Lesona 79
Alema 14
Faatomuaga
Ina ua uma ona faalogo i le talaiga a Alema ma Amoleka, na talitonu ma salamo nisi o le nuu o Amonaea. O le toatele o tagata na feitai ma saili e fasioti ia Alema, Amoleka, ma i latou o e na talitonu i a laua upu. Na molia ma faamasinoina ia Alema ma Amoleka, ma iu ai lava ina falepuipuiina. Na tutuliesea e tagata amioleaga o Amonaea ia alii o e na talitonu ma susunuina a latou taitoalua, fanau, ma tusitusiga paia ao faamalosia ia Alema ma Amoleka e matamata i ai. Ina ua mavae le tele o aso, na laveaiina e le Alii ia Alema ma Amoleka mai le falepuipui ma faaumatia ia taitai amioleaga a Amonaea.
Fautuaga mo le Aoaoga
Alema 14:1–13
Na falepuipuiina ia Alema ma Amoleka, ao tagata Amonaea na talitonu na tutuliesea pe susunuina
Valaaulia ia tamaiti aoga e mafaufau i ni luitau sa latou feagai ai pe o feagai ai i le taimi nei. Ona valaaulia lea o se tamaitiiti aoga e faitau leotele mai le faamatalaga lenei:
“O puapuaga e eseese mafuaaga e oo mai ai. E ono mafai i nisi taimi ona lua fetaiai ma tofotofoga, o se taunuuga lea o lou faamaualuga ma le le usiusitai. O nei tofotofoga e mafai ona aloese mai ai e ala i le ola amiotonu. O isi tofotofoga o ni vaega faanatura o le olaga ma e ono oo mai i taimi o loo e ola amiotonu. Mo se faataitaiga, e mafai ona tupu ia te oe tofotofoga i taimi o ma’i, po o le le mautonu, po o le oti foi o e pele. E oo mai puapuaga i nisi o taimi ona o filifiliga le lelei ma upu ma gaoioiga faatiga a isi.
“O lou manumalo ma le fiafia, i le taimi nei ma le faavavau, e faalagolago tele lea i lau tali atu i faigata o le olaga” (Faamaoni i le Faatuatua: O Se Tusitaiala o le Talalelei [2004], 8–9).
Faamalamalama atu o le lesona i le asō, o le a talanoaina e tamaiti aoga se tala o tagata na aafiaina i ni faigata matautia. O le tele o nei faigata na faaoo atu i ai e isi. Uunaia ia tamaiti aoga e mafaufau i le auala e faatatau ai ia i latou ia upumoni ia o le a latou talanoaina i lenei lesona, e tusa lava po o a faigata e fetaiai ma i latou.
Tusi le faamatalaga lenei i luga o le laupapa:
Alema ma Amoleka
Seseroma
Alii na liliu mai
Tamaitai na liliu mai ma tamaiti
Valaaulia ni nai tamaiti aoga e feauauai i le faitauina leotele o le Alema 14:1–10. Fai i le vasega e mulimuli i le faitauina o le mau, ma tagai mo ni faataitaiga o tiga na oo i tagata o loo lisiina i luga o le laupapa.
-
O le a le mea na tiga ai nei tagata? (Lisi i luga o le laupapa ia tali a tamaiti aoga.)
Faailoa atu ina ua vaai Amoleka i le tiga o fafine ma fanau, sa ia manao e faaaoga le mana o le perisitua e laveai ai i latou. Fai i se tamaitiiti aoga e faitau leotele le Alema 14:11, ma fai i le vasega e tagai i le tali a Alema i le talosaga a Amoleka.
-
Aisea na faataga ai e le Alii le susunuina o nei fafine ma tamaiti? (Atonu e manaomia lou faamatalaina atu faapea o lenei mau, o le fasi fuaitau “sa tiga foi o ia” o lona uiga “sa ia faatagaina.” Na faatagaina e le Alii le tiga o tagata ina ia avea o latou oti e tutu o ni molimau e faasaga atu i tagata na fasiotia i latou. Tagai foi i le Alema 60:13.)
-
E tusa ai ma Alema, e faapefea ona faamanuiaina ia fafine ma fanau mo lo latou talitonuina o le Alii?
