Lesona 2

O Le Suesueina o Tusitusiga Paia

Faatomuaga

O lenei lesona o le a fesoasoani i tamaiti aoga e faalolotoina lo latou malamalama i faamoemoega o tusitusiga paia. O le a fesoasoani foi ia i latou e suesue i tusitusiga paia i se ala e sili atu sona uiga. E aofia ai ni galuega faatino e uiga i le malamalama i le siosiomaga ma le tulaga o le mau, saili ma malamalama i aoaoga ma mataupu faavae, ma faaaoga aoaoga ma mataupu faavae i o tatou olaga. A o faaleleia o latou tomai e suesue ai tusitusiga paia, o le a faateleina lo latou fiafia i tusitusiga paia, e faapena foi lo latou malamalama i le talalelei. Mafaufau i ni auala e toe iloilo ai nei mataupu i lenei lesona i le tausaga atoa.

Fautuaga mo le Aoaoga

E faapefea ona tatou faia suesuega o tusitusiga paia i totonu o le seminare?

A o le i amataina le vasega, tusi le faamatalaga lenei mai ia Peresitene Thomas S. Monson i luga o le laupapa. (O lenei faamatalaga o loo maua i le itulau e 107 o le lipoti o le konafesi ia Oketopa 1970.)

“O le sini o le aoaoina o le talalelei … e le o le ‘sasaaina o faamatalaga’ i totonu o mafaufau o tagata o le vasega. … O le faamoemoega o le musuia o le tagata e mafaufau e uiga, lagona e uiga, ma faia loa se mea e uiga i le ola ai i mataupu faavae o le talalelei” (Peresitene Thomas S. Monson).

Fai atu i se tamaitiiti aoga e faitau leotele le faamatalaga.

• E faatatau i lenei faamatalaga, o le a sau sini i le avea ai ma o outou faiaoga seminare? O le a se mea e tatau ona avea ma au sini i le avea ai ma tamaiti aoga o le seminare?

Tau atu i tamaiti aoga faapea o lenei lesona, o le a latou suesue ai i ni auala e “mafaufau ai, lagona ai, ma faia loa se mea e uiga i le ola ai i mataupu faavae o le talalelei” o loo aoaoina i tusitusiga paia.

Malamalama i le siosiomaga ma le tulaga o le mau

Faamalamalama atu o le mea e tasi e mafai ona faia e tamaiti aoga e faaleleia ai a latou suesuega i tusitusiga paia o le aoao lea e uiga i le siosiomaga ma le tulaga o tala ma faaaliga i totonu o tusitusiga paia. O le talaaga ma le siosiomaga e tele lava ina ta’ua o le matalalaga.

Valaaulia se tamaitiiti aoga e faitau le apoapoaiga lea mai ia Peresitene Thomas S. Monson:

Peresitene Thomas S. Monson

“Ia faamasani i lesona e aoao mai i tusitusiga paia. Aoao ia iloa le talaaga ma le siosiomaga o faataoto a le Matai ma apoapoaiga a perofeta. Suesue i ai e faapei ona latou saunoa mai ia te oe, aua o upu moni na” (“Ia Avea ma Tagata Sili e Mafai ona Avea ai Oe,” Ensign po o le Liahona, Me 2009, 68).

Faamaoti atu o le malamalama i le talaaga ma le siosiomaga e mafai ona fesoasoani ia i latou e malamalama ai i aoaoga i totonu o tusitusiga paia. E saunia faamatalaga e faamanino ma aumaia se malamalamaaga loloto i tala, aoaoga faavae, ma mataupu faavae i tusiga faatusitusiga paia.

Tusi fesili nei i luga o le laupapa:

• O ai o loo tautala i nei fuaiupu?

• O ai o loo tautala i ai o ia?

• O le a le mea o loo tupu i lea tala?

Faamalamalama atu o nei fesili e mafai ona fesoasoani ia i tatou ia malamalama i le matalalaga o se aoaoga po o se tala i totonu o tusitusiga paia.

