O Aoaoga Faavae Autu
O Aoaoga Faavae Autu e tatau ona faailogainai vasega uma o le seminare ma le inisitituti. E ao ona fesoasoani faiaoga i tamaiti aoga ia iloa, malamalama, talitonu, faamalamalama, ma faaaoga aoaoga faavae nei o le talalelei. Ā faia o le a fesoasoani e faamalosia molimau ā tamaiti ma faateleina lo latou talisapaia mo le talalelei toefuataiina ā Iesu Keriso. O le suesueina o nei aoaoga faavae o le ā fesoasoani foi e tapenaina lelei tamaiti e aoao atu nei upumoni taua i isi.
O fuaitau o mau tauloto e 100 na filifilia e le Seminare ma le Inisitituti o Aoaoga Faalelotu e lagolagoina ai le malamalamaaga o tamaiti i Aoaoga Faavae Autu. O le tele o mau faasino o loo lisiina i lalo e faatatau i fuaitau o mau tauloto. Ua fa’aaofiaina e faalia ai pe faapefea ona fesootai ma Aoaoga Faavae Autu.
1. Aiga Atua
E tolu peresona mavaevae i le Aiga Atua: o Le Atua le Tama Faavavau; o Lona Alo o Iesu Keriso; ma le Agaga Paia (tagai Iosefa Samita–Talafaasolopito 1:15–20). E i ai i le Tama ma le Alo ia tino o aano ma ivi, a o le Agaga Paia o le peresona o agaga (tagai MF&F 130:22–23). E tasi lo latou faamoemoega ma le aoaoga faavae.Ua atoatoa a’ia’i lo latou lotogatasi ina ia faataunuuina le fuafuaga paia a le Tama Faalelagi o le faaolataga.
Le Atua Le Tama
O Le Atua le Tama o le Pule Aoao o le atulaulau. O ia o le Tama o o tatou agaga (tagai i le Eperu 12:9). E atoatoa o Ia, e ona le mana uma, ma e silafia mea uma. O Ia foi o le Atua o le alofa mutimutivale atoatoa, agalelei, ma le alofa moni.
Iesu Keriso
O Iesu Keriso o le Ulumatua a le Tama i le agaga ma o le Alo e Toatasi na Fanaua e le Tama i la le tino.O Ia o Ieova o le Feagaiga Tuai ma le Mesia o le Feagaiga Fou.
Sa soifua Iesu Keriso i se soifuaga e leai se agasala ma faia se togiola atoatoa mo agasala a tagata uma (tagai Alema 7:11–13). O Lona soifuaga o se faataitaiga tonu e tatau ona ola ai tagata uma (tagai Ioane 14:6; 3 Nephi 12:48). O ia o le muai tagata i lenei fogaeleele na toetu mai (tagai 1 Korinito 15:20–22). O le a toe afio mai Iesu Keriso i le mana ma le mamalu ma o le a nofotupu i le lalolagi i le taimi o le Meleniuma.
O tatalo uma, faamanuiaga, ma sauniga o le perisitua e tatau ona faataunuuina i le suafa o Iesu Keriso (tagai 3 Nifae 18:15, 20–21).
Mau fesootai: Helamana 5:12; MF&F 19:23; MF&F 76:22–24
O Le Agaga Paia
O le Agaga Paia o le sui lona tolu o le Aiga Atua. O ia o le peresona o agaga e leai se tino o aano ma ivi. E masani lava ona taua o le Agaga, le Agaga Paia, le Agaga o le Atua, le Agaga o le Alii, po o le Faamafanafana.
E molimau mai le Agaga Paia i le Tama ma le Alo, e faaalia mai le moni o mea uma, ma faamama i latou o e salamo ma ua papatisoina (tagai Moronae 10:4–5).
Mau fesootai: Kalatia 5:22–23; MF&F 8:2–3
2. Ata o le Faaolataga
I le olaga i le muai olaga, sa folasia ai e le Tama Faalelagi se fuafuaga e mafai ai e i tatou ona avea faapei o Ia ma maua ai tino ola pea ma le ola e faavavau (tagai Mose 1:39).E faatatau tusitusiga paia i lenei fuafuaga o le ata o le faaolataga, o le fuafuaga sili o le fiafia, o le fuafuaga o le togiola, ma le fuafuaga o le alofatunoa.
