Lesona 155

Moronae 7:1–19

Faatomuaga

Na faamaumauina e Moronae se lauga na tuuina atu e lona tama, o Mamona, i le tele o tausaga ua mavae. O lenei lesona e aofia ai le vaega muamua o le lauga, lena na aoao atu ai Mamona e uiga i le faia o galuega amiotonu ma le manatu moni i ai ma e uiga foi i le ala tatou te iloa ai le eseesega i le va o le lelei ma le leaga. O le lesona 156 e aofia ai le vaega o totoe o le lauga.

Mulimuli i uunaiga a le Agaga Paia

A o e filifili po o fea aoaoga ma mataupu faavae e faamamafa, ia faaauau ona saili atu i le taitaiga mai le Agaga Paia.

Fautuaga mo le Aoaoga

Moronae 7:1–11

Ua aoaoina e Mamona soo o Iesu Keriso ia faia galuega lelei ma le manatu moni i ai

Faaali atu se fasi fualaau aina e foliga lelei le pito i fafo.

• Pe na e iloaina ea muamua o se fasi fualaau aina e le lelei le pito i totonu e pei ona foliga mai ai fafo? (Valaaulia ni nai tamaiti aoga e faasoa mai ni faataitaiga. Atonu e te manao e faamatala atu se aafiaga a oe lava ia.)

• O a ni auala e mafai ai ona pei le tagata o se fasi fualaau aina e foliga lelei mai fafo ae pala le pito i totonu?

Faamatala atu na faamaumauina e Moronae upu a lona tama, o Mamona, e uiga i le taua o le amiotonu i o tatou loto faapea foi ma le faia o galuega amiotonu. Valaaulia se tamaitiiti aoga e faitau le Moronae 7:2–3 leotele, ona fai atu lea i le vasega e faailoa mai le vaega o loo lauga i ai Mamona. (Na lauga atu o ia i tagata o le Ekalesia.)

A uma ona lipoti mai e tamaiti aoga mea na latou aoaoina, fai atu i se tamaitiiti aoga e faitau leotele le Moronae 7:4–5. Valaaulia le vasega e mulimuli i le faitauga ma vaai pe na faapefea ona iloa e Mamona nei tagata o “soo fifilemu o Keriso” (Moronae 7:3).

Tusi le fuaitau manatu moni i ai i le laupapa.

• O le a sou manatu i le uiga o lenei fuaitau?

A o talanoaina e tamaiti aoga lenei fesili, atonu e te manao e fai atu i se tasi o i latou e faitau le faamatalaga lenei a Elder Dallin H. Oaks o le Korama a Aposetolo e Toasefululua:

Elder Dallin H. Oaks

“E le tatau le na ona tatou faia o le mea sa’o. E tatau ona tatou faia mo le mafuaaga sa’o. O le upu faaona po nei o le faamoemoega lelei. E masani ona faamanino mai e tusitusiga paia lenei uiga faalemafaufau talafeagai i upu faamoemoe atoa o le loto po o le manatu moni i ai.

“Ua faamanino mai e tusitusiga paia e malamalama le Atua i o tatou faamoemoega ma o le a faamasinoina a tatou faatinoga i na faamoemoega” (Pure in Heart [1988], 15).

Valaaulia tamaiti aoga e suesue le leoa le Moronae 7:6–10, ma vaai mo lapataiga a le Alii i tagata o e fai galuega lelei e aunoa ma se manatu tonu i ai.

• O a lapataiga na tuuina atu e le Alii ia i latou o e faia galuega e aunoa ma se manatu tonu i ai? (Na Ia lapatai mai faapea o a latou galuega o le a le aoga ia i latou ma o a latou galuega o le a faitaulia mo le leaga nai lo le amiotonu.)

