Lesona mo Suesuega e Faia i le Aiga
Upu a Mamona–Mosaea 6 (Iunite 11)
Anomea Sauniuni mo le Faiaoga o Suesuega e Faia i le Aiga
Aotelega o Lesona o Aso Taitasi mo Suesuega e Faia i le Aiga
O le aotelega lea o aoaoga faavae ma mataupu faavae na aoaoina e tamaiti ao latou suesueina Upu a Mamona –Mosaea 6 (iunite 11) e lei fuafuaina e aoao o se vaega o lau Lesona. O le Lesona e te aoao atua e na o nisi o aoaoga faavae ma mataupu faavae nei o loo taulai i ai. Mulimuli i uunaiga a le Agaga Paia a o e mafaufau i tulaga manaomia o tamaiti.
Aso 1 (Upu a Mamona–Mosaea 2)
O le suesue i le aafiaga o Mamona i lona mulimuli i le Agaga ma faaaofia ai papatusi laiti a Nifae i lana faamaumauga, sa aoao ai e tamaiti e silafia mea uma e le Alii. Na aoao mai e le Tupu o Peniamina e faapea, a na lei i ai ia sa Nifae ia tusitusiga paia, semanu ua latou pauu atu i le le talitonu, ma o le suesue i tusitusiga paia e fesoasoani tatou te iloa ai ma tausi poloaiga. Na ia aoao atu i lona nuu ia mataupu faavae taua e pei o le: A tatou auauna atu i isi, ua tatou auauna atu lea i le Atua. A tatou lagonaina le nofo aitalafu i le Atua, ona tatou mananao lea e auauna atu i isi ma faateleina ai lo tatou lotofaafetai. Afai tatou te tausi poloaiga, o le a faamanuiaina i tatou i la le tino ma la le agaga.
Aso 2 (Mosaea 3)
Na toe ta’ua e le Tupu o Peniamina ia upu a se agelu, o le na aumaia le “tala fiafia o le olioli tele” e uiga i le afio mai o le Alii i le tino nei. Sa aoaoina ai e tamaiti, e silia ma le 100 tausaga na valoia mai ai a o lei taunuu, o le a puapuagatia Iesu Keriso ina ia mafai ona faaolaina i tatou mai a tatou agasala. E mafai ona faaolaina i tatou mai a tatou agasala pe a tatou faaaoga le faatuatua ia Iesu Keriso ma salamo. Afai tatou te gauai atu i faatosinaga a le Agaga Paia, e mafai ona tatou faatoilaloina le tagata natura e ala i le Togiola a Iesu Keriso.
Aso 3 (Mosaea 4)
O le savali a le Tupu o Peniamina na faatumulia ai tagata i le Agaga o le Alii. Sa aoaoina e tamaiti a tatou faaaogaina lo tatou faatuatua ia Iesu Keriso ma salamo ma le faamaoni, ona tatou maua lea o se faamagaloga o a tatou agasala. Na aoao atu e le Tupu o Peniamina lona nuu afai tatou te faamaualalo ia i tatou lava i luma o le Atua, ma taumafai e atiina ae uiga faa-Keriso, e mafai ona tatou faatumauina se faamagaloga o a tatou agasala.
Aso 4 (Mosaea 5–6)
A o latou aoao e uiga i le suiga na oo mai i le nuu o le Tupu o Peniamina, sa iloa ai e tamaiti a tatou faaaoga lo tatou faatuatua ia Iesu Keriso ma maua le Agaga Paia, e mafai ona tatou iloa se suiga tele o le loto. Sa osifeagaiga le nuu o le Tupu o Peniamina e faia le finagalo o le Alii ma tausi Ana poloaiga, ma faaalia tatou te tauaveina i o tatou luga le suafa o Iesu Keriso pe a tatou osia ma tausi feagaiga paia.
Faatomuaga
O le a fesoasoani lenei lesona e malamalama ai tamaiti i aoaoga a le Tupu o Peniamina i ona atalii ma lona nuu i le tolu tausaga a o lei maliu o ia. Na aoao e le Tupu o Peniamina lona nuu i le ala e maua ai ma faatumauina se faamagaloga o a latou agasala e ala i le faaaogaina o le faatuatua ia Iesu Keriso.
