Lesona 68: Mosaea 28–29

Lesona 68

Mosaea 28–29

Faatomuaga

Ina ua liua, sa lagonaina e atalii o le Tupu o Mosaea se naunautaiga malosi e folafola atu le talalelei i tagata sa Lamana. Ina ua uma ona fesili atu i le Alii ma maua mai se faamautinoaga o le a faamanuiaina i latou ma puipuia, sa tuu atu loa e Mosaea i latou e o. O le taimi foi lea, sa galue ai Mosaea e tausia talafaamaumau paia na tuuina atu ia te ia. Sa ia faaliliuina talafaamaumau a sa Iareto, ona tuuina atu uma lea o talafaamaumau ia Alema le Itiiti. Aua na mumusu ona atalii e avea ma tupu, o lea sa ia faatuina ai se faigamalo o faamasino e fai ma faigamalo fou i le nuu.

Fautuaga mo le Aoaoga

Mosaea 28:1–9

Ua mananao atalii o Mosaea e talai atu i le au sa Lamana

A o lei amataina le vasega, tusi le faamatalaga lenei i luga o le laupapa:

Ua ou matua manao lava mo le fiafia e faavavau o isi.
Ua ou naunau e ositaulaga e fesoasoani ai i isi.
Ua ou manao e faasoa atu i isi le talalelei.

A amata le vasega, fai i tamaiti e faaaoga saunoaga o i luga o le laupapa e iloilo filemu ai i latou lava. Fai i ai e faaaoga se fua mai le 1 i le 10, o le 1 e ta’u mai ai e le o faamatalaina lelei ai i latou i le saunoaga, a o se fua o le 10 e ta’u mai ai e matuai lelei lava ona faamatalaina i latou e le saunoaga.

Valaaulia tamaiti e faitau lemu le Mosaea 27:8–10.

E faapefea ona fuaina Alema ma atalii o Mosaea i le fua lava lea i le taimi lenei i o latou olaga?

Fai i tamaiti e faitau leotele le Mosaea 28:1–4.

E faapefea ona fuaina atalii o Mosaea i le fua lava lea e tasi ina ua mavae ona liuaina? O a fasifuaitau i le Mosaea 28:1–4 o ta’u mai ai le tele o lo latou suia?
Aisea na suia ai manaoga o atalii o Mosaea? (Na latou faatuatua ia Iesu Keriso, salamo mai a latou agasala uma, ma ua liua; tagai Mosaea 27:34–36. Atonu foi e te manao e faasino i le Mosaea 28:4 e ta’u mai ai pe na faapefea ona uunaia i latou e le Agaga o le Alii.)
Mai mea ua e aoaoina e uiga ia sa Lamana i lea taimi o lo latou talafaasolopito, o a ni faigata atonu na fetaiai ma faifeautalai iina?
E tusa ai ma le Mosaea 28:2, o le a le eseesega na manatu atalii o Mosaea o le a mafai ona faia e la latou talaiga i olaga o sa Lamana?
Na faapefea ona faatosinaina e le liua o atalii o Mosaea lo latou naunau e faasoa atu le talalelei? O a mataupu faavae e mafai ona tatou aoaoina mai lo latou aafiaga? (Aotele tali a tamaiti i le tusia lea o le mataupu faavae lea i luga o le laupapa: A oo ina loloto lo tatou liua, e faateleina lo tatou naunau e faasoa le talalelei.)

Ata

Elder Dallin H. Oaks

Fai i se tamaitiiti e faitau le saunoaga lea a Elder Dallin H. Oaks o le Korama a Aposetolo e Toasefululua. Atonu e te manao e fautuaina tamaiti e tusia le saunoaga lenei i autafa o le Mosaea 28:1–4.

“O le loloto o lo tatou manao e talai le talalelei, o se fuafaatatau sili foi lena o le faateleina o lo tatou lava liua faaletagata” (“Fetufaai atu Le Talalelei,” Liahona, Ianuari. 2002, 8).

Valaaulia tamaiti e manatunatu pe ua faateleina faapefea lo latou manao e faasoa le talalelei i isi a o latou latalata atili atu i le Alii.

O a ni aafiaga i lou olaga ua e manao ai e faasoa le talalelei i isi?

Fai i tamaiti e mafaufau faapea ua latou iloa se alii talavou o se tagata o le Ekalesia ae tau le manao e faamisiona talai.

O le a se mea e mafai e lenei alii talavou ona fai e faateleina ai lona manao e faasoa atu le talalelei? (A o faasoa mai manatu o tamaiti, fautuaina i latou e toe mafaufau i le mea na faalolotoina ai lo latou liua i le talalelei a Iesu Keriso, ma pe faapefea ona latou fautuaina atu ni gaoioiga faapena mo lenei alii talavou. Fesoasoani ia latou iloa o le tele o le liua e oo atu ai i se manao faateleina e faasoa atu le talalelei i isi.)

