Potutusi
Lesona 88: Alema 30

Lesona 88

Alema 30

Faatomuaga

Ina ua mavae se taua tele i le va o sa Nifae ma sa Lamana, na i ai le filemu i luga o le laueleele. Pe a ma le lua tausaga mulimuli ane, na amata ai ona talai atu e se tagata e igoa ia Korioa e faapea e leai se Atua, o le a le i ai se Keriso, ma e leai se agasala. Na ia tetee atu i taitai o le Ekalesia, fai mai na latou aoaoina atu uputuu valea a o latou tama. O ana aoaoga pepelo na taitaiina ai le toatele o tagata e faia ni agasala matautia. Na aumai Korioa i luma o Alema, lea na molimau atu e uiga ia Iesu Keriso ma aoao atu o loo molimau mai mea uma o loo i ai se Foafoa Silisiliese. Na iu lava ina taia Korioa i le gugu e le mana o le Atua ma sa faamautinoa atu le upu moni. Ae peitai, ina ua ia talosagaina le toe aumai o lona leo, na teena e Alema lana talosaga, fai mai o le a ia toe aoao atu foi ia aoaoga sese pe a toe maua lona leo. Na faaaluina le vaega o totoe o le olaga o Korioa e aisi ai mo ana meaai seia oo ina taia o ia ma soli i lalo ma oti ai e se vaega o tagata sa Nifae na latou taua i latou o sa Sorama.

Fautuaga mo le Aoaoga

Alema 30:1–18

O Korioa, o se aneti-Keriso, na faatauemu i le aoaoga faavae a Keriso

Ao lei amataina le vasega, faapu se tamai pu i le pito i lalo o se apainu ma faaalu i fafo le vaiinu. Faaali atu i le vasega le apa e aunoa ma le faailoa atu e leai se mea o i totonu. Fesili atu po o ai e manao i ai ma e pe fia se mea latou te mananao e faatau ai. Fai i se tamaitiiti e tu mai i luga, suesue le apa, ma tau atu i tamaiti mea o i totonu. (Nai lo se apainu, e mafai foi ona e faaaogaina se atigi pusa gaogao, se taga pepa, po o se pepa afifi lea e masani lava ona i ai i totonu se mea e fia mananao i ai tamaiti.)

  • E faapefea ona faatusa lenei apainu i aoaoga pepelo? (E masani lava e manaia mai fafo ae e gaogao totonu.)

Faamatala atu o le lesona i le asō, o le a aoao ai tamaiti i se tagata e igoa ia Korioa. A o latou suesue le Alema 30, uunaia i latou e mafaufau i le auala na tuua ai e aoaoga a Korioa o ia ma isi i le gaogao faaleagaga.

Faamatala atu i tamaiti aoga ina ua mavae se taimi o taua ma sa Lamana, na ulu atu le nuu o Amona (tagata o Aneti-Nifae-Liae) ma sa Nifae i se vaitaimi o le filemu. Ona faalavelave lea o Korioa i lo latou filemu. Fai i tamaiti e faitau le Alema 30:6, 12, tagai mo se upu e faamatala ai lenei tagata. (O le upu o le Aneti-Keriso. Faamalamalama atu o se tasi o uiga o lenei upu o “soo se tasi po o soo se mea e faaaoao pepelo i le fuafuaga moni o le talalelei o le olataga ma tetee faaaliali pe faalilolilo ia Keriso” [O Le Taiala i Tusitusiga Paia, “AnetiKeriso,” scriptures.lds.org].)

Saunia le galuega faatino lenei i luga o se pepa e tufa atu po o i luga o le laupapa ao lei amataina le vasega. Afai e te tuuina i luga o le laupapa, fai i tamaiti e kopi i totonu o api o le vasega po o api talaaga mo le suesueina o tusitusiga paia. O le a fesoasoani lea ia i latou ina ia iloa ai le auala o faaaoga ai e Satani ma i latou o auauna atu ia te ia ia aoaoga faavae pepelo e faatosinaina ai i tatou e faia le agasala.

Aoaoga Pepelo a Korioa o le Aneti-Keriso

Aoaoga Pepelo

Savali

1. Alema 30:13–14

a. E le mafai ona e iloa e moni se mea sei vagana ai ua e vaai i ai. O le mea lea, e le mafai ona e iloa e i ai se Keriso.

2. Alema 30:15

e. E leai se mea e taua o se agasala. E leai se fua lautele o le sao po o le sese.

3. Alema 30:16

i. E manuia tagata ona a latou lava taumafaiga. E leai se mea e ta’ua o se togiola.

4. Alema 30:17 (amata i le “e lelei a tagata taitoatasi ia …”)

o. E faigata ona iloa ia mea o le a tutupu i le lumanai, o lea e le tatau ai ona e talitonu ia Keriso pe mulimuli i upu a tagata o fai mai o i latou o ni perofeta.

5. Alema 30:17 (amata i le “soo se mea sa fai e le tagata …”)

u. O le faamagaloga o agasala o se manatu valea lea e sau mai uputuu valea a tuaa.