O le ata o le faaolataga e aofia ai le Foafoaga, o le Pau, le Togiola a Iesu Keriso, ma tulafono uma, o sauniga, ma aoaoga faavae o le talalelei.O le pule faitalia—o le tomai e filifili ma faatino ai mo i tatou lava—e taua foi i le fuafuaga a le Tama Faalelagi (tagai 2 Nifae 2:27). Ona o lenei fuafuaga, ua mafai ai ona faaatoatoaina i tatou e ala i le Togiola, maua le atoaga o le fiafia, ma ola e faavavau i le afioaga o le Atua (tagai 3 Nifae 12:48). E mafai ona tumau a tatou sootaga faaleaiga e oo i le faavavau.
Mau fesootai: Ioane 17:3; MF&F 58:27
Muai Olaga
Ae tatou te lei fananau mai i le lalolagi, sa tatou nonofo i le afioaga o lo tatou Tama Faalelagi o se tasi o Ana fanau agaga (tagai Aperaamo 3:22–23). I lenei muai olaga sa tatou auai i se fonotaga ma isi fanau agaga a le Tama Faalelagi. I lena fonotaga sa folasia mai ai e le Tama Faalelagi Lana fuafuaga, ma na osifeagaiga ai le Iesu Keriso o le muai olaga e avea ma Faaola.
Na faaaogaina la tatou saolotoga e filifili ai e mulimuli ai i le fuafuaga ā le Tama Faalelagi. Na tatou saunia e o mai i le lalolagi, lea o le a mafai ai ona tatou alualu ai pea i luma.
O e na mulimuli i le Tama Faalelagi ma Iesu Keriso na faataga e o mai i le lalolagi ia latou maua le poto masani i le olaga faitino ma alualu ai i luma e agai atu i le ola e faavavau. O Lusifelo, o le isi atalii agaga o le Atua, na tetee i le fuafuaga. Sa avea o ia ma Satani, ma tuliesea faatasi ma e na mulimuli ia te ia mai le lagi ma taofia ai faamanuiaga o le mauaina o se tino faaletino ma le poto masani i le olaga faitino.
Mau Fesootai: Ieremia 1:4–5
O Le Foafoaga
Na foafoaina e Iesu Keriso le lagi ma le lalolagi i lalo o le taitaiga a le Tama. E lei foafoaina le lalolagi mai se mea noa; sa faatulagaina mai mea sa i ai. Sa foafoaina e Iesu Keriso lalolagi e le mafaitaulia (tagai MF&F 76:22–24).
Na taua i le fuafuaga a le Atua le foafoaina o se lalolagi. Na tuuina mai ai se nofoaga e mafai ai ona tatou maua se tino faaletino, e tofotofoina ma suesueina ai, ma atiina ae ai uiga paia.
Ia tatou faaaogaina punaoa o le lalolagi ma le atamai, faamamaluina, ma le loto faafetai (tagai MF&F 78:19).
O Atamu o le uluai tagata na foafoaina i le lalolagi. Na foafoaina e le Atua Atamu ma Eva i Lona lava faatusa. O tagata ola uma —tane ma le fafine—ua foafoaina i le faatusa o le Atua (tagai Kenese 1:26–27).
O Le Pau
I le Faatoaga i Etena, sa poloai atu ai le Atua ia Atamu ma Eva e aua ne’i aai i le fua o le laau e iloa ai le lelei ma le leaga; o le taunuuga o le faia o lena mea o le oti faaleagaga ma le faaletino. O le oti faaleagaga o le vavaeeseina lea o le tagata mai luma o le Atua. O le oti faaletino o le vavaeeseina lea o le agaga mai le tino faaletino. Ona ua solia e Atamu ma Eva le tulafono ā le Atua, na tulieseina ai mai Lona afioaga ma avea ma tagata o le lalolagi. O le solitulafono a Atamu ma Eva ma suiga na oo mai ai, e aofia ai le oti faaleagaga ma le faaletino, ua ta’ua o le Pau.
O se taunuuga la o le Pau, ua mafai ai e Atamu ma Eva ma a la fanau ona tofo i le olioli ma le faanoanoa, iloa le lelei ma le leaga, ma fanafanau (tagai 2 Nifae 2:22–25). I le avea ai o ni e tupuga mai ia Atamu ma Eva, ua tatou i ai i se tulaga pau i le aluga o le olaga faaletino. E tuueseeseina tatou mai le afioaga o le Alii ma e oti faaletino. E tofotofoina foi i tatou i faigata o le olaga ma faaosoosoga ā le fili. (Tagai Mosaea 3:19.)
O le Pau o se vaega taua o le ata o le faaolataga a le Tama Faalelagi. E itulua lona faasinoga—e faasino i lalo ae agai i luma. E le gata la i le folasiaina mai ai o le oti faaletino ma le faaleagaga, ae ua tatou maua ai le avanoa e fananau mai ai i le lalolagi ma ia aoaoina ma alualu ai i luma.
