Lesona 150

Eteru 12:23–41

Faatomuaga

I le tatalo faamaualalo, na faailoa ai e Moronae se popolega. Na ia popole e uiga i vaivaiga na ia iloa i ona tusitusiga ma i tusitusiga o i isi tusi a perofeta o le Tusi a Mamona. Na tali le Alii ma se folafolaga e faamalosia i latou o e faamaualaloina i latou lava ma maua le faatuatua ia te Ia.

Fautuaga mo le Aoaoga

Eteru 12:23–41

Ua aoaoina e Moronae o le faatuatua, faamoemoe, ma le agaalofa e taua i le faaolataga

Tusi le upu malosii le tasi itu o le laupapa ma le upu vaivaii le isi itu o le laupapa. Tuu atu i tamaiti aoga ia mafaufau loloto i mea ua latou lagona o o latou malosiaga. Ona valaaulia lea o i latou e mafaufau e uiga i nai o latou vaivaiga po o ni le atoatoa. Fai atu ia i latou e sii o latou lima pe afai latou te mananao e suia o latou vaivaiga i malosiaga. Faamalamalama atu na aoao Moronae e uiga i le mafuaaga ua tatou maua ai vaivaiga ma le e mafai ona tatou faatoilaloina i latou.

Valaaulia se tamaitiiti aoga e faitau leotele le Eteru 12:23–25. Fai i le vasega e mulimuli i le faitauga, ma faailoa le vaivaiga na lagonaina e Moronae na ia te ia ma isi au tusiupu o le Tusi a Mamona. Ao le i faitau e tamaiti aoga, atonu e te manao e faamalamalama atu o le upu Nuuesei nei fuaiupu ua faatatau i tagata o le a nonofo i malo o Nuuese i aso e gata ai.

• O a mea na popole i ai Moronae o le a tutupu ona o le vaivaiga o i latou o e na tusiaina le Tusi a Mamona?

Valaaulia tamaiti aoga e faitau leleoa le tali a le Alii ia Moronae e uiga i le Eteru 12:26–27. Fai atu ia i latou e vaavaai mo mafuaaga ua tuuina mai ai e le Atua vaivaiga ia i tatou. Faamanino atu o le Eteru 12:27o se fuaitau o mau tauloto. Atonu e te fautuaina tamaiti aoga ia faailoga lenei fuaitau i se auala tulaga ese ina ia mafai ona faigofie ona latou mauaina.

Eteru 12:27 o se fuaitau o mau tauloto. Tagai i le manatu mo le aoaoina o loo i le faaiuga o le lesona e fesoasoani ai i tamaiti aoga i le taulotoina o lenei fuaitau.

Ina ia fesoasoani ia malamalama atili tamaiti aoga i le upu vaivaigae pei ona faaaogaina i nei fuaiupu, fai atu i se tamaitiiti aoga e faitau le faamatalaga o loo i lalo na saunia e Elder Neal A. Maxwell o le Korama a Aposetolo e Toasefululua. Ao le i faitauina le faamatalaga, fai atu i le vasega e faalogologo mo ituaiga o vaivaiga e lua ua faailoa mai e Elder Maxwell.

Elder Neal A. Maxwell

“Pe a tatou faitau i tusitusiga paia i ‘vaivaiga,’ a le tagata o lenei faaupuga e aofia ai le … ua fanauina i tulaga lautele faaletagata le vaivaiga lea ua i ai i le tino faaletino se sootaga faifai pea i le agaga (tagai Eteru 12:28–29). O vaivaiga faapenei e aofia ai, peitai, o o tatou vaivaiga patino, faaletagata lava ia, lea e faamoemoe e tatou te faatoilaloina (tagai MF&F 66:3; Iakopo 4:7). Ua i le olaga se auala e faailoaina ai nei vaivaiga” (Lord, Increase Our Faith [1994], 84).

• E tusa ai ma Elder Maxwell, o a ituaiga o vaivaiga faaletagata ua tatou faitau i ai i tusitusiga paia? (Atonu e manaomia ona e faamalamalama o le fasifuaitau “tulaga lautele faaletagata” e faatatau i le vaivaiga na mafua ai mai le Pau o Atamu ma Eva po o, i nisi upu, o le vaivaiga ua ogatusa ma le “tagata natura” ua tautalagia i le Mosaea 3:19.)