• O a mataupu faavae e mafai ona tatou aoaoina mai nei fuaiupu? (Atonu e taua e tamaiti aoga ni nai upumoni, fesoasoani ia i latou e faailoa mai le mataupu faavae lenei: Ina ia faamanuiaina mo a tatou galuega lelei, e tatau ona tatou faia ma le manatu tonu i ai.)

• I le faaopoopo atu i le manao i faamanuiaga mai le Alii, aisea e te manatu ai e taua le faia o galuega ma le manatu tonu i ai?

• O a eseesega ua e iloaina pe a e faia galuega lelei ma le manatu tonu i ai?

Tau atu faapea na fautuaina e Mamona i tatou ia tatalo ma le manatu tonu i ai (tagai Moronae 7:9). Valaaulia se tamaitiiti aoga e faitau le fautuaga lenei mai ia Peresitene Polika Iaga:

Peresitene Polika Iaga

“E le afaina pe o oe po o au e maua le lagona ina ia tatalo, afai e oo mai le taimi e tatalo ai, tatalo.” (Aoaoga a Peresitene o le Ekalesia: Polika Iaga [1997], 45).

• E faapefea ona fesoasoani le filifili e tatalo e tusa lava pe tatou te le lagonaina le fia tatalo ia i tatou e faasolo ai ina tatalo ma le manatu tonu i ai?

• E faapefea ona fesootai le fautuaga a Peresitene Polika Iaga i le usitai i isi poloaiga e ese mai le tatalo? (Afai e faigata i tamaiti aoga ona tali lenei fesili, mafaufau e faasoa atu lenei faataitaiga: O nisi tagata atonu e leo auai i le lotu ma le manatu tonu i ai. Ae ui i lea, afai latou te faaauau ona auai i le lotu ma faia mea uma latou te mafaia ina ia auai ma tapuai, o le a latou maua ni aafiaga o le a fesoasoani ia i latou e maua ai le olioli i le auai i le lotu. O a latou mafuaaga mo le auai o le a suia. O le a latou auai ona latou te mananao ia i ai iina—latou te mananao e tapuai i le Atua, faafou a latou feagaiga, ma auauna atu i isi.)

Ina ia fesoasoani i tamaiti aoga e faaaoga aoaoga a Moronae i le faia o galuega lelei ma le manatu tonu i ai, saunia lenei gaoioiga ao lei amataina le vasega: Saunia ni fasi pepa laiti. I luga o fasi pepa taitasi, tusi ai se poloaiga. O faataitaiga e ono aofia ai le anapogi, totogiina o le sefuluai, auauna i isi, suesueina o tusitusiga paia, ava i matua, ma soo se isi lava poloaiga e te lagona e ono aoga mo tamaiti aoga e talanoaina. Tuu fasi pepa i se atigi pusa.

I le vasega, valaaulia se tamaitiiti aoga e sau i luma o le potu. Fai atu ia te ia e ave se fasi pepa mai le atigi pusa ma faitau i le vasega. Ona fai atu lea i le vasega e fai le tasi po o mea uma e lua nei:

1. Faasoa atu lo latou lagona i le faamanuiaina ina ua latou usitaia lena poloaiga ma le manatu tonu i ai.

2. Fautua atu auala e usitaia ai lena poloaiga ma le manatu tonu i ai.

Atonu e te manao e toe faia lenei gaoioiga mo ni nai taimi.

A uma lenei gaoioiga, mafaufau e faasoa atu se aafiaga na e maua ina ua e usitai i se poloaiga a le Atua ma le manatu tonu i ai.

Moronae 7:12–19

Ua aoao mai Mamona i le ala e faamasino ai i le va o le lelei ma le leaga

Faamatala atu na valoia e Isaia faapea o aso e gata ai, o nisi tagata o le a taua le leaga o le lelei ma le lelei o le leaga (tagai Isaia 5:20; 2 Nifae 15:20).

• O a nisi o faataitaiga o tagata ua taua le leaga o le lelei ma le lelei o le leaga?

