Lesona 67
Mosaea 27
Faatomuaga
Na fouvale Alema le Itiiti ma atalii o le Tupu o Mosaea i o latou tama ma le Alii ma sa latou taumafai e faaumatia le Ekalesia a le Atua. Na faamutaina a latou taumafaiga ina ua auina mai se agelu, e tali ai tatalo a e amiotonu, ma valaauina i latou ia salamo. O le taunuuga o lenei aafiaga faavavega, sa toe fanauina i latou e ala i le Togiola a Iesu Keriso, ma sa latou malaga faasopolia ai le laueleele o Saraemila e folafola atu le talalelei ma toe faalelei ia manu’a na latou faatupuina.
Fautuaga mo le Aoaoga
Mosaea 27:1–22
Ua valaauina e se agelu ia Alema le Itiiti ma atalii o Mosaea ia salamo
Ina ia maua se matalalaga mo lenei lesona, aotele le Mosaea 27:1–7 i le faamatala o le toatele o tagata le talitonu i Saraemila na amata ona sauaina i latou o le Ekalesia. Ina ua uma ona faasalalauina e le Tupu o Mosaea se folafolaga e faasa ai na ituaiga o faatinoga, o le toatele lava o tagata sa usitai ma sa toe maua le filemu. Peitai, sa taumafai pea nisi tagata e faataumaoia le Ekalesia. O le toalima o na tagata o le atalii o Alema o Alema, ma atalii o le Tupu o Mosaea, o Amona, Arona, Ominea, ma Himinae. O Alema le atalii o Alema e tele lava ina ta’ua o Alema le Itiiti.
Valaaulia se tamaitiiti e faitau leotele le Mosaea 27:8–10. Fai i le vasega e faailoa mai upu po o fasifuaitau e faamatala ai Alema le Itiiti ma atalii o Mosaea.
-
O le a le itu o le faamatalaga o Alema ma atalii o Mosaea e sili ona taua ia te oe? Aisea? (Lisi upu ma fasifuaitau i luga o le laupapa a o ta’u mai e tamaiti. Tuu se avanoa i luga o le laupapa e fatu ai se lisi lona lua i se taimi mulimuli ane o le lesona.)
Fai i tamaiti e manatunatu lemu i fesili nei:
-
A faapea na e ola ai i Saraemila i le taimi lea, mata e faapefea ona e tali atu i faatinoga a Alema ma atalii o Mosaea?
Faaali le ata o le Liua o Alema le Itiiti (Tusi Ata o le Talalelei [2009], nu. 77). Fai i tamaiti e faitau lemu le Mosaea 27:11–13, o le tala lena o loo faaalia i le ata lea. Ona valaaulia lea o se tamaitiiti e faitau leotele le Mosaea 27:14. Fai i le vasega e vaavaai mo mafuaaga na ta’u mai e le agelu na afua ai ona sau ia Alema ma atalii o Mosaea.
-
O le a se mea o aoao mai e lenei fuaiupu pe mafai faapefea ona tatou fesoasoani i isi tagata o tauivi ma faigata? (Ia mautinoa ua malamalama tamaiti e tali mai le Alii i a tatou tatalo faamaoni mo isi. Atonu e te manao e tusi le mataupu faavae lea i luga o le laupapa ma fautuaina tamaiti e tusi i a latou tusitusiga paia i autafa o le Mosaea 27:14. Atonu foi e te manao e fautuaina i latou e faaopoopo i ai se mau faasino i le Iakopo 5:16. Ta’u i ai e tali mai le Alii i a tatou tatalo e le gata mo i latou o loo tauivi faaleagaga ae faapea foi i latou e i ai isi ituaiga luitau ma manaoga.)
-
O anafea na faia ai se eseesega i lou olaga ona o tatalo a se isi tagata?
-
O anafea na e lagonaina ai le faia o se eseesega i se olaga o se isi tagata ona o au tatalo?