Olaga Faaletino
O le olaga faaletino o le taimi lea e aoao ai pe o afea e mafai ai ona tatou saunia mo le ola e faavavau ma faamaonia o le a tatou fa’aaogaina lo tatou saolotoga e filifili ai e fai ai mea uma na poloaiina e le Alii. I le iai i lenei olaga faaletino, e ao ona tatou alolofa atu ma auauna atu i isi (tagai Mosaea 2:17; Moronae 7:45, 47–48).
I le olaga faaletino, e tuufaatasia o tatou agaga ma o tatou tino faaletino, e maua ai e i tatou le avanoa e tuputupuae ai ma atiina ae i auala e lei mafaufauina e mafaia i le muai olaga. O tatou tino o se vaega taua o le ata o le faaolataga ma e tatau ona faamamaluina o se meaalofa mai le tatou Tama Faalelagi (tagai 1 Korinito 6:19–20).
Mau Fesootai: Iosua 24:15; Mataio 22:36–39; 2 Nifae 28:7–9; Alema 41:10; MF&F 58:27
Olaga pe a mavae le Oti
Pe a tatou oti, o le a ulufale atu o tatou agaga i le lalolagi o agaga ma faatalitali ai mo le Toetu. O agaga o e amiotonu o le a nonofo i le mea o i ai le fiafia, ua ta’ua o le parataiso. O le toatele o ē faamaoni o le a faaauau pea ona talai atu le talalelei ia i latou o i le falepuipui o agaga.
O le falepuipui o agaga o se nofoaga le tumau lea i le lalolagi pe a mavae le oti mo i latou o e na maliliu e aunoa ma se malamalama i le upumoni po o i latou o e na lē usiusitai i le olaga faitino. O iina, e aoaoina ai agaga e uiga i le talalelei ma maua ai le avanoa e salamo ai ma talia sauniga o le faaolataga lea o loo faatinoina mo i latou i le malumalu (tagai i le 1 Peteru 4:6). O i latou e taliaina le talalelei o le a nonofo ai i le parataiso seia oo i le Toetu.
O le Toetu o le toe faatasia lea o o tatou tino agaga ma o tatou tino faaletino o aano ma ivi (tagai Luka 24:36–39). Pe a mavae le toetu, o le a le toe mafai ona tuueseeseina le agaga ma le tino, ma o le a tatou ola pea lava. O tagata uma e fananau mai i le lalolagi o le a toetutu aua na manumalo Iesu Keriso i le oti (tagai 1 Korinito 15:20–22). O le a toetutu muamua e amiotonu nai e amioleaga ma o le a tula’i mai i le Uluai Toetu.
O le a faia le Faamasinoga Mulimuli pe a mavae le Toetu. O le a faamasinoina e Iesu Keriso tagata taitasi e iloa ai le mamalu faavavau o le a ia mauaina. O lenei faamasinoga o le a faalagolago i le usiusitai o tagata taitoatasi i poloaiga a le Atua (tagai Faaaliga 20:12; Mosaea 4:30).
E tolu malo o le mamalu (tagai 1 Korinito 15:40–42). O le sili ona maualuga o nei o le malo selesetila. O i latou o e totoa i le molimau ia Iesu ma usitai i mataupu faavae o le talalelei o lea faatasi i le malo selesitila i le afioaga o le Atua ma Lona Alo, o Iesu Keriso (tagai MF&F 131:1–4).
O le malo lona lua o malo e tolu o le mamalu, o le malo terasitila. O i latou e i lenei malo o alii ma tamaitai faamamaluina o le lalolagi o ē lei loto totoa i a latou molimau ia Iesu.
O le malo telesitila o le malo pito i maualalo o malo e tolu o le mamalu. O i latou e mauaina lenei malo o i latou na filifili le amioleaga nai lo le amiotonu i o latou olaga faaletino. O le a maua e nei tagata taitoatasi o latou mamalu pe a maea ona togiolaina mai le falepuipui o agaga.