6. Alema 30:18

f. E leai se olaga pe a mavae le oti, o lea e leai se mea e popole ai fua i se faamasinoga pe a mavae lenei olaga.

Vaevae tamaiti e fai paga. Fai i ai e faitau faatasi le Alema 30:12–18. Faatonu i latou e faatusatusa ia aoaoga pepelo a Korioa, lea o loo i le itu agavale o le galuega faatino, ma savali o na aoaoga, lea o loo i le itu taumatau. (Tali: 1–o, 2–a, 3–u, 4–i, 5–e, 6–f.)

Ina ia fesoasoani i tamaiti e suesue auiliili i aoaoga a Korioa ma faaaoga mea sa latou aoaoina, fai atu fesili nei:

  • O a ni aoaoga sa faaalia ia te oe e taitutusa i aoaoga a Korioa?

  • E tusa ai ma le Alema 30:18, o le a se mea na taitaiina ai e aoaoga a Korioa ia tagata e faia?

  • Aisea e te manatu ai o nei aoaoga na taitaiina atu ai tagata i le faaosoosoga?

  • O le a se mea tatou te aoaoina mai nei mau e uiga i le matautia o aoaoga faavae pepelo? (Fesoasoani i tamaiti ia iloa le mataupu faavae lenei: E faaaoga e Satani ia aoaoga faavae pepelo e faaosooso ai i tatou e faia le agasala.)

Fai i tamaiti e vaai faalemafaufau ia i latou lava i tulaga nei:

Na valaaulia oe e se uo e taaalo i se taaloga vitio. Ina ua e taunuu atu i le fale o lau uo, sa e iloa ai o le taaloga e matautia le saua ma e aofia ai ni tagata e le lelei le faiga o o latou ofu. Ina ua e musu e te taalo i le taaloga, sa fai mai lau uo e te faamatalaina atu ia te ia le mafuaaga e te le fia taalo ai.

  • O le a sau tala e fai atu? (Atonu o le a faamatalaina e tamaiti faapea e lamatia e le taaloga le tulaga faatonuina o lo latou faatuatuaga.)

  • Afai ae amata ona faitio lau uo ia te oe po o lau tapuaiga, fai mai o loo faatapulaaina lou saolotoga, o le a se auala e te ono tali atu ai?

Alema 30:19–60

Ua manao Korioa i se faailoga mai ia Alema ma ua taia i le gugu e le mana o le Atua

Aotele le Alema 30:19–30 e ala i le faamatala atu o Korioa sa aoao atu ia aoaoga faavae pepelo i nuu eseese e tolu o sa Nifae. Na iu lava, ina aumai o ia i luma o le faamasino sili o le laueleele ma i luma o Alema, o le sa avea ma taitai o le Ekalesia. Atonu e te manao e faailoa atu o se tasi o mataupu sili a Korioa e faapea sa taofia e taitai o le Ekalesia ia tagata i le nofopologa —sa aveesea mai e a latou lotu le saolotoga o tagata. Na ia tuuaia foi taitai o le Ekalesia i le sailia o faamanuiaga patino mai galuega a tagata.

Fai i tamaiti e faitau le leoa le Alema 30:31, tagai mo tuuaiga na faia e Korioa e faasaga ia Alema ma isi taitai o le Ekalesia.

Fai i tamaiti e faitau le Alema 30:32–35 e iloa ai le auala na tali atu ai Alema ia Korioa.

  • O faapefea ona e vaaia le moni o le tali a Alema i olaga o taitai o le Ekalesia?

Fai i ni tamaiti se toalua e o mai i luma o le vasega. Fai i ai e faitau leotele le Alema 30:37–45, o le tasi e faitauina upu a Alema ao le isi e faitauina upu a Korioa. Valaaulia le vaega o totoe o le vasega e tagai i mea ia na tuuina atu e Alema e avea ma faamaoniga o le i ai o se Atua.

  • O a ni faamaoniga na tuuina atu e Alema e i ai le Atua? (A o tali mai tamaiti, atonu e te manao e tusi a latou tali i luga o le laupapa. (Atonu e te manao e uunaia ia tamaiti aoga e faailoga na mea i totonu o o latou tusitusiga paia. I le avea ai ma se vaega o lenei talanoaga, faamamafa atu faapea o mea uma lava ua molimau mai o loo i ai le Atua.

  • Mai faamaoniga uma na lisiina e Alema, o fea ua matuai mamana lava ia te oe? Aisea?

Tuu atu i tamaiti ni nai minute e tusi ai. Fai i ai e lisi mai ni faamaoniga sa latou vaaia e “faailoa mai… o loo i ai se Atua” (Alema 30:44). Fai i nai tamaiti aoga e faasoa mai a latou lisi i le vasega.

  • O faapefea ona faatosinaina oe e nei faamaoniga? O a ni auala latou te ono faamalosia ai lou faatuatua ma lau molimau?