Faamanatu i tamaiti aoga o nisi taimi e ta’u mai e tusitusiga paia se mataupu faavae e ala i le faaaogaina o upu afai ma le ona. O le upu afai e faalauiloa ai se mea e ao ona tatou faia, ma le onae faalauiloa ai se faamalamalamaaga o se mea o le a tupu ona o se taunuuga o a tatou amio. Valaaulia tamaiti aoga e iloilo leleoa le Eteru 12:27, ma vaavaai mo mataupu faavae o le “afai-ona” i lenei fuaiupu. E tatau ona faailoa e tamaiti aoga le mataupu faavae o loo i lalo (tusi i le laupapa):

Afai tatou te o mai ia Iesu Keriso, o le a Ia faaali mai ia i tatou o tatou vaivaiga.

Afai tatou te faalotomaualaloina i tatou lava ma faatino le faatuatua i le Alii, o le a Ia faia mea vaivai ma mea malolosi ia i tatou.

• Aisea e te manatu ai e taua ona tatou iloa o tatou vaivaiga?

• Faamanino atu o le fasifuaitau “o mai ia Iesu Keriso” i le mataupu faavae muamua. O a nisi o mea e mafai ona tatou faia ia “o mai ia Iesu Keriso”? (O tali e mafai ona aofia ai e mafai ona tatou tatalo, anapogi, salamo, suesue i tusitusiga paia, auai i tapuaiga faalemalumalu, auauna atu i isi, ma saili ia atiina ae uiga faaKeriso. Atonu e te manao e faamanino atu i le tele o tulaga, o le faatoilaloina o se vaivaiga o lona uiga o se faaopoopoga i le sailia o le fesoasoani a le Alii, e tatau ona faia la tatou vaega.)

• O le a le fautuaga a le mataupu faavae lona lua o le a tupu pe afai tatou te filifili iaauanei faamaualaloina i tatou lava ma faatino le faatuatua ia Iesu Keriso? (O le a faatumauina pea o tatou vaivaiga aua ua tatou teenaina le alofa mutimutivale o le Alii e fesoasoani ia i tatou e faatoilaloina i latou.)

• O le a lou manatu i le uiga o le fasifuaitau “ua lava lou alofa mutimutivale … o e faamaualaloina i latou lava i ou luma”? (Ia fesoasoani i tamaiti aoga e tali lenei fesili, atonu e manaomia ona e faamalamalamaina o le alofa mutimutivale o se “mafuaaga paia e fesoasoani pe faamalosia, ua tuuina mai e ala i le alofa tunoa maoae ma le alofa o Iesu Keriso” ma ua mafai ai ona o le Togiola [Bible Dictionary, “Grace”]. O lenei mana gafatia, po o se fesoasoani, o le a le uma lava—e tusa lava po o le a le toatele o tagata e sailiaina.)

Valaaulia tamaiti aoga e faasoaaafiagana latou mauaina ina ua fesoasoani le Alii ia i latou (po o se tasi ua latou iloaina) e faatoilalo se vaivaiga. (Faamanatu i tamaiti aoga e le tatau ona latou faasoaina aafiaga ua patino tele pe le faalauaiteleina.) Atonu e te manao e faasoa sa oe lava aafiaga.

Fautuaina tamaiti aoga e faasoa aafiaga faaleagaga

E mafai ona e faatuatuaina o le a i ai aafiaga faaleagaga i au tamaiti aoga e faasoa mai. Na matauina e Peresitene J. Reuben Clark Jr. o le Au Peresitene Sili, “E toetoe lava a leai se talavou e sau i le tou faitotoa o le … seminare ua le avea ma tagata aoga i faamanuiaga faaleagaga, … vaaia se tatalo anoa, … molimauina le mana o le faatuatua e faamalolo ai e mamai, pe … ua vaaia le anoanoai o faaleagaga lea e le ano i ai le lautele o le lalolagi i le aso” (The Charted Course of the Church in Education, rev. ed. [1994], 6; tagai foi si.lds.org).