Atonu e te manao e faamalamalama pe na faapefea ona e maua le naunautaiga e aoao atu le talalelei i isi. Ao e faia o lea, ia e manatu e faasoa atu lau molimau faapea ao tatou faalatalata atu i le Alii ma lagona Lona Agaga, o le a faateleina lo tatou naunau e faasoa atu le talalelei i isi.

Fai tamaiti e faitau le Mosaea 28:5–8 ma faailoa mai pe aisea na tuu ai e Mosaea ona atalii e o i se misiona matautia faapena.

I le tali atu i le tatalo a Mosaea, o a faamanuiaga na folafola atu e le Alii i atalii o Mosaea?

Mosaea 28:10–20

Ua faaliliu e Mosaea papatusi a sa Iareto ma tuu atu faamaumauga paia ia Alema

Tusi le ata lenei i luga o le laupapa:

Ata

Papatusi auro ma le palealii

Tusi lou lima i le ata o le palealii, ma fai i se tamaitiiti e faitau le Mosaea 28:10. Fai i le vasega e vaavaai mo se faafitauli na i ai i le tupu ina ua malaga ona atalii i se misiona. (Na manaomia ona ia sailia se tasi e suitulaga ia te ia e fai ma tupu.)

Aotele le Mosaea 28:11–19 e ala i le faamatala ua oo ina toeaina ia Mosaea, ma sa uai atu se vaega o lona loto i faamaumauga paia na tuuina atu ia te ia: o faamaumauga na tuuina atu e lona tama ia te ia e tausi faapea ai ma faamaumauga na tuuina atu ia te ia e le Tupu o Limae. I lana matafaioi o se tagatavaai, sa ia faaliliuina ai faamaumauga a sa Iareto—o papatusi na maua e le vaega a le Tupu o Limae lea na auina atu e sue le laueleele o Saraemila (tagai Mosaea 8:7–9). Tata’i tamaiti i le ata o papatusi auro o i luga o le laupapa.

Faamatala e le gata i le tofia o se taitai mo le malo, ae sa manaomia foi e Mosaea ona tofi se tasi e tausia ia papatusi. Fai i tamaiti e faitau lemu le Mosaea 28:20.

O ai na tuu i ai faamaumauga paia?
Aisea na lelei ai le filifilia o Alema mo nei faamaumauga?

Mosaea 29

Na mulimuli tagata i le fautuaga a Mosaea e faatu se faigamalo e pulea e faamasino

Fai i tamaiti e sii mai o latou lima pe a fia avea ma tupu po o se masiofo. Filifili se tasi o na tamaiti e sau i luma o le vasega ma tu i tafatafa o le palealii o i luga o le laupapa (pe tuu foi se palealii pepa i luga o lona ulu). Fai i tamaiti e faamatala po o a ni tulaga manuia o le a ia maua mai le avea ai ma tupu po o se masiofo.

Fai i tamaiti e faitau leotele le Mosaea 29:1–3.

O ai na mananao tagata e fai ma o latou tupu?
O a mea na lafoai e le fanau a Mosaea ina ia latou o ai e talai i tagata sa Lamana?
O a nisi o avanoa ua ositaulagaina e alii ma tamaitai talavou pe tolopoina foi ina ia auauna atu ai faamisiona?

Aotele le Mosaea 29:4–10 i le faamatala atu sa popole le Tupu o Mosaea ina nei avea le tofia o se tupu fou ma mea e fefinauai ai ma oo ai lava ina tau. Sa ia ta’ua foi isi faafitauli e ono tulai mai pe afai e pule se tupu amioletonu. Fai i tamaiti e faitau le Mosaea 29:16–18 ma faailoa mai na faafitauli.

Faamatala na fautuaina e le Tupu o Mosaea e le tatau ona toe taitaia le malo o sa Nifae e se tupu. Ae, na ia fautuaina se faigamalo o faamasino, ae filifilia lava e tagata ia faamasino.

Fai i tamaiti e faitau lemu le Mosaea 29:11, 25, ma vaavaai pe faapefea ona faamasinoina e faamasino ia tagata. (“E tusa ai ma poloaiga a le Atua” ma “e tusa ai ma tulafono ua tuu mai ia te outou e o tatou tama.”)

Tusi le Mosaea 29:26–27, 30, 33–34, 37–38 i luga o le laupapa. Vaevae le vasega e fai paga. Ia saili e tamaiti ia fuaiupu nei ma faailoa mai tiutetauave o tagata i le malo na fautuaina e le Tupu o Mosaea. Ona talanoaina lea e paga taitasi fesili nei. (Atonu foi e te manao e tusi fesili nei i luga o le laupapa pe tuu atu ia i latou i pepa.)

E tusa ai ma upu a le Tupu o Mosaea, o a manuia e maua pe a faia i le leo o tagata ia faaiuga? (Fai mai a ia, o le leo o tagata e masani lava e le manao i mea e “feteenai ma le mea e sa’o.” Na ia saunoa foi e uiga i le manaomia o tagatanuu uma ona fefaasoaai i avega a lo latou malo ma ia maua “se avanoa tutusa”.)
O a ni taunuuga o le a o’o mai pe afai e filifili e le leo o tagata le amioletonu? (O le a o’o mai le faamasinoga a le Atua i o latou luga, ma o le a fano i latou.)
I le Mosaea 29:34, o le a le uiga o le fasifuaitau “ina ia mafai e tagata taitoatasi ona tauave lana avega”? E mafai faapefea ona faatatau lenei fasifuaitau i tiutetauave o tagatanuu ia saofagā i a latou faiganuu ma faigamalo?