Fautuaina tamaiti e tatalo pea mo isi. Molimau atu o le tala ia Alema le Itiiti ma atalii o Mosaea o le faamaoniga lea e faafofogaina e le Alii a tatou tatalo mo isi. Na te le faaleaogaina le faitalia o i latou o loo tatou tatalo ai, ae o le a Ia faafofoga mai i a tatou tatalo, ma o le a tali mai o Ia i Lana lava ala ma Lona lava taimi.
Fai i se tamaitiiti e sau i luma o le vasega ma faitau leotele le Mosaea 27:15–16. Faamatala o upu nei a le agelu ia Alema ma atalii o Mosaea. Faamamafa atu na fetalai mai le agelu “e pei o se leo o se faititili, sa luluina ai le eleele” (Mosaea 27:11).
-
O le a se mea ua faagaeetia ai oe i le mea sa faia ma fetalai mai ai le agelu? Aisea ua faagaeetia ai oe i lena mea?
Aotele le Mosaea 27:19–22 i le faamatala atu ina uma ona faasoa mai e le agelu lana savali, sa le mafai ona toe tautala ia Alema, ua vaivai, ma sa sii atu o ia ua le gaoioi i lona tama (tagai Mosaea 27:19). Ina ua faalogo le tama o Alema i le mea na tupu, sa ia “olioli aua sa iloa e ia o le mana lea o le Atua” (Mosaea 27:20). Sa ia faapotopoto i tagata “ina ia mafai ona latou molimauina le mea ua faia e le Alii i lona atalii” (Mosaea 27:21). Na ia faapotopoto foi faitaulaga, ma sa latou anapopogi ma tatalo mo lona atalii ina ia ona maua lona malosi ma ia mafai ona tautala (tagai Mosaea 27:22).
Mosaea 27:23–31
Ua salamo Alema le Itiiti ma ua toefanauina
Toe foi i le lisi o loo faamatalaina ai Alema ma atalii o Mosaea lea na e tusia i luga o le laupapa. Faaigoa le lisi lena i le Muamua. Tusi le Mulimuli i le isi itu o le laupapa. Valaaulia tamaiti e faitau le Mosaea 27:23–24, 28–29, ma vaavaai mo upu ma fasifuaitau o loo ta’u mai ai ua suia Alema. Tuu se avanoa i ni nai tamaiti e tusi ai upu ma fasifuaitau nei i luga o le laupapa.
-
E tusa ai ma le Mosaea 27:24 ma le 28, o le a le mea na fai e Alema na iu ai i lenei suiga? O le a le mea na fai e le Alii? A o tatou saili e suia ma mulimuli i le Faaola, aisea e taua ai le mea e tatau ona tatou faia? Aisea e taua ai ona malamalama i le mea o le a faia e le Alii mo i tatou?
-
E fesoasoani faapefea e le aoao i le aafiaga o Alema ona fesoasoani i se tasi ua manatu e le mafai ona faamagaloina o ia?
Valaaulia se tamaitiiti e faitau leotele le Mosaea 27:25–26. Fai i le vasega e faailoa mai le aoaoga faavae na aoao atu e le Alii ia Alema. (E ui atonu e faaaoga e tamaiti ni upu eseese, ae ia mautinoa ua latou malamalama o i tatou uma lava taitoatasi e tatau ona toefanauina e ala i le Togiola a Iesu Keriso. Atonu e te manao e tusi le upumoni lea i luga o le laupapa.)
Faamatala o le toefanauina o lona uiga ia faamatua’ia e le Agaga o le Alii se suiga tele i le loto o se tagata ina le toe manao lena tagata e fai le leaga ae ia manao e saili atu i mea a le Atua (tagai Mosaea 5:2).