Fesili atu i tamaiti aoga e faasoa atu po o a ni mea na latou faia e maua ai se malamalamaaga sili atu i le talaaga ma le siosiomaga o fasifuaitau o mau. Atonu e te manao e lisi nisi o nei manatu i luga o le laupapa.

Atonu e ono tau mai e tamaiti aoga ia ni aga masani e pei o le sueina o uiga o upu faigata ma upu fou, suesueina o tusitusiga o sosoo ai, faitauina o otootoga o mataupu i le amataga o mataupu, po o le sueina o vaefaamatalaga mo faamalamalamaga ma mau fefaasinoai. Ia mautinoa e tau atu nei tomai pe a le ta’ua e tamaiti.

Mo le faaalia o se tasi o metotia mo le malamalama i matalalaga o mau, valaaulia se tamaitiiti aoga e faitau leotele le 3 Nifae 17:1–10. Fai atu i le vasega e mulimuli atu, ma sailia tali o fesili o loo tusia i luga o le laupapa. E mafai foi ona e faamalosiau i latou e vaai i le otootoga o mataupu e fai ai se aotelega vave o mataupu.

• O ai o loo faamatalaina le tala i totonu o le fuaiupu 1, 5–6, ma le 9–10? (Mamona.)

• I le tala , o ai o loo tautala? O ai o loo mauaina le savali?

• O le a le mea na tupu ao le’i tutupu mea ia e i totonu o lenei tala? (Tagai i otootoga o le mataupu mo le 3 Nifae 8–16.) Na faapefea ona uunaia e lou iloaina o lenei talaaga, lou malamalama e uiga i le mafuaaga na mananao ai tagata ina ia nofo umi teisi mai le Faaola? (Tagai i le 3 Nifae 17:5–6.) O a vavega na tutupu ina ua Ia fetalai atu o le a Ia mafuta ma i latou? (Tagai i le 3 Nifae 17:7–10.)

O le iloaina ma le malamalama i aoaoga ma mataupu faavae

Faamamafa atu a malamalama ia tamaiti aoga i le talaaga ma le siosiomaga o se tala faatusipaia, e sili atu ona saunia e iloa ma malamalama i aoaoga ma mataupu faavae o i ai. Valaaulia se tamaitiiti aoga e faitau le faamalamalamaina lea o mataupu faavae o le talalelei, na faasoa mai e Elder Richard G. Scott o le Korama a Aposetolo e toasefululua:

“O mataupu faavae, o ni upu moni ia ua filifilia, mo le faaaogaina i tulaga o mea eseese,” (Ausia o le Malamalama Faaleagaga,” Liahona, Nov. 1993, 101).

Faamalamalama atu o aoaoga ma mataupu faavae e faavavau, o upumoni o le talalelei e le suia a Iesu Keriso e saunia se taitaiga mo o tatou olaga. O lesona ia sa mananao perofeta anamua tatou te aoaoina mai mea na tutupu, tala, ma lauga sa latou faamaumauina i totonu o tusitusiga paia. Tau atu o nisi tusitala i tusitusiga paia na faaaogaina ni fuaiupu e pei o le “ua faapea ona tatou vaai” (tagai i le Helamana 3:27–29) po o upu e pei o le o lea (tagai i le Alema 32:16) e faasino sao lava i aoaoga faavae ma mataupu faavae. Ae peitai, o le tele o aoaoga faavae ma mataupu faavae, e le o tuuina sao mai i tusitusiga paia. Nai lo lena, o nei upu moni o loo tau faaataata mai ma faaalia mai i olaga o i latou i tusitusiga paia.

Ina ia fesoasoani i tamaiti aoga ia iloa aoaoga faavae ma mataupu faavae e le o tuuina sao mai, fautua atu a o latou faitau, ia fesili ia i latou lava ni fesili faapea: O le a le savali a lenei tala? O le a se mea o loo manao le tusitala tatou te aoao mai lea tala? O a upumoni o loo aoaoina mai lea fuaitau o tusitusiga paia? Atonu e te manao e lisi nei fesili i luga o le laupapa.