• Aisea i lou manatu e taua ai le aua le fenumiaia le lelei ma le leaga?

Valaaulia ni nai tamaiti aoga e feauauai i le faitauina leotele mai le Moronae 7:12–17. Fai atu i le vasega e mulimuli i le faitauga ma faailoa mai mataupu faavae e mafai ona fesoasoani ia i tatou e faamasino le lelei mai le leaga. Atonu e te manao e fautuaina i latou e faailoga fuaitau na e faapitoa le taua ia i latou. Ina ia fesoasoani i tamaiti aoga ia lipoti mai i mea na latou maua, fai atu fesili nei:

• E faapefea ona tatou iloa o se mea e mai le Atua? (Ia mautinoa ua faailoa mai e tamaiti aoga le upumoni lenei: O le mea e mai le Atua e valaaulia i tatou e fai le lelei, talitonu ia Iesu Keriso, ma alofa ma auauna i le Atua.)

• E faapefea ona tatou iloa o se mea e sau mai le tiapolo? (Ia mautinoa ua faailoa mai e tamaiti aoga le upumoni lenei: Soo se mea e faatauanauina i tatou e fai le leaga, faafitia Iesu Keriso, pe tetee atu i le Atua e sau mai le tiapolo.)

• O a nisi auala e valaaulia ma faaosoina ai i tatou e le Atua ia faia pea le lelei?

• E faapefea ona valaaulia ma faaosoina i tatou e le tiapolo e fai le agasala?

Ina ia saunia tamaiti aoga e faaaoga aoaoga a Mamona i le faamasinoina o le va o le lelei ma le leaga, valaaulia i latou e tusi se lisi o a latou faafiafiaga e sili ona fiafia i ai i le televise, tifaga, pese, au fai pese, saite i le Initoneti, polokalama i le Initoneti, taaloga vitio, po o mea totino patino. (Atonu e te manao e suia lenei lisi e tusa ai ma manaoga o tamaiti aoga ma mea e fiafia i ai.) A maea se taimi talafeagai e tusi ai, fai atu ia i latou e tuuese a latou lisi. Tau atu ia i latou o le a latou maua le avanoa e mafaufau atili ai ia latou lisi i ni nai minute.

• E tusa ai ma Moronae 7:16, o le a le mea ua tuuina atu i tagata taitasi e fesoasoani ia i tatou e iloa ai le lelei mai le leaga?

Faamatala atu o le Agaga o Keriso ua taua foi o le Malamalama o Keriso (tagai Moronae 7:18). Ina ia fesoasoani i tamaiti aoga ia malamalama i le Malamalama o Keriso, faitau le saunoaga lenei a Peresitene Boyd K. Packer o le Korama a Aposetolo e Toasefululua:

Peresitene Boyd K. Packer

“O le Agaga Paia ma le Malamalama o Keriso e ese le tasi mai i le isi. …

“E tusa lava pe o lenei malamalama i totonu, o le iloa lea o le sao ma le sese, ua taua o le Malamalama o Keriso, i le uiga po o le manatu, e mafai ona taitaiina i tatou e suia a tatou amioga—sei vagana ai ua tatou taofiofia pe le amanaiaina foi. … …

“O alii, tamaitai ma tamaiti uma o soo se malo, talitonuga, po o lanu—o soo se tasi lava, e tusa lava po o fea latou te nonofo ai pe o a foi o latou talitonuga po o a foi mea latou te faia—o loo i totonu o i latou le Malamalama o Keriso e le fano lava” (“O Le Malamalama o Keriso,” Liahona, Ape. 2005, 8, 10).

• E faapefea e se tagata ona taofiofia pe le amanaiaina le Malamalama o Keriso o loo i totonu o ia ?

Valaaulia tamaiti aoga e faitau le leoa Moronae 7:18–19 ma faailoa mai le fautuaga a Mamona e uiga i le ala e tali atu ai i le Malamalama o Keriso i totonu o i tatou. Fai atu i tamaiti aoga e lipoti mai mea ua latou aoaoina.