Fautuaga mo le Aoaoga
Upu a Mamona
Na faaalia e Nifae ma Mamona lo la talitonuga mautinoa i le Atua
Valaaulia se tamaitiiti e faitau le 1 Nifae 9:2–3 e faamanatu ai i tamaiti sa poloaiina ia Nifae e fatu ni seti se lua o papatusi. Fesoasoani ia latou malamalama o le vaega lea, o le fasifuaitau “nei papatusi” e faasino i papatusi laiti a Nifae, lea e i ai se faamaumauga o mea paia. Fai i se tamaitiiti e faitau leotele le 1 Nifae 9:4. Fai i le vasega e vaavaai mo le faamoemoega o papatusi tetele (o se tala i le nofoaiga a tupu ma taua a tagata).
Faamanatu i tamaiti a o otootoina e Mamona ia papatusi tetele a Nifae, sa ia mauaina ai papatusi laiti faatasi ma isi faamaumauga. Sa musuia o ia e le Agaga Paia e faaaofia ai mea sa ia mauaina i papatusi laiti i lana otootoga, e ui lava na te lei iloaina pe aisea (tagai Upu a Mamona 1:7).
Valaaulia le afa o le vasega e sue i le 1 Nephi 9:5–6 pe aisea na poloaiina ai Nifae e fai ia papatusi laiti. Fai i le isi afa o le vasega e sue i Upu a Mamona 1:6–7 pe aisea na filifili ai ia Mamona e faaaofia ia papatusi laiti i lana otootoga. A maea lipoti a tamaiti o le vasega, ona fesili lea i ai po o a mea na aoao mai e nei fuaitau mai ia Nifae ma Mamona e uiga i le Alii. (E mafai e tamaiti ona faaaoga upu eseese, ae ia mautinoa latou te malamalama e silafia e le Alii mea uma.)
-
O le a le “faamoemoega poto” i le lumanai o loo ta’ua e Nifae ma Mamona? (Na silafia e le Alii i le 1828, o papatusi laiti o le a suitulaga i itulau e 116 na leiloloa o le Tusi a Mamona. Tagai i le iunite 6, aso 1 i le taiala suesue a le tamaitiiti aoga.)
-
E mafai faapefea e lou malamalama e silafia e le Alii mea uma i le lumanai ona e maua ai le faatuatua e usitai i uunaiga faaleagaga e te mauaina?
Afai e te lagonaina e manaomia le faaalu o se isi taimi i le vaega lenei o le lesona, fesili i tamaiti pe mafai ona latou faasoa mai ni mea na oo i ai ina ua uunaia i latou e le Agaga e fai se mea ae latou te lei iloaina ia faamoemoega o uunaiga vagana ai i se taimi mulimuli ane.
Mosaea 1
Ua valaau atu le Tupu o Peniamina i tagata ina ia faapotopoto faatasi
Faamatala o papatusi laiti a Nifae o loo aofia ai le talafaasolopito o sa Nifae mai le taimi o Liae seia oo i le taimi na tuufaatasia ai e le Tupu o Mosaea ia tagata Sa Nifae ma Saraemila, ma le taimi na nofotupu ai Mosaea le atalii o Peniamina i le malo i le amiotonu. Na tuuina atu i le Tupu o Peniamina le tiutetauave mo faamaumauga paia. (tagai Ominae 1:23, 25.)
Ina ua lata ina iu le soifua o le Tupu o Peniamina, sa ia faatonuina lona atalii o Mosaea e faapotopoto faatasi le nuu. Valaaulia tamaiti e faitau le Mosaea 1:10–11 ma vaavaai mo mafuaaga na manao ai le Tupu o Peniamina e tautala atu i tagata. (Na manao o ia e faasilasila atu o Mosaea o le isi tupu lea e sosoo ai ma tuu atu i tagata se igoa.)
Mosaea 2–6
Ua aoao e le Tupu o Peniamina lona nuu e uiga i le Togiola a le Faaola
Faaali i tamaiti le ata o le Tupu o Peniamina o loo Lauga atu i Lona Nuu (62298; Tusi Ata o le Talalelei [2009], nu. 74). Faitau le Mosaea 2:12–19 i le vasega. Valaaulia tamaiti e sii o latou lima pe a latou iloaina fasifuaitau o loo faaalia ai le uiga o le Tupu o Peniamina. A sii mai lima o tamaiti, ona taofi lea o le faitau ae fesili i ai e faamatala mai le mea ua latou iloa, ma pe o faapefea ona faaalia ai le uiga o le Tupu o Peniamina.