Faitau le saunoaga lenei a Elder Neal A. Maxwell o le Korama a Aposetolo e Toasefululua:

“Aua o le mea e tupu i le solomuli o aganuu, o le a faamasinoina moni ai taitai ma i latou e mulimuli ai … E faigofie ona faitioina taitai leaga, peitai e le tatau ona i ai se alofaga o amioga a tagata e mulimuli ai” (“Ia Salamo i Lo Tatou Manatu Faapito,” Liahona, Iulai 1999, 24).

Aisea e taua ai i taitai ma e mulimuli ai ona tali atu mo a latou lava mea e faatino?
O le a se mea e mafai ona e faia e lagolago ai tulafono ma taitai amiotonu? (Atonu e te manao e faasino tamaiti i le Mataupu Faavae o le Faatuatua 1:12.)

Faailoa atu lou mautinoa e ui e le o maua e atunuu uma i le lalolagi le avanoa e filifili ai o latou lava taitai, ae o le a fesoasoani pea lava le Alii ia i latou o e faalagolago ia te Ia, tusa lava po o fea latou te nonofo ai.

Valaaulia se tamaitiiti e faitau leotele le Mosaea 29:41–43.

O ai na filifili e tagata e fai ma uluai faamasino sili? Pe na soifua o ia e tusa ai ma lona tiutetauave o se taitai faamaoni ma le amiotonu? O a ni mea na tulai mai ona o lana taitaiga?

Fai i tamaiti e faamatala mai i a latou lava upu mea na latou aoaoina mai le Mosaea 29. Atonu latou te faailoa mai nisi o nei mea moni:

O taitai amioletonu e mafai ona aumai ai le finauga ma le agasala.

E le o se mea e masani ai le filifili e tagata o se mea e le sa’o.

Afai e filifili e tagata le amioleaga, o le a oo mai le faamasinoga a le Atua i o latou luga.

E tofu le tagata ma se tiute e lagolago ai tulafono ma taitai amiotonu.

Faaiu i le tuuina atu o lau molimau e uiga i mataupu faavae o le lesona i le aso.

Iloiloga o le Mosaea

Faaaoga sina taimi e fesoasoani ai i tamaiti e iloilo le tusi a Mosaea. Fai i ai e mafaufau i mea na latou aoao mai lenei tusi i le seminare ma suesuega patino a le tagata lava ia i tusitusiga paia. Pe a manaomia ona vaai faatopetope lea i le tusi e fesoasoani ai ia manatua. A maea se taimi ua lava, ona valaaulia lea o ni nai tamaiti e faasoa mai o latou manatu, ma lagona e uiga i se mea i totonu o le tusi na faagaeetia ai latou.

Tala ma Faamatalaga o Talaaga

Mosaea 28:3. O le manao e faasoa atu le talalelei

Na fautuaina mai e Elder M. Russell Ballard o le Korama a Aposetolo e Toasefululua se auala aoga e mafai ai e tagata o le Ekalesia ona faasoa atu le talalelei.

“O le ki i le faamanuiaina o le galuega talai ma tagata o le au paia, o le faatinoina lea o le faatuatua. O le tasi auala e faaali atu ai lou faatuatua i le Alii ma ana folafolaga o le faatulagaina lea ma le agaga tatalo o se aso e sauniuni ai se tasi e feiloai ma faifeautalai. Na ou mauaina le tele o tusi mai tagata lotu o e na faatinoina lo latou faatuatua i lenei auala faigofie. E ui lava e lei i ai se tasi i mafaufau o aiga o e e mafai ona latou faasoa atu i ai le talalelei, ae sa latou faatuina lava se aso, tatalo, ona talanoa atu lea i ni tagata se toatele. O le Alii o le Leoleo Mamoe Lelei ma na te silafia Ana mamoe o e ua saunia e faalogo i Lona siufofoga. O le a Ia taitaiina i tatou ao tatou sailia Lana fesoasoani paia i le faasoaina atu o Lana talalelei” (“Atiina Ae o se Fale e Fefaasoaai ai le Talalelei,” Ensign po o le Liahona, Me 2006, 86).

Mosaea 29:41–44. O le nofoaiga a faamasino

O le suiga o le faigamalo na faatulagaina e le Tupu o Mosaea sa matuai taua lava ma mai lava i lena taimi seia oo i le soifua mai o Keriso (tagai i le 3 Nifae 2:8) na tusitusia ai e sa Nifae o latou taimi e faatatau i le amataga o le nofoaiga a faamasino. O le taimi muamua sa tusitusia e sa Nifae le taimi mai le tausaga na tuua ai e Liae ia Ierusalema.