Ia fautuaina le faaaogaina o mataupu faavae ua aoaoina i le Eteru 12:27, tusi fuaitau o loo i lalo i le laupapa:

1. Iloaina o o’u vaivaiga 2. Faamaualaloina a’u lava 3. Ia faatinoina le faatuatua ia Iesu Keriso

Valaaulia tamaiti aoga e tusi nei fasifuaitau i a latou api e tusi ai faamatalaga po o api talaaga mo le suesueina o tusitusiga paia. I lalo o fuaitau talafeagai, valaaulia i latou e tusi (1) se vaivaiga ua latou lagona ua ia i latou, (2) o se auala e mafai ona faamaualaloina ai i latou lava, ma (3) se auala e mafai ona latou faatinoina ai le faatuatua ia Iesu Keriso ia mafai ona latou maua Lana fesoasoani, po o le alofa tunoa, e faatoilaloina ai vaivaiga ua latou lisiina. Faamautinoa atu i tamaiti aoga a latou mulimuli i mea ua latou tusiaina, o le a “faia mea vaivai ia avea ma mea malolosi ia te i latou” e le Alii (Eteru 12:27).

Valaaulia tamaiti aoga e faitau leleoa le Eteru 12:26, 28, ma vaavaai mo pe na faapefea ona tali le Alii i popolega a Moronae e tusa ai ma ona vaivaiga.

Faamanino atu o le faamatalaga “E faatauemu e ua valelea, ae o le a faanoanoa i latou” (Eteru 12:26).

• E tusa ai ma mea na tatou aoaoina i le asō, aisea ua e manatu ai e valea le tauemuina o vaivaiga a isi?

Faamanino atu o le Eteru 12:26 ua taua ai le agamalu. (Atonu e te manao e faamalamalama o le agamalu o le faamaualaloina ma aoaoina ma ia onosai i taimi o puapuaga.)

• Aisea e te manatu ai e manaomia ona tatou agamalu ina ia le vaaia vaivaiga o isi?

Ao le i faaauauina, faamamafa atu faapea afai tatou te agamalu, e mafai ona tatou mauaina le alofa tunoa o le Alii e fesoasoani ai ia le amanaia vaivaiga o isi.

Otooto le Eteru 12:29–32 e ala i le faamalamalamaina faapea na aoaoina e Moronae e uiga i le taua o le faatinoina o le faatuatua ma le mauaina o le faamoemoe ma le alofa mama. Atonu e te manao e faamalamalama atu faapea o le “alofa mama o le alofa le pona lea o Keriso” (Moronae 7:47).

Valaaulia tamaiti aoga e faitau leleoa le Eteru 12:33–35, ma vaavaai mo mafuaaga ua taua ai le faatinoina o le alofa mama pe a tatou feagai ma vaivaiga o isi.

• E tusa ai ma Eteru 12:34, o le a se taunuuga o le a feagai mai tatou pe afai e leai se alofa mama ia i tatou?

Ia faaiuina, valaaulia se tamaitiiti aoga e faitau leleoa le Eteru 12:38–41. Fai atu ia i latou e tusi i a latou api e tusi ai faamatalaga po o api talaaga mo le suesueina o tusitusiga paia e uiga i mea ua latou faia e tali atu ai i le valaaulia na faamaumauina i le Eteru 12:41—“Saili lenei Iesu o le ua tusi i ai le au perofeta ma aposetolo.”

Molimau atu ao tatou faalotomaualaloina i tatou lava ma faatinoina le faatuatua ia Iesu Keriso, o le a Ia “faia lea o mea vaivai ia avea ma mea malolosi ia te i [tatou]” (Eteru 12:27). Fautuaina tamaiti aoga ia mulimuli i fuafuaga ua latou tusiaina. Atonu e te fautuaina foi i latou e saili le fesoasoaniga a le Alii i le faatinoina o le alofa mama pe a latou feagai ma vaivaiga o isi.