Mau Fesootai: Ioane 17:3
4. Togiola a Iesu Keriso
O le togiolaina o le mafatia lea i le totogiina o le agasala, lea e aveese ai aafiaga o le agasala mai le tagata agasala ua salamo ma faatagaina ai o ia ia toe faalelei ma le Atua. Ua na o Iesu Keriso lava e toatasi e mafai ona faataunuuina se Togiola atoatoa mo tagata uma. O Lana Togiola na aofia ai Lona puapuagatia mo agasala a tagata uma i le Togalaau i Ketesemane, o le faamaligiina o Lona toto, o Ona puapuaga ma le maliu i luga o le satauro, ma Lona Toetu mai le tuugamau (tagai Luka 24:36–39; MF&F 19:16–19). Sa mafai e le Faaola ona faataunuuina le Togiola aua na Ia tausisia Ia lava ia mama mai agasala ma na i ai le mana e manumalo ai i le oti. Na Ia mauaina le mana e oti ai, mai Lona tina faaletino. Na Ia mauaina le mana e toe aumai ai Lona ola, mai Lona Tama faavavau.
E ala i le alofa tunoa, ua mauaina e ala i le taulaga togiola ā le Faaola, o le a toetutu uma tagata ma mauaina le tino ola pea. O le Togiola ā Iesu Keriso ua mafai ai foi ona tatou maua le ola e faavavau (tagai Moronae 7:41). Ina ia mauaina lenei meaalofa, e tatau ona tatou ola i le talalelei ā Iesu Keriso, lea e aofia ai le i ai o le faatuatua ia te Ia, salamo ia tatou agasala, papatisoina, mauaina o le meaalofa o le Agaga Paia, ma tumau ma le faamaoni seia oo i le iuga (tagai Ioane 3:5).
O se vaega o Lana Togiola, e le gata ina puapuaga Iesu Keriso mo tatou agasala ae na ia tauaveina foi i Ona luga tiga, ma’i, ma vaivaiga o tagata uma (tagai Alema 7:11–13). Ua Ia malamalama i o tatou tiga aua na Ia lagonaina. O lona alofa tunoa, po o le mana gafatia, e faamalosia ai i tatou e onosaia faigata ma ausia galuega lea e le mafai ona tatou faia nao i tatou (tagai Mataio 11:28–30; Filipi 4:13; Eteru 12:27).
Mau Fesootai: Ioane 3:5; Galuega 3:19–21
Faatuatua ia Iesu Keriso
O le faatuatua o le “faamoemoe i mea e le vaaia, a ua moni” (Alema 32:21; tagai foi i le Eteru 12:6).O se meaalofa lava mai le Atua.
O le faatuatua e tatau ona taulai atu ia Iesu Keriso ina ia mafai ai ona taitaiina atu se tagata i le faaolataga. O le i ai o le faatuatua ia Iesu Keriso o lona uiga o le faalagolago atoatoa ia te Ia ma talitonu i Lana Togiola e le iu, mana, ma le alofa. E aofia ai le talitonu i Ana aoaoga ma talitonu e tusa lava pe tatou te le malamalama e uiga i mea uma, e Na te malamalama (tagai Faataoto 3:5–6; MF&F 6:36).
E sili atu i le na o le talitonu fua, o le faatuatua e faaalia mai i auala tatou te ola ai (tagai Iakopo 2:17–18). E mafai ona faateleina le faatuatua pe a tatou tatalo, suesue i tusitusiga paia, ma usitai i poloaiga a le Atua.
E i ai foi le faatuatua o le Au Paia o Aso e Gata Ai i le Atua le Tama, le Agaga Paia, le mana o le perisitua, ma isi vaega taua o le talalelei toefuataiina. O le faatuatua e fesoasoani lea tatou te maua ai le faamalologa faaleagaga ma le faaletino ma le malosi e fetuleni ai i luma, e feagai ai ma o tatou tulaga faigata, ma manumalo ai i faaosoosoga 2 Nifae 31:19–20). O le a galueaiina e le Alii vavega tetele i o tatou olaga e tusa ai ma lo tatou faatuatua.
E ala i le faatuatua ia Iesu Keriso, o le a mafai ai e le tagata ona maua se faamagaloga o agasala ma mafai mulimuli ai ona mau faatasi ma le Atua i lona afioaga.
Mau Fesootai: Mataio 11:28–30
Salamo
O le salamo o se suiga o le mafaufau ma le loto lea e aumaia ai ia i tatou se vaaiga fou e uiga i le Atua, e uiga ia i tatou lava, ma e uiga i le lalolagi. E aofia ai le fulitua i le agasala ma liliu atu i le Atua mo le faamagaloga. E faaosofia e ala i le alofa mo le Atua ma le naunau faamaoni e usitai i Ana poloaiga.
O a tatou agasala tatou te lē mama ai—lē agavaa ai e toe foi atu ma nonofo ai i le afioaga o lo tatou Tama Faalelagi.E ala i le Togiola a Iesu Keriso, ua tuuina mai ai e lo tatou Tama i le Lagi le ala lava e tasi mo i tatou ina ia faamagaloina ai a tatou agasala (tagai Isaia 1:18).
