Mosaea 25

Faatomuaga

O le Mosaea 25 o loo i ai se faaiuga i le tala i tagata o Senifa (tagai Mosaea 7–24). Na toe foi tagata o Limae ma tagata o Alema i Saraemila, ma sa tuufaatasia ai ma le saogalemu i lalo o le nofoaiga a le Tupu o Mosaea. Ina ua taunuu nei vaega, sa papatisoina ia Limae ma ona tagata. Na tuu atu e le Tupu o Mosaea le pule ia Alema e faavae ai ekalesia i le laueleele uma, ma faafoe ai mataupu a le Ekalesia a le Atua i tagata o Nifae.

Fautuaga mo le Aoaoga

Mosaea 25:1–13

O i latou na faapotopoto i Saraemila na tuufaatasia ma avea ai o sa Nifae

Valaaulia tamaiti e mafaufau i tala sa latou faitauina pe faalogo foi i ai, ia e faapupula mai ai le ala na fesoasoani ai le Alii i se tasi e ala i le tuuina atu o le taitaiga, malosi, puipuiga, po o le laveaiga. Atonu e te fautuaina atu ia latou mafaufau i tala i tusitusiga paia, talafaasolopito o le Ekalesia, po o olaga o tagata o aiga po o uo. Mo se faataitaiga, faasoa atu le tala lea na faamatalaina e se tamaitai talavou sa feseta’i solo i luma atu o lana vaega, ma savali agai atu ai i auvae mauga i se taimi o sa latou gaoioiga i fafo:

“Sa fai mai se leo lapatai, e pāū ae lemu, ‘Foi i tua.’ Toeitiiti lava a ou le amanaiaina, ae na toe sau foi. O le taimi la lea na ou faalogo ai ma toe foi i le vaega. A o matou savavali atu i lalo, sa matou vaaia ni povi poa lapopoa lanuuli o savavali faatopetope ma le ita agai mai i luga o le a’ega. Na amata ona eeli le palapala e le povi aupito lapoa a o faataupupula mai ia i matou. … Sa faatosina ese e lo matou taitai perisitua, ma sa mafai ai ona matou fea’ei saogalemu i le isi itu o le pa.

“A o matou toe ulu atu i lo matou tolauapiga, sa ou iloa ai ana ou le faalogo i le lapataiga mai le Agaga, semanu e matua leaga ni o’u manua pe oti ai lava. Sa ou iloaina na alofa patino le Tama Faalelagai ia te au ma sa malutia ai au. Ou te matua faafetai lava i le Alii mo lena lapataiga. O lena aafiaga na faamalosia ai la’u molimau ma ou maua ai se alofa tele atu mo le Alii” (“Turn Back,” New Era, Nov. 2010, 47).

Valaaulia se tasi o tamaiti e faasoa mai se tala e manatu e faapupula mai ai le agalelei ma le mana o le Atua i le olaga o se isi. Fesili i le vasega:

E fesoasoani faapefea ia te oe le faalogo i faataitaiga o le agalelei ma le mana o le Atua i olaga o isi?

Aotele le Mosaea 25:1–6 i le faamatala faapea ina ua mavae le sosolaese o tagata o Limae ma tagata o Alema (o i latou uma na tupuga mai tagata o Senifa) mai le nofopologa ma tuufaatasi ma tagata na nonofo i Saraemila, sa faitau atu e le Tupu o Mosaea a latou talafaamaumau i tagata uma. Faitau lemu e tamaiti le Mosaea 25:7, ma vaavaai mo le tali masani a tagata i tala o fegalegaleaiga a le Atua ma tagata o Senifa. Valaaulia se tamaitiiti e faasoa mai mea na te mauaina.

Kopi le siata lenei i luga o le laupapa. Faamatala o le Mosaea 25:8–11, tatou te aoao atili ai i le ala na tali atu ai tagata i tala o tagata o Senifa ma Alema. Fai i tamaiti e sue i mau faasino po o a mea na faalogo i ai tagata ma pe o a ni o latou lagona. O tali i le mau faasino muamua o loo faapuipui atu mo se faataitaiga.

	O mea na faalogo ai tagata	O lagona o tagata
Mosaea 25:8	(Na latou faalogo i le ala na laveaiina mai ai tagata Limae mai le nofopologa.)	(Na faatumulia ai i latou i le olioli tele.)
Mosaea 25:9
Mosaea 25:10
Mosaea 25:11

A lava le taimi o tamaiti e suesue ai mau faasino, valaaulia nisi o i latou e tusi i luga o le laupapa mea na latou maua. Fai i tamaiti e aotele mea na latou aoaoina mai le Mosaea 25:8–11 i le ta’u mai o mataupu faavae mai lenei fuaitau e mafai ona latou faaaogaina mo i latou lava. A tali mai tamaiti, fesoasoani ia latou iloaina o le suesue i talafaamaumau o fegalegaleaiga a le Atua ma isi, e mafai ai ona tatou lagonaina le olioli ma le lotofaafetai i le Atua. (A o faitauina e tamaiti nei fuaiupu, atonu latou te matauina foi le faanoanoa ma le toilalo e mafua mai i le agasala.)

O a ni puna tatou te liliu atu i ai e aoao ai i aafiaga o isi ma le agalelei o le Atua? (Tusi a latou tali i luga o le laupapa. Atonu latou te faaaofia ai mau, saunoaga o konafesi aoao, mekasini a le Ekalesia, talaaga patino o taitai o le Ekalesia ma isi, ma talafaasolopito o aiga.)

