Mosaea 21–22

Faatomuaga

Ina ua faatolu ona toilalo mai le faasaolotoina o i latou lava mai le nofopologa ia sa Lamana, na iu ina liliu atu tagata o Limae i le Alii e faasoloto i latou. Ona taunuu ai lea o Amona ma ona uso i le nuu o Liae-Nifae. Ina ua uma ona osifeagaiga e auauna i le Alii, sa sosola le nuu o Limae mai le nofopologa ai ia sa Lamana, ma sa taitai i latou e Amona i Saraemila.

Fautuaga mo le Aoaoga

Mosaea 21:1–22

Ina ua mavae ona osofai e tagata o Limae ia sa Lamana ma toilalo faatolu ai, sa latou faalotomaulaloina i latou lava i luma o le Alii ma amata ai ona faamanuiaina.

Tusi upupologa ma le laveaiina i luga o le laupapa.

O a ni ata e oo mai i le mafaufau pe a e mafaufau i upu nei?
O a lagona e te mafaufau i ai e o faatasi ma nei upu?
O a mea a nei upu e fai i le ata o le faaolataga?

Faamatala o le Mosaea 21–24 o loo i ai tala o vaega e toalua o tagata sa nofopologa i autau a sa Lamana ma sa laveaiina lava i latou e le Alii. I le Mosaea 21–22, tatou te faitau ai ia Limae ma ona tagata, o e na nofopologa ona o se taunuuga o a latou amioleaga. O le nofopologa faaleagaga e atagia mai ai le nofopologa faaleagaga na latou oo i ai ona o a latou agasala. O le tala i le vaega lona lua, i le Mosaea 23–24, o le a aofia ai i le isi lesona. E faamatala ai tagata o Alema, o e na feagai ma le nofopologa ma mafatiaga ina ua uma ona papatiso. O ia tala uma e lua, o loo aoao mai ai upumoni taua e uiga i le mana o le Alii e laveaiina ai i tatou mai le agasala ma mafatiaga. Uunai tamaiti e mafaufau i le mana o le Alii e laveaiina ai i tatou mai le agasala a o latou suesue i le nofopologa ma le laveaiina o tagata i le Mosaea 21–22.

Valaaulia tamaiti e faitau lemu le Mosaea 21:2–6. Fai i ai e faailoa mai upu ma fasifuaitau o loo faamatala ai mea na oo i ai Limae ma ona tagata ma pe o a o latou lagona i ai. Ina ia faamamafa ia faigata na feagai ma tagata o Limae, atonu e te manao e fautuaina tamaiti e maka le fasifuaitau “sa leai se auala sa mafai ona latou laveaiina ai i latou lava” i le Mosaea 21:5.

O a faamatalaga i le Mosaea 21:6 o ta’u mai ai e lei faalotomaualaloina e tagata i latou lava ma liliu atu i le Alii?
O le a le tali na fautuaina e le nuu o Limae e maua ai le toomaga mai o latou mafatiaga?

Aotele le Mosaea 21:7–12 e ala i le ta’u atu i tamaiti e faatolu ona o le nuu o Limae e tau ina ia laveaiina ai i latou lava mai tagata sa Lamana, ae sa faatoilaloina i latou ma mafatia ai lava i le toatele e fasiotia i taimi taitasi.

O a ni auala e ono mafai e tagata ona faia ina ua uma la latou taumafaiga lona tolu na lei manuia, e laveaiina ai i latou lava?

Valaaulia ni nai tamaiti e feauauai e faitau leotele mai le Mosaea 21:13–16 e aoao ai pe na faapefea ona tali atu tagata. Mafaufau e fai ni nai fesili po o fesili uma foi.