O le salamo e aofia ai le lagona faanoanoa i le faia o le agasala, ta’uta’u atu i le Tama Faalelagi ma isi pe a tatau ai, lafoaia o agasala, o le sailia e toefuatai pe toe totogi mea na faaleagaina e le agasala a se tagata, ma ola usiusitai i poloaiga a le Atua (tagai MF&F 58:42–43).
Mau Fesootai: Isaia 53:3–5; Ioane 14:6; 2 Nifae 25:23, 26; MF&F 18:10–11; MF&F 19:23; MF&F 76:40–41
5. Tisipenisione, Liliuese, ma le Toefuataiga
Tisipenisione
O le tisipenisione o se vaega o taimi lea o le a faaalia ai e le Alii Ana aoaoga faavae o le talalelei, sauniga, ma le perisitua. O se vaitaimi lea e i ai i le Alii e lē itiiti ifo ma le toatasi se auauna tofia o lē e umia le perisitua paia ma e i ai le tiute paia e tufa atu le talalelei ma faia sauniga o iai. O loo tatou ola ai i le tisipenisione mulimuli —o le tisipenisione o le atoaga o taimi, lea na amata i le faaaliga o le talalelei ia Iosefa Samita.
O tisipenisione ua mavae na iloga ia Atamu, Enoka, Noa, Aperaamo, Mose, ma Iesu Keriso. E le gata i lea, na i ai isi tisipenisione, e aofia ai i latou o le au sa Nifae ma le au sa Iareto. O le ata o le faaolataga ma le talalelei a Iesu Keriso ua faaalia mai ma ua aoaoina i tisipenisione uma.
Liliuese
Pe a o ese tagata mai mataupu faavae o le talalelei ma leai ni ki o le perisitua, ua latou i ai i le tulaga o le liliuese.
O vaitaimi o le liliuese lautele na tutupu lava i le gasologa o le talafaasolopito o le lalolagi. O se tasi o faataitaiga o le Liliuese Tele, lea na tupu ina ua mavae ona faatuina e le Faaola Lana Ekalesia (tagai 2 Tesalonia 2:1–3). Mulimuli ai i le maliliu o Aposetolo ā le Faaola, na le faamamaluina mataupu faavae o le talalelei ma na faia suiga le faatulafonoina i le faalapotopotoga o le Ekalesia ma sauniga o le perisitua. Ona ua salalau tele lenei amioleaga, o lea sa aveesea ai e le Alii le pule ma ki o le perisitua mai le lalolagi.
I le taimi o le Liliuese Tele, sa leai se taitaiga faalelagi mai perofeta soifua mo tagata. Sa faatuina le tele o lotu, ae sa le’i i ai ia te i latou le pule e faaee atu ai le meaalofa o le Agaga Paia pe faia ai isi sauniga o le perisitua. Na faaleagaina pe na leiloloa ni vaega o tusitusiga paia, ma e lei toe maua e tagata le malamalama moni o le Atua.
Sa i ai pea lenei liliuese seia oo i le taimi na faaali mai ai le Tama Faalelagi ma Lona Alo Pele ia Iosefa Samita ma na amataina ai le Toefuataiga o le atoaga o le talalelei.
Toefuataiga
O le Toefuataiga o le toefuataiina mai lea e le Atua o upumoni ma sauniga o Lana talalelei mo Ana fanau i le lalolagi (tagai Galuega 3:19–21).
I le sauniuniga la mo le Toefuataiga, na faatulai mai ai e le Alii ni tamalii faamamaluina i le taimi na ta’ua o le Toefaatulagaina. Sa latou taumafai e toe faafoi mai aoaoga faavae faalelotu, faatinoga, ma faatulagaga i le ala na faatuina ai e le Faaola. Peitai, latou te lei mauaina le perisitua po o le atoaga o le talalelei.
Na amata le Toefuataiga i le 1820 ina ua faaali mai le Atua le Tama ma Lona Alo o Iesu Keriso, ia Iosefa Samita i le tali o lana tatalo (tagai Iosefa Samita—Talafaasolopito 1:15–20). O nisi o mea autu na tutupu i le Toefuataiga o le faaliliuga lea o le Tusi a Mamona, o le toefuataiga mai o le Perisitua Arona ma le Mekisateko, ma le faatulagaga o le Ekalesia i le aso 6 o Aperila 1830.