Valaaulia tamaiti e mafaufau i taimi na latou aoaoina ai le agalelei o le Atua i isi mai punavai o lisi i luga o le laupapa.

Ua faamanuiaina faapefea oe i lou aoao i le agalelei o le Atua i isi mai se tasi o nei punavai?
O le a sou manatu o le a le aafiaga umi i se tagata e aoao e le aunoa i le agalelei o le Atua i Ana fegalegaleaiga ma isi?

Fautuaina tamaiti e faaalu se taimi e filifili ai lava e i latou se tasi o punavai o loo lisi atu i luga o le laupapa ma saili ai mo ni tala musuia o le agalelei o le Atua.

Mosaea 25:14–24

Ua faavaeina e Alema le Ekalesia a le Atua i le laueleele uma o sa Nifae

Ina ia saunia tamaiti e suesue i le faatulagaga ma aoaoga a le Ekalesia i tagata Sa Nifae, fesili:

O anafea na e alu ai i se uarota po o se paranesi a le Au Paia o Aso e Gata Ai i se isi mea e ese mai lau lava uarota po o le paranesi? O a ni mea na e matauina e tutusa ai lau uarota po o lau paranesi ma lea na e asiasi i ai?
E fesoasoani faapefea le vaai i le faatulagaga ma aoaoga a le Ekalesia e tutusa lava i uarota po o paranesi uma a le Ekalesia?

Aotele le Mosaea 25:14–17 i le faamatala atu, ina ua uma ona tautala atu Mosaea ma faitau atu i tagata, sa ia valaaulia Alema e aoao i latou. Ona talosaga lea o le Tupu o Limae ma ona tagata ia papatisoina i latou. Na papatiso e Alema i latou ma amata ai ona faatulaga le Ekalesia i le laueleele atoa.

Valaaulia tamaiti e feauauai i le faitauina leotele mai le Mosaea 25:18–22. Fai i le vasega e vaavaai mo le ala na faatulaga ai le Ekalesia ma pulea i tagata Sa Nifae i ona po o Alema. Ina ia fesoasoani ia malamalama tamaiti o le faatulagaga o le Ekalesia e faamautinoa ai e mafai ona maua e tagata uma le upumoni, fai fesili e pei o:

O faapefea ona atagia mai i le Ekalesia i Sa Nifae le Ekalesia i ona po nei? (E i ai a tatou uarota ma paranesi e pei o “tino eseese” o loo ta’ua i le Mosaea 25:21. O peresitene o paranesi, epikopo, ma peresitene o siteki e pei foi ositaulaga ma aoao na pulea le Ekalesia i ona po o Alema.)
E tusa ai ma le Mosaea 25:15–16, 22, o a upumoni na faamamafa e ositaulaga ma aoao o le Ekalesia i le taimi o Mosaea? (Atonu e te manao e ta’u atu e faapena foi faatonuga na tuuina mai e le Alii i matua, taitai o le Ekalesia, ma faifeautalai i aso e gata ai. [tagai MF&F 15:6; 19:31; 68:25.])
E taua i se a le aoao atu pea o le salamo ma le faatuatua i le Atua?

Fai i tamaiti e faitau le Mosaea 25:23–24, ma vaavaai mo fasifuaitau o loo faamatala ai faamanuiaga na maua e i latou na auai i le Ekalesia a le Atua.

Na faamanuiaina faapefea tagata o se taunuuga o le papatisoina ma auai i le Ekalesia a le Atua?
Ua faamanuiaina faapefea oe e le Atua i le avea ai o oe ma se tasi o le Ekalesia?

Tusi le mataupu faavae lea i luga o le laupapa: A o tatou tauaveina i o tatou luga le suafa o Iesu Keriso ma ola e tusa ai, o le a liligi mai e le Alii i o tatou luga Lona Agaga.

Moimau atu i tamaiti o faamanuiaga ua latou maua o ni tagata o le Ekalesia, e mafai ona faateleina a o latou tausia a latou feagaiga ma maua le Agaga.

Tala ma Faamatalaga o Talaaga

Mosaea 25:17–22. Pule o le perisitua i le au sa Nifae

E le o aumaia e le Tusi a Mamona ni auiliiliga patino e uiga i le perisitua na umia e perofeta ma isi uso o sa Nifae ma sa Lamana. Peitai, o mau faasino i sauniga ma le faiga na faatautaia ai le Ekalesia ua lava ma totoe ai faamaoniga ua aumaia ai na latou umia le Perisitua Mekisateko. Na aoao mai e Peresitene Iosefa Filitia Samita “o le perisitua lea na umia e [tagata sa Nifae] lea na latou pulefaamalumalu ai o le Perisitua i le faatulagaga paia, le faatulagaga a le Alo o le Atua [tagai Alema 13:1–20]. O le perisitua maualuga atu lena e mafai ai ona pulefaamalumalu ai i sauniga uma o le talalelei” (Doctrines of Salvation, ed. Bruce R. McConkie, 3 vols. [1954–56], 3:87).

Mo nisi faamatalaga e uiga i le pule o le perisitua i le Tusi a Mamona, tagai i Tala ma Faamatalaga o Talaaga mo leMosaea 18.