Na faapefea ona suia tagata ina ua maea lo latou toilalo lona tolu?
E tusa ai ma le Mosaea 21:15, aisea na telegese ai ona faafofogaina e le Alii a latou tatalo?
I le Mosaea 11:23–25, o le a le mea na ta’u atu e Apinati i tagata e tatau ona latou faia a o lei faafofogaina e le Alii a latou tatalo mo lo latou laveaiga?
E ui lava e lei vave laveaiina tagata mai lo latou nofopologa, na faapefea ona faamanuiaina i latou e le Alii ina ua amata ona latou salamo? (A o tali mai tamaiti, mafaufau e fautuaina i latou e maka le fasifuaitau “solosolo manuia” i le Mosaea 21:16.)
O le a se mea o aoao mai ai i le mea e faia e le Alii pe a faalotomaualalo e tagata lava latou, amata ona salamo, ma valaau atu ia te Ia mo se fesoasoani?

Aotele le Mosaea 21:16–22 i le faamatala atu faapea, i le taimi na totoe o le nofopologa o le nuu o Limae, sa faamanuiaina e le Alii i latou ina ia latou le fiaaai. E le gata i lea, “sa oo ina le toe i ai se faalavelave i le va o sa Lamana ma le nuu o Limae” (Mosaea 21:22).

Valaaulia tamaiti e ta’u mai mataupu faavae na latou aoaoina mai le tala i le nuu o Limae. E ui atonu e faasoa mai e tamaiti ni mataupu faavae eseese, ae ia mautinoa latou te malamalama a tatou faalotomaulaloina i latou lava, valaau atu i le Alii, ma salamo i a tatou agasala, o le a Ia faafofogaina a tatou tatalo ma faamama le avega o a tatou agasala i Lona lava taimi. (Atonu e te manao e tusi le mataupu faavae lea i luga o le laupapa. Atonu foi e te manao e valaaulia ia tamaiti e tusia i a latou tusitusiga paia i autafa o le Mosaea 21:15–16 po o a latou api talaaga mo le suesueina o tusitusiga paia po o api o le vasega.)

E faapefea ona faamanuiaina i tatou i lo tatou faatalitali i le Alii e laveai i tatou mai avega mamafa o a tatou agasala?

Ina ia fesoasoani i tamaiti e faaaoga mea ua latou aoaoina, tuu i ai ni nai minute e mafaufau loloto ai i fesili nei ma tusi tali i a latou api talaaga mo le suesueina o tusitusiga paia. (Atonu e te manao e tusi ia fesili i luga o le laupapa.)

O le a sau mea o fai e saili ai le mana o le laveaiga mai a tatou agasala?
O a ni auala ua e “solosolo manuia” ai ina ua e sailia le fesoasoani a le Alii?

Mosaea 21:23–22:16

Na galulue faatasi Limae, Amona, ma Kiteona e fesoasoani i tagata ia sosola ese mai le nofopologa ae foi atu i Saraemila.

Manatua: Atonu e te manao e faamanatu i tamaiti o le Mosaea 7 ma le 8 o loo i ai le tala ia Amona ma ona uso ua latou mauaina le Tupu o Limae ma ona tagata. O le isi 14 mataupu, Mosaea 9–22, o loo toe ta’ua ai le talafaasolopito o le nuu o Limae, na amata pe tusa o le 80 tausaga a o lei maua i latou e Amona. O loo faaiu le talafaasolopito lenei i se toe faamatalaina o nisi o mea na tutupu ia o loo aofia ai i mataupu na muamua. Mo lenei le mafuaaga, o le tele o le anotusi o le Mosaea 21:23–30 sa aofia ai lesona o le Mosaea 7–8 ma le Mosaea 18. Ina ia fesoasoani i tamaiti ia manatua mea na tutupu o loo tusia i le Mosaea 21:23–30, e mafai ona fesoasoani le toeiloiloina faapuupuu o le Vaaiga Aoao o Malaga i le Mosaea 7–24 o i le faaopoopoga i le faaiuga o le tusi lesona lenei.