Mau Tauloto—Eteru 12:27

Ia fesoasoani i tamaiti aoga e taulotoina le Eteru 12:27, tusi upu o loo i lalo i luga o le laupapa ma valaaulia tamaiti aoga e kopiina i a latou pepa:

Afai … e o mai … faaali … vaivaiga … avatu … vaivaiga … faalotomaualalo … alofa tunoa … tagata uma … faalotomaualaloina … afai … faalotomaualaloina … faatuatua … vaivai … malolosi.

Fai atu i tamaiti aoga e faitau leleoa le Eteru 12:27, ma matauina upu nei. Ona valaaulia lea o i latou e tauloto le tele o le fuaiupu e mafai ona latou faia, ma vaavaai na o upu i o latou pepa. Fautuaina tamaiti aoga e tuu a latou fasi pepa i se mea e mafai ona latou mauaina i se taimi mulimuli ane i le asō po o le aso e sosoo ai (mo se faataitaiga, i totonu o se taga po o i totonu o latou tusitusiga paia). Valaaulia i latou e iloilo le Eteru 12:27 i taimi latou te vaaia ai le fasi pepa seia o latou taulotoina le fuaitau.

Tala ma Faamatalaga o Talaaga

Eteru 12:27. “O le a ou faaali atu ia te i latou o latou vaivaiga”

Na faaalia e Elder Bruce C. Hafen o le Fitugafulu faapea, o lo tatou tauivi e faatoilaloina vaivaiga e taua i lo tatou faamoemoega i lenei fogaeleele:

“O le fuafuaga a lo tatou Tama tatou te oo atu ai i faaosoosoga ma le faanoanoa i lenei lalolagi pau. …

“Afai la o i ai ni faafitauli i lou olaga, aua e te mantu faapea o loo i ai se mea o loo sese ia te oe. O le tauivi ai ma na faafitauli o le faavae lea o le faamoemoega o le olaga. A o tatou faalatalata atu i le Atua, o le a Ia faaali mai ia i tatou o tatou vaivaiga, ma o na vaivaiga o le a tatou atamamai, ma malolosi ai. Afai o loo e iloaina le tele o ou vaivaiga, o le uiga o lena mea o loo e agaigai atu i le Atua, ae le o le mamao ese maia ai” (“O Le Togiola: O Mea Uma mo Tagata Uma,” Ensignpo o leLiahona, Me 2004, 97).

O le tala o loo i lalo e faatatau i se alii talavou o le na aafia i le faataunuuina o le folafolaga a le Alii i leEteru 12:27:

Ua fautuaina tama talavou uma i le Ekalesia e ausia sini e ala i le polokalama o le Tiute i le Atua ma, i nisi eria, o le polokalama faaSikauti. Sa pisi matua o Jonathan Perez e tausia lona aiga toatele, ma na tauemu ana uo i ana taumafaiaga e ausia le tulaga o le Aeto i le polokalama faaSikauti. E ui lava i nei faigata, na setiina e Jonathan se sini ma amata ona galue. I le faagasologa o taimi, ma faatasi ai ma le fesoasoani ma le lagolagosua a lona taitai o Alii Talavou, sa ia ausiaina lana sini. Na ia tusia, “Ua aoaoina au e lenei aafiaga e tusa lava po o a faalavelave po o luitau e oo mai, o le a fesoasoani le Alii ia te au ia faatoilalo ou faaletonu ma vaivaiga (Eteru 12:27). E le afaina po o le a le tulaga na tatou ola ai pe tatou te mauoa pe matitiva. E mafai ona ausia a tatou sini aua ua i ai le Alii i o tatou autafa” (Jonathan Perez, “An Honor Earned,” New Era, Nov. 2007, 45).

Manatu Faaopoopo Faafaiaoga

Eteru 12:26. Le amanaiaina o vaivaiga o isi

Faamanino atu o se tasi o vaivaiga ua tauivi ma le toatele o tagata o le le mafai lea ona faamaualaloina ma faatinoina le faatuatua pe a latou feagai ma vaivaiga o isi. Faitau leotele atu le lua pe tolu o tulaga o loo i lalo. Malolo pe a maea [ona faitauina] taitasi ma valaaulia tamaiti aoga e faamalamalama pe faapefea i le mauaina o le faatuatua ia Iesu Keriso, o le i ai o le faamoemoe e maua ai faamanuiaga e faavavau, po o le faatinoina o le alofa mama o le a mafai ona fesoasoani i se tasi ia amioa’i talafeagai i le tulaga ua tuuina atu.