Atonu foi e te manao e faamatala e ui ina sa vave ona tupu le suiga tele i le loto o Alema ma atalii o Mosaea, ae o le toatele lava o i tatou e suia malie e ala i le Togiola. O se faagasologa nai lo na o se mea e tupu. Ina ia fesoasoani ia malamalama lelei tamaiti i lenei aoaoga faavae, valaaulia se tasi o i latou e faitau le saunoaga lea a Peresitene Ezra Taft Benson:
“E tatau ona tatou faaeteete a o tatou saili ia avea atili i tatou e faapei o le Atua, ina ia aua nei o tatou atuatuvale ma le maua ai le faamoemoe. O le avea e faapei o Keriso o se taumafaiga e faia i le olaga atoa, ma e masani ona aafia ai le tuputupu ae ma le suia lena e oo mai lemu ma faifai malie. Ua tusia i tusitusiga paia ni tala maoae e uiga i tagata o e na matua liua o latou olaga, i lena lava taimi e pei o: Alema le Itiiti, o Paulo i le ala i Tamaseko, o Enosa na tatalo seia oo i le leva o le po, o le Tupu o Lamonae. O ia faataitaiga ofoofogia o le mana e liua ai, e oo lava i e ua i ai i le loloto o le agasala, e maua le talitonu mautinoa e mafai e le Togiola ona aapa atu i e ua matua atuatuvale lava.
“Ae e tatau ona tatou faaeteete pe a tatou talanoaina nei faataitaiga ofoofogia. E ui ina moni ma mamana, ae e tulagaese nai lo mea e masani ai. Aua o Paulo uma, o Enosa uma, ma Tupu Lamonae uma, e fiaselau ma fiaafe tagata ua manatu e maaleale tele le faagasologa o le salamo, ma tauleiloa. O lea aso ma lea aso latou te latalata atili atu ai i le Alii, ma lo latou le iloaina o loo latou fausia se olaga faaleatua. Latou te ola i ni olaga e le leoa o le agalelei, auauna atu, ma tautinoga” (“O Se Liua Maoae o le Loto,” Ensign, Oke. 1990, 7).
A uma ona faasoa tamaiti i mea sa latou aoaoina mai lenei saunoaga, valaaulia i latou e faaaoga ni nai minute e tali ai se tasi o fesili nei i a latou api talaaga mo le suesueina o tusitusiga paia. (Atonu e te manao e tusi fesili nei i luga o le laupapa a o lei amataina le vasega, saunia se tufaaga e i ai fesili, pe faitau malie atu fesili ina ia mafai e tamaiti ona tusi i a latou api talaaga mo le suesueina o tusitusiga paia.
-
Pe na suia ea oe e ala i le Togiola a o e salamo ma faia le mea sili e te mulimuli ai i le Faaola?
-
O le a se mea se tasi e mafai ona e faia ina ia e sau atoatoa ai i le Alii ina ia mafai ai ona e suia e ala i le Togiola?
Valaaulia ni nai tamaiti e faasoa mai mea sa latou tusia ma faamatala e uiga i le suia e mafai ona tupu ia i tatou pe a tatou salamo ma faaaoga le faatuatua ia Iesu Keriso ma Lana Togiola. (Faamanatu i tamaiti latou te le tau faasoa maia se mea e le faalauaiteleina. Ia mautinoa ua latou malamalama e le tatau ona latou talanoa e uiga i a latou agasala ua tuanai.)
Mosaea 27:32–37
Na faimalaga solo Alema le Itiiti ma atalii o Mosaea i le laueleele, ma taumafai e toe faalelei manu’aga na latou faia ma faamalosia le Ekalesia.
Faamatala o le salamo moni o se suiga lea o le loto, e le na o se naunau e tuu se mea sese. Valaaulia se tamaitiiti e faitau leotele le Mosaea 27:32–37. Fai i le vasega e faailoa mai mea na fai e Alema ma atalii o Mosaea na sili mamao atu i le na o le tuu o mea sese sa latou faia.
-
O a faamaoniga ua e vaaia ia Alema ma atalii o Mosaea e iloa ai ua suia moni?
-
O le a se mea e mafai ona tatou aoao mai i a latou faataitaiga?
O tali a tamaiti e mafai ona aofia ai mea nei:
E oo lava ia i latou o e fouvale i le Alii ma Ana aoaoga e mafai ona faamagaloina.
Ina ia salamo moni, e tatau i se tagata ona faia mea uma e mafai e faaleleia ai se faaletonu sa ia faia. (E mafai ona e faamatala i ai o nisi taimi tatou te faaaogaina ai le upu toetotogi e faasino ai i le faatinoga o le faaleleia o se faaletonu na faia ma le faasa’oga o a tatou filifiliga faavalevalea.)