Na toefuatai mai e Ioane le Papatiso le Perisitua Arona ia Iosefa Samita ma Oliva Kaotui i le aso 15 o Me 1829. Na toefuatai mai le Perisitua Mekisateko ma ki o le malo i le 1829 ina ua faaee atu e Aposetolo o Peteru, Iakopo, ma Ioane ia Iosefa Samita ma Oliva Kaotui.
Ua toefuatai mai le atoaga o le talalelei, ma o Le Ekalesia a Iesu Keriso o le Au Paia o Aso e Gata Ai o “le ekalesia ola e tasi ma le faamaoni i luga o le fogaeleele atoa” (MF&F 1:30). O lea le pine ae faatumulia le lalolagi i le Ekalesia ma tumau ai e faavavau.
Mau Fesootai: Isaia 29:13–14; Esekielu 37:15–17; Efeso 4:11–14; Iakopo 1:5–6
5. Perofeta ma Faaaliga
O le perofeta o se tagata lea ua tofia e le Atua e saunoa mo Ia (tagai Amosa 3:7). E molimau mai perofeta ia Iesu Keriso ma aoao atu Lana talalelei. Latou te faalauiloa mai le finagalo o le Atua ma lona tulaga moni. Latou te tauleagaina le agasala ma lapatai mai i ona taunuuga. O nisi taimi, latou te valoiaina mea o lea tutupu (tagai MF&F 1:37–38). O le tele o aoaoga o perofeta o loo maua i tusitusiga paia. Ao tatou suesue i upu ā perofeta, e mafai ona tatou aoaoina upumoni ma maua taitaiga (tagai 2 Nifae 32:3).
Matou te lagolagoina le Peresitene o le Ekalesia o se perofeta, tagatavaai, ma talifaaaliga ma na o le pau lea o le tagata i le lalolagi e mauaina faaaliga e taitaiina ai le Ekalesia atoa. Matou te lagolagoina foi fesoasoani le Au Peresitene Sili ma sui o le Korama a Aposetolo e Toasefululua e avea o ni perofeta, tagatavaai, ma talifaaaliga.
O faaaliga o le fesootaiga lea mai le Atua i Ana fanau. Ā oo ina faaalia mai e le alii Lona finagalo i lana Ekalesia, ua Ia saunoa mai e ala i Ana Perofeta. O tusitusiga paia —o le Tusi Paia, Tusi a Mamona, Mataupu Faavae ma Feagaiga, ma le Penina Tautele —o loo iai faaaliga na tuuina mai e ala i perofeta anamua ma perofeta o aso e gata ai. O le Peresitene o le Ekalesia ā Iesu Keriso o le Au Paia o Aso e Gata Ai o le perofeta ā le Atua i le lalolagi i le aso.
E mafai ona maua e tagata taitoatasi faaaliga e fesoasoani ai ia te i latou i o latou manaoga patino, tiutetauave, ma fesili ma fesoasoani e faamalosia ā latou molimau. O le tele o faaaliga i taitai ma tagata o le Ekalesia e oo mai e ala i uunaiga ma manatu mai le Agaga Paia. E saunoa mai le Agaga Paia i o tatou mafaufau ma loto i se leo malu ma itiiti (tagai MF&F 8:2–3). O faaaliga e oo mai foi e ala i se faaataataga, i se miti, ma se asiasiga ā agelu.
Mau Fesootai: Salamo 119:105; Efeso 4:11–14; 2 Timoteo 3:15–17; Iakopo 1:5–6; Moronae 10:4–5
6. Perisitua ma Ki o le Perisitua
O le perisitua o le pule ma le mana o le Atua. E ala i le perisitua, na foafoaina e le Atua ma pulea le lagi ma le lalolagi. E ala mai i lenei mana Na te togiolaina ma faaeaina ai Lana fanau, ia aumaia “le tino ola pea ma ola faavavau o le tagata” (Mose 1:39).
E tuuina atu e le Atua le pule o le perisitua i alii agavaa e auai i le Ekalesia e mafai ai ona latou galulue i Lona suafa mo le faaolataga o Ana fanau. O ki o le peisitua o aia ia o au peresitene, poo le mana ua tuuina atu i alii e le Atua e pulea ai ma taitaiina ai le malo o le Atua i le lalolagi (tagai Mataio 16:15–19). E ala mai i nei ki, o latou uma ua umia le perisitua o lea faatagaina e talai atu le talalelei ma faia sauniga o le faaolataga. O i latou uma o e auauna atu i le Ekalesia e valaauina i lalo o le taitaiga ā se tasi o loo umia ki o le perisitua. O lea la, ua latou maua ai le mana e manaomia e auauna ai ma faataunuuina ai tiute o o latou valaauga.