Ina ia fesoasoani i tamaiti aoga e faataitai le iloiloina o aoaoga ma mataupu faavae, fai atu i ai latou te toe foi i le 3 Nifae 17:1–10. Fesili atu:

• Mai aoaoga a le Faaola i totonu o le 3 Nifae 17:2–3, o a ni mea tatou te aoao mai ai e uiga i le malamalama i Ana upu?

• O a ni upumoni e mafai ona tatou aoao mai le Faaola mai le 3 Nifae 17:5–7?

• I le tali atu i le faatuatua tele o tagata, sa ofo atu le Faaola e faamalolo ia i latou. I le 3 Nifae 17:8–9, O a ni mataupu faavae o loo e vaaia e uiga i le sailia o faamanuiaga mai le Alii? (E tasi se mataupu faavae e mafai ona iloa e tamaiti aoga o le tali mai a le Alii i lo tatou manao ma le loto atoa ina ia faalatalata atili atu ia te Ia.)

Afai e lava le taimi e tuuina atu ai nisi faataitaiga i le iloiloina o aoaoga faavae ma mataupu faavae, valaaulia i latou e sailia ni a latou tala e sili ona fiafia i ai. Fesili atu e faailoa mai mataupu faavae na latou aoao mai nei tala. Ona valaaulia lea o i latou e faasoa a latou tala ma mataupu faavae sa latou aoaoina.

Faaaogaina o aoaoga ma mataupu faavae

Na saunoa mai Peresitene Boyd K. Packer o le Korama a Aposetolo e Toasefululua:

“O aoaoga faavae moni, ua malamalama i ai, e suia ai le amio. O le suesue i mataupu o le talalelei e vave ona faaleleia ai le amio nai lo le suesue i ala e faalelei ai le amio. … o le ala lea ua matou faamamafa ai le suesue i aoaoga o le talalelei (“Fanau Iti,” Liahona, Nov. 1986, 18).

Faamalamalama atu a tatou malamalama i aoaoga ma mataupu faavae, ua tatou iloa e sili atu nai lo uiga o upu. Ua tatou iloa le uiga o aoaoga ma mataupu faavae i o tatou olaga. Ina ua tatou iloaina se aoaoga faavae po o se mataupu faavae ma malamalama i ai, e mafai ona tatou faaaogaina i o tatou olaga. Faamalamalama atu o le faaaogaina o le a tupu pe a tatou faia se mea i le mataupu faavae na tatou aoaoina. O tamaiti aoga e ola i mataupu faavae latou te aoaoina, o le a tele atu se avanoa e lagona ai le Agaga Paia ua molimau atu i le moni o na mataupu faavae (tagai i le 2 Nifae 32:5; Moronae 10:5). O le taua moni lenei o le malamalama e maua mai le suesue i tusitusiga paia. Fesoasoani i tamaiti aoga ia iloa ai soo se taimi lava e suesue ai i tusitusiga paia— pe o i ai i le fale, le lotu, i le seminare, galue i le polokalama o le Alualu i Luma o le Tagata Lava Ia po o le Tiute i le Atua, po o se isi lava tulaga—o se tasi o a latou sini autu e tatau ona i ai o le faaleleia lea o a latou taumafaiga e ola i le talalelei ma faalatalata atili i le Atua.

Ina ia fesoasoani i tamaiti aoga ia malamalama ma faaaoga mataupu faavae sa latou mauaina i totonu o tusitusiga paia, faamalosiau atu ia i latou e tatalo mo le fesoasoani a le Agaga Paia ia latou suesuega faaletagata lava ia. Ia faamalosiau atu foi ia i latou e fai ni fesili faapenei ao latou suesue: O le a se mea o loo finagalo le Alii ou te faia i lenei malamalama? O le a se eseesega e mafai e lenei mea ona faia i lou olaga? O le a se mea e mafai ona ou amataina pe taofia i le taimi nei ina ia ou ola i se olaga sili atu? O le a faapefea ona sili atu lo’u olaga pe a ou faia lenei mea? (Atonu e te manao e tusia nisi po o fesili uma nei i luga o le laupapa. Atonu foi e te manao e fautua atu i tamaiti aoga ia tusia nei fesili ia latou api talaaga o suesuega i tusitusiga paia ina ia mafai ona latou tapa soo i ai.)

