FAATOMUAGA i Le Tusi a Iaroma

Aisea e suesue ai lenei tusi?

A o aoao e tamaiti aoga le tusi a Iaroma, o le a latou vaai i ai e tausia e le Atua Ana folafolaga e faamanuia ai i latou o e usitai i Ana poloaiga. O le a latou aoao ai foi i taumafaiga a tupu o sa Nifae, perofeta, aoao ma ositaulaga i ona po o Iaroma e fesoasoani ai i tagata ia salamo ma aloese mai le faatafunaga.

O ai na tusia lenei tusi?

O Enosa le atalii o Iaroma na tusia le tusi lenei. E faapei o lona tama—ma lona tamamatua foi o Iakopo ma le tama o lona tamamatua o Liae —o Iaroma, sa i ai le agaga o valoaga ma faaaliga (tagai Iaroma 1:2). Ina ua maea lana faamaumauga, sa ia tuufaasolo atu ia papatusi i lona atalii o Ominae.

Mo ai na tusia ai lenei tusi ma pe aisea foi?

Fai mai Iaroma na ia tusia “e tusa ma le poloaiga a [lona] tama o Enosa, ina ia mafai ona tausia lo [latou] gafa” (Iaroma 1:1). Na ia ta’ua foi o ana faamaumauga sa “tusia mo le manuia o o matou uso sa Lamana. (Iaroma 1:2; tagai foi Enosa 1:13–18). E lei tusia e Iaroma ana lava valoaga ma faaaliga, aua na talitonu o ia ua lava mea na faamaumauina e ona tama “le ata o le faaolataga ua faaalia” (Iaroma 1:2). Ae, na ia faamatalaina le galuega a taitai o sa Nifae i le taimi o lana auaunaga. O nei taitai “o ni tagata malolosi i le faatuatua i le Alii (Iaroma 1:7) o ē uunaia pea lava pea ia tagata ina ia salamo ma tausi i poloaiga (tagai Iaroma 1:3–5, 10–12). Na matauina e Iaroma, a filifili e tagata e mulimuli i fautuaga a o latou taitai amiotonu, ona manuia lea ma sa mafai ona latou puipuia i latou lava mai ia sa Lamana. Na ia molimau mai, “Ae sa faamaonia le afioga a le Alii, na fetalai mai e ia i o matou tama, fai mai: O le tulaga e oo i ai la outou tausiga o A’u poloaiga, o le a outou manuia i le laueleele.” (Iaroma 1:9; tagai foi 1 Nifae 2:19–20).

O anafea ma o fea foi na tusia ai?

O le tusi a Iaroma o loo aofia ai le tusa ma le 59 tausaga, pe tusa mai le 420 TLM i le 361 TLM (tagai Enosa 1:25; Iaroma 1:13). Sa tusia i le nuu o Nifae.

O a ni elemene iloga o lenei tusi?

O le tusi a Iaroma o le tusi aupito puupuu i le Tusi a Mamona. O loo i ai auiliiliga i le tuputupu ae o le malo o sa Nifae, o loo ta’ua ai sa latou “ma sa matua uluola tele lava , ma salalau atu i luga o le laueleele” (Iaroma 1:8). Sa latou mauoa foi i punaoa ma atamamai e galulue i laau ma u’amea, o le fauina o fale, o masini, faiga o meafaigaluega ma auupega (tagai Iaroma 1:8).

Otootoga

Iaroma 1:1–2 Ua maua e Iaroma ia papatusi ma faamatala lona faamoemoega mo le tusiaina.

Iaroma 1:3–12 Ua faamaumauina e Iaroma le faataunuuina o le folafolaga e manuia ma uluola sa Nifae pe a latou tausia Ana poloaiga. Ua ia molimau mai i le mana o le Faaola e laveai ai tagata mai le agasala ao le’i oo i Lana auaunaga i le tino nei, ma tuu atu ai i tagata e “talitonu ia te ia … e pei o la ua i ai” (Iaroma 1:11).

Iaroma 1:13–15 Ua ta’u mai e Iaroma sa tausia se faamatalaga o taua i le va o sa Nifae ma sa Lamana i papatusi lapopoa a Nifae. Na ia tuufaasolo atua ia papatusi laiti i lona atalii o Ominae.