Aotele le Alema 30:46–50 e ala i le faamatala atu o Korioa, na te lei taliaina lava ia faailoga ia sa tuuina atu ia te ia, ae na ia faatonuina Alema e tuu atu ia te ia se faailoga o le i ai o se Atua. I le tali atu, na taia Korioa i le gugu i le mana o le Atua I lona talitonuina o le mana o le Atua, na tusi ai Korioa e uiga i le mafuaaga na ia talai ai e faasagatau i le Atua le Tama ma Iesu Keriso. Valaaulia se tamaitiiti aoga e faitau leotele le faamatalaga a Korioa o i le Alema 30:51–53.

  • O le a sou manatu o le uiga o le tala a Korioa na ia fai mai sa ia aoao atu mea “sa logolelei i latou i le mafaufau faaletino”? (Atonu e manaomia lou faamatalaina faapea o aoaoga a Korioa na faamemelo i ai manaoga faaletino amioletonu o tagata nai lo o latou manaoga faaleagaga amiotonu.)

Aotele le Alema 30:54–59 e ala i le faamatalaina o Korioa na talosaga atu ia Alema ina ia tatalo e aveese le fetuu mai ia te ia. Na musu Alema, ma fai mai afai ae maua e Korioa le avanoa e toe tautala ai, o le a ia toe aoao atu aoaoga faavae pepelo i tagata. Na tuliesea Korioa i fafo ma na ia alu atu i lea fale ma lea fale, ma aisi ai mo ana meaai. Na iu lava na ia alu atu i tagata sa Sorama, o e na vavaeese mai sa Nifae, ma na solia o ia i lalo ma oti ai.

Fai i tamaiti e faitau le leoa le Alema 30:60, tagai mo le mataupu faavae lea na aoao atu e Mamona.

  • O le a se aoaoga faavae na aoao atu e Mamona i lenei mau?

Ia mautinoa o malamalama tamaiti aoga e “le lagolagoina e le tiapolo ana fanau [tagata e mulimuli ia te ia] i le aso gataaga.”

  • E faapefea ona ese lenei mea mai le auala o tausia ai i tatou e le Tama Faalelagi ma Iesu Keriso? (A o talanoaina e tamaiti lenei fesili, atonu e te manao e faasino atu i latou i le Alema 36:3.)

Molimau atu e uiga i upu moni na tou talanoaina ma tamaiti aoga i lenei lesona.

Tala ma Faamatalaga o Talaaga

Alema 30:52. “Sa ou iloa i taimi uma lava o loo i ai se Atua”

Na aoao mai Elder Robert D. Hales o le Korama a Aposetolo e Toasefululua e uiga i le taua o le iloaina o faailoga tatou te mauaina e faatatau i le upu moni o le talalelelei:

“Afai tatou te le gauai atu i uunaiga malu a le Agaga Paia, ua tatou i ai i le pagatia o le avea e pei o Korioa, o se aneti-Keriso i le Tusi a Mamona. Na le gata ina le talitonu Korioa i le Atua, ae sa ia upuvale foi i le Faaola, le Togiola, ma le agaga o valoaga, ma aoao atu aoaoga sese e faapea e leai se Atua ma e leai se Keriso.

“Sa le malie Korioa i le na o le teena o le Atua ma alu filemu i lona ala. Sa taufaifai o ia i e na talitonu [i le Atua] ma poloai atu i le perofeta o Alema e faaali atu se faailoga e talitonu ai e i ai [se Atua] ma le mana o le Atua. O le tali a Alema e tutusa lava le aoga i aso nei ma na vaitaimi: ‘Ua lava faailoga ua e maua; e te tofotofo ea i lou Atua? E te fai mai ea, Faaali mai ia te au se faailoga, ae ua ia te oe le molimau a ou uso uma nei, ma perofeta paia uma foi? Ua folasia i ou luma tusitusiga paia, ioe, ma ua faailoa mai i mea uma o loo i ai se Atua; ioe, e oo i le lalolagi, ma mea uma ua i ona luga, ioe, ma lona faataamilosaga, ioe, ma paneta uma foi o loo i o latou ala masani ai ua molimau mai o loo i ai se Foafoa Silisiliese.Alema 30:44.]

“Na iu lava ina tuuina atu ia Korioa se faailoga. Na taia o ia ma gugu ai. ‘Ma sa tuu atu foi e Korioa lona lima ma tusitusi, ua faapea mai: … Ou te iloa foi e leai se tasi mea, ua na o le mana o le Atua, ua mafai ona faaoo mai lenei mea ia te au; ioe, na a’u iloa foi e i ai le Atua.’Alema 30:52.

“Uso e ma tuafafine, atonu ua uma ona e iloa i lou loto, o loo soifua le Atua. Atonu e te le’i iloaina uma mea e uiga ia te Ia ma le malamalama foi i Ona ala uma, ae o le malamalama o le talitonu o loo i totonu ia te oe, o loo faatalitali mo le fagua ma faateleina e le Agaga o le Atua, ma le Malamalama o Keriso lea na e fanau mai ma oe” (“Saili ia Iloa le Atua, Lo Tatou Tama Faalelagi, ma Lona Alo o Iesu Keriso,” Ensign po o le Liahona, Nov. 2009, 31).

Lolomi