Ina ia faaiu ai, vaevae tamaiti aoga i ni paga. Fai atu ia i latou e faasoa atu e le tasi i le isi ia mataupu faavae sa aoaoina ananei mai le 3 Nifae 17:1–10. Faamalosiau atu ia i latou e talanoa mai po o a ni mea ua latou faia e atiina ae ai lo latou malamalama i nei mataupu faavae ae po o le a le mea o le a latou faia e faaaoga ai mea na latou aoaoina ma lagonaina. Fai atu ia i latou e talanoa pe faapefea ona suia o latou olaga i le faaaogaina o nei mataupu faavae.

Manatu Faaopoopo Faafaiaoga

Iloiloina o aoaoga ma mataupu faavae

Ina ia fesoasoani i tamaiti aoga e faataitai le iloiloina o aoaoga ma mataupu faavae, ia tusi le siata lea i luga o le laupapa ma faamalosia ia tamaiti aoga e kopi i totonu o a latou api talaaga mo suesueina i tusitusiga paia. Fai atu i tamaiti aoga e faitau fuaitau o tusitusiga paia ma tusi i lalo le savali autu o ia fuaiupu taitasi.

Fuaitau o tusitusiga paia	Savali taua o lenei fuaitau (i au lava upu)
1 Nifae 2:16
1 Nifae 19:23
2 Nifae 32:3

A maea ao lava se taimi , fai atu i tamaiti aoga e faasoa atu se savali sa latou mauaina. Fai atu i tamaiti aoga e tusia se tasi o nei mataupu faavae, ae mulimulitai i le mamanu lenei: Afai ou te , ona Mo se faataitaiga: Afai ou te ole atu i le Atua ma le faatuatua, ona mafai lea ona Ia faamaluluina lou loto ma fesoasoani ia te au ia ou talitonu (tagai i le 1 Nifae 2:16). A ua maea, ia fai atu ia i latou e fefaasoaai ma a latou paga mea sa latou tusia. Ia fesili atu ia i latou e faamalamalama mai pe aisea e taua ai ia i latou. Valaaulia se tamaitiiti aoga se toatasi pe toalua foi e faasoa atu i le vasega pe faapefea ona faaleleia a latou suesuega i tusitusiga paia ao latou iloiloina ma malamalama i aoaoga ma mataupu faavae o le talalelei.

Metotia ma tomai e suesue ai tusitusiga paia

O tomai ia o le a fesoasoani i tamaiti aoga ia latou suesuega i tusitusiga paia. O loo aofia ai o ni faamanatu i lenei tusi lesona atoa.

Uiga o upu: O nisi o upu na faaaoga e perofeta e le masani ai i tatou. E mafai ona fesoasoani ia i tatou le Taiala i Tusitusiga Paia, vaefaamatalaga i tusitusiga paia, ma se lomifefiloi masani ina ia aoao ia uiga o upu ma iloa upu e tutusa uiga ma na upu. Faataitaiga: o le upu Mesia i le 1 Nifae10:4–17.

Suiga o igoa: Ina ia fesoasoani ia te oe e faaaoga tusitusiga paia i lou olaga, sui lou igoa i se igoa o i totonu o tusitusiga paia. Faataitaiga: 1 Nifae 1:1.

Mau fefaasinoai: E fesootaiina mau mai le tasi i le isi e faamanino ai uiga ma tatala ai le malamalama. Faataitaiga: I le laina i talaane o le 3 Nifae 12:28, atonu e te mafai ona tusia se faamatalaga e vaai i le Mataupu Faavae ma Feagaiga 42:23.

Mafuaaga ma le aafiaga: Tagai i le sootaga i le afai-ona ma le ona-o lea. Faataitaiga: 2 Nifae 1:9.