Atonu e te manao e fesili i tamaiti po o a mea ua latou aoaoina e uiga i le auauna atu i le Mosaea 2:17. (O tali a tamaiti e tatau ona atagia mai ai se malamalama faapea a tatou auauna atu i isi, ua tatou auauna atu lea i le Atua.) Atonu foi e te manao e toe fai mai e le vasega le Mosaea 2:17, o se mau tauloto, e tatau ona manatua. Mafaufau e valaaulia tamaiti e faasoa mai po o le a se ala na latou auauna atu talu ai nei i le Atua e ala i le auauna atu i isi.
Tusi le mau lea i luga o le laupapa po o se fasipepa. Aua nei tusia ai tali o loo faapuipui. Tofi tamaiti taitasi e iloiloina se tasi o mau. Faamanatu i ai o le lauga a le Tupu o Peniamina, o loo taulai atu i le autu lea: “E mafai ona oo mai le faaolataga i le fanauga a tagata, e ala i le na o le suafa lava o Keriso, le Alii Mamana Aoao” (Mosaea 3:17). E tofu mau ma se mea o aoao mai ai e uiga i lenei autu.
-
Mosaea 2:20–25, 34. (A tatou iloaina lo tatou nofoaitalafu i le Atua, e faateleina lo tatou lotofaafetai.)
-
Mosaea 3:7–11, 17–18. (Na puapuagatia Iesu Keriso ina ia mafai ona faaolaina i tatou mai a tatou agasala. Afai tatou te faaaoga lo tatou faatuatua ia Iesu Keriso e ala i le salamo, e mafai ona faaolaina i tatou mai a tatou agasala.)
-
Mosaea 3:12–16, 19–21. (Afai tatou te gauai atu i faatosinaga a le Agaga Paia, e mafai ona tatou faatoilaloina le tagata natura e ala i le Togiola a Iesu Keriso ma avea ai o se tagata paia.)
-
Mosaea 4:5–8, 19–21, 26. (Afai tatou te faamaualalo i tatou lava i luma o le Atua ma taumafai e atiina ae uiga faa-Keriso, e mafai ona tatou faatumauina le faamagaloga o a tatou agasala.)
A uma ua lava se taimi na tuu atu i tamaiti, tuu atu ia i latou e lipoti mai mea sa latou aoaoina i le vasega po o ni vaega toalaiti. Ona fai lea i ni tamaiti e filifili se mataupu faavae se tasi ma faamatala mai pe mafai faapefea ona latou faaaogaina i o latou olaga.
Valaaulia se tamaitiiti e faitau leotele le Mosaea 4:1–3 Fai i le vasega e mulimuli ai, ma vaavaai mo auala na tali atu ai tagata i upu a le Tupu o Peniamina. Ona valaaulia lea o se isi tamaitiiti e faitau leotele le Mosaea 5:1–2, 5–8. Fai i le vasega e vaavaai mo auala tatou te tauaveina ai le suafa o le Alii i o tatou luga. Ia mautinoa e malamalama tamaiti i le mataupu faavae lenei: Tatou te tauaveina i o tatou luga le suafa o Iesu Keriso pe a tatou osia ma tausia feagaiga paia. Atonu e te manao e faamanatu i tamaiti o se tasi o mafauaaga na faapotopoto faatasi ai e le Tupu o Peniamina tagata o le aoao atu lea o i latou e uiga i le osia o feagaiga. Na ia faapaiaina foi lona atalii o Mosaea e avea ma tupu i le nuu (tagai Mosaea 6:3).
A faaiu, fesili i tamaiti pe i ai nisi o i latou e mananao e faasoa mai o latou lagona e uiga i le tauaveina i o latou luga le suafa o Iesu Keriso i le papatisoga. Fai i ai e manatunatu loloto i fesili nei:
-
E mafai faapefea ona e faaaogaina e oe lava ia ia mataupu faavae mai le lauga a le Tupu o Peniamina?
-
O le a le uiga ia te oe o le tauaveina i ou lava luga o le suafa o Keriso?
E mafai foi ona e molimau atu i le olioli e maua mai le talitonu ia Iesu Keriso ma le faalagolago i Lana Togiola.
O Le Isi Iunite (Mosaea 7–17)
Fesili i tamaiti: Pe e te tu ea mo Iesu Keriso tusa lava pe o le faia o lena mea o le a faaumatia ai lou ola? Faailoa atu i tamaiti o le vaiaso a sau o le a latou suesue ai i aoaoga a le perofeta o Apinati. Fautuaina i latou e vaavaai mo le savali na naunau ia Apinati e tuuina atu i tagata sa Nifae, e ui lava ina sa ia iloa o le a fasiotia ai o ia.