifae 28:13–17, o se “tulaga lea e oo i tagata o e ua suia i se taimi le tumau i foliga ma le natura—o lona uiga—ua siitia i se tulaga maualuga a’e faaleagaga—ina ia mafai ona latou tumau i le afioaga ma le mamalu o agaga faalelagi” (Taiala i Tusitusiga Paia, “Liua,” scriptures.lds.org; tagai foi i le MF&F 67:11; Mose 1:11). Ua ta’u mai e tusitusiga paia e uiga i tagata o e na liuaina, e aofia ai Mose (tagai i le Mose 1:9–11); Iesu Keriso, Peteru, Iakopo, ma Ioane (tagai i le Mataio 17:1–8); ma Iosefa Samita (tagai i leIosefa Samita—Talafaasolopito1:14–20).
O tagata ua faaliliuina o “tagata ua suia ina ia le oo ia te i latou le tiga po o le oti seia oo i lo latou toetutu mai i le tino ola pea” (Taiala i Tusitusiga Paia, “Tagata ua Faaliliuina,” scriptures.lds.org; tagai foi i le 3 Nifae 28:7–9, 20–22, 37–40). O lo latou faamoemoega o le aumaia lea o agaga ia Keriso (tagai i le 3 Nifae 28:9). O tusitusiga paia ua i ai tala e uiga i tagata o e na faaliliuina, e aofia ai Enoka (tagai i le Kenese 5:24; Eperu 11:5), Mose (tagai i le Alema 45:19), Elia (tagai i le 2 Tupu 2:11), ma Ioane le Soo Pele (tagai i le Ioane 21:22–23; MF&F 7).