Upu autu: O upu ma fuaiupu e pei o le faauta, ma o lea, ona, e ui i lea, poo lea ua tatou vaai o ni valaaulia e faatali ma vaai mo ni savali faapitoa. Faataitaiga: Helamana 6:35–36.

Lisi o mau:e masani lava ona aumai e perofeta lisi o luitau ma lapataiga. A e maua ni lisi, mafaufau e faanumera ia elemene taitasi. Faataitaiga:Alema 26:22.

Faatulagaga: I tala i tusitusiga paia, suesue po o ai o loo saunoa, o le tagata po o tagata o loo saunoa i ai, le mea o loo saunoa mai ai, ma po o fea ma anafea o loo tupu ai lenei mea. Faataitaiga: O le faatulagaga mo le Alema 32:21–43 o loo maua i le Alema 31:1, 6–11 ma le 32:1–6.

Faatusatusaga: O tusitusiga a perofeta e tele ina faaalia ai se faatusatusaga i manatu, mea na tutupu, ma tagata. O nei faatusatusaga e faamamafa ai mataupu faavae o le talalelei. Vaai mo faatusatusaga i fuaiupu taitasi, i mataupu, ma i isi mataupu ma tusi. Faataitaiga: 2 Nifae 2:27; Alema 48:1–17.

Vaaiga faatino: Vaavaai mo faamatalaga auiliili e mafai ona fesoasoani ia te oe e fatu ai se ata faalemafaufau a o e faitau. Mafaufau o loo e i ai i mea ia na tutupu. Faataitaiga: Enosa 1:1–8.

Faatusa: Upu e pei o le e pei, a o, po o faatusatusa i ai e fesoasoani e iloa ai faatusa. Tagai i tua atu o le faatusa e ala i le suesueina o lona natura ma mafaufau i ona uiga. O Vaefaamatalaga, le Lomifefiloi o le Tusi Paia ma le Taiala i Tusitusiga Paia, e mafai ona fesoasoani i le faaliliuina o isi o faatusa. Faataitaiga: Helamana 8:14–15, e aofia ai vaefaamatalaga mo na fuaiupu.

Mafaufau Loloto: O le mafaufau loloto e aofia ai le mafaufau, manatunatu loloto, faia o fesili, ma le iloiloina o mea ua e iloa ma mea ua e aoaoina. O le mafaufau loloto e masani ona fesoasoani ia i tatou e malamalama i le mea e tatau ona tatou faia e faaaoga ai mataupu faavae o le talalelei.

Suesue i tusitusiga paia

Filifili se nofoaga i luga o le faafanua e le masani ai tamaiti aoga. Valaaulia tamaiti aoga e mafaufau o le a latou o i se malaga i se mea mamao lava. Tau atu ia i latou le igoa o le mea e o i ai, ae aua le faaalia ia i latou le faafanua ma le mea e o i ai.

• O le a le ituaiga o auala o femalagaiga o le a e faaaogaina? O a ni mea o le a e teuina? O a ni gaoioiga o le a e auai i le taimi e te taunuu ai?

O le a faigata i tamaiti aoga ona saunia ni tali lelei mo nei fesili. Faaali atu le nofoaga i luga o le faafanua pe faamalamalama atu le mea e tu ai. Tau atu ia i latou sina vaega itiiti e uiga i le nofoaga. Ona toe fesili atu lea o na lava fesili sa e fesili atu ai muamua.

• E faapefea e le iloa o le mea e te alu i ai ona aafia ai lau tapenaga mo le malaga?

• Pe mata e mafai ai ona e oo atu i le nofoaga e te malaga i ai e aunoa ma lou iloa o le mea o loo tu ai?

Faamalamalama atu o le iloaina o le mea e alu i ai mo le malaga e aafia tele ai a tatou filifiliga i mea e ave ma pe faapefea ona malaga i ai, o le iloa o le sini faamoemoeina o le suesueina o le talalelei e aafia ai le ala tatou te suesueina ai tusitusiga paia i vasega i aso uma —ma le mea tatou te maua mai ai.