Atonu e manaomia lou faamamafaina atu faapea o lenei tulaga faapitoa, o le finagalo o le Alii na faatagaina ai ia tagata ina ia tiga pe mafatia. Ae peitai, e le o le tulaga lava lea i taimi uma. Ia faamautinoa atu i tamaiti aoga e alofa le Alii ia i latou ma e finagalo ina ia latou fiafia ma maua le filemu i o latou olaga. Afai o loo tiga pe o sauaina i latou i soo se auala, e tatau ona latou saili se fesoasoani mai se matua po o se taitai o le Ekalesia ina ia latou foiaina le faafitauli.
-
O a nisi mafuaaga o le a faatagaina ai i tatou e le Alii ina ia tiga? (Atonu e ono aofia i tali Lona manaomia o i tatou ina ia malamalama i taunuuga o filifiliga le lelei, Lona manaomia o lo tatou atiaeina o le onosai, Lona manaomia o lo tatou atiaeina o le lotoalofa mo isi o loo tiga, ma Lona manaomia o lo tatou iloa e manaomia lo tatou faalagolago atu ia te Ia.)
Tusi le upumoni lenei i luga o le laupapa: Afai tatou te faalagolago atu i le Alii, Na te faamalosia i tatou i le taimi o o tatou tofotofoga. Fai atu i se tamaitiiti e faitau leotele le Alema 14:12–13.
-
Na faapefea ona faaalia i upu a Alema lona faalagolago i le Alii?
Atonu e manaomia lou fai atu i se tamaitiiti aoga e faitau mai ia faamatalaga nei mai ia Elder Richard G. Scott o le Korama a Aposetolo e Toasefululua:
“Ua tatou maua i faataitaiga a Alema ma Amoleka ni faamalamalamaga. A o malaga atu e faia mea lelei i le nuu o Amonaea, sa pueina faatagataotaua i laua. Sa faalagolago Amoleka i lana soa poto masani o Alema, o le na taitaia o ia ia ona maua le faalagolago malosi i le Alii. Ina ua ia vaai atu i le susunuina o fafine ma fanau i le afi, sa faapea atu Amoleka, ‘Atonu o le a latou susunuina foi i taua.’ Sa tali atu Alema, ‘Ia faia lava e tusa ma le finagalo o le Alii’— o se mataupu taua. ‘Ae … e lei uma la ta galuega; o lea latou te le susunuina ai i taua’ [Alema 14:12–13; faaopoopo le faamamafa]” (“Ina Ia Faamaloloina,” Liahona, Iulai 1994, 8).
“O le soifuaga lenei o se aoaoga i le faalagolago atoatoa—faalagolago ia Iesu Keriso. … O le faalagolago o lona uiga o le usiusitai lea ma le loto i ai e aunoa ma le iloaina o le iuga mai le amataga (tagai i le Faataoto 3:5–7). Ina ia fua mai, e tatau ona sili atu le malosi ma tumau lou faalagolago i le Alii, nai lo lou faalagolago i ou lava lagona ma lou poto masani” (“Faalagolago i le Alii,” Liahona, Ian. 1996, 19).
Faamatala atu o le Alema 14:14–29, o le a iloa ai e tamaiti aoga le tele o faataitaiga a Alema ma Amoleka o loo faalagolago i le Alii. O le a latou iloa ai foi le auala na faamalosia ai e le Alii i laua ina ia mafai ona la faia Lana galuega.
Alema 14:14–29
Na laveaiina e le Alii ia Alema ma Amoleka mai le falepuipui ma faaumatia ia taitai amioleaga a Amonaea.
Vavae faaafa le vasega. Tuu atu i le tasi afa o le vasega e sue le Alema 14:14–19 ao leisi afa e sue le Alema 14:20–25. Fai atu i vaega uma e lua e saili ia mea ia na tiga ai Alema ma Amoleka i lima o taitai amioleaga o Amonaea. A lava loa le taimi e faitau ai tamaiti aoga, fai atu i ai e faasoa mai mea sa latou mauaina. Lisi a latou tali i luga o le laupapa i lalo o “Alema ma Amoleka”.
-
O fea o nei tofotofoga semanu o le a sili ona faigata mo oe? Aisea?
-
O anafea na e vaai ai i tagata o mafatia i faafitauli e ui lava o loo latou taumafai e ola amiotonu?