1. O se tasi e masani ai po o se uo ua i ai uiga e te le fiafia i ai.

2. O se sui o le uarota ua tuuina mai se lauga po o se lesona ua e lagona le le manaia.

3. Ua faia e se tasi se tala le lelei e uiga ia te oe.

4. Ua i ai se faaletonu i se sui o le aiga ua mafua ai ona luitauina oe i nisi taimi.

Eteru 12:27. Faatoilaloina o vaivaiga

Ia fesoasoani i tamaiti aoga ia malamalama pe faapefea ona avea o tatou vaivaiga ma malosiaga, valaaulia tamaiti aoga e toalua e faitau tala moni o loo i lalo. Fai atu i le afa o le vasega e faalogologo pe na faapefea e tagata taitoatasi i tala taitasi ona faamaualaloina i latou lava ma o mai ia Iesu Keriso. Fai atu i le isi afa o le vasega e faailoa mai pe na faapefea ona faatoilaloina vaivaiga na faalavelave i tagata taitoatasi.

Na tusia e se tamaitai talavou:

“E masani lava ona avea au ma se tagata matamuli i tagata ou te le masani lelei i ai. …

“Na amata le aoga, ma na foliga mai na iloa e Satani ou vaivaiga ma taumafai e faateleina.

“I se tasi o po ae ou te lei moe, sa ou faitau i leEteru 12. … ‘Afai [latou] te faalotomaualaloina i latou lava i ou luma, ma faatuatua mai ia te au, ona Ou faia lea o mea vaivai ia avea ma mea malolosi ia te i latou.’ …

“Na faatumulia ou mata i loimata. Na ou iloa o le mea na ou lagonaina o lou manao lea ia ou sau ia Keriso. Na faafuasei ona ou malamalama na i ai se fuafuaga a le Alii mo au. Na ou iloaina foi na finagalo le Alii e fesoasoani ia ou maua ni uo lelei. Pe ana i ai lava ia te au le faamaualaloina ma le faatuatua, o le a fesoasoani le Alii ia avea ou vaivaiga ma malosiaga.

“Ua ou vaaia i le taimi nei le tausia e le Alii o Lana folafolaga” (Raina Nibarger, “Shy No More,” New Era, Oke. 2009, 45).

Na taua e se alii talavou lona tauivi e faamamaina mai le mausa o ata mataga:

“Sa ou naunau lava ma faamaonia lo’u aafia ai i ata ma tusi mataga e ala lea i lo’u faamanatuina ia te a’u lava o loo aafia ai foi tamaiti i le aoga, ma na foliga mai ai e le o se faafitauli tele mo i latou.

“O le fiailoa na liua i le naunau i ai, ma o le naunau i ai na atiina ae ai se vaisu malosi. E le’i pine ae fai ma a’u mausa.

Na iu lava na filifili lenei alii talavou e faamaualaloina o ia lava ma sau i le Alii:

“Sa ou ifo ma le faamaualalo i le Alii i loimata ma aioi atu mo le malosi e sili atu nai lo lo’u lava malosi. Sa ou tatalo i lea po ma lea po, ma i’u ai ina ua ou iloa e tatau ona ou talanoa atu i lo’u epikopo e uiga i ai. O le vaega lena sa sili ona faigata. …

“E umi se taimi ma ni taumafaiga faamaoni sa faia ina ia taofia ai ni vaisu le lelei. Na iu lava sa faamasinoina a’u e lo’u taitai perisitua ma ua ou agavaa ai ou te alu e auauna i se misiona. O le faalogona sili i le lalolagi o le alu lea i le malumalu ma le iloa ua ou mama. O le Agaga sa ou manao e lagonaina … na toe fetuleni mai i lo’u loto ma lo’u olaga. Ou te matuai faafetai ai lava mo le Togiola a Iesu Keriso” (“Matautia O Loo I Luma Atu! Aloese Mai le Mailei o Ata ma Tusi Mataga,” New Era, Oke. 2002, 12, 13, 14, 15).