O le Togiola a Iesu Keriso, e mafai ai ona tatou suia i se tulaga o le amiotonu.
Faaiu i le molimau atu o le tala ia Alema ma atalii o Mosaea o se faataitaiga lea o le mana o le Togiola a Iesu Keriso e suia ai i tatou. Molimau atu i le finagalo o le Faaola e faamagalo tagata uma, o e faapei o nei taulelea, e faatuatua ia te Ia ma saili e mulimuli ia te Ia.
Tala ma Faamatalaga o Talaaga
Mosaea 27:25. Toe fanaufouina
Na faamatala e Elder David A. Bednar o le Korama a Aposetolo e Toasefululua le faagasologa o le toefanauina:
“Tatou te amataina le faagasologa o le toefuataiina e ala i le faatuatua ia Keriso, salamo ia tatou agasala, ma papatisoina e ala i le faatofuina mo le faamagaloga o agasala, e se tasi o i ai le pule o le perisitua.
“… A mavae ona tatou o a’e mai i le vai o le papatisoga; e manaomia e o tatou agaga ona faatofu ai pea lava pea ma faatumu i le upumoni ma le malamalama o le Talalelei a le Faaola. O se loiloi i nisi taimi ma le papa’u i aoaoga faavae a Keriso ma le auai faaafaafa i Lana Ekalesia toefuataiina e le mafai ona fua mai ai le liua faaleagaga lea e mafai ai ona tatou savavali i le ola toefuataiina. Ae o le faamaoni i feagaiga, tumau i tautinoga, ma le ofoina atu o o tatou agaga atoatoa i le Atua e manaomia pe afai tatou te fia mauaina faamanuiaga faavavau.
“O le faatofuina atoatoa ma faatumu ai i le talalelei a le Faaola, o laasaga taua ia o le toefanauina. (“E Ao Ina Toe Fanau Mai Outou,” Ensign po o le Liahona, Me 2007, 21).
Na faamalamalama mai foi e Elder Bruce R. McConkie o le Korama a Aposetolo e Toasefululua:
“E toefanauina i tatou pe a tatou oti e tusa ai ma le amioletonu ma pe a tatou ola e tusa ai ma mea o le Agaga. Ae e le tupu i se taimi vave, faafuasei. O le toefanauina … o se faagasologa. O le toefanauina o se mea e faifai malie, vagana ai i nai taimi ma’oti ia e matua faavavega lava ma ua tusia ai i tusitusiga paia. E tusa ai ma le aoao tetele o tagata o le Ekalesia, e toefanauina auauai i tatou, ma e toefanauina i tatou i se malamalama faaopoopo ma se iloa faaopoopo ma ni manaoga faaopoopo mo le amiotonu a o tatou tausia poloaiga. …
“I le avea ai ma tagata o le Ekalesia, ua tatou fuafuaina se ala e tau atu i le ola e faavavau; afai tatou te amataina le faagasologa o le toefanauina faaleagaga, ma tatou agai i le itu sa’o; a tatou fuafuaina se ala o le faamamaina o o tatou agaga, o sia mea ma sia mea tatou te o ai i lena itu; afai tatou te fuafuaina se ala o le avea ma tagata e atoatoa, ma, o lea laasaga ma lea laasaga o le vaega ma lea vaega, e faaatoatoaina ai o tatou agaga ma faatoilaloina le lalolagi, ona matua mautinoa lava lea —e leai se fesili i lena mea—o le a tatou maua le ola e faavavau. E ui o loo i ai le toefanauina faaleagaga o i tatou o loo lupe, o le faaatoatoaina o i o tatou luma, o le faamamaina atoatoa o i o tatou luma, afai tatou te fuafuaina se ala ma mulimuli ai i le mea sili tatou te mafaia i lenei olaga, a oo la i le taimi tatou te tuua ai lenei olaga, o le a tatou faaauau ai pea lava i lena lava ala e tasi” (“Jesus Christ and Him Crucified, ” Brigham Young University 1976 Speeches, Sept. 5, 1976, 5–6, speeches.byu.edu).