Faamanatu i tamaiti na iloa e le nuu o Limae ua ala ona latou mafatia ona ua latou teena le valaaulia a le Alii ina ia salamo (tagai Mosaea 12:1–2; 20:21). O lenei faailoaga o a latou agasala, na amata ai e le nuu o Limae le faagasologa o le salamo ma le liua. Faasoa le faauigaga lea o le salamo:

“O le [salamo] e manaomia mo lou fiafia i lenei olaga seia oo atu lava i le faavavau. O le salamo e sili atu nai lo na o le faailoa atu o mea sese ua fai. O se suiga o le mafaufau ma le loto. …E aofia ai le fulitua i le agasala ma liliu atu i le Atua mo le faamagaloga. E uunaia e le alofa mo le Atua ma le manao moni e usitai i Ana poloaiga” (Faamaoni i le Faatuatua: O Se Tusitaiala o le Talalelei [2004], 146).

Valaaulia tamaiti e faitau lemu le Mosaea 21:32–35. Fai i ai e faailoa mai upu ma fasifuaitau o loo ta’u mai ai ua salamo Limae ma lona nuu ma ua liliu atu o latou loto i le Alii. Atonu e te manao e fautuaina i latou e maka upu ma fasifuaitau nei. Valaaulia tamaiti e faasoa mai mea na latou maua. (E tatau ona aofia i a latou tali le ulu atu o Limae ma le toatele o lona nuu i se feagaiga e auauna atu i le Atua ma tausi Ana poloaiga, ma ua latou mananao ina ia papatiso, ma ua latou loto e auauna atu i le Atua ma o latou loto atoa.)

O le a fesoasoani le gaoioiga lea e iloa ai e tamaiti sa fesoasoani le Alii ia sosola ese le nuu o Limae mai le nofopologa, pe a latou faamamaluina la latou feagaiga e auauna atu ia te Ia ma tausi Ana poloiga. Tusi fesili ma mau nei i luga o le laupapa:

Na avea faapefea le taunuu atu o Amona ma ona uso o se tali i tatalo a le nuu o Limae? (tagai Mosaea 7:14–15, 18–20; 21:14–15, 22–24.)

E le gata ina saili atu i le fesoasoani a le Alii e ala i le tatalo, ae o a mea na fai e le nuu o Limae, faatasi ai ma le taitaiga a Kiteona, ina ia laveaiina ai? (tagai Mosaea 21:36; 22:1–10.)

O a faamatalaga o i nei fuaiupu o ta’u mai ai na fesoasoani le Alii i le nuu o Limae e sosolaese ai ma le saogalemu? (tagai Mosaea 22:11–16; 25:15–16.)

Vaevae tamaiti i ni vaega se tolu. Ia saunia vaega taitasi e tali se fesili se tasi o loo i luga o le laupapa i le suesueina lea o mau o loo i ai. A uma ni nai minute, tofi se tamaitiiti se toatasi mai vaega taitasi e lipoti mai a latou tali sa latou saunia. O se taimi lelei foi lea e faaopoopo ai e tamaiti le “ua sosola le nuu o Limae” i a latou ata o le Vaaiga Aoao o Malaga i le Mosaea 7–24. (Mo le ata atoa, tagai i le faaopoopoga o i le faaiuga o le tusi lesona lenei.) Atonu foi e te manao i tamaiti e vaai i le faailogatusi o le Tusi a Mamona e iloa ai po o le a le mea o le a oo i ai le nuu o Limae (tagai Mosaea 22:13–14).

Ta’u i ai e ui atonu tatou te le o manaomia le saili ia laveaiina mai se nofopologa faaletino e pei ona sa faia e le nuu o Limae, ae e manaomia uma e i tatou ona laveaiina mai agasala.

O le a se mea ua e aoaoina mai le Mosaea 21–22 e maua ai le faamalosiauga e soo se tasi o manaomia ona iloa le mana o le Alii e laveai ai i tatou mai le agasala?