Mau Fesootai: MF&F 121:36, 41–42
Perisitua Arona
E masani lava ona taua le Perisitua Arona o le perisitua sauniuni. O tofi i le Perisitua Arona o le tiakono, aoao, ositaulaga, ma le epikopo. I le Ekalesia i lenei vaitaimi, e mafai e alii agavaa o le ekalesia ona mauaina le Perisitua Arona e amata i le 12 tausaga.
O le Perisitua Arona “e umia ki o asiasiga ma galuega a agelu, ma le talalelei o le salamo, ma le papatisoga” (MF&F 13:1).
Perisitua Mekisateko
O le Perisitua Mekisateko o le perisitua maualuga, po o le maoae, ma taitaia mea faaleagaga (tagai i le MF&F 107:8). O lenei perisitua maualuga na tuuina atu ia Atamu ma na i ai pea lava i le lalolagi i soo se taimi e faaali mai ai e le Alii Lana talalelei.
Sa faaigoaina muamua “o le Perisitua Paia, e tusa ma le faatulagaga a le Alo o le Atua” (MF&F 107:3). Sa ta’ua mulimuli ane o le Perisitua Mekisateko, na faaigoaina i se faitaulaga sili maoae o le sa soifua i le taimi o le perofeta o Aperaamo.
E aofia i le Perisitua Mekisateko ia tofi o le toeaina, faitaulaga sili, peteriaka, Fitugafulu ma le Aposetolo. O le Peresitene o le Perisitua Mekisateko o le Peresitene lea o le Ekalesia.
Mau Fesootai: Efeso 4:11–14
7. Sauniga ma Feagaiga
Sauniga
I totonu o le Ekalesia ā Iesu Keriso o le Au Paia o Aso e Gata Ai, o sauniga o se faatinoga mamalu paia e iai sona faauigaga faaleagaga. Ua mamanuina sauniga taitasi e le Atua ina ia aoao atu ai upumoni faaleagaga. O sauniga o le faaolataga e faia i le pule o le perisitua ma i lalo o le taitaiga a i latou o e umia ki o le perisitua. O nisi sauniga e taua mo le faaeaga ma ua ta’ua o sauniga faaola.
O le sauniga faaola muamua o le talalelei o le papatisoga e ala i le faatofuina i le vai e se tasi ua iai le pule. E taua le papatisoga mo se tasi ina ia avea ai ma se uso o le Ekalesia ma ina ia ulu atu ai i le malo selesitila (tagai Ioane 3:5).
O le upu papatisoga e sau mai le upu Eleni o lona uiga ia fufui pe faatofu. O le faatofuina e faatusa lea i le maliu o se tagata mai le olaga e tumu i le agasala ma toe fanaufouina i se olaga faaleagaga, e tuuto i le galuega a le Atua ma Ana fanau. E faatusaina foi i le maliu ma le toetu.
Pe a maea ona papatisona se tagata, ona faaee atu lea o aao o se tasi pe sili atu o e umia le Perisitua Mekisateko i luga o le ulu o le tagata ma faamauina o ia o se tasi o le Ekalesia. I le avea ai o se vaega o lenei sauniga, ua ta’ua o le faamauga, e tuuina atu ai i le tagata le meaalofa o le Agaga Paia.
O le meaalofa o le Agaga Paia e ese mai le uunaiga a le Agaga Paia. A o lei faia le papatisoga, e mafai ona lagona e le tagata le uunaiga a le Agaga Paia mai lea taimi i lea taimi ma e ala mai i lena uunaiga e mafai ai ona maua se molimau o le upumoni (tagai Moronae 10:4–5). A uma ona talia le meaalofa o le Agaga Paia, e i ai i le tagata le aia tatau i Lana mafutaga tumau pe afai na te tausia poloaiga.
O isi sauniga faaola e aofia ai le faauuina i le Perisitua Mekisateko (mo alii), faaeaga o le malumalu, ma le faamauga o le faaipoipoga (tagai MF&F 131:1–4). O sauniga faaola uma o le perisitua e o faatasi ma feagaiga. O totonu o le malumalu, e faataunuuina ai foi sauniga faaola nei mo latou ua maliliu. Faatoa aoga sauniga e sui ai pe ā talia lea e tagata maliliu i totonu o le lalolagi o agaga ma faamamalu feagaiga fesootai.
O isi sauniga, pei o le faamaloloina o mai ma le faaigoaina ma le faamanuiaina o fanau, e taua foi mo lo tatou tuputupu ā’e faaleagaga.