Valaaulia tamaiti e feauauai e faitau leotele le Alema 14:25–29. Fai i le vasega e mulimuli i le faitauga, vaavaai i le mea na faia e le Alii e laveai ai Alema ma Amoleka mai le falepuipui. Ina ia fesoasoani ia tamaiti e maua ma iloa ia mataupu faavae o i nei maua, fai atu ni fesili po o fesili uma nei:
-
Aisea na mafai ai e Alema ma Amoleka ona maua le mana ma le malosi mai le Alii? (Tagai i le Alema 14:26, 28.)
-
O a ni mataupu faavae e mafai ona tatou aoaoina mai i aafiaga a Alema ma Amoleka i le falepuipui? (Atonu o le a eseese ia tali a tamaiti, ae e tatau ona atagia mai ai le upumoni faapea afai tatou te valaau atu i le Alii ma le faatuatua, o le a Ia faamalolosia i tatou ma laveaiina i tatou mai o tatou puapuaga i Lana lava ala ma i Lona lava taimi. Atonu e te manao e fautuaina ia tamaiti aoga e maka ia fasifuaitau o i le Alema 14:26, 28 o loo faamamafa mai ai lenei mataupu faavae.)
-
O a nisi o auala e mafai ai e tagata ona faatino le faatuatua ia Iesu Keriso i vaitaimi faigata?
Fai i tamaiti aoga e faasoa mai ni aafiaga sa latou maua ina ua latou molimauaina le malosi lea e oo mai i o tatou olaga ao tatou faatinoina le faatuatua ia Iesu Keriso ma faatalitali ma le lotomaulalo ia te Ia. Atonu o le a latou faasoaina mai o latou lava aafiaga po o aafiaga mai olaga o tagata latou te iloa. Atonu e mafai foi ona e faasoa mai se aafiaga mai lou olaga po o le olaga o se tasi e te iloaina.
Faaiu i le molimau atu o le mana o le Alii e aumaia ia i tatou le malosi ma laveaiina i tatou mai faafitauli i Lana lava ala ma i Lona lava taimi. Faamautinoa atu i tamaiti aoga afai tatou te faalagolago i le finagalo o le Alii, o le a Ia faateleina lo tatou malosi ma le mana e fetaiai ai ma faigata.
Tala ma Faamatalaga o Talaaga
Alema 14:7–11. “Ua aveina a’e i latou e le Alii ia te ia lava”
E ui tatou te faanoanoa i le maliliu o e amiotonu, ae tatou te olioli i le iloaina o lo latou taui i le lalolagi o agaga (tagai Alema 40:12) ma lo latou nofoaga tumau i le malo selesitila (tagai MF&F 76:50–70). Na fetalai mai le Alii, “O le a le tofo i le oti i latou o e e oti ia te a’u, aua o le a suamalie ia te i latou” (MF&F 42:46). Sa faamalamalama mai e Peresitene Iosefa F. Samita:
“E moni o lou vaivai ou te tagi ai i oti o au uo ma tagata o le aiga. Atonu e maligi ou loimata pe a ou vaai i le faavauvau o isi. E i ai i lou loto le agaga lotoalofa mo le fanau a tagata. E mafai ona matou fetagisi faatasi; e mafai ona matou fiafia faatasi; peitai e leai se mafuaaga ou te faavauvau ai, pe faanoanoa ai aua o le oti e oo mai i le lalolagi.… O popolega uma o lenei oti ua aveesea mai le Au Paia o Aso e Gata Ai. E leai so latou popole i le oti faaletino, aua ua latou iloa na oo mai le oti ona o le solitulafono a Atamu, ma o le a oo mai le ola ona o le amiotonu o Iesu Keriso, ma e ui o le a latou feoti o le a latou toe feola. O le mauaina o lenei malamalama, ua latou maua ai le olioli e oo lava i le oti, aua ua latou iloa o le a latou toe tutu ma toe feiloai i tala atu o le tuugamau” (i le Conference Report, Oke. 1899, 70).
Na aoao mai e Elder Bruce R. McConkie o le Korama a Aposetolo e Toasefululua:
“O nisi o taimi e lamaina ai ma sauaina ia tagata o le Alii. O nisi taimi Na te faataga ai Ana au paia faamaoni ina ia faatuai ma mafatia, i le tino ma le agaga, e faamaonia ai mea uma, ma vaai pe o le a latou usitaia Ana feagaiga, e oo i le oti, ina ia latou agavaa ai mo le ola e faavavau. Afai o le tulaga lea o nisi o i tatou, ia faia i ai” (“The Dead Who Die in the Lord,” Ensign, Nov. 1976, 108).