Faauma i le tuuina atu o lau molimau i le mana o le Alii e laveai ai i tatou mai le agasala. Faamamafa atu a tatou faalotomaulaloina i tatou lava, valaau atu i le Alii, ma salamo mai a tatou agasala, o le a Ia faafofogaina a tatou tatalo ma faamama le avega o a tatou agasala i Lona lava taimi.

Tala ma Faamatalaga o Talaaga

Mosaea 21:15, 29–30. O le mafatiaga e maua mai le agasala, e mafai ona i ai se faamoemoega.

A tatou agasala ma mumusu e salamo, e pei o le nuu o le Tupu o Limae, ua tatou aumaia i o tatou lava luga se tiga faaopoopo —o nisi taimi e faaletino ma e faaleagaga i taimi uma. Na faamalamalama mai e Elder Kent F. Richards o le Fitugafulu le ala e mafai ai ona avea le tiga ma se vaega taua o lo tatou faamalologa faaleagaga ma le tuputupu ae:

“O le tiga o se fua o le faagasologa o le faamalologa. E tele ina aoao ai i tatou i le onosai. …

“Na tusia e Elder Orson F. Whitney: ‘E leai se tiga tatou te mafatia ai, leai se tofotofoga tatou te oo i ai e maumau. E aoga mo lo tatou a’otauina, i le atinaega o na uiga auaumama e pei o le onosai, faatuatua, lototoa ma le lotomaulalo. E ala i le faanoanoa ma le mafatia, galue ma faigata, tatou te maua ai aoaoga na tatou o mai iinei e maua.’

“E faapena foi le saunoaga a Elder Robert D. Hales:

“‘O tiga e aumaia ai ia te oe se lotomaulalo e mafai ai ona e mafaufau loloto. O se aafiaga ou te matua faafetai ai lava ua ou oo i ai.

“‘Sa ou aoaoina faapea, o le tiga faaletino ma le faamaloloina o le tino … talitutusa lava ma le tiga faaleagaga ma le faamaloloina o le agaga i le faagasologa o le salamo’” (“O Le Togiola ua Aofia ai Tiga Uma,” Ensign po o le Liahona, Me 2011, 15).

Mosaea 21:15–16. O a ou uiga faaalia i le taimi o mafatiaga?

Na aoao mai e Elder Richard G. Scott o le Korama a Aposetolo e Toasefululua uiga e tatau ona tatou taumafai e atiina ae i le taimi o o tatou mafatiaga:

“O le a aumai e le Alii le fesoasoani faatasi ai ma mana o le lagi pe a e sailia le laveai i le lotomaulalo ma le faatuatua ia Iesu Keriso.

“Aua e te faapea mai, ‘ua leai se tagata e malamalama ia te au; ua le mafai ona ou faavasegaina, pe mafai foi ona ou maua le fesoasoani ua ou manaomia.’ O ia upu o ni upu e faatoilalo ai oe. E leai se tagata e mafai ona fesoasoani ia te oe e aunoa ma lou faatuatua ma lou taumafai e fai lau vaega. O se laasaga tatau lena mo lou alualu luma. Aua e te saili mo se olaga e leai ni mafatiaga, tiga, to’atuga, lu’i, po o le faanoanoa, aua o mea ia ua faaaoga e le Tama alofa e faateleina ai lo tatou alualu i luma ma le malamalama faaletagata lava ia. E pei ona tele ona faamaonia mai i tusitusiga paia, o le a e maua le fesoasoani pe a e faatuatua ia Iesu Keriso. O le faatuatua ia Keriso o lona uiga o lo tatou faalagolago lea ia te Ia; tatou te faalagolago i Ana aoaoga. O lena tatou te maua ai le faamoemoe, ma o le faamoemoe e maua ai le alofa, le alofa mama o Keriso – le lagona toafilemu lea e oo mai pe a tatou iloa lona popole, lona alofa ma lona malosi e faamaloloina i tatou, pe faamama a tatou avega i lona mana faamaloloina.” (“Ina Ia Faamaloloina,” Liahona Iulai 1994 , 9).