• O le a sou manatu i le uiga o le “sailiili ma le filiga i le malamalama o Keriso”?

• O a mataupu faavae e mafai ona tatou aoao mai le Moronae 7:19? (E tatau i tamaiti aoga ona faailoa mai mataupu faavae nei: A o tatou sailiili ma le filiga le Malamalama o Keriso, e mafai ona tatou iloaina le eseesega o le lelei ma le leaga. Afai tatou te taofi mau i mea lelei uma, o le a avea i tatou ma fanau a Keriso. Afai e manaomia e tamaiti aoga le fesoasoani e malamalama ai i le fuaitau “atalii o Keriso,” atonu e te manao e vaai i le lesona 55 i lenei tusi lesona.)

• O anafea na e saili ai ia iloa pe o se mea lelei lea pe talafeagai? O le a se mea na e faia e “sailiili ma le filiga” ina ia iloa ai pe lelei pe talafeagai?

Fai atu i tamaiti aoga e vaai i lisi na latou faia muamua. Faaali pe faitau leotele fesili nei, ma valaaulia tamaiti aoga e “sailiili ma le filiga i le malamalama o Keriso” (Moronae 7:19) a o latou faamaumauina a latou tali i nei fesili. Aua le faatatopeina lenei gaoioiga. Tuu atu i tamaiti aoga ia lava le taimi e manatunatu loloto ai ma tusitusi. Tau atu i tamaiti aoga o le a e le fesili atu ia i latou e faasoa mai mea latou te tusia.

• O le a le lelei ua mafai ai e nei mea ona valaaulia oe e fai le lelei, talitonu ia Iesu Keriso, ma alofa i le Atua ma auauna ia te Ia?

• Pe o taumafai nisi o nei mea e faatauanau oe e fai le leaga, faalotolotolua ia Iesu Keriso, pe aua le toe auauna i le Atua ?

• Pe o e lagona e tatau ona e aveesea nisi o nei mea mai lou olaga? Afai o lena, o le a faapefea ona e faia lena mea?

Tau atu o nisi taimi atonu e faigata ona fai le mea tatou te iloa e sa’o pe afai e manaomia ai le tuueseina o se mea tatou te fiafia i ai. Ina ia fesoasoani i tamaiti aoga e lagolago e le tasi le isi i lenei taumafaiga, fesili atu:

• O le a le fautuaga e te ono ofoina atu e fesoasoani ai i se isi ia tuuese mea e le lelei pe le talafeagai?

Mo le faaiuga, faamautu atu a o tatou mulimuli i le Malamalama o Keriso, e mafai ona tatou iloaina le mea lena e lelei, aloese mai taufaasese a Satani, ma ola faapei oni soo o Iesu Keriso.

Tala ma Faamatalaga o Talaaga

Moronae 7:17. O le tiapolo na te le faatauanauina se isi e fai le lelei

Na aoao mai Elder Jeffrey R. Holland o le Korama a Aposetolo e Toasefululua:

“O Satani, po o Lusifelo, po o le Tama o Pepelo—pule a oe i se igoa e valaau ai—e moni o ia, o foliga moni lava o mea leaga. O ona faamoemoega ua i ai i tulaga faataumaoi uma. … E faavavau lava lona tetee i le alofa o le Atua, le Togiola a Iesu Keriso, ma le galuega o le filemu ma le faaolataga. O le a ia faasagatau atu i nei mea i soo se taimi ma soo se mea na te mafai ai. Ua ia iloa o le a faatoilaloina o ia ma tulia i fafo i le iuga, ae ua ia naunau i le mea na te mafai ai le toatele o isi faatasi ma ia” (“Ua Tauto i Tatou Uma,” Ensign po o le Liahona, Nov. 2011, 44).