Faamanatu i tamaiti aoga o le seminare, tatou te aoaoina ai le talalelei e ala i le suesueina o tusitusiga paia i aso uma. Valaaulia se tamaitiiti aoga e faitau le manatu lea mai ia Peresitene Marion G. Romney. Fai atu i le vasega e faalogo mo ni faamoemoega autu mo le suesueina o tusitusiga paia.

“E le mafai e se tasi ona suesue faamaoni tusitusiga paia e aunoa ma le aoaoina o mataupu faavae o le talalelei ona o tusitusiga paia na tusia e faasaoina mataupu faavae mo lo tatou lelei.” (“The Message of the Old Testament” [CES Symposium on the Old Testament, 17 Aok., 1979], 3, si.lds.org).

• E tusa ai ma le saunoaga a Peresitene Romney, aisea sa tusia ai tusitusiga paia?

• E faapefea ona eseese le suesueina o tusitusiga paia mai le suesue mo se suega i le aoga?

Faamaoti atu o le sini o le suesueina o tusitusiga paia e le na o le aoao e uiga i mea na tutupu i totonu o tusitusiga paia ae mo le mauaina ma ola i upumoni o le talalelei lea na taumafai le au tusitala e aoao mai ia te i tatou. O nei upumoni ua taua o aoaoga ma mataupu faavae.

Ina ia fesoasoani i tamaiti aoga ia malamalama po o a ia aoaoga ma mataupu faavae ma faapupula mai le matafaioi autu o loo faataunuuina e aoaoga ma mataupu faavae i le suesueina o tusitusiga paia, tusi le ata lenei i luga o le laupapa a o le i amataina le vasega:

Tuueseese tagata

Faamalamalama atu o le tagata o loo i le itu agavale e fai ma sui o perofeta ma isi tagata i totonu o tusitusiga paia. O le tagata i le itu taumatau e fai ma sui o i tatou taitoatasi. Ina ia faamaoti atili, atonu e te manao e fai atu i tamaiti aoga e tau mai se tagata i totonu o le Tusi a Mamona (e pei o Nifae po o Amona) ma tusi le igoa o le tagata i lalo o le ata i le itu agavale. Ona atonu ete tusia le igoa o se tamaitiiti aoga i lalo o le ata i le itu taumatau. Faasino i le avanoa po o le mamao o le va o ata.

• O a nisi o eseesega i le va o o tatou olaga ma olaga o tagata i totonu o tusitusiga paia e mafai ona faafaigata ai le malamalama i tusitusiga paia pe faatusatusa i ai ? (Atonu e mafai ona ta’ua e tamaiti aoga ia ituaiga mea e pei o le eseesega i olaga, aganuu, gagana, ma nofoaga.)

Valaaulia se tamaitiiti aoga e faaopoopo se auala laupapa i le ata i luga o le laupapa ma faaigoa o le aoaoga ma mataupu faavae.

fesootaiga o tagata e ala i le auala laupapa

Tau atu i tamaiti aoga o aoaoga ma mataupu faavae e faavavau ma o upumoni o le talalelei e le masuia. E moni i le taimi na tusia ai tusitusiga paia, ma i le taimi tatou te faaaogaina ai i o tatou olaga, e mafai ona fesoasoani ia i tatou e faalatalata atili ai i le Alii ma faia ni filifiliga atamai. E pei ona faaalia i le ata, o aoaoga ma mataupu faavae e fesootaiina ia periota uma e lua o taimi ma fesoasoani e faafesootaia le va.

Faamalamalama atu o lenei faiga o le suesueina o tusitusiga paia e i ai ona vaega taua e tolu: (1) malamalama i le matalalaga po o le talaaga, faasologa o le tala, ma mea na tutupu i totonu o tusitusiga paia; (2) faailoa ma malamalama i aoaoga ma mataupu faavae; ma le (3) faaaogaina o na upumoni i o tatou olaga. Faaopoopo atu nei elemene e tolu mo le suesueina o tusitusiga paia i le ata o i luga o le laupapa, e pei ona faaalia i lalo.

sootaga o tagata e ala i le auala laupapa