Mau Fesootai Galuega 2:36–38
Feagaiga
O le feagaiga o se maliega paia i le va o le Atua ma le tagata. E tuuina mai e le Atua tuutuuga mo le feagaiga, ma e tatou te malilie e faia le mea Na te poloaiina i tatou e fai; ona folafola mai lea e le Atua mo i tatou ni faamanuiaga faapitoa mo lo tatou usiusitai (tagai MF&F 82:10.
O sauniga faaola uma o le perisitua e o faatasi ma feagaiga.Tatou te osi feagaiga ma le Alii i le taimi o le papatisoga ma toe faafouina na feagaiga e ala i le taumamafa ai i le faamanatuga. O uso o ē mauaina le Perisitua Mekisateko, e ulu atu i se tautoga ma le feagaiga o le perisitua.Tatou te osia isi feagaiga i le malumalu.
Mau Fesootai: Esoto 19:5–6; Salamo 24:3–4; 2 Nifae 31:19–20; MF&F 25:13
8. Faaipoipoga ma le Aiga
O le faaipoipoga i le va o se alii ma se tamaitai, ua faauuina e le Atua ma o le aiga o le totonugalemu lea o Ana fuafuaga o le faaolataga ma le fiafia. E maua le fiafia i le olaga faaleaiga pe a faavae i aoaoga a le Alii o Iesu Keriso.
O mana paia o le foafoaina o fanau ua na o le va lava o le alii ma le tamaitai ua faaipoipoina faaletulafono, o se tane ma le ava e tatau ona faaaogaina ai. O matua e ao ina fanafanau ma faatumulia ai le lalolagi, aoao a latou fanau i le alofa ma le amiotonu, ma ia faia mea uma mo manaoga faaletino ma faaleagaga o latou fanau.
O le tane ma le ava ua i ai se tiutetauave paia e alofa ma tausi e le tasi le isi. E tatau ona pulefaamalumalu tamā i o latou aiga i le alofa ma le amiotonu, ma e tuuina atu mea e manaomia o le olaga. O le uluai matafaioi a tina o le faafaileleina lea o a latou fanau. O nei matafaioi paia, e ao i tamā ma tina ona fesoasoani le tasi i le isi o se paaga tutusa.
O le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau. Sa foafoaina le lalolagi ma faaalia mai le talalelei ina ia mafai ai ona fausia aiga, faamauina, ma faaeaina e faavavau (Siiina mai “O Le Aiga: O Se Folafolaga I le Lalolagi,” Liahona, Nov. 2010, 129.)
Mau Fesootai: Kenese 2:24; Salamo 127:3; Malaki 4:5–6; MF&F 131:1–4
9. Poloaiga
O poloaiga o tulafono ia ma mea e manaomia e tuuina mai e le Atua i le tagata. Tatou te faaalia lo tatou alolofa ia te Ia e ala i le tausia o Ana poloaiga (tagai Ioane 14:15). O le tausia o poloaiga o le a aumaia ai faamanuiaga mai le Alii (tagai MF&F 82:10).
O poloaiga autu sili e lua o le “alofa atu i le Alii lou Atua ma lou loto atoa, ma lou agaga atoa, ma lou manatu atoa. … Ma le … alofa atu i le lua te tuaoi, ia pei o oe lava ia te oe” (Mataio 22:36 39).
O Poloaiga e Sefulu o se vaega taua o le talalelei ma o ni mataupu faavae e faavavau lea e tatau ai mo lo tatou faaeaga (tagai Esoto 20:3–17). Sa faaali atu e le Alii ia Mose [poloaiga] i aso anamua, ma na Ia toe aumaia [poloaiga] i faaaliga i aso e gata ai.
O isi poloaiga e aofia ai le tatalo i aso taitasi (tagai 2 Nifae 32:8–9), aoao atu o le talalelei i isi (tagai Mataio 28:19–20), tausia o le tulafono o le ola mama (tagai MF&F 46:33), totogiina atoa o le sefuluai (tagai Malaki 3:8–10), anapogi (tagai Isaia 58:6–7), faamagalo atu i isi (tagai MF&F 64:9–11), ia loto faafetai (tagai MF&F 78:19), ma ia tausia le Upu o le Poto (tagai MF&F 89:18–21).
Mau Fesootai: Kenese 39:9; Isaia 58:13–14; 1 Nifae 3:7; Mosaea 4:30; Alema 37:35; Alema 39:9; MF&F 18:15–16; MF&F 88:124
Mo nisi faamatalaga i nei autu, alu i le LDS.org, Teachings, Gospel Topics; pe tagai ane i le Faamaoni i le Faatuatua: O Se Tusitaiala o le Talalelei [2004].